Ien Jemlokin An Anij Kõtlok Eñtan Ebak
IJOKO otemjej kwoj reito-reitak ie, ewõr eñtan. Bible eo ej kallimur bwe “Anij yokwe.” (1 Jon 4:8) Inem, etke juõn Anij in yokwe ear kõtlok bwe eñtan in en wõnmanlok wõt iumin elõñ ebeben ko?
Ke Anij ear kõmanman Adam im Eve ear likit ilo ir juõn maroñ in kãlet ekkar ñan kõnan eo air. Im men in kar juõn men in letok emõn, bwe “Anij [en] lo men otemjej E ar kõmõnmõni, im lo, re kanuij emõn.” (Jenesis 1:31) Kij aolep jej kaorõk men in letok in maroñ in kãlet.
Bõtab, men in jolet in emõn kar jab aikwij in kajerbale ilo ejelok joñan. Anij ear kõmman bwe armij ren jab ellãlok jen kien ko an me rej jelet enbwiniir, einwõt kien gravity ak eddo. Ejja einlok wõt, ear kõmanman armij bwe ren jab ellãlok jen kien ko an ekkar ñan mour erreo, kien ko renaj jemlok ilo juõn jukjuk im bed eo eburukuk. Inem, kin un in emõn, Nan in Anij ej rejañ: “Kwon liki Jeova kin aolepen buruõm, im kwon jab atartar ion jelalokjen.”—Jabõn Kennan 3:5.
Jimmad im jibwid moktata, Adam im Eve, rar jab kajerbal maroñ in kãlet eo air ilo jimwe. Rar lemnak ilo jab jimwe bwe remaroñ kar makelok iair jen Anij im lo tõbrak. Ekkar ñan jokãlet eo air make, rar jutak ilikin kien ko an.—Jenesis, chapter 3.
Aitwerõk Eo Elap —Iroij Bõtata
Ke Adam im Eve rar jumae Anij, rar aitwerõke iroij bõtata eo an, ak maroñ eo an ñan iroij. Jehovah emaroñ kar kokkure ir im kõmanman bar juõn maan im kõrã, bõtab men in eban kar uake aitwerõk eo kin wõn iroij eo ejimwe im emõntata ñan armij. Elañe ear lelok ien ñan ejaak ailiñ ko ekkar ñan lemnak ko air make, armij ro renaj kamol ilo alikar elañe air kamakelok iair jen Anij enaj kar wõr tõbrak ie.
Ta eo elõñ thousand yiõ ko an bwebwenato in armij rej jiroñ kij kake? Iumin aolepen ebeben kein, nana im eñtan rar wõnmanlok wõt.
Ien jemlokin an Jehovah kõtlok men in im nana im eñtan ej ebak. Mõttan jidik Anij enaj bõk kunan ilo bebe ko an armij. (Daniel 2:44, New World Translation) Eñin wãwen eo Anij enaj kajemlok eñtan. Enaj kokkure lal in enana im kadeloñtok juõn jukjuk im bed eo ekãl im “wãnik im mol renaj bed ie.”—2 Peter 3:13, NW.
Men in ej news eo emõn! Elap ad aikwiji lal in ekãl. Im jejjab aikwij to ad kõttar ñan loe. Jen ke ear jejjet kitien kanan ko ilo Bible eo, jejelã bwe ien jemlokin an Anij kõtlok eñtan ej ebak.