‘Nõbar Jeova!’​—Etke?

1-3. (1) Ñããt eo kar je Sam 147? (2) Ta eo jemaroñ katak jãn ad etale Sam 147?

EKKÃ ad nõbare juon armej ñe ear em̦m̦an an kõm̦m̦ane juon jerbal, ak kõn an kwal̦o̦k wãween ko rem̦m̦an ippãn juon Kũrjin. El̦aññe jej kõm̦m̦ane men in ñan ro jet, eokwe l̦õmn̦ak m̦õk kõn ewi joñan an aikuj l̦apl̦o̦k ad nõbar Jeova Anij! Jemaroñ nõbare kõn an lukkuun kajoor ãinwõt an alikkar ilo menin kõm̦anm̦an ko an. Bareinwõt kõn an l̦ap an yokwe im em̦m̦an an kõm̦m̦an ñan kõj, im ej alikkar men in ke ekar jilkintok Nejin eo ej make wõt bwe en mej kõn kõj.

² Eo ear je Sam 147 ear em̦m̦akũt im nõbar Jeova. Ear bareinwõt rõjañ ro jet bwe ren kobal̦o̦k ippãn im nõbar Anij.​—Riit Sam 147:1, 7, 12, UBS.

³ Jejjab jel̦ã wõn eo ear je sam in, ak bõlen eo ear je emaroñ kar mour ilo tõre eo ke Jeova ear kõjepl̦aak RiIsrael ro ñan Jerusalem, im kanemkwõj er jãn aer jipo̦kwe ilo Babil̦on. (Sam 147:2, UBS) Rijeje sam in ear em̦m̦akũt im nõbar Jeova kõn an kar kõjepl̦aak armej ro an ñan ijo jikier bwe ren bar kabuñ ñan E. Im ekar bar kwal̦o̦k un ko jet unin ad aikuj nõbar Jeova. Ta jet iaan un kein? Im ta jet iaan un ko unin am̦ aikuj lam̦õj im ba “Alleluya!,” ak ‘Nõbar Jeova!’?​—Sam 147:1, UBS.

JEOVA EJ KAENÕM̦M̦AN RO ERUP BŨRUEER

4. Ta kar eñjake eo an RiIsrael ro ke Kiiñ Sairõs ear kanemkwõj er jãn aer jipo̦kwe, im etke?

⁴ Pijaikl̦o̦k m̦õk wãween an kar RiIsrael ro eñjake ke rar jipo̦kwe ilo Babil̦on. Ro rar kajipo̦kweik er rar kõm̦m̦an kõjak kake er im ba: “Kom̦win al ñan kõm juon al kõn Zaion.” Ilo tõrein, em̦õj aer ko̦kkure Jerusalem, ijo me el̦ap aer kar m̦õn̦õn̦õ im kabuñ ñan Jeova ie. (Sam 137:1-3, 6, UBS) Kõn an kar rup bũrueer, RiJu ro rar jab kõn̦aan al im rar aikuj bõk kaenõm̦m̦an. Bõtab ear m̦ool kanaan eo an Anij ke Sairõs, kiiñ in Põrsia eo ear kanemkwõj armej rein. Ear anjo̦ ioon Babil̦on im ba: “Jeova . . . Ear jiroñ eõ bwe in kalõk ñan E juon em̦ i Jerusalem . . . Jabdewõt eo ej ippemi iaan ro riaelõñ An otemjej, Jeova Anij eo an En ippãn, im en wanlõñl̦o̦k wõt.” (2 Kr. 36:23) Naan kein remaroñ kar lukkuun kaenõm̦m̦an RiIsrael rein me rar pãd ilo Babil̦on!

5. Ta eo rijeje sam ear ba kõn an Anij kajoor im maroñ kaenõm̦m̦an kõj?

⁵ Jeova ear jab baj lel̦o̦k wõt kaenõm̦m̦an ñan RiIsrael ro ãinwõt juon kumi, ak ear bar lel̦o̦k kaenõm̦m̦an ñan kajjojo iaaer. Ej bar wal̦o̦k men in ilo raan kein. Rijeje sam ear ba kõn Anij: “Ej kaenõm̦m̦an ro erup bũrueer, im ej kori kinej ko kinjaer.” (Sam 147:3, UBS) Alikkar bwe Jeova ej bar lukkuun kea kõn ro rej iioon apañ im rej bũrom̦õj. Ilo raan kein, Jeova elukkuun kõn̦aan kaenõm̦m̦an kõj ñe jej bũrom̦õj. (Sam 34:18; Ais. 57:15) Ej letok mãlõtlõt im ej kõkajoor kõj bwe jen maroñ kijenmej ium̦win apañ ko jej iiooni.​—Jem. 1:5.

