Eunice In Lois Wanjoñok in ro Ri Katakin

Einwõt ro ri karejaran Jehovah, jejelã bwe lelok juõn katak in kabuñ eo ebolemen ñan ajiri ro nejid ej juõn eddo elap. Meñe ilo ien ko remõntata, jerbal in emaroñ obrak kin elõñ kain menin kabañbañ ko im men ko rebin. Im elaplok an eindein ñe juõn Christian jemen ak jinen ajiri ej jelmae aitwerõk in ilo juõn mweo ejebel tõmak in kabuñ ie. Juõn wãwen eo einwõt in ejjab kãl. Jeje ko rej jiroñ kij kin juõn jemen ak jinen ajiri eo ear lo e make ilo juõn wãwen eo einlok wõt in ilo ebeben eo kein kajuõn C.E.

Family eo an juõn kõrã etan Eunice ear jokwe ilo Lystra, juõn bukwon in Lycaonia ilo turõk-tuiolap in Asia Minor. Lystra kar juõn bukwon edik eo ear jab lap an aorõk. Kar juõn jikin ilo bed eo an ri Rome kar etan Julia Felix Gemina Lustra, ijo Augustus Caesar ear kajutake ñan ukõtlok makitkit ko an ri kwot ro ilo melan ko ibelakin. Eunice kar juõn Christian in ri Jew ear jokwe ilo juõn em eo armij ro ie ear jebel air kabuñ ibben leo belen ri Greek, ladik eo nejin Timothy, im lio jinen Lois.​—Jerbal 16:1-3.

Einwõt, ear jab kanuij lõñ ri Jew ilo Lystra, ke Bible ejjab kwalok kin juõn imõn kwelok ijo, meñe ear wõr ri Jew ear bed ilo Iconium, 20 mile ettolok. (Jerbal 14:19) Inem emaroñ kar jab bidodo ñan Eunice ñan an jerbale tõmak eo an. Ke mol eo in bwe Timothy ear jab mwijmwij elikin an lotak menin ear tellok ñan an jet ri kabel ro lemnak bwe leo belen Eunice ear jumae lemnak in.

Bõtab, Eunice ear jab make ian ilo tõmak eo an. Ej alikar bwe Timothy ear bõk an kakabilek ilo “jeje ko rekwojarjar” jen erro jimor jinen im jen lio jibwin, Louis, jinen jinen.a Ri jilek Paul ear kõketak Timothy: “A kwon berwõt ilo men ko kw’ar katak im rel buruõm kaki, bwe kwo jela wõn eo kw’ar katak iben im jen ke kwoj ajiri kw’ar jela jeje ko rokwojarjar, ko re maroñ in kameletlet yuk ñõn lomor kin tõmak eo ej ilo Kraist Jisõs.”​—2 Timothy 3:14, 15.

Katak “Jen Ke Kwoj Ajiri”

Ke Paul ear ba bwe an Timothy katak ilo “jeje ko rokwojarjar” kar lelok ñan e “jen ke kwoj ajiri,” alikar menin kar melelen jen ke ear niñniñ. Menin ej errã ilo an kajerbal nan in Greek eo (breʹphos) eo ekkã an jitõñlok ñan juõn ajiri eo ej kab lotak. (Keidi Luke 2:12, 16.) Kin menin Eunice ear bõk eddo eo an lelok in Anij ilo an lukkun lemnak kake, im jab jerwane ien ilo an jino wõt jen jinoin im lelok ñan Timothy ekkatak eo enaj kar jibañ e ilo an rittolok ñan juõn ri karejar eo etiljek an Anij.​—Deuteronomy 6:6-9; Jabõn Kennan 1:8.

Timothy kar “rel buru[en]” kin mol eo ilo jeje ko. Ekkar ñan juõn dictionary in Greek, nan eo Paul ear kajerbal ijin melelen “ñan reel im bin kake; ñan tõmak” juõn men. Ejelok bere, kajerbal elap ien im jibadbad kar menin aikwij ñan ejaake kain tõmak rot in ebin ilo buruen Timothy, im jibañ e ñan kõmmanwa ion Nan in Anij im jerbale an tõmak ie. Inem, alikar, erro jimor Eunice im Lois rar kate ir jerbal ñan katakin Timothy jen Jeje ko. Im kar juõn jinekjej kõrã rein rej tõmak ilo Anij rar bõk tokjen! Paul ear maroñ jeje kin Timothy: “Ke ij kememej tõmak eo emol ej bed ibbam ilo ejelok jabdewõt etao, im eo ear bed mokta ibben jibũm Lois im jinõm Eunice, ak ij liki bwe ej bareinwõt bed ilo kwe.”​—2 Timothy 1:5, NW.

Juõn jerbal elap tokjen Eunice im Lois rar kõmmane ilo mour eo an Timothy! Ilo wãwen in, ri jeje David Read ej ba: “Elañe ri jilek eo ear tõmak bwe ejelok tokjen ak bwe jelã eo an Timothy make kin oktak in kabuñ, e naj kar mõkaj in kakememej e kake. Ak men eo moktata ear aikwij in ba kake kin tõmak eo an Timothy kar bwe ear ededelok an ‘mour ilo Lois . . . im Eunice.’” Ennan eo an Paul kin tõmak eo an Lois, Eunice, im Timothy ej kalikar bwe katak ko jen Jeje ko ekkã jemen im jinen ajiri ro ak jimmair im jibwiir liloki jen wõt jinoin ilo mweo menin kar juõn bedbed ilo beek jerammõn ko an juõn ajiri ilo jitõb ñan ilju eo an. Menin ejjab aikwij in kõmman ke bwe ro uan family eo ren lukkun lemnak kin ta eo rej kõmmane ñan kajejjet kitien eddo in ñan Anij im ajiri ro nejiir jimor?

