Organized to Do Jehovah’s Will
peij 21-31
Chapter 4
Ewi Wãwen Kar Karõk Im Tel Congregation Eo
RI JILEK Paul ilo letter eo an kein kajuõn ñan Ri Korint ro ear kwalok kin juõn mol eo eaorõk kin Anij ke ear je: “Bwe Anij e jab Anij in airwaro, a in ainemõn.” Inem ear wõnmanlok im kwalok kin kwelok ko an congregation eo, ear ba: “A ren kõmõn men otemjej ekar im ilo lajrõk.”—1 Kor. 14:33, 40.
Ilo jinoin ejja letter eo wõt, ri jilek Paul ear lelok nan in kauwe ñan Ri Korint ro kin jebel ko rar walok iloan congregation eo. Paul ear rejañ brother ro ñan air “konono einwõt juõn” im bwe ren “wãppenlok ilo juõn lemnok im juõn bebe.” (1 Kor. 1:10, 11) Inem ear lelok nan in kakabilek ko kin men ko jet me rar jelet burukuk eo an congregation eo. Ilo an kajerbal wanjoñok eo kin juõn enbwin, ear kwalok ilo alikar kin aikwij eo ñan air buru wõt juõn im jerbal ibben don. Kin un in, ear rejañ aolep ro ilo congregation in Christian, jekdon ta jerbal ko air, ñan air kwalok air yokwe don. (1 Kor. 12:12-26) Burukuk rot in ibwiljin ro uan congregation eo ej melelen ej aikwij wõr karõk ko rekwon.
Ak ewi wãwen naj karõk congregation in Christian? Wõn eo enaj karõke? Kain karõk rot renaj jerbal, im wõn ro renaj bõk eddo eo? Ilo ad kõtlok bwe Bible eo en tel kij, jenaj bõk uak ko ralikar ñan kajitõk kein.—1 Kor. 4:6.
KARÕKE EKKAR ÑAN WÃWEN IROIJ EO AN ANIJ
Congregation in Christian ear jutak ilo 33 C.E. ilo ran in kwojkwoj in Pentecost an Ri Jew ro. Ta eo jemaroñ katak kin congregation eo ilo ien eo? Kar karõke im tel e iumin iroij eo an Anij. Bwebwenato eo kin ta eo ear walok ilo Jerusalem enañin 2,000 yiõ ko remotlok ej lukkun kalikar bwe Anij eo ear kajutak congregation eo an Christian ri kabit ro. (Jerb. 2:1-47) Ear mweo imõn, family eo an. (1 Kor. 3:9; Ep. 2:19) Congregation in Christian eo an Anij rainin, eo ear laplok kinke kar kobaik “jar elap,” ej lor ejja wãwen eo wõt kar karõk im tel congregation eo ilo ebeben eo kein kajuõn.—Rev. 7:9, 10.
Congregation eo ilo ebeben eo kein kajuõn ear jino kin enañin 120 ro uair. Kar lutõklok jitõb kwojarjar ion rein mokta ilo jejjet in kitien kanan eo ilo Joel 2:28, 29. (Jerb. 2:16-18) Ak ilo ejja ran eo wõt, enañin 3,000 ro jet rar baptais ilo den im koba ibben congregation in ri kabit ro. Rar bõk nan eo kin Christ im “rej ber im bin ilo katak im komao iben dron an ro dri jilik.” Elikin men in, “Iroij ej kobaik na ibeir ro re naj mour, ilo ran otemjej.”—Jerb. 2:41, 42, 47.
Joñan an lap an orlok congregation in ri kabit ro ilo Jerusalem priest eo elap an Ri Jew ro ear aol im ba bwe ri kalor ro an Christ rar kobrak Jerusalem kin katak ko air. Ri kalor ro rekãl ilo Jerusalem ear koba elõñ priest ro, ro rar erom mõttan congregation eo.—Jerb. 5:28; 6:7.
Jesus ear ba: “Kom naj Aõ dri kennan ilo Jerusalem, im i aolepen Judia, im i Sameria, im ñõn eneo etolok tata i lõl.” (Jerb. 1:8) Im eñin men eo ear walok. Ke ear walok elap matõrtõr ilo Jerusalem elikin mij eo an Stephen, ri kalor ro me rar jokwe ijo rar jebliklik ilujen Judea im Samaria. Ak ilo jabdewõt jikin ko rar etal ie, rar wõnmanlok im keañ kin news eo emõn im kõmman ri kalor ro, ekoba jet jen ibwiljin Ri Samaria ro. (Jerb. 8:1-13) Im tokelik, ear wõr tõbrak in kwalok kin news eo emõn ibwiljin ri ailiñ ko rejjab Ri Jew im rejjab mwijmwij. (Jerb. 10:1-48) Jerbal in kwalok nan im kõmman elõñ ri kalor ro ear walok ilo an jutak elõñ congregation ko rekãl an Christian ilikin Jerusalem.—Jerb. 11:19-21; 14:21-23.
