Etetal Ibben Anij​—Ñan Indio

“Kimnaj . . . etetal ilo etan Jehovah am Anij ñan indio.”​—MICAH 4:5, New World Translation.

1. Etke jemaroñ naetan Jehovah “Kiñ ñan indio”?

JEHOVAH ANIJ ear ejelok jinoin. Ejejjet bwe ren kar naetan “Eo Ej Jen Ran Ko Etto,” kinke ear bed jen indio. (Daniel 7:9, 13, NW) Jehovah enaj bed ñan indio bareinwõt. Ej make wõt “King ñan indio.” (Revelation 10:6; 15:3, NW) Im iman mejen, juõn thousand yiõ rej einwõt “inne ke ejoko, im einwõt juõn mmij ilo boñ.”​—Sam 90:4.

2. (a) Ta karõk eo an Anij kin armij ro rekiblie? (b) Ion ta eo jej aikwij kejatdikdik im karõk ko ad ren bedbed ioir?

² Kinke Ri Letok mour eo ej mour ñan indio, emaroñ kar lelok ñan armij ro ruo moktata, Adam im Eve, juõn kejatdikdik ñan mour indio ilo Paradise. Bõtab, kin jab bokake, Adam ear luji maroñ eo ñan mour indio, im ear lelok jerawiwi im mij ñan ajiri ro nejin. (Dri Rom 5:12) Ak, jumae eo an Adam ear jab kokkure karõk eo an Anij jen jinoin. Ej ankil an Jehovah bwe armij ro rekiblie ren mour ñan indio, im ejamin likjap in kajejjet kitien karõk eo an. (Aiseia 55:11) Inem, ej juõn men ekkar bwe jen likit kejatdikdik im karõk ko ad ion ad karejar ñan Jehovah ñan indio. Meñe jej kõnan kememej wõt kin “ran in Iroij” eo, ej aorõk ñan kememej bwe mejenkajjik eo ad ej ñan etetal ibben Anij ñan indio.​—2 Piter 3:12.

Jehovah Ej Jerbal ilo Ien Eo Emwij An Kãlete

3. Ewi wãwen jej jelã bwe ewõr an Jehovah “ien eo ejejit” ñan kajejjet kitien karõk ko an?

³ Einwõt ro rej etetal ibben Anij, jej lukkun kõnan kajejjet kitien ankil an Anij. Jej jelã bwe Jehovah ej Ri Lale Awa eo Elap, im jej liki bwe ejamin likjap in kajejjet kitien karõk ko an ekkar ñan ien eo an. Ñan wanjoñok, “ke ien eo ejejit, Anij e ar jilkintok Nejin.” (Dri Galetia 4:4) An kar jiroñ ri jilek John bwe en wõr juõn “ien” ñan kajejjet kitien men in kanan eo ear loi ilo kakõlle ko. (Reveles̃õn 1:1-3) Ewõr “ien ekajet ro remij.” (Reveles̃õn 11:18) Elõñlok jen 1,900 yiõ ko remotlok, ilo kakõrmol ri jilek Paul ear ba bwe Anij “e ar likit juõn ran, iomin ran eo E naj ekajet ro dri lõl ilo wãnik.”​—Jerbal 17:31.

4. Ewi wãwen jej jelã bwe Jehovah ekõnan kajemlok jukjuk im bed in enana?

⁴ Jehovah enaj kajemlok jukjuk im bed in enana, kinke lal in ej katton ãt eo etan ilo ran kein. Ri nana ro rar eddek einwõt ujoj. (Sam 92:7) Ikijen nan im jerbal ko air, rej kalõkatip Anij, im ej kaburomõj e ñe ej lo ro ri karejaran rej bed ilo eñtan im matõrtõr. (Zechariah 2:8, NW) Ejelok bwilõñ bwe Jehovah ear kakien bwe mõttan wõt jidik im aolepen dolul eo an Satan renaj jako! Emwij an Anij bebe kin ñããt eo enaj walok men in, im nan in kanan ko ilo Bible emwij air jejjet rej kalikar bwe jej mour ilo “ien jemlokin.” (Daniel 12:4  NW) Mõttan jidik enaj kajerammõn aolep ro rej yokwe e.

