Ñõn Iloan Juõn Rum Ekilõk

ELIKIN an Piter im Jon ilok jen lup eo me enbwinin Jisõs e ar ber ie, Meri ej mõke wõt ian ijo. E jino jõñ. Inem ej ilok im reitok iloan lup eo, einwõt ar loe ilo pija eo juõn. Ijen ej lo ruo enjel! Rej kajitõk iben: ‘Etke kwoj jõñ?’

Meri ej uak: ‘R’ar bõklok Iroij eo aõ, im I jaje ia eo r’ar likit e na ie.’ Inem Meri ej oktak lok im lo juõn eman. Ej kajitõk iben: ‘Wõn eo kw’ar bukõt e?’

Meri ej lemnõk bwe leo ej dri kallip eo, im bwe e maroñ kar bõk enbwinin Jisõs. Kin men in ej ba: ‘Elañe kw’ar bõke, kwon kennanek iõ ijo kw’ar likite na ie.’ Ak ke ej añiñin e kin etan, Meri ej kile bwe Jisõs eo. Ej ettõrlok im kennanek dri kalor ro im ba: ‘Emwij aõ lo Iroij eo.’

Jotan lok in ran eo, ke ruo dri kalor ro rej ilok ñõn jikin kwelok in Em-me’õs, juõn eman ej kobalok ibeir. Dri kalor ro re kanuij buromõj kinke emwij mõn Jisõs. Ak ke rej ilok i lõllok, leo ej kamelele elõñ menko jen Baibel eo im kainemõn ir. Tokelik, ke rej bwijrak im mõña, dri kalor ro rej kile bwe lein ej Jisõs. Ilo ien in Jisõs e mokunlok, im e mõkaj an dri kalor rein ruo jeblaklok ñõn Jerusalem im kennanek dri jilik ro kake.

Ilo ien in, Jisõs ej bareinwõt weaklok ñõn Piter. Ro jet re lukkun iruj ke rej roñ men in. Inem dri kalor rein ruo rej ilok ñõn Jerusalem bwe ren bukõt dri jilik ro. Rej kennanek ir kin wãwen eo Jisõs e ar bareinwõt weaktok ñõn ir ilo ial eo. Im ilo ien eo rej kennan kin men in, kwo jela ke ta men in kabwilõñlõñ eo ej walok?

Lale mõk pija eo. Jisõs ej weaktok ijin ilo rum eo, meñe e kilõk kejam eo. E kanuij loñliñ dri kalor rein! Ejjab juõn ran e kabwilõñlõñ ke? Kwo maroñ ke bwini jete dre alen Jisõs e ar weaktok ñõn ro dri kaloran? Kwoj bwini ke lailim alen?

Dri jilik Tomas e joko ilo ien eo Jisõs ej weaktok. Inem dri kalor ro rej jiroñ e im ba: ‘Kim ar lo Iroij eo!’ Ak Tomas ej ba bwe e naj aikwij mõke lo Jisõs bwe en kap tõmak. Eokwe, lokin drualitõk ran, dri kalor ro rej bar ber iben dron iloan juõn rum ekilõk, im ilo ien in Tomas ej ber ibeir. Ilo iriñ, Jisõs ej weaktok ijin ilo rum eo. Kiõ Tomas ej tõmak.