“Komin Ekil”

“Inem komin ekil; bwe kom jaje ilo ran õt Iroij e naj itok.”​—MATU 24:42.

1. Ewi eñjake eo an ri karejar ro an Jehovah kin yiõ ko relõñ in air karejar ilo tiljek? Kwalok juõn wanjoñok.

ELÕÑ ro ri karejaran Jehovah etto air bed rar katak kin mol eo jen ke rar maan im kõrã ro rar dik wõt. Einwõt ri wia eo ear lo juõn pearl (dekã aorõk) eo elap aorõkin im ear wiakake aolep men ko mweien bwe en wiaiki, ri school in Bible rein ewõr air itoklimo rar karmijeteik ir make im wujleplok air mour ñan Jehovah. (Matu 13:45, 46; Mark 8:34) Ewi wãwen eñjake eo air kin an aetoklok air kõttar jen air kar kõtmene in lo an jejjet kitien karõk ko an Anij ñan lal in? Ejelok air ajlok! Rej errã ibben Brother A. H. Macmillan, eo elikin elõñlok jen jiljinoñoul yiõ ko in an karejar ñan Anij ilo tiljek, ear ba: “Emwij an laplok bebe eo aõ jen kar mokta ñan aõ kijenmij wõt ilo tõmak eo aõ. Ear kõmman bwe en wõr tokjen ñan aõ mour. Ej jibañ wõt iõ ñan jelmae ran ko rej itok ilo ejelok lelñoñ.”

2. (a) Kakabilek ta eo ejejjet Jesus ear lelok ñan ri kalor ro an? (b) Ta kajitõk ko naj etali ilo katak in?

² Ak ta kin kwe? Jekdon ewi joñan dettam, lemnak kin nan kein an Jesus: “Inem komin ekil; bwe kom jaje ilo ran õt Iroij e naj itok.” (Matu 24:42) Ennan in elamwan ebed ie juõn mol eo emũlal. Jejjab jelã ran eo Iroij eo enaj itok in jerbale ekajet eo ion jukjuk im bed in enana, im ejjab menin aikwij ñan ad jelã. Ak jej aikwij mour ilo juõn wãwen eo bwe ñe ej itok, jejamin ajlok. Ikijen men in, ta wanjoñok ko jej loi ilo Bible bwe renaj jibañ kij ñan ad ekkõl wõt? Ewi wãwen an kar Jesus kalikar aikwij in? Im ta menin kamol eo ewõr ibbed rainin im ej kamol bwe jej mour ilo ran ko eliktata in lal in ejjab tõmak ilo Anij?

Juõn Wanjoñok in Kakkõl

3. Ewi wãwen an elõñ armij ro rainin einlok wõt ro ilo ran ko an Noah?

³ Ilo elõñ wãwen ko, armij ro rainin rej einlokwõt maan im kõrã ro rar mour ilo ran ko an Noah. Ilo ien eo lal in ear obrak kin kowadoñ, im bwe buruen armij “renana wõt aolepen ien.” (Jenesis 6:5) Elõñ wõt iair rar mad kin jerbal in mour ko an ran otemjej. Ak, mokta jen an kar bõktok Ibwijleplep eo, Jehovah ear lelok ñan armij ro juõn ien emõn ñan ukwelok. Ear kajerbal Noah ñan kwalok nan, im Noah ear bokake​—im jerbal einwõt “juõn dri kwaloke kwojarjar” bõlen iumin 40 ak 50 yiõ ko ak lõñlok. (2 Piter 2:5) Bõtab, armij ro rar kajekdon nanin kakkõl eo an Noah. Rar jab ekkõl wõt. Kin menin ilo jemlokin, Noah wõt im family eo an rar ellã im mour jen jerbal in ekajet eo an Jehovah.​—Matu 24:37-39.

4. Ilo wãwen et eo jerbal in kwalok nan eo an Noah rej naetan juõn eo ear wõr tõbrak ie, im ewi wãwen ba kin ejja menin wõt kin jerbal in kwalok nan eo am?

⁴ Jerbal in kwalok nan eo an Noah ear wõr ke tõbrakin? Jab ekajet ikijen oran eo eiet im ear uak. Emol, jerbal in kwalok nan eo an Noah ear jejjet kitien karõk eo ie jekdon joñan ro rar uak. Etke? Kinke ear lelok ñan armij ro ien emõn ñan air kãlet elañe renaj karejar ñan Jehovah ak jab. Ak ta kin territory in kwalok nan eo am? Meñe eiet ro emol air uak, kwoj bõk elap tõbrak. Etke? Kinke ilo am kwalok nan, kwoj kõllaj ainikien nanin kakkõl eo an Anij, im kin menin kwoj kajejjet kitien jerbal eo Jesus ear lelok ñan ri kalor ro an.​—Matu 24:14; 28:19, 20.

