Eor Mweiuk ko Raurõk Iber ñõn Lelok
1 Nan eo an Anij eobrõk kin katak ko reaurõk me jej kaurõki. (Sam 12:6; 119:11, 14) Juõn ien, Jisõs ear kajerbal wanjoñok ko ñõn kwalok kin Ailiñ eo, im ear kajitõk iben dri kalor ro an: “Kom ar melele men kein otemjej ke?” Ke rar ba bwe remelele, ear ba ñõn ir: “Kin men in, skraib otemjej rej katak kin ailiñ in lõñ, rej einwõt armij, eo ãtõk, im ej bõktok men ko rekãl im remor jen jikin mweien.”—Mat. 13:1-52.
2 Jemaroñ lemnok kin katak ko jar katak kaki ilo jinoin bwe rej einwõt mweiuk ko etto air ber iber. Ak ilo ar kalaplok ar katak kin men ko remũlallok kin Nan in Anij, jemaroñ lo katak ko jet remol ilo Baibel eo, im rej einwõt mweiuk ko rekãl ñõn kij. (1 Kor. 2:7) Bareinwõt, “dri korijer e tiljek im meletlet,” ej jibõñ kij ñõn bõk melele kin katak ko rekãl.—Mat. 24:45.
3 Jej kaurõk mweiuk kein ilo Baibel, ko jar bõk jen jinoin im ko rekãl. Men in ej kamakit kij ñõn bõk katak ko im kaminene ko ilo ar katakin armij kin Nan in Anij, im jej kalaplok ar kwalok ñõn ro jet kin katak ko remol me jar katak kaki.
4 Katak Jen Joñok Eo An Jisõs: Ñõn kalikar kin wãwen ear lemnok kin mweiuk kein, Jisõs ear lukkun kate in kwalok ñõn ro jet. Meñe ear mõk jet ien, ear jab bwijrõk jen an kwalok kin mweiuk kein jen “jikin mweiuk eo an.”—Jon 4:6-14.
5 Yokwe eo an Jisõs kin ro rar jab melele kin Anij im karõk eo an, ear kamakit e ñõn kwalok kin mweiuk kein kin mol ko kin Anij me rej lomoren armij. (Sam 72:13) Ear tiriamokake rein rar kõnan katak kin Anij im karõk eo an im men in ear kamakit e bwe en “katakin ir men ko relõñ.”—Mark 6:34.
6 Kajeoñwe Jisõs: Ñe jej kaurõk mweiuk kein iber, einwõt Jisõs, jenaj kijorur in kebellok Baibel ko ar im kwalok katak kein reaurõk ñõn armij ro. (Ken. 2:1-5) Meñe jet ien jemaroñ mõk, jenaj kijejeto wõt im kwalok kin katak ko ilo Baibel. (Mark 6:34) An lap ar kamolol kin mweiuk kein iber, enaj kamakit kij ñõn kalaplok ijo kunar ilo ar jerbal in kwalok nan.