Bõlen Paul ear bareinwõt lemnak kin kain mejatoto eo Lois im Eunice rar ejaake ilo mweo. Ri jilek eo emaroñ kar lolok ir imweo imwiir ilo jinoin an bed ilo Lystra, iturinlok 47/48 C.E. Bõlen kõrã ro rar oktak ñan mour in Christian ilo ien eo. (Jerbal 14:8-20) Bõlen okmãnãn in kõtan eo ekamõnõnõ rar lañliñ kake ilo mweo ear kareel Paul ñan kãlet nan ko ke ear jitõñlok ñan Lois einwõt “jibwin” Timothy. Ekkar ñan ri kabel eo Ceslas Spicq, kajin Greek eo ear kajerbale kin nan in (mamʹme, ilo keidi ibben nan in teʹthe) ej “juõn nan an ajiri kin yokwe” ñan lio jibwin, eo ilo nan in kamelele in ej kalikar “juõn kõtan ebak im yokwe.”

Ilok eo An Timothy

Ear jab alikar kin ta wãwen belele eo an Eunice ke Paul ear lolok Lystra ilo lolok eo an kein karuo (iturinlok 50 C.E.). Elõñ ri kabel ro rej lemnak bwe lio ear juõn eo ejako belen. Mekarta, iumin tel eo an jinen im jibwin, Timothy ear rittolok ñan juõn likao eo emõn, bõlen iturinlok 20 yiõ dettan tok ñan ien eo. “Jimjãn jimjãten i Listra im Aikoniõm [rar] nebar e.” (Jerbal 16:2) Alikar, juõn kõnan eo ñan kajeded news eo emõn kin Ailiñ eo emwij kar ejaake ilo buruen Timothy, kinke ear bõk kir eo an Paul ñan an etal ibben im Silas ilo ial eo air ilo jerbal in missionary eo.

Kalmenlokjen kin wãwen eñjake eo an Eunice im Lois ke Timothy ear bojak in ilok jen ir! Rar jelã bwe ilo ien lotok eo kein kajuõn an Paul ñan bukwon eo air, ri bukwon ro rar kade ri jilek eo im likiti bwe en mij. (Jerbal 14:19) Inem emaroñ kar jab bidodo ñan erro in kõtlok jodikdik eo Timothy bwe en ilok. Bõlen, rar lemnak ewi toan an naj kar jako jen ir im elañe enaj kar jeblaktok ñan ir ilo jokane. Meñe emaroñ kar walok abañ rot in, jinen im jibwin ejelok bere rar rejañ e bwe en bõk jerammõn eo enaj kamaroñ e ñan an kalaplok an karejar ñan Jehovah.

Katak ko Raorõk

Elap ijo jemaroñ katak jene ilo ad lukkun etale im lemnak kin Eunice im Lois. Tõmak ear kamakit ir ñan air karittolok Timothy ilo emõn ilo jitõb. An jimman im jibwin joñok eo emõn im bin ilo tiljek ñan Anij rej kwalok ñan ajiri ro jibwiir im ro jet emaroñ lukkun wõr tokjen ñan aolepen congregation eo an Christian. (Titus 2:3-5) Joñok eo an Eunice ilo wãwen in ej kakememej jinen ajiri ro me lõmaro beleir rejjab bed ilo mol eo kin eddo eo im jerammõn ko rej walok jen air katakin ajiri ro nejiir katak ko ilo jitõb. Kõmmane menin emaroñ aikwij elap beran jet ien, elaptata ñe leo jemen ear jab tõmake katak ko an kabuñ eo an lio belen. Menin bareinwõt ej kir ñan jelã kilen, ke Christian kõrã eo ri belele ej aikwij kautiej tel eo an leo belen.

Tõmak, jibadbad, im karmijeteik e make eo an Lois im Eunice rar nawõnãir ilo air lo an Timothy eddeklok ilo jitõb ñan joñan eo ear erom juõn missionary im overseer emõn. (Pilippai 2:19-22) Eindein rainin, katakin ajiri ro nejid kin mol ko ilo Jeje ko ej aikwiji ien, jab burukadu, im beek in kõmmane, ak juõn tõbrak emõn ej walok ej kõmman bwe aolepen jibadbad eo en mol an wõr tokjen. Elõñ Christian jodikdik ro emõn joñok im kar katakin ir ‘jeje ko rekwojarjar jen ke rar ajiri’ ilo juõn mweo armij ro ie rejebel ilo kabuñ rej bõktok elap lañliñ ñan jemeir ak jineir eo ej tõmak ilo Anij. Im emol an jabõn kennan ba: ‘Kõrã eo ej keotak juõn eo emeletlet enaj lañliñ’!​—Jabõn Kennan 23:23-25.

Ri jilek John ear ba kin ajiri ro nejin ilo jitõb: “Ejelok lõñliñ iba elap jen in, bwe in roñ kin an ro nejiõ etetal ilo mol.” (3 John 4) Emol, lemnak eo ej walok ilo nan kein elõñ ro rej errã ie ro rej einwõt Eunice im Lois, ruo wanjoñok in ro ri katakin.

[Kamelele eo itulal]