Jehovah En Men In Liki Eo Ad

“Jeova E naj am men in liki.”​—JABÕN KENNAN KO 3:26.

1. Meñe elõñ rej ba rej liki Anij, ta eo ej kamol bwe rejjab kõmman eindein ien otemjej?

JABÕN KENNAN eo “Jej Liki Anij” ej walok ilo money eo an United States of America. Ak aolep ro rej kajerbal money, ilo ene eo ak jabdewõt jikin, rej lukkun liki Anij ke? Ak elaplok air liki money? Kain liki rot in kin money ejjab maroñ errã ibben liki ilo juõn Anij eyokwe im utiejtata, eo ejjab kajerbal kajur eo an ilo jakkar, im ejjab kibbon. Emol, elukkun dike kibbon.​—Epesõs 5:5.

2. Ta lemnak eo ewõr ibben ri Christian ro remol rej kin kajur in mweie?

² Christian ro remol rej liki Anij, jab mweie, eo ej “mone” armij. (Matu 13:22) Rej kile bwe ewõr joñan kajur in money eo ñan kalaplok mõnõnõ im kejbãrok mour. Ejjab eindein ibben kajur eo an Anij Ekajur Bõtata. (Zephaniah 1:18, New World Translation) Kin men in, elap an meletlet nan in rejañ in: “Komin jab arõk dala; komin jokõne kin men ko ami: bwe E ar ba, I jamin likit yuk, im I jamin illok jen kwe in drio”!​—Dri Hibru 13:5.

3. Ewi wãwen Duteronomi 31:6 ej kalikarlok nan ko an Paul kin eon in?

³ Ke ear jei nan ko ilo paragraph eo ilañ ñan ri Christian Dri Hibru ro, ri jilek Paul ear elij nan in jiroñ ko Moses ear lilok ñan ri Israel ro mokta jen ear mij: “Kwon bin im beran wõt, kwon jab mijõk, im jab lelñoñ kin ir: bwe Jeova am Anij, Eo ej karwõn yuk; E jamin likjõp jen yuk, ak illok jen kwe.” (Duteronomi 31:6) Jeje kein rar kwalok bwe Moses ear rejañ armij bwe ren liki Jehovah ellã jen air baj liki bwe enaj kar kabwe aikwij ko air ilo kanniek. Ewi wãwen?

4. Ewi wãwen Anij ear kamol ñan ri Israel ro bwe rar maroñ liki e?

⁴ Iumin 40 yiõ ko Israel ear jebwãbwe ilo ene jemaden, ilo tiljek Anij ear kabwe men in aikwij ko air kin mour ñan ir. (Duteronomi 2:7; 29:5) Bareinwõt ear tel ir. Juõn wãwen ear kõmman men in kar ikijen juõn kõdo ilo ran im juõn kijeek ilo boñ, im men kein rar tel ir ñan “juõn ene e bwijliplip kin milk im hõnni.” (Exodus 3:8; 40:36-38) Ke emottok ien eo ñan deloñ ilo Enen Kallimur eo, Jehovah ear kãlet Joshua bwe en bõk jikin Moses. Ri ene ro renaj kar jumae. Ak Jehovah ear maaj ibben armij ro an iumin elõñ yiõ ko, inem kar ejelok unin ñan air lelñoñ. Ri Israel ro remaroñ kar liki Jehovah Anij!

5. Ewi wãwen ri Christian ro ran kein rej bed ilo wãwen eo einlok wõt wãwen eo ri Israel ro rar bed ie mokta wõt jen air deloñ iloan Enen Kallimur eo?

⁵ Ran kein ri Christian ro rar maaj ilo ene jemaden in lal in enana kiõ lok ñan lal eo ekãl an Anij. Jet iair rar etetal ilo ial in elõñlok jen 40 yiõ ko. Kiõ rej jutak itõrerein lal eo ekãl an Anij. Ak, ri kijirãt ro rej bineje wõt ial eo, im rekõnan bõpraek jabdewõt armij jen air deloñe jikin eo enaj erom ene eo einwõt Enen Kallimur eo, jikin eo elaplok an aibujuij jen ene eo etto ear ibwijleplep kin milk im honey. Inem ñan Christian ro ran kein, elap an ekkar nan ko an Moses, me Paul ear elij: “E jamin likjõp jen yuk, ak illok jen kwe”! Aolep ro rej kajur im tiljek wõt, obrak kin tõmak, liki Jehovah, renaj jerammõn.

