Ia Eo Jemaroñ Lo Mõnõnõ Eo Emol Ie?

ELÕÑ armij rej lemnak bwe remaroñ lo mõnõnõ eo emol ilo air korlok mweiuk ko. Ewi lemnak eo am? Meñe emaroñ wor joñan mõnõnõ eo ad jen men in kanniek ko, ejjab melelen enaj eindein; im men in kainemõn ko ilo kanniek rejjab kalek tõmak ak kabwe aikwij ko ilo jitõb bareinwõt.

Ilo Katak eo an ion Tol eo, Jesus ear ba: “Emõnõnõ ro rej jela kin aikwij ko air ilo jitõb, bwe air ailiñ in ilõñ. (Matthew 5:3, NW) Bareinwõt Jesus ear ba: “Komin lale, im kejbarok kom jen jabrewõt arõk mweiuk; bwe an armij mour e jab kin an lõñ men ko an.”​—Luke 12:15.

Elõñ armij rej bukõt mõnõnõ ilo air kõmmõn mour in ejej im “jerbal in kõniek ko [jet].” (Galetia 5:19-21) Bõtab, bõk kwunar ilo men in kamõnõnõ ko ilo kanniek ejamin bõktok mõnõnõ eo emol im indio. Emol, ro rej kõmmõn manit kein rejamin jolet Ailiñ in Anij.​—1 Korint 6:9, 10.

Armij ro jet rej jeltok ñõn loair ñõn bõk mõnõnõ ilo air bukõt ial in kautiej ir make. Jikin kokone book ko im mõn wia book ko rej obrak kin book ko rej katakin kin kilen kautiej kij make, ak book kein rar jab bõktok mõnõnõ eo emol. Inem, ia eo jemaroñ lo mõnõnõ eo emol im indio ie?

Ñõn bõk mõnõnõ eo emol, jej aikwij kile aikwij eo ilo jitõb emwij ad jolet jen ien lotak. Jesus ear ba: “Emõnõnõ ro rej jela kin aikwij ko air ilo jitõb.” Emol, enaj ejelok tokjen ñõn kij ñõn melele kin men in im likjap in kõmmõn jabdewõt men. Ñõn wanjoñok: Ta eo enaj walok ñõn juõn ri ettõr eo me elikin iaikwij eo ear kajekdon an enbwinen añũre den in idak? Ejjabto tokelik enaj jabwe den ilo enbwinin im enaj jelmae abañ ko jet? Eindein, elañe jejjab uake aikwij eo ad ñõn kakajur kij kin men ko lor jitõb, ejjabto tokelik jenaj jakolok ilo jitõb. Men in enaj tellok ñõn ad luji lõñliñ im mõnõnõ.

Jesus ilo eyu ear kile aikwij eo an ilo jitõb, ilo an keini in katak im kalmenlokjen kin Nan in Anij. Ear maroñ lo im konono jet mõttan Jeje ko Rekwojarjar ilo bidodo. (Luke 4:16-21; keiri Epesõs 4:20, 21.) Bareinwõt Jesus ear keiri an kõmõnmõn ankil an Jemen ilõñ einwõt mõñã eo kijen. Kõmõnmõn ankil an Anij ear bõktok mõnõnõ eo emol ñõn e.​—John 4:34.

Aet, jejjab maroñ bõk mõnõnõ eo emol ilo ad bõk men ko lor jitõb; bareinwõt mõnõnõ eo ejjab waloktok jen ad kamõnõnõik kannieker. Mõnõnõ eo emol ej juõn wãwen ilo buruer, im ej bedbed ion tõmak eo emol im juõn kõttan emõn ibben Jehovah Anij. Inem, ilo ekkar ñõn, ri jeje psalm David ear al: “Emõnõnõ ro dri ailiñ ñe air Anij Jeova.”​—Psalm 144:15b.

[Pija eo ilo peij 31]

Tõmak im juõn kõttan emõn ibben Anij enaj bõktok mõnõnõ eo emol