5. Ewi wãwen Lot im Habakkuk rar watõk wãwen ko ibelakiir?

⁵ Ri karejar ro an Jehovah ilo ien etto rar kijoror in lo ien jemlokin ien ko renana. Ri wãnik eo Lot ear “elap an buromõj kin an ro dri nana kõmõn ilo ejej.” (2 Piter 2:7) Kin an buromõj kin wãwen ko ibelakin, ri kanan eo Habakkuk ear akwelap: “Ewi toan, O Jehovah, ij aikwij lamij im kajitõk kin jibañ, im kwojjab roñjake? Ewi toan aõ aikwij kir yuk ñan jibañ iõ jen kowadoñ in, im kwojjab lomoren iõ? Etke kwoj kõtlok iõ bwe in lo men ko rej kaeñtan armij, im kwoj kalimjek wõt abañ ko? Im etke men ko emwij rakimi im kowadoñi rej bed imaõ, im etke ewõr akwelel, im etke ewõr tarinae?”​—Habakkuk 1:2, 3, NW.

6. Ta eo Jehovah ear ba ñan uake jar eo an Habakkuk, im ta eo jemaroñ katak jen men in?

⁶ Ilo juõn joñan edik, Jehovah ear uake Habakkuk ilo nan kein: “Vision eo enaj jejjet kitien ilo ien ekkar, im ej wõnmanlok wõt ñan jemlokin, im enaj jejjet kitien, im ejamin riap. Meñe emaroñ rumij, kwon kijoror wõt kake; bwe enaj jejjet kitien. Ejamin rumijtok.” (Habakkuk 2:3, NW) Inem Anij ear kalikar bwe enaj kar emmakit ilo “ien eo” emwij karõki lok iman. Meñe emaroñ kar einwõt rumij an itok, Jehovah enaj kajejjet kitien karõk eo an​—ilo ejelok likjap!​—2 Piter 3:9.

Karejar Ilo Kijejeto Eo Ejjab Mõk

7. Meñe Jesus ear jab lukkun jelã ñããt eo ran eo an Jehovah enaj kar itok, ewi wãwen ear wõnmanlok ilo jerbal ko an?

⁷ Ej ke juõn men in aikwij bwe jen jelã kin ien eo ejejjet Jehovah enaj kajejjet kitien karõk ko an ñan ad etetal ilo kijejeto ibben Anij? Jaab ñan jidik. Kalmenlokjen kin jet wanjoñok ko. Jesus ear itoklimo kin ien eo Anij enaj kar kõmanmõn ankil an ion lal einwõt ilañ. Emol, Christ ear katakin ri kalor ro ñan jar: Jememuij i lõñ, En kwojarjar Etõm. En itok Am ailiñ. Ren kõmõnmõn ankil Am einwõt i lõñ, bareinwõt ion lõl.” (Matu 6:9, 10) Meñe Jesus ear jelã bwe kajitõk eo an ear kar uake, ear jab jelã kin ien eo ejejjet enaj kar walok. Ilo kanan eo an elap ikijen jemlokin jukjuk im bed in, ear ba: “A ran eo im auõ eo ejelok juõn e jela kake, im jab enjel ro i lõñ, jab Nejin, a Jema wõt.” (Matu 24:36) Kinke Jesus Christ ej bedbed eo ñan kajejjet kitien karõk ko an Anij, ej e eo enaj kunan ñan kokkure ri kijirãt ro an Jemen ilañ. Bõtab, ke Jesus ear bed ion lal, ear jab jelã ñããt eo Anij enaj kar jerbal. Ak ear melelen men in ke bwe en kadiklok an jerbal ilo kijejeto ñan Jehovah? Jaab ñan jidik! Ke rar lo an Jesus kijejeto ilo an karreoik temple eo, ro “dri kaloran [rar] kememej bwe ar je, Kijejeto kin mweo imõm e naj kõñ iõ.” (Jon 2:17; Sam 69:9) Jesus ear boub wõt kin jerbal eo kar jilkintok e bwe en kõmmane, im ear kõmmane ilo kijejeto eo ejelok mõk ie. Bareinwõt ear karejar ñan Anij ilo ejelok jemlokin.

8, 9. Ke ri kalor ro rar kajitõk kin ien jeblak eo an ailiñ eo, ta eo kar jiroñlok ir, im ewi wãwen rar uak?

⁸ Men in ear mol ñan ri kalor ro an Christ bareinwõt. Jesus ear kwelok ibbeir mokta jen an kar wanliñlok ñan lañ. Bwebwenato eo ej ba: “Inem ke rej kweloklok, rej kajitõk iben im ba, Iroij, kwoj bar karõk ailiñ in Israel ien in ke? Im Ej ba ñõn ir, E jab emõn ami jela ien ko, ak tere ko Jema e ar likiti ilo An kajur. A kom naj bõk maroñ ñe emwij an Jitõb Kwojarjar itok iomi: im kom naj Aõ dri kennan ilo Jerusalem, im i aolepen Judia, im i Sameria, im ñõn eneo etolok tata i lõl.”​—Jerbal 1:6-8.