6. Ewi wãween ad maroñ bõk tokjãn jãn naan ko an rijeje sam ilo Sam 147:4? (Lale pija eo ilo jinoin katak in.)

⁶ Rijeje sam ear reilõñl̦o̦k im lale lañ im ba bwe Jeova ej “bwine oran iju ko, im ej n̦aetan kajjojo iaaer.” (Sam 147:4, UBS) Etke rijeje sam ear kiiõ jino kõnnaan kõn men ko ilañ? Eokwe l̦õmn̦ak kõn men in. Rijeje sam ear reilõñl̦o̦k im lali iju ko ilañ, ak ear jab jel̦ã ñan jidik jete oraer. Ilo raan kein, rũmmãlõtlõt ro rejel̦ã bwe ewõr pilien kurub in iju me lal̦ in ej pãd ie (Milky Way galaxy). Im emaroñ bar wõr pilien im pilien kurub in iju ko jet (galaxy)! Armej rejjab maroñ bwini oran iju ko ilañ ak Rũkõm̦anm̦an eo ad wõt emaroñ. Ilo m̦ool, joñan an jel̦ã kõn aolep iju kein em̦õj an lel̦o̦k etaer kajjojo. (1 Ko. 15:41, UBS) Anij, eo im ejel̦ã kõn aolep iju kein, ebar jel̦ã kajjiem̦. Aolep iien ejel̦ã ia eo kwõj pãd ie, kõn eñjake ko am̦, im ta ko kwõj aikuji!

7, 8. (1) Ta eo Jeova emel̦el̦e kõn kõj? (2) Kwal̦o̦k juon waanjoñak kõn wãween an Jeova kwal̦o̦k an tũriam̦o.

⁷ Jeova ejjab baj kwal̦o̦k wõt an itoklimo kake eok, ak ebar ewõr an kajoor im maroñ ñan jipañ eok kõn apañ ko kwõj iiooni ilo mour eo am̦. (Riit Sam 147:5, UBS.) Bõlen kwõmaroñ l̦õmn̦ak bwe wãween eo kwõj iioone el̦ap an pen im kwõjjab maroñ kõm̦adm̦õde. Ak Anij emel̦el̦e kõn joñan maroñ ko ad, im “ej keememej bwe kõj bũñalñal.” (Sam 103:14, UBS) Jãn iien ñan iien, jej kõm̦m̦an bõd kõnke jejjab weeppãn. Im el̦ap ad bũrom̦õj im ajl̦o̦k kõn men ko jej ba, kõn̦aan ko ad me rejjab jim̦we, im l̦õmn̦ak ko renana ãinwõt ebbanbane ro jet! Ejjel̦o̦k an Jeova m̦õjn̦o̦ im ejjab kõm̦m̦an likjab, bõtab el̦ap an mel̦el̦e kõn eñjake ko ad.​—Ais. 40:28, UBS.

⁸ Bõlen em̦õj am̦ lo an Jeova jipañ eok bwe en dikl̦o̦k am̦ bũrom̦õj kõn apañ ko reppen kwaar iiooni. (Ais. 41:10, 13) Ñan waanjoñak, juon jeid im jatid bainier etan Kyoko, ear lukkuun ebbeer im bũrom̦õj ãlikin an kar em̦m̦akũt ñan juon jikin im kõm̦m̦ane juon jerbal ekããl ilo doulul in. Ewi wãween an kar Jeova kwal̦o̦k bwe emel̦el̦e kõn eñjake ko an kõrã in? Ilo eklejia eo an ekããl, ekar wõr ro me relukkuun bar mel̦el̦e kõn eñjake ko an. Ear kile bwe ej ãinwõt ñe Jeova ej ba ñane: “Ij yokwe eok, ejjab kõnke kwõj juon bainier, ak kõnke nejũ kwe im em̦õj am̦ kallim̦ur bwe kwõnaaj jerbal ñan ña. Ikõn̦aan bwe kwõn m̦õn̦õn̦õ ilo mour n̦e am̦ ãinwõt juon iaan Ri Kõnnaan ro aõ!” Ewi wãween an kar Jeova kwal̦o̦k ñan kwe bwe joñan jel̦ãl̦o̦kjen̦ eo an elukkuun l̦ap?

