Ilo Wãwen Et Eo Jesus Christ Ej Jelet Yuk?
KIN katak eo jaar etale lok iman, emaroñ ke wõr unin ad bere bwe katakin ko an Jesus rar lukkun jelet armij ro ibelakin lal? Bõtab, kajitõk eo eaorõk ñan kij ej, “Ilo wãwen et eo nan in katakin ko an Jesus rej jelet ña make?”
Nan in katakin ko an Jesus rar koba katak ko kin men ko reinjuõn jen don. Tokjen ko raorõk jen katak kein remaroñ jelet mour eo ad ilo wãwen otemjej. Jen etale kin ta eo Jesus ear katakin kij kin ta men ko raorõk jej aikwij jibadõki mokta im kaddek juõn jimjera ibben Anij.
Jibadõk Mokta Men Ko Ewõr Tokjeir ilo Mour
Lal in elukkun boub rainin ej bõk elap ien im kajur ko ad im ej kamad kij jen ad kabwe aikwij ko ad ilo jitõb. Lemnak mõk kin juõn emaan 20 jima an yiõ etan Jerry. Meñe Jerry ej mõnõnõ in bwebwenato kin katak ko ilo Bible im tokjen ko ej bõki jeni, ej ba ilo buromõj: “Ejabwe ien ibba ñan bwebwenato kin men kein aolep ien. Ij jerbal jiljino ran ilo juõn week. Sunday ej ran eo wõt ij kakije. Im elikin aõ lale aolep men ko ij aikwij kõmmani, Ilukkun mõk.” Elañe kwoj bed ilo ejja abañ in wõt, kwomaroñ bõk tokjen jen men eo Jesus ear katakin kake ilo Katak eo an ion Tol eo.
Jesus ear ba ñan armij ro rar kwelok ibben ñan roñjake e: “Komin jab inebata buruemi kin ami mour, ta eo kom naj mõña, ak ta eo kom naj irak; im bareinwõt kin enbwinemi, ta kom naj balle. Mour e jab lap jen ekõn ke, im enbwin e jab aurõk jen balle ke? Komin kalimjeke bao ko i mejatoto, bwe re jab jeor ak marmir ak aini na iloan imõn ekõn, im Jememiuij i lõñ Ej najirik ir. Kom jab aurõk jen ir ke? . . . Inem komin jab inebata buruemi im ba, Ta je naj mõña? Ak ta je naj irak? Ak e naj kijkan ar balle? Bwe ro dri ailiñ ko rej bukõt men kein otemjej; bwe Jememiuij i lõñ E jela ami aikwij men kein otemjej. Komin bukot mokta ailiñ in Anij, im kwojarjar eo An; im naj koorlok men kein otemjej ñõn kom.” (Matu 6:25-33) Ta eo jej katak jen nan kein?
Jesus ear jab ba bwe jej aikwij jerwane aikwij ko ad ilo kanniek im ko an ro uan family eo ad. Bõtab, Jesus ear kallimur bwe elañe jej bukõt mokta men ko relijeklok im bukõt mokta men ko lor jitõb, Anij enaj kabwe men ko jet jej aikwiji. Men eo jej katak jen nan kein an Jesus ej bwe jen likit men ko relijeklok mõkta ilo mour eo ad. Elañe jej lor nan in kakabilek in enaj tellok ñan mõnõnõ, kinke “emõnõnõ ro rej lemnak kin aikwij eo air ilo jitõb.”—Matthew 5:3, New World Translation.
Ejaak Jimjera Eo Ad Ibben Anij
Ro rej lemnak kin aikwij ko air ilo jitõb rej kile aorõkin air ejaak juõn jimjera emõn ibben Anij. Ewi wãwen ad maroñ ejaak juõn kõtan emõn ibben juõn armij? Ewi wãwen ad maroñ kalaplok ad jelã kin armij eo? Jej aikwij bõk ien ñan katak kin lemnak ko, maroñ ko, tõbrak ko, im men ko ekõnan im jab kõnan. Jej aikwij kõmman eindein ñe jej ejaak jimjera eo ad ibben Anij. Jej aikwij bõk jelãlokjen eo ejejjet kin e. Ke ear jar ñan Anij kin ri kalor ro an, Jesus ear ba: “Men in mour indrio bwe ren jela Kwe juõn wõt Anij emol, im Jisõs Kraist, eo Kw’ar jilkintok.” (Jon 17:3) Aet, ejaak juõn jimjera ebak ñan Anij ej tellokin bwe jen jelã kajjen. Wãwen eo wõt jemaroñ bõk jelãlokjen in ej ilo Nan in Kakõrmol eo an Anij, Bible eo. (2 Timote 3:16) Jej aikwij karõk ien ñan katak Bible.
Bõtab, jelãlokjen wõt ejabwe. Ilo ejja jar eo wõt, Jesus ear ba: “(Ri kalor ro an) r’ar kejbãrok Am in nan.” (Jon 17:6) Jej aikwij jab bõk jelãlokjen eo an Anij wõt ak bareinwõt jej aikwij mour ekkar ñan jelãlokjen eo an. Ewõr ke bar juõn wãwen jemaroñ jeraik Anij? Jemaroñ ke kaddeklok jimjera eo ad ibben jabrewõt armij elañe jej emmakit ilo jelã ilo juõn wãwen ejõkkar ñan lemnak im kien ko an? Inem, lemnak im kien ko an Anij, rej aikwij tel kij ilo wãwen otemjej ilo mour eo ad.
Kwomaroñ Bõk Tokjen Jen Katakin ko Otemjej an Jesus
Katakin ko an Jesus ej kab mwij ad bwebwenato kaki rej aibujuij, lamwan, im kajur. Armij ro remaroñ bõk tokjeir ilo air katak jen katakin ko an im jerbali ilo mour eo air.
Ri Kennan ro an Jehovah ilo bukwon eo am renaj mõnõnõ in jibañ yuk ñan lale wãwen am maroñ bõk tokjen jen katakin ko remeletlet otem meletlet armij ro rar konono kaki. Kimij kir kom ñan kebak ir.
[Pija eo ilo peij 5]
“Jememiuij i lõñ ej najirik ir”