Kajekdon Ri Kanan ro An Anij

5. (a) Ta wãwen ko rar jeded ilo Judah ilo ran ko an Habakkuk, im ewi wãwen an kar armij ro uak ñan ennan in kanan eo an? (b) Ewi wãwen an kar armij in Judah ro kwalok kijirãt ñan ri kanan ro an Jehovah?

⁵ Elõñ ebeben ko elikin Ibwijleplep eo, ailiñ in Judah ear jelmae juõn tõre eo jerbal ko ie rar kauwatata. Kabuñ ñan ekjap, ekajet bwid, ijjibed, im meñe uror ear ekkã kõmmani. Jehovah ear kajutak Habakkuk ñan an kakkõl armij ro bwe elañe rar jab ukwelok, jorrãn enaj kar itok ioir ikijen pein ri Chaldea ro, ak ri Babylon ro. (Habakkuk 1:5-7, New World Translation) Ak armij ro rar makoko in roñjake. Bõlen rar lemnak, ‘Bwe, iumin buki yiõ ko remotlok, ri kanan Isaiah ear kõllaj ainikien ilo juõn kakkõl eo einlok wõt, ak ejañin kar wõr men eo ear walok!’ (Aiseia 39:6, 7) Elõñ ian ri kien ro an Judah rar jab oktaklok wõt jen ennan eo ak rar bareinwõt ri kijirãt ñan ri keañ ro. Ilo juõn ien, rar kajeoñ in mõn ri kanan Jeremiah, im renaj kar lo tõbrak elañe Ahikam ear jab kabõjrak ir. King Jehoiakim ear illu kin bar juõn ennan in kanan, im ear kõtlok bwe ren mõn ri kanan Urijah.​—Jeremiah 26:21-24, NW.

6. Ewi wãwen an kar Jehovah kakajur Habakkuk?

⁶ Ennan eo an Habakkuk ear jab mõjno, im ear jab buñbuñ ejja einwõt eo an Jeremiah, eo Anij ear kakõrmole ñan an kanan kin 70-yiõ ko in jorrãn eo an Judah. (Jeremiah 25:8-11, NW) Kin menin, jemaroñ melele kin eñtan eo an Habakkuk ke ear lamõj: “Ewi toan, O Jehovah, ij aikwij lamõj im kajitõk kin jibañ, im kwojjab roñjake? Ewi toan aõ aikwij kir ñan yuk ñan jibañ, im kwojjab lomoren kim jen kowadoñ in?” (Habakkuk 1:2, NW) Jehovah ilo joij ear uak Habakkuk kin nan kein rej kakajur tõmak: “Vision eo enaj jejjet kitien ilo ien ekkar, im ej wõnmanlok wõt ñan jemlokin, im ejamin riap. Meñe emaroñ rumij, kwon kõtmene wõt kake; bwe ejamin likjap an jejjet kitien. Ejamin rumijtok.” (Habakkuk 2:3, NW) Inem Jehovah ewõr juõn “ien ekkar” ñan bõktok juõn jemlok ñan ekajet nana im ijjibed ko. Elañe ekar einwõt ñe erumij, Habakkuk ear jab aikwij ebwer, ak kadikdiklok. Jen men in, en kar “kijoror wõt kake,” im mour ilo kajjojo ran kin juõn lemnak in ekaiuriur. Ran eo an Jehovah ejamin rumij!

7. Etke bar juõn jorrãn kar karõk ñan Jerusalem ilo ebeben eo kein kajuõn C.E.?

⁷ Enañin 20 yiõ ko elikin an Jehovah konono ñan Habakkuk, jikin kwelok eo an Judah, Jerusalem, ear jeebeplok. Tokelik rar bar kaleke, im elõñ wõt ian bwid ko ear lap air kaeñtan Habakkuk rar kajimweiki. Bõtab, ilo ebeben eo kein kajuõn C.E., jikin kwelok eo rar bar kakõlleiki ñan an jeebeplok kin jab tõmak eo an armij ro ie. Ilo tiriamokake, Jehovah ear karõk ñan ro ejimwe burueir ñan air ellã im mour. Ilo ien in, ear kajerbal ri kanan eo elaptata an wõr an maroñ Jesus Christ ñan kwalok ennan eo. Ilo 33 C.E., Jesus ear jiroñ ri kalor ro an: “Im ñe kom naj lo jaran dri tõrinae ro rej kabol Jerusalem, inem kom naj jela ebak kejeebeplok e. Inem ro rej ber i Judia ren ko ñõn tol ko.”​—Luk 21:20, 21.