JEOVA EJ KABWE AIKUJ KO AD

9, 10. Ta wãween eo eaorõktata Jeova enaaj jipañ kõj kake? Jouj im kwal̦o̦k juon waanjoñak.

⁹ Kõj aolep jej aikuji men ko ãinwõt m̦õñã, nuknuk, im jikin ad jokwe. Bõlen kwõmaroñ inepata kõn an naaj jabwe kijõm̦ m̦õñã. Bõtab, Jeova ear kõm̦m̦ane lal̦ in bwe en kabwe m̦õñã ñan aolep armej im bareinwõt ñan “koon in bao reven ko ñe rej jañ.” (Riit Sam 147:8, 9, UBS.) El̦aññe Jeova ej wõnm̦aanl̦o̦k im naajdik bao reven ko, kwõmaroñ lõke bwe enaaj bar kabwe aikuj ko am̦.​—Sam 37:25, UBS.

¹⁰ Men eo eaorõktata, ej bwe Jeova ej letok men ko jej aikuji bwe tõmak eo ad en kajoor wõt, im ej letok ‘aenõm̦m̦an eo jãne, eo ej el̦l̦ã jãn jel̦ã otemjej.’ (Pil. 4:6, 7) L̦õmn̦ak kõn waanjoñak eo an Mutsuo im kõrã eo pãleen me rar lo an Jeova jipañ erro ke ear wal̦o̦k n̦o ko rel̦l̦ap ilo Jepaan ilo kar 2011 eo. Ilo iien in, erro ar ko jãn n̦o ko im wanlõñl̦o̦k ñan bõrwajin m̦weo m̦weerro. Bõtab ilo raan eo, ear jako enañin aolep men ko m̦weieerro. Boñõn eo, rar pãd ilowaan juon ruum̦ emarok im m̦õl̦o me ej pãd ilo teek eo kein karuo. Jibboñõnin raan eo juon, erro ar pukoti jet iaan bok ko ad me remaroñ kõkajoor erro. Im bok eo de eo erro ar loe ej Yearbook eo an 2006. Ke Mutsuo ear ãlõke peij ko ilo bok in, ear loe juon iaan taitõl̦ ko rej ba “The Deadliest Tsunamis Ever Recorded.” Bwebwenato in ej kwal̦o̦k kõn m̦akũtkũt lal̦ eo ear wal̦o̦k ilo Sumatra ilo 2004 eo, me ear kõm̦m̦an bwe en wal̦o̦k n̦o ko rel̦l̦aptata me ej kab wõr ilo bwebwenato. Mutsuo im kõrã eo pãleen rar jañ ke erro ar riiti bwebwenato ko an ro jeid im jatid. Erro ar kile an Anij yokwe im kea kake erro ilo an kar lel̦o̦k naanin kõkajoor kein me erro ar lukkuun aikuji. Bareinwõt, Jeova ear lel̦o̦k im kabwe aikuj ko jet aerro. Ro jeier im jatier ilo tõmak jãn jikin ko jet ilo Jepaan rar lel̦o̦k kijeero m̦õñã im aer nuknuk. Bõtab, men eo el̦aptata an kar kõkajoore erro ej ikijjeen em̦m̦aan ro me doulul in an Anij ear jilkinl̦o̦k er ñan lol̦o̦k eklejia eo aer. Mutsuo ej ba: “Iar kile bwe Jeova ej pãd iturim kajjojo im lale kõm. Im men in ear l̦ap an kaenõm̦m̦an kõm!” Anij ej letok m̦okta men ko jej aikuji ñan kõkajoor tõmak eo ad, im tokãlik ej letok im kabwe aikuj ko jet ad.

