Kakajur Liki Eo Ad Ilo Wãnik Eo An Anij

“Bwe am liki en ber ilo Jeova, emwij aõ lewõj ibbemwõj jelãlokjen.”​—JABÕN KENNAN KO 22:19, New World Translation.

1, 2. (a) Etke Ri Kennan ro an Jehovah rej liki Jehovah? (Jabõn Kennan Ko 22:19) (b) Ta eo ej kwalok bwe jet ian armij ro rej aikwij kakajur liki eo air ilo Jehovah?

CHRISTIAN ro remol rar bõk jerammõn kin jelãlokjen eo ejejjet an Jehovah im karõk ko an. Ilo yokwe “dri korijer e tiljek im meletlet” ej “najirik ir [ilo jitõb] ilo ien emõn.” (Matu 24:45) Jelãlokjen eo emwij air bõki kar lelok ñan ir juõn bedbed ebin ñan liki Anij. Kin men in, einwõt juõn kumi, Ri Kennan ro an Jehovah elap air liki Jehovah im wãnik eo an.

² Bõtab, ej alikar bwe jet ian Ri Kennan ro rej aikwij kakajurlok liki rot in. Jet ien Society eo ej bõk letter ko rej kalikar air bere kin kamelele ko ilo book ko an. Bere kein remaroñ kar walok kin kamelele ko rar ukõti, ak kin katak ko kar jelet ro rar jomantak kajitõk ko, elaptata ilo juõn wãwen ear lel burueir.​—Keidi Jon 6:60, 61.

3. Ta eo emaroñ walok ñan ri karejar ro an Jehovah bareinwõt, im etke?

³ Ri karejar ro remol an Jehovah rej bareinwõt lo mol eo ilo Ekklisiastis 9:11: “I ar jeblaktok, im reilok iomin al, bwe iaikwij e jab ñõn eo e mõkõj wõt, ak keitak ñõn eo e kajur wõt, ak bareinwõt ekõn ñõn ro dri meletlet wõt, ak mweiuk ko ñõn armij in jelalokjen wõt, ak joij ñõn armij re kabel wõt: a ien im men in walok rej itok ñõn ir otemjej.” Ewi wãwen emaroñ mol men in ilo bar juõn wãwen ak ilo jitõb? Jemaroñ kar jelã kajjen Christian ro rar mõkaj in jerbali nan in kakabilek ko an Bible, beran ilo air jojomare mol eo, meletlet ilo wãwen air jerbali kien ko an Bible, im kijejeto ilo air jibadõk jelãlokjen eo ejejjet. Ak, kin an “ien im men in walok rej itok” wõt, jet iair remaroñ lo bwe ejjab lap air maroñ kõmman men ko kiõ jen mokta kin air bed ilo jorrãn ak rittolok. Remaroñ lemnak elañe renaj deloñ ilo lal eo ekãl an Anij im jab aikwij mij.

4, 5. Etke ejelok un ibben Christian ro ñan luji air liki kin wãnik eo an Jehovah?

⁴ Ñe juõn Christian ej luji eo belen, ebwe an lap an eñtan kake. Erro jimor rar jerbal ñan Jehovah iumin elõñ yiõ ko. Ri belele eo emour wõt ej jelã bwe mij ej kajemlok belele eo airro.a (1 Dri Korint 7:39) Kiõ, ñan kejbãrok e jen an ebwer, ej aikwij kijenmij wõt im debij eñjake ko an.​—Keidi Mark 16:8.

⁵ Elap an meletlet bwe jen watõk ien mij eo an ri belele eo mõttad, jemed ak jined, nejid, ak Christian jerad einwõt juõn ien emõn ñan kwalok ad liki ilo wãnik eo an Jehovah! Meñe jemaroñ luji men ko mweieir, jemaroñ liki bwe Jehovah ej wãnik wõt. Jemaroñ liki bwe jabdewõt armij ej bõk mour indio​—elañe jab le jen eñtan eo elap inem ilo ien jerkakbiji​—enaj mõnõnõ. Ikijen Anij, ri jeje sam ear ba: “Kwoj erlokwe peiõm im kamat air kõnan ñõn men otemjej remour. Jeova e wãnik ilo ial ko An otemjej, im E joij ilo jerbal otemjej An. Jeova ej ebak ñõn ir otemjej rej kir ñõn E, ñõn ro otemjej rej kir ñõn E ilo mol. E naj kamol kõnan an ro remijõk E; e naj bareinwõt roñjake air lamij im lomorir.”​—Sam Ko 145:16-19.

