Kwo Maroñ Katakin Ro Jet!
1. Ta jerammõn ko rebellok ñõn kajuju dri kwalok kin Ailiñ eo?
1 Juõn ian men ko remõntata ilo ar kwalok nan ej ñõn katakin juõn kin mol eo. Ar lo an juõn bõk ennan eo kin Ailiñ eo im ar jibõñ e bwe en ruaklok ñõn Iroij bõtata eo, ej juõn menin kamõnõnõ elap. (Jem. 4:8) Ñõn katakin juõn eo im ej kwuli kin mol eo im lo an jino kõmõn oktõk ko ilo mour eo an, lemnok eo an, im mwilin, en mejenkajik eo ñõn aolep dri kwalok ro kin Ailiñ eo.—Mat. 28:19, 20.
2. Etke jet re ãliklik jen air katak Baibel iben ro jet, im ta eo enaj jibõñ ir bwe ren anjo ion abañ in?
2 Liki wõt Jeova: Ilo ien ko etto, dri korijer ro retiljek rekin lemnok bwe rebet jen air maroñ bok kunair ilo jerbal eo Anij ear jitõñ ir ñõn kõmõne. Liki Jeova Anij ear kamaroñ Moses, Jeremaia, Amos, im bar ro jet ro retã burueir bwe ren anjo ion lemnok ko air rebwir im kõtõbrak juõn jerbal elap. (Ex. 4:10-12; Jer. 1:6, 7; Amos 7:14, 15) Bareinwõt Paul, dri jilik eo ear aikwij “beranlok.” Ewi wãwen? Ear ba: “kim ar beranlok ilo am Anij.” (1 Tes. 2:2.) Aet, bwe en emõn ar katakin armij ro kin Baibel, kij aolep jemaroñ liki bwe Jeova enaj letok jibõñ, meletlet, im kajur.—Ais. 41:10; 1 Kor. 1:26, 27; 1 Pit. 4:11.
3, 4. Ta katak ko rebellok ñõn jibõñ kij katakin ro jet kin Nan in Anij?
3 Bõk Kaminene: Jeova Anij, ar Dri Kaki Elap, ej keini an letok katak ko rej berber ion Baibel eo bwe en lukkun kabel wãwen ar katakin ro jet. (Ais. 54:13; 2 Tim. 3:16, 17) Jen bõk tokjen katak kein ilo ar kalaplok ar melele kin Jeje ko im kakõmõnmõnlok maroñ eo ar ñõn katakin armij kin mol eo jen Baibel. Ke eñin unleplep in Jikuul in Kwalok Nan im Service Meeting, bõtab aolep kwelok ko rej ñõn kamineneik kij kilen katakin ro jet kin Nan in Anij.
4 Kwon kate yuk bwe kwon jela kilen katakin ro jet kin men ko remũlõl ilo juõn wãwen ebiruru. Buk in Jikuul in Kwalok Nan eo ilo peij 227, ej kemelele: “Bwe katak eo am en melak ñõn ro jet, kwonaj aikwij lukkun melele kake mokta.” Ar uak ilo ien kwelok ko ej men in jibõñ kij kabinlok melele ko ñõn ar kajerbale ilo ien ko rej itok. Inem en emõn am kapojõk, bwe am liki kin am maroñ in katakin en edreklok wõt.
5. Ta katak ko jet jej bõki ilo congregation eo ar im rej jibõñ kij ñõn kakõmõnmõnlok ar katakin ro jet?
5 Ejelok berre bwe ilo jinoin, dri kwalok ro an dri Kristian rar bõk air katak jen dron ke rar kwalok nan im kõmõn dri kalor ro. (Luk 10:1) Ñe kwomaroñ, jerbal iben ro eor air iminene kin kwalok nan, einwõt pioneer ro, elder ro, im ro rej lotok kij ilo jerbal in katakin ro jet kin Baibel eo. Kwon lale wãwen air kajerbal wanjoñok ko ralikar im buk in katak ko ar me rej kemeleleik mol eo jen Jeje ko. Kajitõk ibeir kin wãwen ko kwomaroñ kakõmõnmõnlok am katakin. (Ken. 1:5; 27:17) Jen kamolol bwe aolep katak kein jen ro jeer im jãter rej ilo mol, jen Anij.—2 Kor. 3:5.
6. Bwe juõn en maroñ katakin ro jet kin Nan in Anij enaj aikwij ta?
6 Liki wõt Jeova, im kortokjen katak ko ej litoki. Jar, bwe en or am wõnmanlok. (Sam 25:4, 5) Kwomaroñ bareinwõt lo mõnõnõ eo ej itok kin am jibõñ juõn bwe en einwõt kwe, eo ej katakin ro jet kin Nan in Anij.