Liki Ej Bedbed ion Jelãlokjen im Jimjeran Don

6, 7. (a) Ta eo ear melejoñe liki eo an Abraham ilo Jehovah? (b) Ewi wãwen kar eñjake eo an Abraham ke ej etal ñan jikin eo ñan an katok kin Isaac?

⁶ Juõn ien eo jimman ri Israel ro Abraham kar kaiñi e bwe en katok kin Isaac nejin ilo kijeek. (Jenesis 22:2) Ta eo ear kamaroñ jemen in eyokwe bwe en wõr liki eo ebin ilo Jehovah im ear bojak in bokake e ilo mõnõnõ? Dri Hibru 11:17-19 ej uak: “Kin tõmak Ebream, ke melejoñ e, e ar katok kin Aisak, im eo e ar mõnõnõ in bõk kalimur ko, ej katok kin juõn wõt nejin e ar keutak; Aet, eo emwij ba kin e, Ineõm re naj walok jen Aisak: Bwe ej lemnok bwe Anij e maroñ in kejerkak e jen ro remij, im e ar bar bõk e jen ijo ilo nan in kõkar.”

⁷ Kememej bwe Abraham im Isaac ear bõk jilu ran ñan air tõbraklok jikin eo rar aikwij kõmmane katok eo. (Jenesis 22:4) Ear lap ien ñan an Abraham oktak lemnak eo an kin ta eo rar kajitõk bwe en kõmmane. Jemaroñ ke kalmenlokjen kin eñjake eo an, buruen? Lotak eo an Isaac ear juõn men in kalañliñ kinke rar jab kõtmene kake. Men in kamol jibañ eo jen lañ ear kamũlallok kõtan eo ear bed ikõtan Abraham, lio ibben eo Sarah, im Anij. Jen ien eo manlok rar kõtmene wõt kin ta kar ilju eo an Isaac im ro nejin. Ettõnak ko airro renaj kar jemlok ke ilo mõkaj, kin men eo Anij ear kajitõkin ir kake?

8. Ewi wãwen liki eo an Abraham ilo Anij ear le jen an baj tõmak wõt bwe Anij emaroñ kar kajerkakbijik Isaac?

⁸ Ak, liki eo an Abraham ear bedbed ion jelãlokjen eo an kin wãwen an armij ro jimjeran don. Einwõt “jeran Anij,” Abraham “e ar tõmak Anij, im emwij watõk e ñõn e einwõt wãnik.” (Jemes 2:23) Liki eo an Abraham kin Jehovah ear ellã jen an baj tõmak wõt bwe Anij emaroñ kar kajerkakbijik Isaac. Abraham ear bareinwõt liki bwe men eo Jehovah ear kajitõk bwe en kõmmane ear juõn men ekkar im jimwe, meñe Abraham ear jab jelã kin aolep un ko. Kar ejelok unin an bere bwe Jehovah ear jimwe kin men eo ear kajitõk kake. Inem, liki eo an Abraham ear kajurlok ke enjel eo an Jehovah ear bõpraek e jen an mõn im katok kake Isaac.​—Jenesis 22:9-14.

9, 10. (a) Ñããt eo lok iman Abraham ear liki Jehovah? (b) Ta katak eo eaorõk jemaroñ katak kake jen Abraham?

⁹ Abraham ear kwalok ejja kain liki rot in kin wãnik eo an Jehovah 25 yiõ ko lok iman. Ke ear bõk nan in kakkõl eo bwe Sodom im Gomorrah enaj kar jeebeplok, ear buromõj kin mour eo an ro ri wãnik rar jokwe ijo, ekoba likao eo wulepen Lot. Abraham ear akwelap ñan Anij kin nan kein: “En etolok jen Kwe bwe Kwon kõmõn ein drein, im mõn ro dru wãnik iben ro dri jerawiwi, im bwe dru wãnik ren einwõt dri jerawiwi; en etolok jen Kwe: Eo ej Iroij in ekajet ñõn aolepen lõl E jamin kõmõn wãnik ke?”​—Jenesis 18:25.

