WÃWEEN BWE EN MAROÑ BÕJRAK AN WÕNM̦AANL̦O̦K WÕT KÕJDAT

2 | Jab Idenon̦e

Naanin Kakapilõk eo jãn Baibõl̦:

“Kom̦win jab ukot nana kõn nana ñan jabdewõt armej. . . . El̦aññe kom̦ maroñ, kom̦win kate kom̦ joñan wõt ami maroñ ñan mour ilo aenõm̦m̦an ippãn armej otemjej. . . . Kom̦win jab idenon̦e ñan kom̦ make, . . . kõnke Jeje ko rej ba: ‘“Kun̦aõ idenon̦e, inaaj n̦aon̦ãer kõn wõt jerbal ko aer renana,” Jeova ej ba.’”—ROM 12:17-19.

Mel̦el̦ein Naanin Kakapilõk In:

Meñe eitok wõt bwe jen illu ñe juon ej bõd n̦ae kõj, ak Anij ejjab kõn̦aan bwe jen idenon̦e. Ijoke, ekõn̦aan bwe jen kõttare kõnke m̦õttan wõt jidik enaaj kajim̦we aolep men.—Sam 37:7, 10.

Men eo Kwõmaroñ Kõm̦m̦ane:

Ñe armej ro rej idenon̦e, ekõm̦m̦an bwe en wõnm̦aanl̦o̦k wõt kõjdat. Kõn men in, ñe juon ej kainepataik ak kõjorrããn eok, kwõn jab ukotl̦o̦k. Kajjioñ dãpij wõt aenõm̦m̦an ilo bũruom̦ im em̦m̦akũt ilo aenõm̦m̦an. Jet iien, emaroñ em̦m̦anl̦o̦k ñan mel̦o̦kl̦o̦ke men eo ear wal̦o̦k. (Jabõn Kõnnaan 19:11) Ijoke, jet iien emaroñ em̦m̦anl̦o̦k ñan ripoote ta eo ear wal̦o̦k. Ñan waanjoñak, el̦aññe kwe eo kar kõjorrããn eok, kwõmaroñ kããlõt ñan ripoote jorrããn eo ear wal̦o̦k ñan kwe ñan bwilijmããn̦ ro ak jikin ko jet an kien.

Juon eo ej wõnm̦aanl̦o̦k im idenon̦e ej ko̦kkure e make

Ta el̦aññe ãinwõt ejjel̦o̦k wãween ñan kõm̦adm̦õde apañ eo ilo aenõm̦m̦an? Ak ta el̦aññe em̦õj am̦ kate eok joñan wõt am̦ maroñ ñan kajjioñ kõm̦adm̦õde apañ eo ilo juon wãween eaenõm̦m̦an? Kwõn jab idenon̦e. Am̦ idenon̦e emaroñ kõm̦m̦an bwe en nanal̦o̦k wãween eo ej wal̦o̦k. Ijello̦kun am̦ ãindein, kwõn kõm̦m̦an bwe en bõjrak an wõnm̦aanl̦o̦k kõjdat. Kwõmaroñ katak ñan lõke wãween an Anij kõm̦adm̦õde apañ eo. Baibõl̦ ej ba: “Kom̦win lel̦o̦k kom̦ make ñan Irooj; Lõke e im enaaj jipañ kom̦.”—Sam 37:3-5, UBS.

Bwebwenatoun Mour eo An—ADRIÁN

Ear Anjo̦ jãn Eñjake in Idenon̦e

Ke Adrián ear juon jo̦dikdik, ekõn ire kõn an obrak kõn kõjdat im kõn̦aan idenon̦e. Ej ba: “Ekkã aõ kõjerbal bu ñe ij ire im kõpata. Elõñ iien ij lukkuun jorrããn im bõtõktõk aolepen ãnbwinnũ im rekõn likũt wõt ña itõrerein ial̦ ko kõnke rej l̦õmn̦ak bwe inaaj mej.”

Adrián ear jino katak Baibõl̦ ke ear 16 an iiõ. Ej wõnm̦aanl̦o̦k im ba: “Ke iar wõnm̦aanl̦o̦k wõt im katak Baibõl̦, iar kile ippa make bwe ij aikuj kõm̦m̦an oktak.” Ear aikuj jol̦o̦k an kõjdat im bõjrak jãn an kwal̦o̦k lãj. Ear lukkuun l̦ap an bõk tokjãn jãn men eo ear katak jãn Rom 12:17-19 kõn jab idenon̦e. Ej ba: “Iar jino kile ippa make bwe Jeova enaaj kõm̦adm̦õdi men ko rejjab jim̦we ilo iien eo im wãween eo ej lo bwe ekkar. Jidik kõn jidik, ear jakol̦o̦k aõ lãj.”

Juon jota, juon kumi in ri-nana me rekõn ire ippãn Adrián rar wõnm̦aiki im m̦ane. Eo ej tõl kumi eo ear lam̦õj im ba: “Etke kwõjjab ire!” Adrián ej make kwal̦o̦k im ba: “Iar lukkuun illu im kõn̦aan ire.” Bõtab ijello̦kun an kar ukotl̦o̦k nana eo, ear jar ilo tukadu ñan Jeova im ko jãn ijo.

Adrián ej wõnm̦aanl̦o̦k im ba: “Raan eo juon, iar iioon eo ear tõl kumi in. Ilukkuun kar kon̦aan ukotl̦o̦k men eo enana ear kõm̦m̦ane ñan ña, bõtab iar bar jar ilo bũruõ im kajjitõk ippãn Jeova bwe en jipañ eõ bwe in jel̦ã dãpij aõ illu. Iar bwilõñ ke l̦ein ear itok ñan ippa im ba: ‘Jol̦o̦k bõd kõn men eo ear wal̦o̦k boñ. Ilo m̦ool, ikõn̦aan ãinwõt kwe. Ikõn̦aan katak Baibõl̦.’ El̦ap aõ kar m̦õn̦õn̦õ bwe iar maroñ dãpij aõ illu! Tokjãn men in, kõm̦ro kar jim̦or katak Baibõl̦.”