⁹ Ejelok jabdewõt men ear kalikar bwe ri kalor ro rar ebwer kin uak in. Jen men in, rar kijejeto im boub wõt ilo jerbal in kwalok nan. Iumin jejjo wõt week, rar kobrak Jerusalem kin nan in katak ko air. (Jerbal 5:28) Im iumin 30 yiõ ko, rar kalaplok jerbal in kwalok nan eo air ñan joñan eo bwe Paul ear maroñ ba bwe rar kwalok news eo emõn ñan armij “ro otemjej rej ber iomin lõñ.” (Dri Kolosse 1:23) Meñe ear jab “bar karõk ailiñ in Israel” eo einwõt ri kalor ro rar kõtmene kake ilo bwid im ear jab jutak ilañ ilo ien mour eo air, rar jerbal wõt ilo kijejeto ñan Jehovah kin ejelok jemlokin.

Etale Un Ko Ad

10. Ad jab jelã ñããt eo Anij enaj kokkure jukjuk im bed eo an Satan ej kõtlok kij bwe jen kamol ta?

¹⁰ Ri karejar ro an Jehovah ilo ran kein rej kõtmene bareinwõt ñan lo jemlokin jukjuk im bed in enana. Bõtab, mejenkajjik eo ad elaptata, ejjab ñan deloñlok ñan loan lal eo ekãl Anij ear kallimur kake. Jej kõnan lo bwe ãt eo etan Jehovah en kwojarjar im kautiej wãwen iroij eo an. Kin men in, jemaroñ lañliñ bwe Anij ear jab jiroñ kij kin ‘ran ak auõ’ eo ear karõk ñan kokkure jukjuk im bed eo an Satan. Men in ej kõtlok kij ñan kamole bebe eo ad ñan etetal ibben Anij ñan indio kin ad yokwe e im jab kin mejenkajjik ko ad rekibbon.

11, 12. Ilo wãwen et eo kar aitwerõke tiljek eo an Job, im ewi wãwen aitwerõk in ej jelet kij?

¹¹ Debij wõt ad tiljek ñan Anij ej jibañ kij bareinwõt ñan kamol bwe Satan ear bwid ke ear ba bwe ri wãnik eo Job​—im armij ro einwõt e​—rej karejar ñan Anij kin kõnan ko air rekibbon. Elikin an kar Jehovah kalikar bwe Job eo ri karejaran ear juõn armij ejelok ruõn, ewãnik, im emijak Anij, Satan ear naruõn im ba: “Kwar kalmõnlokjen kake dri korijera Job ke? bwe ejelok einwõt ilo lõl, juõn armij e wãppen im wãnik, eo ej mijõk Anij im jeorlok jen nana. Inem Setan e ar uak Jeova, im ej ba, Ejelok unin an Job mijõk Anij ke? Kwar jab likit juõn worwor in kabol e, im mweo imõn, im men ko otemjej iben, ijoko otemjej ke? Kwar kejerammõn jerbal ko an pein, im elõñlok men ko an ilo eneo. A Kwon kõtellok peõm kiõ, im uñire men otemjej an, inem e naj karmijete Yuk iman mejõm.” (Job 1:8-11) Ilo an tiljek wõt iumin melejoñ, Job ear kamol bwe nan in kinaak ko an rar jab mol.

¹² Ilo ad bedwõt ilo ial in tiljek eo ad einlok wõt in, jej kamol bwe ejjab mol nan in kinaak ko an Satan bwe jej karejar ñan Anij kinke ewõr juõn ãjinkij ebojak. Ilo ad jab jelã ien eo ejejjet ñe kaje eo an Anij enaj buñõt ri nana ro ej letok ñan kij ien eo ñan kamol bwe jej yokwe Jehovah im kõnan etetal ilo ial ko an ñan indio. Ej kwalok bwe jej tiljek ñan Anij im liki wãwen eo ej kõmman men ko. Bareinwõt, ilo ad jab jelã kin ran im awa eo ej jibañ kij ñan niknik wõt im ekkõl wõt ilo jitõb kinke jej kile bwe ien jemlokin emaroñ itok jabdewõt ien, einwõt juõn ri kwot ilo boñ. (Matu 24:42-44) Ilo ad etetal ibben Jehovah, jej kamõnõnõik buruen im lelok juõn nan ñan uake Devil eo, eo ej kinaak e.​—Jabõn Kennan Ko 27:11.

Karõklok Iman ñan Mour Indio!

