KATAK 17

Ewi Wãween an Em̦m̦aan ro me Rej Itoitak im Lol̦o̦k Eklejia ko Jipañ Kõj?

Juon em̦m̦aan ej lol̦o̦k eklejia ko im kõrã eo pãleen — Malawi

Juon em̦m̦aan ej lol̦o̦k eklejia ko ej tõl kweilo̦k in kwal̦o̦k naan — Kweilo̦k in kwal̦o̦k naan

Juon em̦m̦aan ej lol̦o̦k eklejia ko ej kwal̦o̦k naan ilo̦bwilej — Kwal̦o̦k naan

Juon em̦m̦aan ej lol̦o̦k eklejia ko ej kweilo̦k ippãn em̦m̦aan ro rej lale eklejia eo — Kweilo̦k ippãn em̦m̦aan ro me rej lale eklejia

Elõñ alen an Baibõl̦ kõnnaan kõn Barnebas im rijjelõk Paul. Em̦m̦aan rein rar itoitak jãn jikin ñan jikin im lol̦o̦k eklejia ko ilo iien ko etto. Etke? Kõnke rar kõn̦aan jipañ ri tõmak ro m̦õttaer bwe en jab jorrããn jem̦jerã ko aer ippãn Anij. Paul ear ba bwe ear kõn̦aan ‘jepl̦aakl̦o̦k im lol̦o̦k ro jein im jatin’ ilo tõmak im lale ej et aer mour. Ear m̦õn̦õn̦õ in itoitak elõñ buki m̦ail̦ ko bwe en maroñ ilo̦k im kakajoor er. (Jerbal 15:36) Eñin ej bar kõn̦aan eo an aolep em̦m̦aan ro me rej itoitak im lol̦o̦k eklejia ko rainin.

Rej lotok kõj ñan kakajoor kõj. Ñe juon iaan em̦m̦aan rein ej itoitak im lol̦o̦k eklejia ko, ej jol̦o̦k juon wiik ilo kajjojo eklejia. Ej lol̦o̦k kajjojo iaan eklejia kein ruo alen ilo juon iiõ. Elõñ men ko jej katak jãn em̦m̦aan rein im kõrã ro pãleer. Rekõn̦aan jel̦ã kajjied aolep jãn ro redik ñan ro rerũtto. Rej m̦õn̦õn̦õ in kwal̦o̦k naan ippãd im itok ippãd ñe jej katak Baibõl̦ ippãn armej ro. Em̦m̦aan rein rej kobal̦o̦k ippãn em̦m̦aan ro me rej lale eklejia eo im lotok kõj ñan jipañ kõj. Ñe rej kõm̦m̦an aer katak ilo iien kweilo̦k ko im kweilo̦k ko rel̦l̦ap, katak kein aer relukkuun kakajoor kõj.—Jerbal 15:35.

Rej kate er bwe ren jel̦ã kajjien aolep. Em̦m̦aan rein rekõn̦aan jipañ aolep ilo eklejia ko bwe ren epaake Anij. Rej kweilo̦k ippãn em̦m̦aan ro me rej lale eklejia eo kab ri jipañ ro ñan etale tõprak ko rar wal̦o̦k ilo eklejia eo. Rej bar lel̦o̦k naan in jipañ bwe en em̦m̦anl̦o̦k wãween an em̦m̦aan rein kõm̦m̦ani jerbal ko aer. Rej jipañ pioneer ro bwe ren lo el̦ap tõprak ilo aer kwal̦o̦k naan. Rej bareinwõt kate er bwe ren jel̦ã kajjien ro rekããl ilo eklejia eo im roñjake an rein rekããl bwebwenato kõn wõnm̦aanl̦o̦k ko rej kõm̦m̦ani. Aolep em̦m̦aan rein me rej lotok kõj rej m̦õn̦õn̦õ in kõm̦m̦ani aolep men kein ñan jipañ kõj. (2 Korint 8:23) Jej aikuj kajjioñe joñak ko an em̦m̦aan rein kõnke ekajoor tõmak ko aer im el̦ap aer tiljek ñan Anij.—Hibru 13:7.

Etke ewõr em̦m̦aan ro me rej itoitak im lol̦o̦k eklejia ko?
Ewi wãween kwõmaroñ bõk tokjãn jãn iien lotok kein an em̦m̦aan rein?