Ta karõk ko rar kõmman bwe kajjojo congregation ekãl kar karõke im tel e ilo wãwen iroij eo an Anij? Ikijen jerbal eo an jitõb eo an Anij, kar karõk bwe en wõr ri jibañ shepherd ro ñan lale bwij eo. Ilo congregation ko ijo Paul im Barnabas rar lolok ie ilo trip in missionary eo air kein kajuõn, rar jitõñ maan ro reritto bwe ren jerbal einwõt elder ro. (Jerb. 14:23) Jerbal katak 20 ej kwalok kin jet melele ko kin kwelok eo an ri jilek Paul ibben maan ro reritto ilo congregation eo ilo Ephesus. Paul ear ba ñan ir: “Inem komin kejbãrok kom im lale aolepen bwij eo Jitõb Kwojarjar e ar likit kom dri kaki ilo e, bwe komin najirik eklisia an Iroij, eo E ar wiaik kin bõtõktõk eo An.” (Jerb. 20:28) Maan rein rar ritto ilo men ko lor jitõb. Rar tellokiir bõk maroñ in kinke rar kajejjet aolep men in aikwij ko ekkar ñan Bible eo. (1 Tim. 3:1-7) Kar jitõñ Titus ri jerbal eo mõttan Paul bwe en kowãppen jet armij bwe ren elder ro ilo congregation ko ilo Crete.—Tait. 1:5.
Ke elõñlok congregation ko rar jutak, ri jilek ro im elder ro ilo Jerusalem rar wõnmanlok im jerbal einwõt overseer ro reutiej an congregation eo ibelakin lal ilo ebeben eo kein kajuõn. Rar jerbal einwõt governing body (kumi in ri tel ro) an aolepen congregation in Christian eo.
Ke ear jeje ñan congregation eo ilo Ephesus, ri jilek Paul ear kamelele bwe ilo air jerbal ibben jitõb eo an Anij, congregation in Christian eo emaroñ kejbãrok burukuk eo ikijen air tiljek ñan bõr eo an Jesus Christ. Paul ear rejañ Ri Christian ro ñan air kaddek ettã buru im ñan kejbãrok buru wõt juõn ilo air kamao ilo ainemõn ibben aolep ro uan congregation eo. (Ep. 4:1-6) Inem ear elij nan ko jen Sam 68:18 im jerbale ñan karõk eo an Jehovah kin maan ro reritto ilo jitõb im ewõr air maroñ me rej jerbal einwõt ri jilek ro, ri kanan ro, ri evanjel ro, shepherd ro, im ri kaki ro ñan air kabwe aikwij ko an congregation eo. Maan rein, einwõt men in letok ko jen Jehovah, rej kakajurlok jitõbõn aolepen congregation eo ilo buñburu eo an Anij.—Ep. 4:7-16.
CONGREGATION EO RAININ EJ LOR JOÑOK EO AN RI JILEK RO
Rainin aolep congregation ko an Ri Kennan ro an Jehovah rej lor ejja karõk eo wõt. Ibben don rej ejaak juõn congregation eburukuk ibelakin lal me ej bedbed ion kumi in ri kabit ro. (Zech. 8:23) Men in emaroñ walok kinke Jesus Christ ear kajejjet kitien kallimur eo an, ilo an tiljek in bed ibben ri kabit ri kalor ro an “ien otemjej ñõn jemlokõn lõl.” Ro rej erom mõttan congregation eo ej laplok wõt rainin rej mõnõnõ in bõk news eo emõn kin Anij, wujleplok aolepen air mour ñan Jehovah Anij ñan air kõmanman ankil an, im rej baptais einwõt ri kalor ro an Jesus Christ. (Mat. 28:19, 20; Mark 1:14; Jerb. 2:41) Rej kile “s̃eperd emõn,” Jesus Christ, einwõt Bõran ejjab ion ro uan ri kabit ro wõt ilo congregation eo ak bareinwõt ion aolepen bwij eo, ekoba “sheep ro jet.” (Jon 10:14, 16; Ep. 1:22, 23) Bwij in ej “juõn wõt bwij” kinke rej kejbãrok air burukuk ilo air kile bõr eo an Christ im bareinwõt ilo air kõttãik ir ñan “dri korijer e tiljkek im meletlet,” eo Christ ear jitõñe. Jen wõnmanlok im kwalok ad liki class in ri karejar in rainin.—Mat. 24:45.