BÕK TOKJÃN JÃN JIPAÑ EO AN ANIJ

11. Ta eo jej aikuj kõm̦m̦ane bwe jen maroñ bõk tokjãn jãn jipañ eo an Anij?

¹¹ Aolep iien Jeova epojak in jipañ im “kõjerkak ro ettã bũrueer.” (Sam 147:6) Ak ewi wãween ad maroñ bõk tokjãn jãn an pojak in jipañ kõj? Eokwe, ej aikuj wõr juon ad kõtaan em̦m̦an ippãn Jeova. Im ñan ad maroñ kõm̦m̦ane men in ej aikuj ettã bũruod. (Zp. 2:3) Ro ettã bũrueer rej lõke im kõttar wõt an Jeova kajim̦we jabdewõt wãween ko rejjab jim̦we, im aolep men ko rej kaeñtaan er. Im el̦ap an Jeova m̦õn̦õn̦õ im buñbũruon ippãn rein.

12, 13. (1) Bwe jen bõk tokjãn jãn jipañ eo an Anij, ta eo jejjab aikuj kõm̦m̦ane? (2) Wõn ro me Jeova ej buñbũruon ippãer?

¹² Bõtab, Anij ej “kõttãik ñan bwidej ro renana.” (Sam 147:6) Jejjab kõn̦aan bwe men in en wal̦o̦k ñan kõj! Jekõn̦aan bwe Anij en kwal̦o̦k yokwe eo an ñan kõj. Kõn men in, jej aikuj diki men ko ej diki. (Sam 97:10) Ñan waanjoñak, jej aikuj in dike mourin l̦õñ. Mel̦el̦ein men in bwe jej aikuj kõjparok kõj jãn jabdewõt wãween ko renaaj tõll̦o̦k kõj bwe jen kõm̦m̦ani men ko renana, ãinwõt alwõji pija ko rettoon. (Sam 119:37, UBS; Matu 5:28) Men in emaroñ lukkuun pen, bõtab Jeova enaaj kõjeraam̦m̦an kõj kõn ad lukkuun kate kõj.

¹³ Bwe jen maroñ lo tõprak ilo ad kõjparok kõj jãn men ko renana, jej aikuj atartar ioon Jeova im jab atartar iood make. Jeova enaaj ke m̦õn̦õn̦õ ñe jej lõke kõj make ak kappok jipañ ippãn ro jet? Alikkar bwe eban! Jeova ejjab “buñbũruon kõn o̦o̦j ko rekajoor, im bareinwõt kõn rũttarin̦ae ro reperan.” (Sam 147:10, UBS) Ijello̦kun ad kappok jipañ ippãn ro jet im lõke kõj make, jej aikuj kepaake Jeova ilo ad jar ñane im akwel̦ap bwe en jipañ kõj. Jeova ejjab ãinwõt rũkakapilõk ro an lal̦ in kõnke emaroñ lõñ alen ad kajjitõk jipañ ippãn, ak eban m̦õk im ñati kajjitõk ko ad. Jeova “ebuñbũruon ippãn ro rej kautieje, im ippãn ro rej lõke jouj im yokwe eo an el̦ap.” (Sam 147:11, UBS) Innem jemaroñ lõke bwe kõn an tiljek im yokwe kõj, enaaj wõnm̦aanl̦o̦k wõt im jipañ kõj bwe jen anjo̦ ioon kõn̦aan ko ad rebõd.

14. Ta eo rijeje sam ear lukkuun lõke?

¹⁴ Jeova ej kallim̦uri kõj bwe enaaj jipañ armej ro an ñe rej pãd ilo aikuj. Ke rijeje sam ear l̦õmn̦ak kõn an kar Jeova jipañ RiIsrael ro bwe ren jepl̦aak ñan Jerusalem, ear al im ba: “Ej kapen aor ko am̦; Ej kõjeraam̦m̦an armej ro am̦ im Ej waje tõrerein aelõñ eo am̦.” (Sam 147:13, 14, UBS) Ke rijeje sam ear jel̦ã bwe Jeova enaaj kapen wõrwõr ko an Jerusalem, men in ear kaenõm̦m̦ane im kõm̦m̦an bwe en lõke bwe Jeova enaaj kõjparok armej ro an.