8. (a) Ta eo emaroñ kar walok ñan jet Christian ro ke ear motlok ien eo elikin an Jesus mij? (b) Ewi wãwen an kar nanin kanan ko an Jesus kin Jerusalem jejjet kitieir?

⁸ Ke ej ellã yiõ ko, jet Christian ro ilo Jerusalem remaroñ kar lemnak kin ñããt eo enaj kar jejjet kitien kanan eo an Jesus. Eokwe, lemnak kin menin katok ko jet iair ejelok bere rar kõmmani. Bõlen rar jab bõk menin lelok ko emõn lali kin bebe eo air ñan ekkõl wõt im mimij. Ke emotlok ien, rar mõk in kõttar ke? Rar bõk ke jemlok in bwe rar kokkure air ien, im lemnak bwe nan ko an Jesus rar jerbal ñan juõn ebeben eo tokelik, jab ñan eo air make? Ilo 66 C.E., kanan eo an Jesus ear jino jejjet kitien ke jarin tarinae ko an Rome rar kabol Jerusalem. Ro rar ekkõl wõt im kile kakõlle eo, rar ko jen jikin eo, im rar ellã im lo jorrãn eo an Jerusalem.

Wanjoñok kin Aikwij eo ñan Ekkõl Wõt

9, 10. (a) Ewi wãwen am naj ka tarlepe wanjoñok eo an Jesus kin ri karejar ro rar kõttar iroij eo air ñan an jeblaktok jen belele eo an? (b) Etke air kõttar iroij eo air emaroñ kar bin ñan ri karejar ro? (c) Etke ear wõr tokjen ñan an ri karejar ro kõttar wõt?

⁹ Ilo kalikar aikwij eo ñan ekkõl wõt, Jesus ear keidi ri kalor ro an ñan ri karejar ro rar kõttar jeblaktok eo an iroij eo air jen belele eo an. Rar jelã bwe enaj kar jeblaktok ilo juõn joten​—ak ilo awa ta? Ilo waj eo kein kajuõn ilo joten eo ke? Eo kein karuo ke? Eo kein kajilu ke? Rar jab jelã. Jesus ear ba: “Elañe [iroij eo] e naj itok ilo mmij ken ka ruo, ak ilo mmij ken ka jilu, im lo ir einwõt [ekkõl], ro dri korijeran rej mõnõnõ!” (Luk 12:35-38) Baj kalmenlokjen kin kõtmene eo an ri karejar rein. Jabdewõt ainikien, jabdewõt men eo ej makitkit ear kalaplok kõtmene eo air: ‘Emaroñ ke iroij eo ad in?’

¹⁰ Ta elañe iroij eo ear itaktok ilo mimij eo kein karuo ilo joten eo, eo kar jen enañin ratimjuõn awa mae lukwõn boñin eo? Aolep ri karejar ro, ekoba ro ear lap air jerbal jen ke ej jibboñ wõt, ren kar bojak ke in yokyokwe e, ak jet ren kar kiki ke? Ta elañe iroij eo ear jeblaktok ilo ien mimij eo kein kajilu ilo boñin eo​—ilo ien eo jen lukwõn boñin eo mae enañin jilu awa ilo jibboñin eo? Jet ian ri karejar ro ren kar oktak ke im ebwer, meñe jumae ilo an einwõt rumij iroij eo air?a Ro wõt im rar lo air mimij ke iroij eo ear tõkeãktok naj kar keañ kin ir remõnõnõ. Ñan ir nan ko ilo Jabõn Kennan 13:12 renaj kar lukkun jerbal: “Kõtõmene, ñe e rumijtok, ej kõmõn bwe buruen e nañinmij; a ñe men in kõnan ej waloktok, ej wijki in mour.”

11. Ewi wãwen an jar maroñ jibañ kij ñan bed wõt im ekkõl?

¹¹ Ilo ien eo ear einwõt wõr rumijlok, ta eo enaj kar jibañ ri kalor ro an Jesus ñan air ekkõl wõt? Ke ear bed ilo jikin kallip in Gethsemane moktalok wõt jidik jen air kar naruõn, Jesus ear jiroñlok jilu ian ri jilek ro an: “Komin ekil im jar, bwe komin jab dreloñ ilo kabo.” (Matu 26:41) Yiõ ko tokelik, Peter, eo ear bed ilo ien eo, ear lelok nanin kakabilek eo einlok wõt ñan Christian ro mõttan. Ear je: “A jemlokõn men otemjej ej ebaktok, inem en jime ami lemnok, im komin jadõr im jar.” (1 Piter 4:7) Ealikar, niknik ilo jar ej aikwij juõn mõttan jerbal in Christian eo ad. Emol, jej aikwij etal wõt im eowor ñan Jehovah bwe en jibañ kij ekkõl wõt.​—Dri Rom 12:12; 1 Dri Tessalonika 5:17.