KAJERBAL DOLUL KO ME KABUÑ EO EJ KAJUTAKI EKKAR ÑAN KIEN
Ilo ran kein eliktata an jukjuk im bed in enana, men ko mweien Master eo ear laplok ibelakin lal. Men in ear likit juõn eddo elap ion kumi in ‘ri karejar in etiljek.’ Ñan kajejjet eddo eo air ñan kabwe ekan ko lor jitõb ilo ien ekkar im ñan kwalok kin news eo emõn kin Ailiñ eo mokta jen an itok jemlokin, class in ri karejar in ear kajutak jet dolul ko me kien ko rej kile ir. Ealikar bwe ear ial in meletlet ñan air karõk jet dolul ko me kien ko an ailiñ ko jet rej kile kaki. Dolul kein an kabuñ ewõr air maroñ in kõmman im leto-letak Bible im book ko ibelakin lal ilo air kajerbale ilo jerbal in kwalok nan kin Ailiñ eo.
Dolul kein rej kajerbali wõt ñan kowõnmanlok men ko an kabuñ eo emol ilo lal in. Aolep dolul kein rej jerbal ibben don ñan jibañ jerbal in kwalok nan kin news eo emõn ibelakin lal. Rej lale aikwij ko ilo jitõb an aolepen congregation eo an Anij ilo mõttan ko otemjej ilo lal in.
WÃWEN KARÕK IN RA EO
Ñe rej kajutak juõn ra, rej jitõñ jilu ak elõñlok elder ro bwe ren ejaak juõn Branch Committee ñan lolorjake jerbal eo ilo ailiñ eo ak ailiñ ko iumin ra eo. Juõn ian uan committee eo ej jerbal einwõt jeban Branch Committee eo.
Congregation ko iumin kajjojo ra rej karõki ilo circuit ko, im elõñ circuit ko rej ejaak juõn district. Joñan kilepin circuit im district ko remaroñ oktak jen don, kinke ej wawa ion jikin eo rej bed ie im kajin ko im bareinwõt jete congregation ko kar karõki ñan ra eo. Rej karõk bwe juõn circuit overseer en jerbal ibben congregation ko ilo kajjojo circuit. Juõn district overseer ej lolok elõñ circuit ko, ej jerbal ilo circuit assembly ko, im ej jerbal ibben jet congregation ko, ekkã ibben circuit overseer eo. Eddo ko an overseer ro rej ito-itak rej walok jen ien ñan ien ilo Ad Jerbal Ñan Ailiñ Eo im bareinwõt letter ko ra eo ej jejelok ñan ir.
Aolep ilo dolul eo rej kile karõk in tel eo an Anij. Congregation ko rej kile im bokake karõk ko rej ñan tokjen eo an aolep. Rej mõnõnõ in bõk maan ro reritto kar jitõñ ir ñan lale jerbal ko ilo ra ko, district ko, circuit ko, im congregation ko. Rej reilok ñan “dri korijer e tiljek im meletlet” ñan bõk ekan ko lor jitõb ilo ien ekkar. ‘Ri karejar in etiljek’ rainin ej kõttãik e ñan bõr eo an Christ, bokake nan in kakabilek ko ilo Bible, im lor tel eo an jitõb kwojarjar. Ke aolep rej jerbal ibben don ilo burukuk, rej lo tokjen ko einlok wõt ko congregation ko ilo ebeben eo kein kajuõn rar iioni. Ilo Jerbal 16:5 ej jiroñ kij: “Inem eklisia ko rebinlok ilo tõmak, im orair e orlok ran otemjej.”
