Jab Pere Kwe Make —Jab L̦õmn̦ak bwe Ejjel̦o̦k Kapeel Ippam̦
1. Etke jet ri kwal̦o̦k naan rej mijak in kajjitõk ippãn juon el̦aññe ekõn̦aan katak Baibõl̦?
1 Kwõj ke mijak in kajjitõk ippãn juon el̦aññe ekõn̦aan katak Baibõl̦ kõnke kwõj l̦õmn̦ak bwe ejjel̦o̦k kapeel ippam̦ ñan katakin armej ro? Ilo iien ko etto, jet iaan ri karejar ro retiljek ãinwõt Moses im Jeremaia, rar l̦õmn̦ak bwe ejjel̦o̦k aer maroñ ñan kajejjet jerbal ko me Anij ear lil̦o̦k ñan er. (Ex. 3:10, 11; 4:10; Jer. 1:4-6) Men in ej kaalikkar bwe elõñ armej ro rej l̦õmn̦ak bwe ejjel̦o̦k kapeel ippãer. Ta ko jemaroñ kõm̦m̦ani bwe jen jab l̦õmn̦ak rot in?
2. Etke jen jab l̦õmn̦ak bwe ebwe wõt ñan ad kwal̦o̦k naan jãn em̦ ñan em̦ im bwe ej kun̦aan ro jet ilo eklejia eo katak Baibõl̦ ippãn armej ro?
2 Jen keememej bwe Jeova ejamin kajjitõk ippãd bwe jen kõm̦m̦ane juon men me jebane. (Sam 103:14) Men in ej kaalikkar bwe jemaroñe jerbal eo ad ñan ‘kõm̦m̦an rũkal̦oor’ im “katakin er.” (Matu 28:19, 20) Jeova ear jab baj lel̦o̦k jeraam̦m̦an in ñan ro wõt me ewõr aer imminene im kapeel. (1 Ko. 1:26, 27) Kõn men in, jen jab l̦õmn̦ak bwe ebwe wõt ñan ad kwal̦o̦k naan jãn em̦ ñan em̦ im bwe ej kun̦aan ro jet ilo eklejia eo katak Baibõl̦ ippãn armej ro.
3. Ewi wãween Jeova ej jipañ im kamaroñ kõj ñan katak Baibõl̦ ippãn ro jet?
3 Jeova Ej Kamaroñ Kõj: Jeova ej kamaroñ kõj ñan kõm̦m̦an rũkal̦oor ro. (2 Ko. 3:5) Ej kõjerbale doulul eo an ñan katakin kõj katak ko rem̦ool ilo Baibõl̦ me ri mãlõtlõt ro ilo lal̦ in rejjab mel̦el̦e kaki. (1 Ko. 2:7, 8) Bareinwõt, ear likũt ilo Baibõl̦ bwebwenato ko an Ri Kaki eo El̦ap, Jijej, im wãween an kar katakin armej ro bwe jen maroñ kajjioñe. Ej bar wõnm̦aanl̦o̦k im katakin kõj kilen katakin ilo kweilo̦k ko ad. Ejjab men kein wõt, ak Jeova ej bar letok bok ko me jemaroñ kõjerbali ñan katakin ro jet kõn Baibõl̦. Ñan waanjoñak, ear letok bok eo etan Katak ko Rem̦ool. Bok in ej katakin armej kõn katak ko rem̦ool ilo juon wãween emel̦ak im pidodo ñan mel̦el̦e. Kõn men in, meñe jemaroñ kar l̦õmn̦ak bwe enaaj pen ñan katak Baibõl̦ ippãn armej ro, ilo m̦ool emaroñ jab lukkuun pen.
4. Etke jejel̦ã bwe Jeova enaaj jipañ kõj?
4 Jeova ear jipañ Moses im Jeremaia. Eñin unin erro ar maroñ kajejjet jerbal ko me Jeova ear lil̦o̦k ñan er. (Ex. 4:11, 12; Jer. 1:7, 8) Jemaroñ bareinwõt kajjitõk bwe Jeova en jipañ kõj. Keememej bwe ñe jej katak Baibõl̦ ippãn armej ro jej katakin er katak ko rem̦ool kõn Jeova. Men in ej lukkuun kabuñbũruon. (1 Jon 3:22) Kõn men in, kate eok ñan katak Baibõl̦ ippãn ro jet. El̦ap lañlõñ im elõñ tokjãn ko rej wal̦o̦k ñe jej bõk kun̦aad ilo jerbal in.