Ejjabto Eñtan Otemjej Renaj Jemlok!

Jet ien ilo mour eo am, bõlen kwar kajitõk, ‘Etke elap eñtan?’ Iumin thousand yiõ ko, family eo an armij ear lap an eñtan jen tarinae ko, jeramel, jorrãn ko eidiñ air walok, kõtõrãik kien, jab jimwe in jerbal, nañinmij, im mij. Ilo buki yiõ ko remotlok armij ro rar lo an laplok eñtan jen kar mokta. Eñtan kein otemjej renaj jemlok ke?

Ej menin kainemõn kij ñan ad jelã bwe ejjabto enaj jemlok! Nan in Anij, Bible eo, ej keañ im ba: “Eo enana e naj joko . . . A ro etã burueir re naj jolit ene eo, im re naj kaloñliñ ir mõke kin ainemõn elõñlok.” Ewi toan an naj ro ettã burueir jolet lal im wõr ainemõn? “Ro remõn re naj jolit ene eo, im jokwe iloan ñõn in drio.”​—Sam 37:10, 11, 29.

Elikin an Anij jolok nana im eñtan, lal in enaj oktak ñan juõn paradise. Inem armij ro renaj mour indio ilo mõnõnõ im ejmour ewãppen. Nan in Anij ej kanan: “[Anij] E naj kõmõraik jen mejeir dren in kemjãlãl otemjej, im e naj ejelok bar mij, im re jamin bar liãjlol, ak jõñ, ak iñtan.”​—Reveles̃õn 21:4.

Ilo lal eo ekãl, ro remij naj bar kajeblaktok ir ñan mour bwe ir bareinwõt ren maroñ lañliñ im lo jerammõn kein remõn: “Ro remõn im ro renana re naj jerkakbiji.” (Jerbal 24:15) Eñin unin Jesus Christ ear maroñ jiroñlok juõn ri nana eo ear ukwelok im kalikar an tõmak E: “Kwo naj ber iba ilo paredais.”​—Luk 23:43.

Etke Eñtan Ear Ijjino?

Kinke kar karõk eo an Anij in bwe en wõr juõn ilju eo emõn an armij, etke ear kõtlok bwe eñtan en ijjino? Etke ear kõtlok bwe en wõnmanlok?

Ke Anij ear kõmanman Adam im Eve, E ar kõmanman ir kin enbwin im lolãtãt ko rewãppen. E ar likit ir ilo juõn paradise ak jikin kallip eaibujuij im lelok ñan ir jerbal ko rekamõnõnõ bwe ren kõmmani. Bible eo ej ba: “Anij e ar lo men otemjej E ar kõmõnmõni, im lo re kanuij emõn.” (Jenesis 1:​31) Elañe rar bokake Anij, renaj kar keotak ajiri ro rewãppen, im aolepen lal enaj kar oktak im juõn paradise, ijo armij ro renaj kar mour indio ie ilo ainemõn im mõnõnõ.

Anij ear likit ilo Adam im Eve men in letok eo emõntata kin maroñ in kãlet einwõt mõttan maroñ eo an armij. Kar jab kõmmane ir bwe ren einwõt robot ko ejelok air kalmenlokjen, ak jab maroñ kõmman bebe ko ak jab bõk jabdewõt jokãlet ko. Bõtab, ñan air wõnmanlok wõt im lo mõnõnõ ear wawa ion air kajerbal maroñ in kãlet eo air ilo wãwen eo ejimwe​—ikijen bokake kien ko an Anij. Einwõt an Anij ba: “Ña Jeova am Anij, Eo eor tokjen An katakin yuk, Eo ej tel yuk ilo ial eo emõn kwon etal ie.” (Aiseia 48:17) Bwid in kajerbal maroñ in kãlet enaj walok elap jorrãn, kinke kar jab kõmanman armij ñan an lo jerammõn ilo an anemkwoj lok ian make jen Anij. Bible ej ba: “Ijelã bwe ejjelok en emaroñ beek ilju eo an; Ejjelok en emaroñ beek men otemjej ilo mour eo an.”—Jeremiah 10:23.

Ekaburomõjmõj bwe, ro jemed im jined jinointata rar bõk eñjake in bwe rar maroñ anemkwoj lok iair jen Anij im maroñ jerammõn wõt. Ak ke rar kajekdon tel eo an Anij rar luji an jurake ir im wãppen eo air. Inem rar jino rittolok im mij. Inem kinke kij jej ro nejiir kin men in jaar jolete jab wãppen im mij.​—Dri Rom 5:​12.

Aitwerõk Eo Elap​—Wõn eo Ewõr an Jimwe in Iroij?

