E Mour Jisõs

KWO jela ke wõn kõra eo im lõmaro ruo? Kõra eo ej Meri Mag’da-lini, juõn ian ro jeran Jisõs. Im lõmaro rej nuknuk mouj rej enjel ro. Rum jirikrik in me Meri ej reitok iloan ej jikin eo me r’ar likit enbwinin Jisõs na ie elikin an mij. Rej naetan lup. A kiõ e joko enbwin eo! Wõn eo e ar bõke? Jen lale.

Elikin an mij Jisõs, pris ro rej ba ñõn Pailat: ‘Ke Jisõs e ar mour e ar ba bwe e naj jerkakbiji elikin jilu ran. Inem kwon jiroñ bwe en wor ro dri lale lup eo. Inem ro dri kaloran re ban kwote enbwinin im ba bwe e ar jerkakbiji jen ro re mij!’ Pailat ej jiroñ pris ro bwe ren jilkinlok dri tõrinae ro bwe ren lale lup eo.

Bõtap ilo jibboñ tata in ran eo ken ka jilu elikin an Jisõs mij, juõn enjel ej weaktok. Ej kadribillok ejman eo jen mejen lup eo. Joñan an dri tõrinae ro lelñoñ re jaje makõtkit. Tokelik, ke rej reilok ñõn loan lup eo, e joko enbwin eo! Jet ian dri tõrinae ro rej dreloñ iloan jikin kwelok eo im kennanek pris ro. Kwo jela ke ta eo pris nana ro rej kõmõne? Rej kõllã mõnni ñõn dri tõrinae ro bwe ren riõp. ‘Komin ba bwe ro dri kaloran r’ar itok boñ, ke kom ar kiki, im kwote enbwin eo,’ pris ro rej jiroñ dri tõrinae ro.

Ak ilo ien in, jet kõra ro jeran Jisõs rej lolok lup eo. Re kanuij bwilõñ ke rej lo bwe ejelok kobban! Ilo iriñ, ruo enjel ro rej kõnõk nuknuk ko re jatõltil rej weaktok. ‘Etke komij bukõt Jisõs ijin?’ rej kajitõk. ‘Emwij kajerkak e. Komin kaiur kom im kennanek ro dri kaloran.’ E kanuij mõkaj an limaro ettõr lok! Ak ilo ial eo juõn eman ej kabwijrak ir. Kwo jela ke wõn eo? Ej Jisõs! ‘Komin ilok im kennanek ro dri kalora,’ ej ba.

Ke limaro rej jiroñ dri kalor ro bwe e mour Jisõs im bwe r’ar loe, e bin an dri kalor ro tõmak men in. Piter im Jon rej ettõr lok ñõn lup eo bwe ren mõke lale, ak ejelok kobban lup eo! Ke Piter im Jon rej ilok, Meri Mag’da-lini ej berwõt. Eñin ien eo ej reitok ñõn loan lup eo im lo enjel ro ruo.

Kwo jela ke ta eo e ar walok ñõn enbwinin Jisõs? Anij e ar kõmõn bwe en mokunlok. Anij e ar jab kajerkakbiji Jisõs ñõn mour ilo enbwinin kõniek eo me e ar mij kake. E ar lelok ñõn Jisõs juõn enbwinin jitõb ekãl, einwõt enjel ro i lõñ. Ak bwe en kwalok ñõn ro dri kaloran bwe e mour, Jisõs e maroñ bõk juõn enbwinin armij bwe armij ro ren loe, einwõt ar naj katak.