12. Ta oktak eo ikõtan antonelok im mimij ak ekkõl wõt?

¹² Lale bwe Peter ear bareinwõt ba: “Jemlokõn men otemjej ej ebaktok.” Ewi joñan an ebak? Ejelok jabdewõt wãwen ñan an armij jitõñlok ñan kajejjet ran im awa eo. (Matu 24:36) Ak ewõr juõn oktak ikõtan antonelok, eo Bible ejjab rejañ kake, im debij wõt kõtmene eo kin jemlokin, eo ej kõketak kake. (Keidi 2 Timote 4:3, 4; Taitõs 3:9.) Ta juõn wãwen eo me jemaroñ debij wõt ad kõtmene kin jemlokin? Ilo ad lukkun lalelok menin kamol eo bwe jemlokin ej ebak. Kin menin jen elij jiljino line in kamol ko rej kamol bwe jej mour ilo ran ko eliktata in lal in ejjab tõmak ilo Anij.

Jiljino Line ko Rej Kamol Menin Kamol eo

13. Ewi wãwen an kanan eo an Paul emwij je ilo 2 Timote chapter 3 kamol ñan yuk bwe jej mour ilo “ran ko eliktata”?

¹³ Moktata, ej lukkun alikar ad lo jejjet in kitien kanan eo an ri jilek Paul kin “ran ko eliktata.” Paul ear je: “A kwon jela men in, bwe ilo ran ko eliktata, ien ko renana re naj waloktok. Bwe armij ro e naj anij lo burueir, im re naj dri arõk mweiuk, im dri jualõñlõñ, im dri jua, im dri kajirere, im ro rej kiblia ñõn ro jemeir im jineir, im ro re jab kamolol, im dri nana. Im ro re jab yokwe ro nukiir, im ro re lej, im ro rej kennan nan in riõp, ro re jab kamanwa, r’awia, ro rej drike emõn, Ro dri ketõk, ro re mõlkaro ro dri kimjãje, im ro rej yokwe men in kabuñburueir elap jen air yokwe Anij, Ro rej kõmõnmõn wãwen mwiliir, a ilo burueir rej karmijete emõn: jen rein kwon illok. A armij renana im ro dri jela mon re naj laplok ilo air nana, re naj mone im naj mone ir.” (2 Timote 3:1-5, 13) Jejjab lo ke an jejjet kitien kanan in ilo ran kein ad? Ro wõt im rej kajekdon mol ko remaroñ kowane!b

14. Ewi wãwen an nan ko ilo Reveles̃õn 12:9 kin Devil eo ej jejjet kitien rainin, im ta eo ejjabto enaj walok ñan e?

¹⁴ Kein karuo, jej lo tokjen ko in air kar jolok Satan im demon ro an jen lañ, ilo kajejjet kitien Reveles̃õn 12:9. Ijin, jej konono: “Im ar jolok drakon eo elap, serpent e ridto, naetan devil im Setan, eo ej moni aolepen lõl, ar jolok e ñõn lõl, im ar jolok enjel ro an na iben.” Tokjen menin ear walok ilo wo eo elap ñan lal. Emol, elap wo ñan armij, elaptata jen 1914. Ak kanan eo ilo Reveles̃õn ej kobaiktok bwe ñe rej jolaltak Devil eo ñan lal, ejelã bwe “jirik wõt ien iben.” (Reveles̃õn 12:12) Ilo ien in, Satan ej kõmman tarinae ibben ri kabit ri kalor ro an Christ. (Reveles̃õn 12:17) Emwij ad lukkun lo tokjen ko in tarinae eo an ilo ien kein ad.c Bõtab, ejjabto, Satan naj likiti ilo abyss eo bwe “en jab bar mon dri ailiñ ko.”​—Reveles̃õn 20:1-3.

