KÕMEL̦EL̦E KO JET
Jijej Kũraij Ej Messaia eo Kar Kallim̦ur Kake
ÑAN jipañ kõj jel̦ã wõn Messaia eo, Jeova Anij ear kõmaroñ elõñ rũkanaan ro ilo Baibõl̦ ñan je aolep mel̦el̦e ko kõn Rũlo̦mo̦o̦r in me ekar kallim̦ur kake. Rũkanaan rein rar tipdiki aolep mel̦el̦e ko renaaj wal̦o̦k ilo iien eo Messaia in enaaj kar l̦otak, iien eo enaaj kar kõm̦m̦ane jerbalin kwal̦o̦k naan eo an, im bareinwõt iien eo enaaj kar mej. Im el̦ap an kabwilõñlõñ bwe aolep kanaan kein ilo Baibõl̦, rar jejjet im alikkar ilo mour eo an Jijej Kũraij. Ñan kam̦oole men in, eokwe jen etale jet iaan kanaan ko rar jejjet kũtieer ke Messaia eo ear l̦otak im bareinwõt ke ear juon ajri jidikdik.
Rũkanaan Aiseia ear kanaan bwe Messaia eo enaaj kar itok jãn bwij eo an Kiiñ Devid. (Aiseia 9:7) Innem eñin men eo ear wal̦o̦k, Jijej ear itok jãn menmenbwij eo an Devid.—Matu 1:1, 6-17.
Bar juon rũkanaan an Anij etan Maika, ear kanaan bwe tokãlik ajri in enaaj juon rũtõl im bwe enaaj l̦otak ilo ‘Betleem Eprata.’ (Maika 5:2) Ilo iien eo Jijej ear l̦otak, ear wõr ruo bukwõn ko ilo Israel me kar etaer in Betleem. Juon iaaer ear pãd iturin Nazeret im eo juon ear pãd iturin Jerusalem ilo Judia. Betleem eo me ear pãd iturin Jerusalem kar n̦aetan ilo iien ko etto, Eprata. Eñin ej bukwõn eo me Jijej ear l̦otak ie, ãinwõt kar kanaan kake!—Matu 2:1.
Bar juon kanaan ilo Baibõl̦ ej ba bwe naaj kar kũrtok Nejin Anij “jãn Ijipt.” Ke Jijej ear juon ajri, jemãn im jinen rar bõke im ko kake ñan Ijipt. Bõtab, ãlikin an kar Herod mej, rar jepl̦aaktok kake jãn Ijipt. Men in ear kajejjete kũtien kanaan in ilo Baibõl̦.—Hoseia 11:1; Matu 2:15.
Ilo laajrak eo etan “Kanaan ko kõn Messaia eo,” eoon ko em̦õj kõllaajraki ium̦win ijo ej ba “Kanaan eo” rej tipdiki jet iaan kanaan ko kõn Messaia eo. Jouj im keidi eoon kein ippãn eoon ko jet ium̦win ijo ej ba “An Jejjet Kũtien.” Am̦ naaj kõm̦m̦ane men in, enaaj kal̦apl̦o̦k am̦ tõmak bwe naan ko ilo Baibõl̦ rem̦ool.
Ilo am̦ naaj etale eoon kein, keememej bwe kar je kanaan kein elõñ bukwi iiõ ko m̦okta jãn an kar Jijej l̦otak. Jijej ear ba: “Naan otemjej em̦õj je kõn eõ ilo Kien Moses, bareinwõt jeje ko an rũkanaan im Sam ko rej aikuj in jejjet.” (Luk 24:44, UBS) Kwõmaroñ make kam̦oole ilo Baibõl̦ n̦e am̦ bwe aolep kanaan kein kõn Messaia eo rar jejjet kũtieer!