Etke Anij ear jab jolok Adam im Eve im bar jino ibben bar ruo armij? Kinke kajur bõtata eo an Anij ijoko otemjej ilañ im ilal, einwõt ba, jimwe eo an ñan iroij, kar aitwerõke. Kajitõk eo kar: Wõn eo emaroñ jimwe an ba bwe e eo ejimwe ñan an iroij, im iroij eo an wõn eo ekkar? Ilo lemnak kin nan ko ilõñ: En kar maroñ ke emõnlok ñan armij ro elañe Anij ear jab iroij ioir? Kinke Anij ear kõtlok elap ien ñan an armij kajeoñ make tel ir ilo air jenolok jen iroij eo an, Anij ear kalikar ñan aolep elañe enaj emõnlok ñan an armij bed iumin iroij eo an ke ak ñe rej iroij ñan ir make. Ien eo kar lelok ebwe ñan an armij ro kajeoñ kin aolep wãwen kien, ibben don an armij, jerbal in money, im kabuñ ko ilo air jenolok jen ialin tel eo an Anij.

Ta tokjen eo ear walok? Thousand yiõ ko in bwebwenato an armij ej kamol bwe ej laplok wõt eñtan. Ilo buki yiõ ko remotlok, family eo an armij ear jelmae eñtan eo enana tata im ejañin kar wõr einwõt. Kar urore million armij ilo Bata eo an Lal Kein Ka II. Elõñlok jen 100 million rar mõn ir im kokkure ir ilo tarinae ko. Kõtõrãik kien im ijjibed rar jededlok. Kajerbal uno in kadõk ko rekajur ej laplok wõt ibelakin lal. Nañinmij ko rekabobo me rej walok jen an maan im kõrã ro babu ibben don ej etal wõt im jelet elõñlok armij. Elõñ million rej mij kajjojo yiõ jen kwuli im nañinmij. Mour in family im aorõk in mour erreo ej mejaljallok wõt ijoko jabdewõt. Ejelok juõn ian kien ko an armij remaroñ letok mejelan abañ kein. Ejelok juõn iair emwij an jolok rittolok, nañinmij, im mij.

Wãwen eo armij ej bed ie kiõ ej einwõt an kar Bible kanan kake kin ien kein ad. Nan in Anij ej kwalok kin tõre in jej bed ie einwõt “ran ko eliktata” in jukjuk im bed in ñe “ien ko renana renaj waloktok.” Im ejja einwõt an kar Bible ba, ‘armij ro renana im ri jelã mon emwij air wõnmanlok im nanalok.’​—2 Timote 3:​1-5, 13.

Ejjabto Enaj Jemlok Eñtan

Aolepen menin kamol ko rej kwalok bwe ien eo kar lelok ñan an armij anemkwoj ñan air kajeoñ kin jabdewõt wãwen ko kajjo wãweiir ikijen air tel ir make im jenolok jen Anij ejjabto enaj jemlok. Emwij kwalok ilo alikar bwe armij eban maroñ lo jerammõn ilo an make iroij im jenoloklok jen Anij. Iroij eo wõt an Anij emaroñ bõktok ainemõn, mõnõnõ, ejmour wãppen, im mour indio. Inem melim eo an Jehovah kin nañinmij im eñtan ej ebaktok jemlokin. Ejjabto Anij enaj emmakit im bõktok jemlok ñan jerbal ko an armij im jolok aolepen jukjuk im bed in ejjab emõn.

Kanan eo ilo Bible ej ba: “Ilo ien an king rein iroij [kien ko an armij ro me rej jerbal kiõ], Anij in lõñ enaj kajutak juõn ailiñ eo ejamin jebeblok, . . . enaj kejebeblok aolepen ailiñ ko jet [kien ko rej bed kiõ], im enaj bed ñõn indrio.” (Daniel 2:44) Karreoik notaiki eo kin iroij bõtata eo an Jehovah, jimwe eo an ñan iroij, ikijen Ailiñ eo an ilañ ej katak eo elap an aorõk ilo Bible. Ke ear kanan kin juõn mõttan elap tokjen kin kakõlle eo kin “ran ko eliktata,” Jesus ear ba: “Im naj kwalok gospel in an ailiñ in lõñ i aolepen lõl kin men in kennan ñõn ailiñ otemjelok; ilo ien eo e naj itok jemlokõn.”​—Matu 24:14.

Ñe ej itok jemlokin, wõn ro renaj ellã im mour? Bible ej uak: “Bwe ro re jime re naj jokwe ilo lõl, im ro re wãppen re naj berwõt ie. A ro re nana, naj kamõkit ir jen eneo.” (Jabõn Kennan Ko 2:​21, 22) Ro rejimwe ej ro rej katak kin ankil an Jehovah im jerbale: “Im men in mour in drio, bwe ren jela Kwe juõn wõt Anij emol, im Jisõs Kraist, eo Kw’ar jilkintok.” (Jon 17:3) Aet, “lõl e jokolok . . . , a eo ej kõmõnmõn ankil an Anij ej berwõt in drio.”​—1 Jon 2:​17.