¹⁰ Ri patriarch eo Abraham ear liki bwe Jehovah ejamin kõmman jabdewõt men ilo jab wãnik. Ri jeje Sam eo ear al tokelik: “Jeova e wãnik ilo ial ko An otemjej, im E joij ilo jerbal otemjej An.” (Sam 145:17) Emõn bwe jen kajitõkin kij make: ‘Ij bõk ke men eo Jehovah ej kõtlok bwe in iione im jab bere kin wãnik eo an? Ij tõmak ke bwe jabdewõt men ej kõtlok enaj emõn ñan iõ im armij ro jet bareinwõt?’ Elañe jemaroñ uak aet, inem emwij ad katak jen juõn katak eaorõk jen Abraham.

Kwalok Liki ilo Men Ko Jehovah Ej Kãleti

11, 12. (a) Ta eo ikijen liki ej juõn men in aikwij ñan ri karejar ro an Anij? (b) Ta abañ eo emaroñ bed ibbed jet ien?

¹¹ Ro rej liki Jehovah rej liki bareinwõt kin armij ro Jehovah ej kãlet ir ñan kajejjet kitien karõk ko an. Ñan ri Israel ro, ear melelen bwe ren liki Moses im eo ear bõk jikin tokelik, Joshua. Ñan ri Christian ro mokta, ear melelen air likin ri jilek ro im ro rej ritto ilo jitõb ilo congregation eo ilo Jerusalem. Ñan kij ran kein, ej melelen ad liki “dri korijer e tiljek im meletlet” eo kar kãlet ir ñan najidik kij kin ekan ko kijed ilo jitõb “ilo ien emõn,” im ro uan Governing Body eo.​—Matu 24:45.

¹² Emol, liki ro rej tel congregation eo an Christian enaj tokjen eo ñan kij make. Kar jiroñ kij: “Komin bokake im kõtaik kom ñõn ro rej tel kom, bwe rej lale ami, einwõt ro re naj kwalok kin air kõmõn, bwe ren kwalok im lõñliñ im jab buromõj. Bwe men in e jab men in kakjuror kom.”​—Dri Hibru 13:17.

Jab Notaik Armij Ro Jehovah Ej Kãlet Ir

13. Ta un eo ewõr ibbed ñan liki ro rar kãlet ir ñan tel kij?

¹³ Bible eo ej jibañ kij bwe jen jokkin wõt juõn ilo an liki ro rej tel armij ro an Jehovah. Jemaroñ kajitõkin kij: ‘Moses ear bwid ke? Ri jilek ro rar kwalok ke lemnak eo an Christ ien otemjej?’ Uak ko rej alikar. Jehovah ear kãlet ñan kajerbal maan ro retiljek ñan tel armij ro an, meñe rar jab wãppen. Eindein, meñe elder ro ilo ran kein rejjab wãppen, jej aikwij kile bwe “Jitõb Kwojarjar e ar [kãlet ir einwõt] dri kaki ilo e, bwe [ren] najirik eklesia an Iroij, eo E ar wiaik kin bõtõktõk eo An.” Ej tellokiir bwe jen jurake im kautiej ir.​—Jerbal 20:28.

14. Ta eo ej alikar kin an Jehovah kãlet Moses ijellokin Aaron ak Miriam einwõt ri tel?

¹⁴ Aaron ear jilu yiõ rittolok jen Moses, ak erro rar riklok jen lio jeid, Miriam. (Exodus 2:3, 4; 7:7) Im kinke Aaron ear wejepedik an kennan jen Moses, kar kãlet e einwõt ri kennan eo an jatin. (Exodus 6:29-7:2) Ak, ñan tel ri Israel ro, Jehovah ear jab kãlet Miriam, ak ri wejepedik eo, Aaron. An kãlet Moses ear bedbed ion jelãlokjen eo emol im aikwij ko ilo ien eo. Ke rar likjap ilo juõn ien jen juõn lolokjen ealikar, Aaron im Miriam rar abõnõnõ: “Jeova e ar konono iben Moses wõt ke? E ar jab konono ibemro bareinwõt ke?” Miriam, bõlen ear tel abõnõnõ in, kar kajeik e kin an jab kautiej jokãlet eo an Jehovah, eo me e im Aaron jimor renaj kar aikwij kile e einwõt “e kanuij inemõn, jen armij otemjej rej ber ion mejen lõl.”​—Bwinbwin 12:1-3, 9-15.