13. Ta eo Bible ej kalikar kake kin kebojak ñan ran ko tokelik?

¹³ Ro rej etetal ibben Anij rej jelã bwe ej juõn men in meletlet ñan kõmman karõk ko emõn joñan kin ran ko renaj itok. Kin air kile abañ im inebata ko rej walok ñe rej rittolok, elõñ armij rej kajeoñ in kajerbal emõn ded im kajur eo air ilo jimwe bwe en wõr air kortoklik ilo ien rej ritto. Ta, kin ran in ilju eo ad ilo jitõb eo ej laplok an aorõk? Jabõn Kennan Ko 21:5 ej ba: “Lemnok ko an dri owõn, re men in jerammõn, a jabrewõt eo eur ilo bebe, ej jarõplok ñõn aikwij.” Ewõr tokjen ñan karõklok iman ñan ñan mour indio. Kin ad jab jelã kin ñããt eo jemlokin jukjuk im bed in enaj itok, jej aikwij lemnak kin aikwij ko ad ñan ran ko tokelik. Ak jen jokkin wõt juõn ilo lemnak im likit mokta men ko lor jitõb ilo mour eo ad. Armij ro ejelok air tõmak remaroñ ba bwe likit mokta kõmanmõn ankil an Anij ej juõn lemnak ejedkaju. Ak mol ke?

14, 15. (a) Ta parable eo Jesus ear konono kake kin karõk ko kin ran ko tokelik? (b) Etke lemnak eo an ri mweie eo ilo parable eo an Jesus kar juõn lemnak ejedkaju?

¹⁴ Jesus ear konono kin juõn parable ak wanjoñok ñan kalikar men in. Ear ba: “Jikin kallip ko an juõn armij emweie elõñ air jebar leen: Im ej bebe ilo buruen im ba, Ta eo I naj kõmõne, bwe ejelok jikin ijo ij aini leen ko aõ? Im e ba, I naj kõmõn men in; I naj jelate mo ko imõn ekõn eo aõ, im kalek ko jet relaplok; im ilo ir I naj aini aõ korn im mweiõ otemjej. Im I naj ba ñõn aõ, Aõ, elõñ mweiuk ko mweiõm emwij pojõk ñõn elõñ yiõ; kwon kakije, mõña, irak, im lõñliñ. A Anij e ba ñõn e, Kwo bwebwe, boñinin naj kajitõk ibõm kin am; inem e naj an wõn men ko kw’ar kaboji? Ein drein eo ej likit mweiuk ko mweien ñõn e wõt, im e jab mweie ñõn Anij.”​—Luk 12:16-21.

¹⁵ Jesus ear ba ke bwe ri mweie eo ear jab aikwij jerbal ñan kõmman jortoklik ko ñan ran ko renaj itok? Jaab, bwe Bible eo ej rejañ kij ñan jerbal. (2 Dri Tessalonika 3:10) Bwid eo an ri mweie eo kar bwe ear jab kõmman men ko ear aikwij kõmmane bwe en “mweie ñõn Anij.” Meñe ear maroñ lo mõnõnõ kin men ko mweien iumin elõñ yiõ, enaj kar mij tokelik. Lemnak eo an ear jedkaju, jab ñan indio.

16. Etke jemaroñ atartar ion Jehovah ñan bõk juõn ilju ejokane?

¹⁶ Etetal ibben Jehovah ñan indio ewõr tokjen im ej lolokjen. Ej wãwen eo emõntata ñan karõk lok iman ñan ran ko rej berotok. Meñe ej men in meletlet ñan kõmman karõk ko ewõr tokjeir ikijen school, jerbal, im eddo ko an family, jej aikwij kememej bwe Jehovah ejjab ilok jen ri karejar ro an retiljek. King David ear al: “Iar ajiri im kiõ Ij lõllab, ak ijañin lo jabdewõt ri wãnik ej jojolããr, ak inen ej eowor kin mõñã.” (Psalm 37:25, New World Translation.) Eindein Jesus ear kallimur bwe Anij enaj kabwe men in aikwij ko ñan aolep ro rej bukõt mokta Ailiñ eo im etetal ilo ial ko an rewãnik.​—Matu 6:33.