Ñe Jej Buromõj Ñe Jejjab Aikwij

6, 7. (a) Etke jet ian Ri Kennan ro me rar eñtan mokta remaroñ bõk juõn lemnak einjuõn kiõ? (b) Etke jejjab kõnan ba bwe Jehovah ejjab wãnik kin an kõtlok eñtan ilo ien eo mokta?

⁶ Jemaan, jet ian Ri Kennan ro rar eñtan kin air jab bõk kunair ilo juõn jerbal ear jelet bõklikit eo air. Ñan wanjoñok, men in emaroñ kar jerbal ñan jokãlet eo air ikijen jet kain jerbal kar naetan civilian service rar kãleti jemaan. Kiõ kin juõn bõklikit emõn juõn brother beek in kõmmane im jab rupe kien eo ikijen jab bõk kunan ilo politic ak tarinae ilo jukjuk im bed in ran kein.

⁷ Kar juõn men ejjab wãnik ke bwe Jehovah en kar kõtlok e bwe en eñtan ilo ien mokta kin juõn men emõn an kõmmane kiõ? Enañin aolep ro rar bed ilo ejja wãwen rot in remaroñ kar ba jaab. Jen men in, renaj kar lañliñ bwe men in ear kabellok juõn ien emõn ñan kwalok ilo alikar iman mejen armij ad jutak bin ilo tiljek ñan aitwerõk eo kin wõn eo ej iroij bõtata eo ilañ im ion lal. (Keidi Job 27:5.) Ta un eo unin an jabdewõt armij ñan jutak bin ibben Jehovah? Ilo ad kejbãrok kien ko an Christian ilo tiljek ke rar melele kake ir ak ilo air jerbal ekkar ñan bõklikit eo air, rar kamol ir einwõt ro ej tellokin air bõk jimjeran Jehovah. Mol, emeletlet bwe jen kejbãrok kij jen ad kokkure bõklikit eo ad ak kalõkatip armij ro jet. Jemaroñ lemnak kin wanjoñok eo an ri jilek Paul.​—1 Dri Korint 8:12, 13; 10:31-33.

8. Etke kar ejelok un ibben Christian ri Jew ro, me rar bokake Kien eo, ñan bere kin wãnik eo an Jehovah?

⁸ Ñan kabuñburuen Jehovah, ri Jew ro rar aikwij bokake Kien Ko Joñoul im 600 kein ko jet. Tokelik, iumin kein eo an Christian, bokake kein kein ear jab juõn men in aikwij ñan karejar ñan Jehovah, jab ri Jew ro ilo kanniek bareinwõt. Kien ko rar jab aikwij bokake rar koba kien in mwijmwij, kejbãrok ran in Sabbath, katok men in mour ko, im kejbãrok ir jen jet mõñã ko kijeir. (1 Dri Korint 7:19; 10:25; Dri Kolosse 2:16, 17; Dri Hibru 10:1, 11-14) Ri Jew ro​—ekoba ri jilek ro​—me rar erom Christian ro kar kõtlok ir jen air kejbãrok kien ko iumin bujen Kien eo an Moses. Rar abõnõnõ im ba ke bwe karõk eo an Anij ear jab wãnik kinke ear kakien ir mokta bwe ren kõmman men ko rar jab aikwij kõmmani kiõ? Jaab, rar mõnõnõ in kalaplok air melele kin karõk ko an Jehovah.​—Jerbal 16:4, 5.