15, 16. Ewi wãwen Caleb ear kamol bwe ear liki Jehovah?

¹⁵ Ke 12 ri iaroñroñ ro rar wate Enen Kallimur eo, 10 iair rar kwalok juõn report enana. Rar kalelñoñ ri Israel ro ilo air konono kin ri Canaan ro einwõt “armij [ro] re kanuij inea.” Inem, men in ear kamakit ri Israel ro bwe ren “lotan Moses im Aron.” Ak jab aolep ri iaroñroñ ro rar jab liki Moses im Jehovah. Jej konono: “Im Caleb e ar kokejeklokjen armij rõn iman Moses, im ba, Jen jarõplok im bõk eneo; bwe je kanuij maroñ in bõk anjo jen ir.” (Bwinbwin 13:2, 25-33; 14:2) An Caleb jutak bin ear kobalok ibben ri iaroñroñ eo mõttan Joshua. Erro jimor rar liki Jehovah ke rar ba: “Elañe Jeova ej yokwe kij, inem E naj kadreloñ kij iloan enen, im letok ñõn kij; eneo e bwijliplip kin milk im hõnni. Men in wõt, . . . komin bareinwõt jab mijõk ro dri eneo . . . Jeova ej iber: komin jab mijõk ir.” (Bwinbwin 14:6-9) Liki in ilo Jehovah ear tellok ñan air bõk ãjenkij eo. Jen aolep ritto ro rar mour ilo ien eo, Caleb, im Joshua wõt im jet ian ri Levi ro rar bõk jerammõn eo ñan deloñ ilo Enen Kallimur eo.

¹⁶ Jejjo yiõ ko tokelik Caleb ear ba: “A ña I ar kanuij lor Jeova aõ Anij. . . . Inem kiõ, lo, Jeova e ar kejbarõk aõ mour, einwõt E ar ba, iomin yiõ kein eñoul lailim, jen ien eo Jeova e ar konono nan ñõn Moses, ke Israel e ar etetal ilo ene jemaren: im kiõ, lo, ña ridtõn drualitõkñoul lailim yiõ. Ñõn ien in ña kajur einwõt ilo ran eo ke Moses e ar jilkinlok iõ: einwõt aõ kajur ien eo, ein drein aõ kajur kiõ.” (Joshua 14:6-11) Lale lemnak eo emõn an Caleb, tiljek eo an, im maroñ ko an ilo kanniek. Ak, Jehovah ear jab kãlet Caleb bwe en bõk jikin Moses. Ear lelok jerammõn in ñan Joshua. Jemaroñ liki bwe Jehovah ear kãlet e kin juõn un, im ear juõn jokãlet eo emõntata.

17. Ta eo emaroñ kar kõmman bwe en ejelok an Peter maroñ ñan bõk juõn eddo?

¹⁷ Ri jilek Peter ear karmijetek Master eo an jilu alen. Bareinwõt ear mõmlep ilo an make beek in mwijit lojilñin ri karejar eo an priest eo eutiej. (Matu 26:47-55, 69-75; Jon 18:10, 11) Jet armij remaroñ ba bwe Peter ear mijak armij, jab jokkin wõt juõn, im jab tellokin ñan an bõk jerammõn ko reaorõk. Ak, wõn eo ear bõk key ko an Ailiñ eo, bõk jerammõn eo ñan kabellok ial eo ñan lañ ñan jilu jar in armij ro? Kar Peter.​—Jerbal 2:1-41; 8:14-17; 10:1-48.

18. Ta bwid eo, einwõt an kar Jud kwalok kake, jej aikwij kejbãrok kij jen e?

¹⁸ Wanjoñok kein rej kwalok bwe jen kejbãrok kij jen ad ekajete armij kin ta eo jej loe kin mejed. Elañe jej liki Jehovah, jejamin bere kin men ko ej kãleti. Meñe congregation eo an ion lal ej obrak kin armij ro rejjab wãppen, rejjab ba ejelok air likjap, ej kajerbal wõt ir ilo juõn wãwen eo elap. Jude, eo ear jatin Jesus, ear kakkõl ri Christian ro ilo ebeben eo kein kajuõn bwe rar “kejekron kajur in iroij rõn im konono nana nae wuj ko.” (Jud 8-10) Jejjab kõnan einwõt ir.

