Juon Em̦m̦aan Ekajoor im Juon Leddik Jidikdik

Ear wõr juon leddik jidikdik jãn Israel me ear pãd ilo aelõñin Siria, juon jikin elukkuun ettol̦o̦k jãn ãneo ãneen. Rũttarin̦ae ro an Siria rar bõke ledik in jãn baam̦le eo an, im kiiõ ej jerbal ñan lio pãleen Neaman, juon em̦m̦aan me ej tõl juon kumi in tarin̦ae. Ledik in ear kabuñ ñan Jeova meñe armej ro jet ijin ear pãd ie rar jab.

Neaman ear bõk juon nañinmej me ear ko̦kkure ãnbwinnin, im aolep iien ear metak im eñtaan jãn nañinmej in an. Leddik jidikdik eo ear kõn̦aan jipañe. Kõn men in, ear ba ñan lio pãleen Neaman: ‘Ijel̦ã wõn en̦ me emaroñ jipañe l̦eo pãleem̦ bwe en em̦m̦anl̦o̦k an mour. Juon en̦ rũkanaan an Jeova ilo Israel etan in Ilaisha. Enaaj maroñ kõmouri jãn nañinmej en̦ an.’

Innem liin ear ba ñan Neaman kõn men eo leddik jidikdik in ear ba ñane. Neaman ear m̦õn̦õn̦õ in kõm̦m̦ane jabdewõt men bwe en bar mour, im kõn men in ear etal ñan m̦weo im̦õn Ilaisha ilo Israel. Neaman ear l̦õmn̦ak bwe Ilaisha enaaj kar etal im wõnm̦aiki im kwal̦o̦k an lukkuun kautieje kõn an utiej. Ak Ilaisha ear jab kõm̦m̦ane men in. Ear jilkinl̦o̦k rijerbal eo an bwe en etal im iioone Neaman im ba ñane naan kein: ‘Etal im tulo̦k ilo Reba Jordan 7 kõttan im kwõnaaj mour jãn nañinmej n̦e am̦.’

Neaman ear jab m̦õn̦õn̦õ kõn men in. Ear ba: ‘Iar l̦õmn̦ak rũkanaan n̦e enaaj kar kũr ñan Anij en̦ an im kõm̦m̦ane juon men ekabwilõñlõñ ñan kõmour ña. Ak kiiõ ej ba bwe in etal ñan juon reba ilo Israel me ejjab em̦m̦an ãinwõt reba ko ammim ilo Siria. Etke ijjab etal im tulo̦k ilo juon iaan reba kan̦ ammim?’ Neaman ear lukkuun illu, im ear etal jãn m̦weo im̦õn Ilaisha.

Rijerbal ro an Neaman rar jipañe bwe en kajim̦we l̦õmn̦ak eo an. Rar ba ñane: ‘Irooj, kwõjjab m̦õn̦õn̦õ ke in kõm̦m̦ane jabdewõt men bwe kwõn bar mour? Elukkuun pidodo kõm̦m̦ane men en̦ rũkanaan en̦ ej ba. Etke kwõjjab baj etal wõt im kõm̦m̦ane?’ Neaman ear roñjake naan kein aer. Ear etal ñan Reba Jordan im tulo̦k ie 7 kõttan. Ãlikin an kõm̦m̦ane men in 7 kõttan, ear ato jãn dãn eo im kajju mour jãn nañinmej eo an. Joñan an Neaman m̦õn̦õn̦õ, ear ro̦o̦l ñan ippãn Ilaisha bwe en kam̦m̦oolole. Neaman ear ba: ‘Ijel̦ã kiiõ bwe Jeova ej Anij eo em̦ool.’ Kwõl̦ak lale, kar ta eñjake eo an leddik jidikdik eo ke ear lo bwe Neaman ear mour jãn nañinmej eo an?