9. Ta mol eo ear bed ibben jet ri Kennan ro, ak etke ejelok unin air aikwij buromõj kake?

⁹ Ilo ran kein ad, kar wõr jet ri Kennan ro rar lukkun kijñeñe kin ta men ko rar kõmmani im jab kõmmani. Kin unin elaplok air kar eñtan jen armij ro jet. Tokelik, jelãlokjen eo elaplok ear jibañ ir ñan kalaplok air melele kin men ko. Ak ejelok unin air buromõj kin jerbal eo air mokta ekkar bõklikit eo air, meñe ear bõktok eñtan ioir. Ej juõn men in kajerammõn ibbeir bwe rar mõnõnõ in bõk eñtan ilo tiljek ñan Jehovah, bwe “men otemjej [rej] kõmõni kin gospel.” Jehovah ej kajerammõn kain kabuñ rot in. (1 Dri Korint 9:23; Dri Hibru 6:10) Ri jilek Peter ear je ilo lolokjen: “Elañe komij kijenmij ñe kom kõmõn emõn im iñtan kake, men in ej kabuñburuen Anij.”​—1 Piter 2:20.

Katak Jen Jonah

10, 11. Ewi wãwen ekar dik an Jonah kwalok liki ilo Jehovah (a) ke ear bõk jerbal eo ñan etal ñan Nineveh? (b) ke Anij ear jab kokkure ri Nineveh ro?

¹⁰ Ke an kar jiroñ e bwe en etal ñan Nineveh, Jonah ear jab kamolol kin wãwen an kar Jehovah liki e. Elikin an kar lelñoñ kin an jab bokake, Jonah ear kajimwe lemnak eo an, kile bwid eo an, bõk jerbal eo an, im kakkõl ri Nineveh ro kin jeebeplok eo enaj kar buñ ioir. Ak juõn men ear jab kõtmene kake ear walok: Kin an ri Nineveh ro ukwelok, Jehovah ear jab kokkure ir.​—Jonah 1:1-3:10, NW.

¹¹ Kar ewi lemnak eo an Jonah? Ilo jememe, ear abõnõnõ ñan Anij ilo jar. Abõnõnõ eo an kar einlok wõt in: ‘Iar jelã bwe men kein renaj kar walok. Eñin unin iar jab kõnan etal ñan Nineveh jen mokta Kiõ, elikin aõ bed ilo aolep abañ kein, ekoba aõ lelñoñ im jook kin aõ bed ilo juõn ik kileplep, im elikin an lap aõ jerbal ñan kakkõl ri Nineveh ro kin jeebeplok eo air, inem men in ej kab walok! Ejelok tokjen aolep jerbal im eñtan ko aõ! Emõnlok bwe In mij!’​—Jonah 4:1-3.

12. Ta eo jemaroñ katak jen joñok eo an Jonah?

¹² Kar wõr ke juõn un emõn ñan an Jonah abõnõnõ? Jehovah ear jab wãnik ke kin an tiriamokake ri ukwelok ro? Ilo mol, Jonah en kar aikwij lañliñ; elõñ thousand armij ro rar rõlok jen jeebeplok eo! (Jonah 4:11) Ak lemnak eo an eabõnõnõ im ejelok kautiej ear kwalok bwe ear jab liki ekajet jimwe eo an Jehovah. Ear lemnak kin emake le jen joñan im jidik wõt an lemnak kin ro jet. Jej aikwij katak jen joñok eo an Jonah ilo ad likit eñjake im lemnak ko ad make ilikin lemnak eo an Jehovah. Jej aikwij tõmak bwe bokake Jehovah, lor kien ko an rej itok jen dolul eo an im bõk bebe ko an, ej men eo ejimwe ñan kõmmane. Jej tõmak bwe “e naj emõn iben ro rej mijõk Anij.”​—Ekklisiastis 8:12.

Kiõ Ien Emõn ñan Kakajur Liki Eo Ad!