19. Etke ejelok unin ñan ad bere jokãlet ko an Jehovah?

¹⁹ Jehovah ej lelok eddo ko ñan armij ro ekkar ñan maroñ ko rej jejjet ñan aikwij ko ñan tel armij ro an ilo wãwen eo ekõnan bwe ren etal ilo ien eo. Jej aikwij kate kij ñan kile mol in, in jab bere kin jokãlet ko an Anij, ak jokane wõt ñan karejar ilo ettã buru ijo Jehovah ear likit kij kajjojo. Ilo wãwen in jenaj kwalok bwe emwij ad kãlet bwe Jehovah en men in liki eo ad.​—Dri Epesõs 4:11-16; Dri Pilippai 2:3.

Kwalok Liki ilo Wãnik eo an Jehovah

20, 21. Ta eo jemaroñ kar katak kake jen wãwen eo Anij ear jerbal ibben Moses?

²⁰ Elañe elap ad liki kij make le jen joñan im ejjab lap ad liki Jehovah, jen katak jen Moses. Ke ear 40 an yiõ, ear make kanemkwoj ri Israel ro jen kamakoko eo an Ri Egypt rõn. Meñe wõnmanlok in kõtõbar ko an emõn, ak rar jab anemkwoj ri Israel ro ilo mõkaj, im kakõmõnmõnlok mour eo an. Emol, ear aikwij ko. Elikin wõt an kar kamineneik e iumin 40 yiõ ko ear bojak in kõmmane men ko ear kõnan kõmmane ilo jinoin. Kiõ ear maroñ liki Jehovah bwe en jibañ e kinke ear kõmman men ko ekkar ñan wãwen eo an Jehovah ilo juõn ien ekkar ñan ien eo An.​—Exodus 2:11-3:10.

²¹ Kij kajjojo jej aikwij kajitõk: ‘Jet ien ij ettõr ke man Jehovah im elder ro ear kãleti ilo congregation eo, kajeoñ in kamõkajlok wãwen ko ak kõmman men ko ekkar ñan lemnak eo aõ make? Jen aõ buromõj kin air jab kãlet iõ kin jet jerammõn ko, ij mõnõnõ ke in bõk ien eo ñan kamineneik iõ?’ Emol, emwij ke ad bõk juõn katak eaorõk jen Moses?

22. Meñe ear luji juõn jerammõn elap, ewi wãwen Moses ear lemnak kin Jehovah?

²² Bareinwõt, jemaroñ bõk bar juõn katak jen Moses. Bwinbwin 20:7-13 ej jiroñ kij kin juõn bwid ear kõmmane, im ear aikwij nawõnãn. Ear luji jerammõn eo ñan tel ri Israel ro ñan loan Enen Kallimur eo. Ear ba ke bwe bebe eo an Jehovah ear jab jimwe? Ear kamakelok ian ke, im jememe wõt kin an Anij ekajete e ilo jab jimwe? Moses ear luji ke liki eo an kin wãnik eo an Jehovah? Jej lo uak ko ilo nan ko an Moses ñan ri Israel ro mokta jen an mij. Kin Jehovah, Moses ear ba:: “An jerbal e wãppen bwe ial ko An otemjej re wãnik juõn Anij in tiljek im ejelok nana iben, E wãnik im jime wõt.” (Duteronomi 32:4) Moses ear liki wõt Jehovah ñan jemlokin. Ta kin kij? Kij kajjojo jej kakajur ke liki eo ad ilo Jehovah im wãnik eo an? Ewi wãwen jemaroñ kõmman eindein? Jen lale.

Ewi Wãwen Kwonaj Kar Uak?

◻ Ta un ko unin an kar ri Israel ro liki Jehovah?

◻ Ikijen liki, ta eo jemaroñ katak jen Abraham?

◻ Etke jej aikwij kejbãrok kij jen ad bere jokãlet ko an Jehovah?

[Pija eo ilo peij 10]

Liki ilo Jehovah ej koba ad kautiej ro rej tel congregation eo