Juõn Ledrik Ej Jibañ Juõn Eman E Kajur

KWO jela ke ta eo ledrik jirikrik in ej ba? Ej jiroñ kõra eo kin dri kanan eo an Jeova, I-lai’sha, im men in kabwilõñlõñ ko remõn me Jeova ej jibañ e bwe en kõmõni. Kõra eo ejjab jela kin Jeova kinke ejjab juõn dri Israel. Inem jen lale unin an ledrik eo ber i mweo imõn kõra eo.

Kõra eo ej juõn dri Siria. Etan leo belen ej Ne’a-man, kapen an jar in tõrinae eo an Siria. Ke r’ar bõk anjo ilo tõrinae eo, r’ar ãñintok ledrik in Israel in ñõn iben lio belen Ne’a-man bwe en dri korijeran.

Ne’a-man e ar bõk juõn nañinmij e nana etan leper. Nañinmij in e maroñ kõmõn bwe mõttõn kõniekin armij eo en wõtlok jen e. Inem eñin men eo me ledrik eo ej jiroñ lio belen Ne’a-man: ‘Emõn ñe aõ iroij en kar ber iben dri kanan eo an Jeova ilo Israel. E naj kar kemour e jen an nañinmij in leper.’ Tokelik, rej jiroñ leo belen kin men eo.

E kanuij lap an Ne’a-man kõnan mour jen nañinmij eo an; kin men in e ar ilok ñõn Israel. Ke e ar tokeaklok eneo, e ar ilok ñõn mweo imõn I-lai’sha. I-lai’sha ej kadriojlok leo dri korijeran bwe en jiroñ Ne’a-man bwe en ilem tutu ilo River Jordan ji1jilimjuõn alen. Men in e ar lukkun kaillu Ne’a-man, im e ar ba: ‘River ko ijo jikiõ remõnlok jen jabrewõt river ilo Israel!’ Im elikin an ba men in, Ne’a-man e ar ilok.

Ak juõn ian ro dri korijeran e ar ba: ‘Aõ karo, elañe I-lai’sha e ar jiroñ yuk bwe kwon kõmõn juõn men e bin, kwo naj kar kõmõne. Inem kiõ etke kwo jab baj tutu, einwõt an ba?’ Ne’a-man e ar eoroñ eo korijeran im e ar ilok im tutu ilo River Jordan jiljilimjuõn alen. Ke e ar kõmõn men in, e ar mour jen nañinmij eo an!

E ar kanuij mõnõnõ Ne’a-man. E ar jeblak iben I-lai’sha im ba ñõn e: ‘Kiõ I jela bwe Anij in Israel ej mõke wõt Anij eo emol ilo aolepen lõl. Inem kwon joij im bõk juõn men in mõnõnõ jen iõ.’ Ak I-lai’sha e ar uak im ba: ‘Jaab, I jamin bõk jabrewõt.’ I-lai’sha e ar jela bwe enaj kar bwir elañe e ar bõk men in lelok eo, kinke Jeova eo e ar kemour Ne’a-man. Ak Gi-he’zai, leo korijeran I-lai’sha, e ar kõnan bõk men in lelok eo bwe en an.

Inem eñin men eo Gi-he’zai e ar kõmõne. Elikin an ilok Ne’a-man, Gi-he’zai e ar ettõrlok ñõn iben. Im e ar ba ñõn e: ‘I-lai’sha e ar jilkinlok iõ bwe in kennanek yuk bwe e kõnan bõk mõttõn men in lelok eo am im lelok ñõn jet ian ro jeran im rej kap itok in lotok e.’ Nan in e ar juõn riõp. Ak Ne’a-man ejaje bwe Gi-he’zai e ar riõp; inem ej lelok ñõn Gi-he’zai mõttõn men ko.

Ke Gi-he’zai e ar jeblak ñõn mweo imõn, I-lai’sha e ar jela kin men eo e ar kõmõne. Emwij an kar Jeova jiroñ e. Kin men in e ar ba: ‘Kin am kar kõmõn men in e nana, nañinmij in leper an Ne’a-man e naj edrep ñõn yuk.’ Im e mõkaj an leo bõk nañinmij in leper!

Ta eo je maroñ katak jen aolepen men kein? Mokta, bwe jen kajeoñwe ledrik jirikrik eo ilo ar kennan kin Jeova. Men in e maroñ jibañ elõñ armij. Ken ka ruo, jen jab utiej buru einwõt kar Ne’a-man mokta, ak jen bokake ro dri korijeran Anij. Im ken ka jilu, jen jab riõp einwõt kar Gi-he’zai. Ejab je maroñ katak elõñ men ko jen ar readi Baibel eo ke?