Chapter 5
Overseer Ro Rej Shepherd Bwij Eo
ILO ien eo ear kwalok nan ion lal, Jesus emol an kar “s̃eperd emõn.” (Jon 10:11) Ke ear lo jar ko me rar mõnõnõ in lor e, “Ej tiriamokake ir, bwe rej barõk, im jibliklik einwõt s̃ip ko ejelok air s̃eperd.” (Mat. 9:36) Peter im ri jilek ro jet rar lo yokwe im itoklimo eo an kin armij. Jesus ear lap an oktak jen shepherd ro rewan an Israel, me rar jerwane bwij eo ñan joñan eo me ro einwõt sheep rar jebliklik im kwuli kin men ko lor jitõb! (Ezek. 34:7, 8) Ilo air lale joñok eo emõn an Jesus kin katakin im wãwen eo ear kejbãrok sheep ko ñan joñan eo ear lelok an mour kin ir, ri jilek ro rar katak kilen jibañ ro ewõr air tõmak ñan air jeblak ñan Jehovah, ‘shepherd eo im ri lale air.’—1 Pit. 2:25.
Ikijen katak im joñok eo an, Jesus ear kalikar ñan ri jilek ro kin aorõkin eddo eo ear lelok ñan ir ñan air lale sheep ko. Juõn ien ke ear konono ñan Peter, Jesus ear kalikar ilo lemnak im buruen ri jilek ro jet kin aorõkin air najidik im lale sheep ko. (Jon 21:15-17) Men in ear lukkun kamakit buruen Peter, einwõt ej alikar ilo nan in kakabilek eo an ñan elder ro. Ilo letter eo an kein kajuõn, ear rejañ overseer ro: “Komin s̃eperd bwijin Anij ej ber ibemi, im lale e, jab ilo makoko a kin ami kõnan, ekar ñõn ankil an Anij; jab kin wõnan dala, a kin ami yokwe; Im komin jab iroij ion men eo emwij likite na ibemi, a komin mõke joñok ñõn bwij eo.”—1 Pit. 5:1-3.
Nan kein an Peter rej jerbal wõt ñan overseer ro ilo congregation eo rainin. Overseer ro rainin rej bõk ejja eddo eo wõt ilo ebeben eo kein kajuõn, ñan shepherd bwij eo an Anij. Ilo letter eo an, Peter ear kalikar kin lemnak eo ekkar me en wõr ibben overseer ro kin kajejjet eddo in. Ilo kajeoñe Jesus, kin kõnan im yokwe ren jerbal einwõt joñok ko ñan bwij eo, im tel ilo jerbal eo an Jehovah.
Ewõr unin ad kamolol kin overseer ro me jitõb kwojarjar ej jitõñ ir ilo congregation eo. Jej bõk elõñ tokjen ko. Ñan wanjoñok, overseer ro rej lelok nan in kõketak ko ilo jitõb im lale aikwij ko an kajjojo ro uan ilo congregation eo. Kajjojo week rej niknik in tel ilo kwelok ko an congregation eo, ijo aolep rej bõk kakajur ilo tõmak. (Rom. 12:8) Jibadbad ko air ñan kejbãrok bwij eo jen men in kauwatata ko, einwõt jen armij ro renana, rej kalaplok jokane eo ad ilo jitõb. (Ais. 32:2; Tait. 1:9-11) Joñok emõn eo air im air tel ilo jerbal in kwalok nan ej rejañ kij ñan ad kijejeto wõt ilo jerbal in kwalok kin news eo emõn kajjojo alliñ. (Pil. 3:16, 17; Hib. 13:15-17) Ikijen “men in yokwe ñan armij rõn” Jehovah ear emõn an kabwe aikwij ko ñan kalek congregation eo.—Ep. 4:8, 11, 12.
MEN IN AIKWIJ KO AN OVERSEER RO
Ñan kõmman bwe en emõn air lale congregation eo, armij ro rej jitõñ ir ñan air jerbal einwõt overseer ro rej aikwij kajejjet men in aikwij ko einwõt Nan in Anij ej kwalok kaki. Elañe ej tellokiir wõt inem jemaroñ ba bwe kar jitõñ ir ikijen jitõb kwojarjar. (Jerb. 20:28) Emol, men in aikwij ko ekkar ñan Jeje ko reutiej ñan Christian overseer ro, kinke maan rein ewõr eddo eo elap ñan tel ilo kabuñ eo an Jehovah im rej aikwij juõn joñok emõn kin mwilin Christian. (1 Kor. 11:1; Hib. 13:7) Ak kien kein rejjab le jen joñan air bin im kõmman bwe Christian maan ro me emol air yokwe Jehovah im rej mõnõnõ bwe ej kajerbal ir, ren jab maroñ tõbari. Kien ko reutiej rej aikwij bwe elder ro kar jitõñ ir ren joñok ko remõn ilo congregation eo. En kar alikar ñan aolep bwe overseer ro rej armij ro rej jerbale nan in kakabilek ko ilo Bible ilo makitkit ko air ilo mour.
