Bukõt Mõnõnõ

JEJJO yiõ ko remotlok, kar kajitõk ibben armij ro ilo France, Germany, Great Britain, im United States, “Ta eo jej aikwij kõmmane ñan bõk mõnõnõ?” Ian ro rar uak, 89 percent ian armij rein rar uak im ba bwe ejmour eo emõn eaorõk; 79 percent rar ba bwe rar aikwiji juõn mour in mare ak kõtan emõn; 62 percent rar jitõñlok ñan ãjinkij ko jen air lale ajiri ro nejiir; im 51 percent rar lemnak bwe rar aikwij kabukõt juõn jerbal emõn ñan lo mõnõnõ. Meñe rar katakin enañin aolep armij bwe mõnõnõ ej atartar ion money, 47 percent rar tõmak bwe money ej bõktok mõnõnõ. Ta eo men kein rej kamole?

Moktata, lale kin kõtan eo ikõtan money im mõnõnõ ekkar ñan lemnak eo an jet armij. Juõn etale kar kõmmane ibben jibuki armij ro remweietata ilo United States ear kwalok bwe ejjab laplok air mõnõnõ jen armij ro jet. Bareinwõt, meñe elõñ ilo United States rar korlok mweiuk ko air ruo alen iloan 30 yiõ ko remotlok, ejjab laplok air mõnõnõ jen mokta, ekkar ñan ri kabel ro rej ekkatak kin lemnak an armij. Ilo mol, juõn report ej ba: “Iumin ejja ien in wõt, oran armij ro reburomõj ear orlok wõt. Oran jodikdik ro rej bõk mour ko air ear orlok jilu alen. Oran ri belele ro rej jebel jen don ear orlok ruo alen.” Ilo enañin 50 ailiñ ko, ri etale ro rar katak kin kõtan eo ikõtan money im mõnõnõ im rar kile bwe money ejjab maroñ wiaik mõnõnõ.

Kiõ, ewi joñan aorõkin ejmour eo emõn, mour in mare eo emõn, im juõn jerbal emõn ñan lo mõnõnõ? Eokwe, elañe rar aikwij aolep men kein ñan lo mõnõnõ, ta kin elõñ million armij ro renañinmij im aolep ro me mour in mare eo air ejjab emõn? Ta kin ro emwij air mare ak ejañin wõr nejiir im aolep maan im kõrã ro ejañin wõr juõn air jerbal emõn? Aolep armij rein rej bed ke ilo juõn mour ejjab mõnõnõ? Im mõnõnõ eo an ro emõn ejmour eo air im ro rej juburueir ilo mour in mare eo air enaj jako ke elañe wãwen mour eo air ear oktak?

Ejimwe Ke Jikin Ko Jej Bukõt Mõnõnõ Ie?

Armij otemjej rekõnan mõnõnõ. Jejjab bwilõñ kin men in kinke Ri Kõmanman eo an armij ej juõn “Anij e mõnõnõ,” im kar kõmanmane armij ilo wãwen Anij. (1 Timote 1:​11; Jenesis 1:​26, 27) Inem, ej ekkar ñan wãwen armij bwe ren bukõt mõnõnõ. Bõtab, elõñ rej lo bwe ñan debij wõt mõnõnõ ej einwõt ñe jej debij bok in lojet​—ebidodo an men kein jimor jakolok.

Bõtab, ejjab eñin ke bwe jet armij rej kate ir ellã jen joñan ñan bukõt mõnõnõ? Ri meletlet eo Eric Hoffer ear eindein an lemnak. Ej ba: “Bukõt mõnõnõ ej juõn ian un ko relap unin an armij ro jab mõnõnõ.” Men in emol elaptata ñe jej bukõt mõnõnõ ilo jikin ko rejjab jimwe. Elañe jej kõmman eindein, emol bwe jenaj lo buromõj im bwok. Kajeoñ kate kij bwe jen mweie; jibadõk juõn ãt ebuñbuñ; jibadõk mejenkajjik ko ilo kien, jikin ko reutiej, ak mejenkajjik ko kin mweiuk ko; ak baj mour wõt ñan bukõt kõnan ko ad make im kamõnõnõik kij ilo mõkaj men kein aolep rejjab bõktok mõnõnõ. Jejjab bwilõñ ñe jet armij rej bõk juõn lemnak ekabwokbwok ekkar ñan juõn ri jeje eo ear ba: “Elañe jaar bõjrak in bukõt mõnõnõ inem jenaj kar mõnõnõ”!

Alikar bwe, etale eo kar kamelele kake ilo tujinoin katak in ear kwalok bareinwõt bwe 4 jen 10 armij rar lemnak bwe mõnõnõ ej itok jen ad kõmman emõn im jibañ ro jet. Im 1 jen 4 iair rar ba bwe tõmak im kabuñ ear lap tokjeir ñan bedwõt ilo mõnõnõ. Alikar, bwe jej aikwij lukkun etale im lale kin ta eo jej aikwij kõmmane ñan lo mõnõnõ emol. Katak eo tok ilal enaj jibañ kij ñan kõmman eindein.

[Pija ko ilo peij 3]

Elõñ rej lemnak bwe money, mour einwõt juõn family ejuburueir, ak bõk juõn jerbal emõn ej ki eo ñan lo mõnõnõ. Kwoj errã ke kin men in?