13. Ewi wãwen kij aolep jemaroñ kakajurlok liki eo ad ilo Jehovah?

¹³ Kakajurlok liki eo ad ilo Jehovah ej juõn men in meletlet. (Jabõn Kennan Ko 3:5-8) Emol, elõñlok men ko jej aikwij kõmmani jen ad jar wõt bwe Jehovah en jibañ kij ñan kalaplok liki eo ad. Liki ej eddeklok ekkar ñan jelãlokjen eo ejejjet, inem jej aikwij kõmman bwe katak Bible ibbed, konono Bible im book in Bible ko, rej mõttan schedule eo ad ran otemjej. Ekkeini ad bed ilo kwelok ko an Christian ej juõn men eaorõk, ekoba ad kebojak im bõk kunad ilo kwelok ko, joñan wõt ad maroñ. Kõmman juõn manit ñan kwalok katak ko remol jen Bible ñan ro jet, jelã kilen uake kajitõk ak nan in jumae ko, ej kamũlallok liki eo ad ilo Jehovah im Nan eo an. Jej kalaplok wõt kõtan eo ad ibben jen ran ñan ran.

14. Etke mõttan jidik armij ro an Anij renaj aikwij kwalok liki ilo Jehovah ilo juõn joñan rejañin kwaloke mokta?

¹⁴ Ilo ran ko rej ebaktok wõt, eñtan eo elaptata ñan kokkure armij enaj waloktok ilo idiñ. (Matu 24:21) Ñe ej walok, ri karejar ro an Anij enaj lap air aikwij liki wãnik eo an Jehovah im tel eo an dolul eo an. Ilo juõn wãwen kõkkar, renaj liki ilo kiblie kien eo an Anij: “Komin itok, eo Aõ dri ailiñ, komin dreloñ na ilo rum ko am, im kil aur ko iturõm: kwon tilekek jirik ien, mae ien illu eo e naj joko.” (Aiseia 26:20) Ererelok air deloñ ilo jikin kone eo ilo elõñlok jen 85,000 congregation ko ilo 232 ailiñ ko. Meñe emaroñ wõr men ko jet rej kobalok ibben nan in jiroñ in “dreloñ na ilo rum ko am,” jemaroñ liki bwe Jehovah enaj jibañ kij ñan kõmmani.

15. Ewi wãwen rar kwalok aikwij eo ñan liki ilo 1998, im etke ej juõn men ejimwe?

¹⁵ Ej juõn men in aikwij bwe jen kakajurlok liki eo ad kiõ. Elañe jejjab liki Christian ro jeid im jatid, ilo dolul eo an Jehovah im, elaptata, Jehovah, jejjab maroñ bõk lomor. Inem elap an emõn bwe ilo 1998, Ri Kennan ro an Jehovah ibelakin lal rar elij unleplep in yiõ eo air, bwe “ro otemjej rej kir etan Iroij re naj mour”! (Dri Rom 10:13) Kin unin jej aikwij liki wõt. Elañe jej kile ad kadiklok liki eo ad meñe jidik wõt, jej aikwij kate wõt ñan kajimweike kiõkiõ, aet, rainin.

Ekajet eo an Jehovah Enaj Wãnik

16. Ta eo emaroñ walok ñan liki elañe jejjab kaddeklok e, im ewi wãwen jemaroñ kejbãrok jen ad walok men in?

¹⁶ Ilo Dri Hibru 3:14, Christian ri kabit ro rar bõk nan in kakkõl in: “Bwe kij jej dri bõk mõtõn Kraist, elañe jej drebij wõt aruij liki ñõn jemlokõn einwõt ilo jinoin.” Einwõt juõn nan in kaiñi, nan kein rej jerbal ñan Christian ro rej kejatdikdik in mour ion lal. Liki ilo jinoin emaroñ jakolok elañe jejjab kalaplok e. Elap an aorõk bwe jen jibadõk jelãlokjen eo ejejjet, kakajurlok foundation eo liki eo ad ej bedbed in!

17. Etke jemaroñ liki bwe ikijen ad ellã im mour, Jesus enaj ekajet ilo jimwe?

¹⁷ Mõttan jidik Christ enaj ekajete ailiñ otemjej bwe en “kijbil ir jen dron, einwõt s̃eperd ej kijbil s̃ip ko jen goat ko.” (Matu 25:31-33) Jemaroñ liki bwe Christ enaj ekajet ilo wãnik wõn ro ej tellokin air bõk lomor. Jehovah ear lelok ñan e meletlet, lolokjen, im kadkad ko jet ej aikwiji ñan “ekajet ro dri lõl ilo wãnik.” (Jerbal 17:30, 31) Jej aikwij liki joñan wõt Abraham, eo ear ba: “En etolok jen Kwe [Jehovah] bwe kwon kõmõn ein drein, im mõn ro dru wãnik iben ro dri jerawiwi, im bwe dri wãnik ren einwõt dri jerawiwi; en etolok jen Kwe: Eo ej Iroij in ekajet ñõn aolepen lõl E jamin kõmõn wãnik ke?”​—Jenesis 18:25.

