Remaroñ Lo Bwe Jej Einjuõn
1 Yiõ eo lok, elõñlok jen 300,000 ro rekãl rar koba ibbed ilo air baptais. Ta eo armij rein rar lo ibben Ri Kennan ro an Jehovah me ear kamakit ir ñan air kõnan bwe ren mõttan dolul eo an Anij? Etke ej alikar ad oktak jen aolep kabuñ ko jet? Ijin ej jet uak ko ralikar:
—Jej eddeb ñan Bible eo elaplok jen lemnak ko ad make: Jej kabuñ ñan Jehovah Anij “ilo Jitõb im ilo mol,” einwõt Jesus Christ ear ba bwe jen kõmmane. Men in ear melelen bwe jen karmijete katak ko rewan an kabuñ im bokake Nan eo an Anij emwij jeje.—John 4:23, 24; 2 Tim. 3:15-17.
—Jej kebak armij im jab kõttar air kebak kij: Jaar bõk kakien eo an Christ ñan kwalok nan im ñan katakin, im jej kajeoñe wanjoñok eo an ñan bukõt ro emol burueir. Jej bukõt ir ilo moko imwiir, iturin ial, ak ilo jabdewõt jikin jemaroñ lo ir.—Mat. 9:35; 10:11; 28:19, 20; Jerbal 10:42.
—Jej lelok nan in kibel ko ilo Bible ñan aolep ilo ejelok wõnãn: Jej anemkwoj in kajerbal money im mweiuk ko ad im kajur eo ad, ñan jerbal elõñlok jen juõn billion awa ko kajjojo yiõ ilo jerbal eo an Anij. Ilo ejelok kalijeklok, jej katak Bible ibben jabdewõt armij.—Mat. 10:8; Jerbal 10:34, 35; Rev. 22:17.
—Emõn ad bõk kaminene ñan jibañ armij ilo jitõb: Ikijen katak eo ad make kin Bible im nan in kibel ko jej bõki ilo kwelok ko an congregation eo, assembly ko, im convention ko, jej bõk jelãlokjen in theocratic ejej uan an aorõk im ej wõnmanlok wõt, me ej kamaroñ kij ñan kameramlok ro jet ilo jitõb.—Ais. 54:13; 2 Tim. 2:15; 1 Pet. 3:15.
—Elap ad kaorõk mol eo, im jerbale ilo mour eo ad ran otemjej: Kin yokwe eo ad ñan Anij, jej kõmman oktak ko, im kaburukuk mour eo ad ibben ankil an. Kadkad ko rekãl kadkadid einwõt Christ rej kareel ro jet ñan mol eo.—Kol. 3:9, 10; Jem. 1:22, 25; 1 John 5:3.
—Jej kate kij ñan mour im jerbal ibben ro jet ilo ainemõn: Kaddek kadkad ko kadkadin Anij ej jibañ kij ñan kejbãrok makitkit im nan ko ad. Jej “kabukot ainemõn im lor e” ibben armij otemjej.—1 Pet. 3:10, 11; Ep. 4:1-3.
2 Wanjoñok ko kin mour in Christian eo ad me armij rej loi ilo dolul eo an Jehovah rej kamakit elõñ ñan bõk mol eo. Wanjoñok eo ad make en jelet ilo ejja wãwen eo wõt armij ro jej jelã kajjiir im rej kalimjek kij.