17. Ewi wãwen jej jelã bwe ien jemlokin ej ebak?

¹⁷ Meñe jej karejar ñan Anij ñan indio, jej aikwij kememej wõt ran eo an Jehovah. Nan in kanan ko an Bible emwij air jejjet kitieir rej kamol bwe ebak ran eo. Ran kein ad rej obrak kin tarinae ko, nañinmij, makitkit lal ko, im ñitta, ekoba matõrtõre Christian ro remol im jerbal in kwalok nan kin news eo emõn kin Ailiñ eo an Anij ibelakin lal. Men kein aolep rej men ko ñan ien jemlokin jukjuk im bed in enana. (Matu 24:7-14; Luk 21:11) Lal in ej obrak kin armij ro “e naj anij lo burueir, im re naj dri arõk mweiuk, im dri jualõñlõñ, im dri jua, im dri kajirere, im ro rej kiblia ñõn jemeir im jineir, im ro re jab kamolol, im dri nana, im ro re jab yokwe ro nukiir, im ro re lej, im ro rej kennan nan in riõp, ro re jab kamanwa, r’awia, ro rej drike emõn, Ro dri ketõk, ro re mõlkaro, ro dri kimjãje, im ro rej yokwe men in kabuñburueir elap jen air yokwe Anij.” (2 Timote 3:1-5) Ilo ran kein eliktata, mour ej bin ñan kij einwõt ro ri karejaran Jehovah. Elap ad kijoror kin ran eo ñe Ailiñ eo an Jehovah enaj jolok nana otemjej! Mae ien eo, jej aikwij kate wõt im etetal ibben Anij ñan indio.

Mour im Karejar ñan Indio

18, 19. Ta eo ej kwalok bwe ri tiljek ro etto rar jerbal ñan Anij im kõnan kõmman eindein ñan indio?

¹⁸ Ñe jej etetal ibben Jehovah, jen kememej kin tõmak eo an Abel, Enoch, Noah, Abraham, im Sarah. Elikin an konono kake ir, Paul ear je: “Rein otemjej r’ar mij ilo tõmak, ke r’ar jañin bõk men in kalimur ko, a r’ar loi jen etolok, im yokyokwe ir, im kwalok kin air drua maijet im dri itoitõk ion lõl.” (Dri Hibru 11:13) Ro ri tõmak rar “kõnan tõbar ailiñ emõn jen eo, aet, ailiñ i lõñ.” (Dri Hibru 11:16) Ilo tõmak, rar reimanlok ñan jikin eo emõnlok iumin kajur eo an Ailiñ in Messiah eo an Anij. Jej tõmak bwe Anij enaj kajerammõn ir kin mour indio ilo jikin eo emõnlok​—Paradise eo ion lal iumin iroij an Ailiñ eo.​—Dri Hibru 11:39, 40.

¹⁹ Ri kanan Micah ear kwalok bebe eo an armij ro an Jehovah ñan kabuñ ñan Anij ñan indio. Ear je: “Armij otemjej, renaj etetal ilo etan anij ko air; ak kimnaj etetal ilo etan Jehovah am Anij ñan indio.” (Micah 4:5, NW) Mae ien mij eo an, Micah ear jerbal ñan Jehovah ilo tiljek. Ñe enaj jerkakbiji ilo lal eo ekãl, ejelok bere bwe ri kanan in enaj wõnmanlok wõt im etetal ibben Anij ñan indio. Ej juõn joñok emõn ñan kij ro rej mour itu-jemlokin ien in!

20. En kar ta bebe eo ad?

²⁰ Jehovah ej kamolol kin yokwe eo jej kwalok ñan ãt eo etan. (Dri Hibru 6:10) Ejelã bwe ebin ñan ad debij ad tiljek ñan e ilo lal in Devil eo ej kajur ion. Meñe “lõl e jokolok,” ak, “eo ej kõmõnmõn ankil an Anij ej berwõt in drio.” (1 Jon 2:17; 5:19) Inem, kin jibañ eo jen Jehovah, jej aikwij beek ilo buruõd ñan kijenmij ilo melejoñ ko jej jelmae jen ran ñan ran. Jej kõnan tel lemnak im ial in mour eo ad ñan jerammõn ko raibujuij Jemed ilañ eo ej yokwe ear kallimur in letok ñan kij. Men kein aolep remaroñ ad elañe jej wõnmanlok im etetal ibben Anij ñan indio.​—Jud 20, 21.

Ewi Wãwen Am Naj Kar Uak?

◻ Ta karõk eo an Anij kin armij ro rekiblie?

◻ Etke Jehovah ejañin kajemlok lal in ejjab tõmak?

◻ Etke ad jab jelã kin ñããt eo Anij enaj emmakit en jab kadiklok kijejeto eo ad?

◻ Ta jet ian tokjen ko ñan etetal ibben Anij ñan indio?

[Pija eo ilo peij 11]

Etetal ibben Anij ej tellokin ad jerbal ñan e ilo kijejeto einwõt ri kalor ro an Christ rar kõmmani ilo jinoin