18. Etke jejjab aikwij buromõj le jen joñan kin men eo jej jaje kake ilo ran kein?

¹⁸ Ilo liki eo ad eyu ilo wãnik eo an Jehovah, jejjab aikwij inebata kin kajitõk ko einwõt: ‘Ewi wãwen an naj ekajete niñniñ im ajiri ro? Emaroñ ke bwe news eo emõn ejamin tõbar jarlepju in armij ro ñe emottok Armageddon? Ta kin ro renañinmij ilo kamelij ak handicap? Ta kin . . . ?’ Emol, jejjab jelã kiõ kin ewi wãwen Jehovah enaj uaki kajitõk kein. Bõtab, enaj uaki ilo juõn wãwen ewãnik im tiriamokake. Jejjab kõnan bere kake men in. Emol, jemaroñ bwilõñ im mõnõnõ ñan lo wãwen eo enaj uaki men kajitõk kein ilo juõn wãwen jejañin lemnak kake mokta.​—Keidi Job 42:3; Sam Ko 78:11-16; 136:4-9; Matu 15:31; Luk 2:47.

19, 20. (a) Etke ejjab nana ad jomantak kajitõk ko remõn? (b) Ñããt eo Jehovah enaj kwalok uak ko jej aikwiji?

¹⁹ Dolul eo an Jehovah ejjab kabwer kij jen ad jomantak kajitõk ko rejimwe im jejjet, einlok wõt jet ri jumae ro rar ba ilo bwid. (1 Piter 1:10-12) Bõtab, nan in kakabilek ko an Bible ej kakabilek bwe jen jab jomantak kajitõk ko rebwebwe, im ejelok bedbed ie. (Taitõs 3:9) Jomantak kajitõk ko remõn im kabukõt uak ko ilo Nan in Anij im Christian book ko emaroñ kalaplok jelãlokjen eo ad ejejjet im kakajurlok liki eo ad ilo Jehovah. Dolul eo ej lor joñok eo an Jesus. Ear jab uake kajitõk ko rejamin kar jerbal ilo ien eo. Ear kamelele: “Bar lõñ men ko iba In ba ñõn kom, a kom jab maroñ in bõki kiõ.” (Jon 16:12) Ear ba bareinwõt bwe kar wõr jet men ko ear jaje kake ilo ien eo.​—Matu 24:36.

²⁰ Ebar wõr men ko jet Jehovah ej aikwij kwaloki. Emenin meletlet bwe jen kõttar e, liki bwe enaj kwalok karõk ko an ilo ien eo ekkar ñan aikwij eo. Jemaroñ liki bwe ñe emottok ien eo an Jehovah, jenaj kalaplok lolokjen eo ad kin wãwen ko an. Aet, jenaj jerammõn, elañe ilo eyu jej liki Jehovah im dolul eo an ej kajerbale. Jabõn Kennan Ko 14:26 ej kallimure kij: “Ilo mijõk Jeova, eor liki e kajur; im ro nejin, re naj lo jikin kone.”

[Kamelele eo itulal]

Ewi Lemnak Eo Am?

◻ Etke ejjab men in meletlet ñan kõtlok bwe eñjake ko ilo kanniek rej kokkure liki eo ad ilo Jehovah?

◻ Ta eo jemaroñ katak jen joñok eo an Jonah?

◻ Etke elap an aorõk ad bed ilo kwelok ko im katak Bible?

[Pija eo ilo peij 14]

Meñe jemaroñ luji men ko ad, jemaroñ liki bwe Jehovah ej wãnik

[Pija ko ilo peij 16]

Kwoj tõmak ke bwe kwoj liki Jehovah?