Ri jilek Paul ear kõlajrak men in aikwij ko ekkar ñan Jeje Ko ñan overseer ro ilo letter eo an kein kajuõn ñan Timothy im ilo letter eo an ñan Titus. Ilo 1 Timote 3:1-7, jej konono: “Elañe armij ej bukot bwe en dri kaki elap, ej kõnan jerbal emõn. Inem, dri kaki elap enjelok notan, en juõn wõt belen, en jadõr, en kõkõmõnmwin, en emõn mwilin, en lap an eken, en jela katakin; En jab ijol wain, en jab jekanunok, en joij wõt, en jab dri iri, en jab arõk dala; En emõn an iroij i mweo imõn, bwe ro nejin ren bokake e, im en mwilin armij; (A elañe armij e jaje kin an iroij i mweo imõn, ekijkan an lale eklisia an Anij?) En jab kãl ilo jerbal in Anij, ñe ab en utiej buruen im ebuñ im einwõt kar liakelok devil eo. Bar juõn ro re jab tõmak ren jab ñutñut e bõjik, bwe en jab buñ ilo kinake im jen an Setan.”
Paul ear jeje ñan Titus: “Kin men in I ar likit yuk i Krit bwe kwon kajime men ko re jañin jimewõt, im likit jet armij bwe ren elder ro ilo jikin kwelok otemjej, einwõt I kar jiroñ yuk; Elañe jabrewõt eman ejelok notan, im belen wõt juõn, im eor nejin retiljek, ro re jab kinaklok ir kin abje, im re jab jelomene. Bwe emõn dri kaki elap enjelok notan, einwõt dri kõmñe an Anij; en jab ankeke, en jab burukaru, en jab dri iri, en jab dri jekanunok, en jab arõk dala; A en dri ken, im en yokwe ro remõn, en emõn mwilin, wãnik, kwojarjar im jadõr; Im en drebij wõt nan emol, einwõt ar katakin e, bwe kin nan in katak ejime, en maroñ in kowe im koukwelok ro rej karkar ajaj.” (Taitõs 1:5-9) Nan in kakabilek kein an Paul ikijen overseer ro rej kalikar ta eo ej kitibuj ilo air kajejjet eddo ko air. Ri jeje Bible ro jet rej bwebwenato kin kadkad ko jet an Christian me maan ro rej jitõñ ir einwõt overseer ro, shepherd ro, ilo congregation eo rej aikwij kwaloki.—Jem. 3:13, 17, 18.
Meñe ilo jinoin ebin air kajejjet men in aikwij ko ilo Bible, ejelok unin an Christian maan ro jenlik jen air jibadõk jerbal ko remõn ekoba jerbal in overseer. Ilo air likit joñok eo ñan kwalok kadkad ko remõn kadkadin Christian, overseer ro rej rejañ ro jet ilo congregation eo bwe en eindein air kõmman. Men in ej alikar ilo ta eo ri jilek Paul ear je ke ear kwalok bwe “men in yokwe ñõn armij rõn” kar litoki “bwe En kowãppenlok ro remõn, kin jerbal in jibõñ, kin kalek enbwinin Kraist: Mae aruij tõbare juõn wõt tõmak, im jela Nejin Anij, ñõn armij eridto, ñõn joñõn ridtõn an Kraist obrõk.” (Ep. 4:8, 12, 13) Kinke aolep Ri Christian ro rej aikwij jibadõk air ritto ilo jitõb, ro kar jitõñ ir einwõt overseer ro ilo congregation eo rej aikwij tel ilo men in.
Paul ear kakabilek Timothy im Titus ñan air likit maan ro rej tellokiir ñan air jerbal einwõt overseer ro ilo congregation eo. Ren jab likao dikdik ro ak kãl ilo jerbal in Anij, ak ren ro ewõr air iminene in mour ekkar ñan wãwen Christian, en wõr juõn melele emũlal kin jelãlokjen eo ilo Bible, im en mol air yokwe congregation eo. Overseer ro ren beran in konono ñe ewõr nana ilo congregation eo im ren mõkaj in kajimweiki, im ilo wãwen in kejbãrok bwij eo jen jabdewõt ro rekõnan kokkure ir. (Ais. 32:2) Ro ilo congregation eo ren mõkaj in kile bwe overseer ro rej ro reritto ilo jitõb, im ewõr air itoklimo kin bwij eo an Anij. Wãwen mour eo air en kalikar men in.