15-17. (1) Jet iien ñe jej iioon wãween ko reppen ta eñjake eo ad, ak ewi wãween an Jeova kõjerbal Naan eo an ñan jipañ kõj? (2) Kwal̦o̦k juon waanjoñak kõn wãween an Naanin Anij ‘m̦õkaj’ im jipañ kõj.

¹⁵ Kwõmaroñ inepata kõn apañ ko kwõj iiooni, bõtab Jeova emaroñ lewaj mãlõtlõt bwe kwõn jel̦ã kijenmej kõn apañ ko kwõj iiooni. Rijeje sam ear ba bwe Anij “ej kwal̦o̦k juon an naanin jiroñ, im em̦õkaj an itok ñan lal̦.” Innem ear bar kõnono kõn jin̦o, aij, im aij dekã ko rej wõtlo̦k im ba bwe ‘ejjel̦o̦k emaroñ pãd ilo m̦õl̦o eo an.’ Bareinwõt ear ba bwe Jeova ej jilkinl̦o̦k naan eo an im kõm̦m̦an bwe men kein ren õnl̦o̦k. (Sam 147:15-18, UBS) Kõn men in, Anij eo ad me ejel̦ã im emaroñe men otemjej, eo im ej kõm̦m̦an bwe en wõr jin̦o im aij, emaroñ bar jipañ eok bwe kwõn anjo̦ ioon jabdewõt wãween ko reppen.

¹⁶ Ilo raan kein, Jeova ej tõl kõj ikijjeen Naan eo an. Im naan ko an ‘rem̦õkaj,’ mel̦el̦ein bwe Jeova epojak jabdewõt iien ñan letok naanin tõl ko ñan kõj ñe jej aikuji. L̦õmn̦ak m̦õk kõn tokjãn ko kwõj bũki jãn am̦ riit Baibõl̦, etale bok ko “rũkarejar etiljek im mãlõtlõt” ej litok, alwõji Broadcast ko an doulul in, etal ñan Weep jait eo ad, kõnono ippãn em̦m̦aan ro rej lale eklejia, im am̦ kobal̦o̦k ippãn ro jeim̦ im jatũm̦ ilo eklejia eo. (Matu 24:45) Em̦õj ke am̦ kile an m̦õkaj an Jeova jipañ im tõl eok ilo mour n̦e am̦?

¹⁷ Juon jeid im jatid etan Simone ear lo wãween an kar Naanin Anij jipañe. Ear l̦õmn̦ak bwe ejjel̦o̦k tokjãn im bwe Anij ejjab buñbũruon ippãn. Bõtab, ke ear jino ebbeer, ear jab bõjrak an jar ñan Jeova bwe en jipañe. Ear bar poub im jab bõjrak jãn an katak Baibõl̦ ippãn make. Ej ba: “Ejjañin kar wõr juon iien me iar kile bwe Jeova ear jab kõkajoor eõ im tõl eõ.” Wãween in ear jipañ wõt e bwe en bõk l̦õmn̦ak ko rejim̦we.

18. Etke kwõjel̦ã bwe Jeova ej m̦õn̦õn̦õ ippam̦, im ta un ko unin am̦ kõn̦aan ‘Nõbar Jeova’?

¹⁸ Rijeje sam ear jel̦ã bwe ibwiljin aolep aelõñ ko ilo lal̦, Jeova ear kããlõt aelõñin Israel bwe ren armej ro an. Kar aelõñ eo de in me Anij ear lel̦o̦k “kien ko An im ekajet ko An” ñan er. (Riit Sam 147:19, 20.) Rainin, el̦ap ad jeraam̦m̦an bwe iaan aolep armej ro ilo lal̦ in kõj wõt jej bõk ãt eo etan Anij. El̦ap ad m̦õn̦õn̦õ kõnke jejel̦ã kajjien, im em̦õj an letok Naan eo an bwe en tõl kõj, im jemaroñ ejaake juon kõtaan epaak ippãn. Ãinwõt eo ear je Sam 147, elukkuun lõñ un ko unin ad aikuj ‘Nõbar Jeova’ im rõjañ ro jet bwe ren bar nõbare.