15. Ewi wãwen an Reveles̃õn 17:9-11 letok menin kamol eo bwe jej mour ilo ien jemlokin?

¹⁵ Kein kajilu, jej mour ilo ien eo an “king” eo kein karalitõk im eliktata emwij je ilo kanan eo ilo Reveles̃õn 17:9-11. Ijin ri jilek John ej kwalok kin jiljilimjuõn king ro, rej jutak ikijen jiljilimjuõn kajur ko an lal in​—Egypt, Assyria, Babylon, Medo-Persia, Greece, Rome, im Anglo-American kajur eo an mõttan ko ruo an lal in. Ej bareinwõt lo king eo “ken ka drualitõk” eo ej jebar “jen jiljilimjuõn.” King in kein karalitõk​—ej eo eliktata John ej pijaiki ilo kalmenlokjen eo an​—kiõ ej jutak ikijen ailiñ ko an United Nations. John ej ba bwe king in kein karalitõk “ej ilok ñõn kokkure e,” im elikin ejelok bar king ro an lal ej kwalok kake.d

16. Ewi wãwen an mol ko ilo jejjet in kitien annañ eo ilo ettõnak eo an Nebuchadnezzar kalikar bwe jej mour ilo ran ko eliktata?

¹⁶ Kein Kemen, jej mour ilo tõre eo neen annañ eo ilo ettõnak eo an Nebuchadnezzar ej kwalok kake. Ri kanan Daniel ear ukõt melelen ettõnak in ettino in juõn annañ eo ekilep eo einwõt nememen armij. (Daniel 2:36-43, NW) Emen mõttan aen ko ilo annañ in rej jutak ikijen kajur ko relap ilo lal in, jino ibben bõran (Jukjuk im Bed eo an Babylon) im wanlallok ñan neen im addin neen (kien ko rej iroij rainin). Aolep kajur ko relap an lal in me rej jutak ikijen annañ in emwij kalikar jedetokiir. Jej mour ilo tõre in emwij kalikare ikijen neen annañ eo. Ejelok men en rej bar kwalok kake kin kajur ko jet ñan air itok.e

17. Ewi wãwen an jerbal in kwalok nan eo ad kin Ailiñ eo letok kamol eo bwe jej mour ilo ien jemlokin?

¹⁷ Kein kalalem, jej lo juõn jerbal in kwalok nan ibelakin lal rej kõtõbrake, eo Jesus ear ba enaj kar walok mokta wõt jen jemlokin jukjuk im bed in. Jesus ear ba: “Im naj kwalok gospel in an ailiñ in lõñ i aolepen lõl kin men in kennan ñõn ailiñ otemjelok: ilo ien eo e naj itok jemlokõn.” (Matu 24:14) Rainin, kanan in ej bed ilo ialin an jejjet kitien ilo juõn wãwen ejelok kar einwõt moktalok. Emol, territory ko jejjañin ilok ñani rej bed wõt, im bõlen ilo ien eo ejejjet an Jehovah, juõn kejam eo ej tellok ñan makitkit eo elaplok enaj bellok. (1 Dri Korint 16:9) Mekarta, Bible ejjab ba bwe Jehovah enaj kõttar mae ien an kajjojo armij ion lal bõk juõn ennan. Jen an eindein, news eo emõn rej aikwij kwalok nan kake ñan an Jehovah buñburuen. Inem enaj itok jemlokin.​—Keidi Matu 10:23.

18. Alikar, ta eo enaj mol kin jet ian ri kabit ro ñe eñtan eo elap ej ijjino, im ewi wãwen ad maroñ etale menin?

¹⁸ Kein kajiljino, oran ri kabit ri kalor ro remol an Christ ej eietlok wõt, meñe jet emol renaj bed wõt ion lal ñe enaj ijjino eñtan eo elap. Elõñ wõt ian bwen ri kabit ro ebwe air ritto, im iumin yiõ kein oran ro rej uan ri kabit ro ej diklok wõt. Ak, ilo an jitõñlok ñan eñtan eo elap, Jesus ear ba: “Im elañe ar jab kaiitlok ran ko, ejelok kõniek e naj kar mour: a kin ro dri kãlet naj kaiitlok ran ko.” (Matu 24:21, 22) Inem, ealikar, jet ian “dri kãlet ro” an Christ renaj bed wõt ion lal ñe eñtan eo elap enaj ijjino.f

Ta eo Ebed Iman?

19, 20. Etke elaplok an menin ekaiuriur ñan kij jen mokta bwe jen bed wõt im ekkõl?

¹⁹ Ta eo ilju eo ej keboj ñan kij? Ien ko rekairujruj rej bojak wõt in itok. Paul ear kakkõl bwe “ran eo an Iroij ej itok einwõt dri kwot ilo boñ.” Ilo an jitõñlok ñan armij ro rej waloktok einwõt ri meletlet ro an lal, ej ba: “Ñe rej ba, Ainemõn im ejelok unin am lelñoñ, eokwe eiriñ naj kokkure ir.” Kin menin, Paul ej rejañ ri konono ro an: “Inem jen jab kiki einwõt ro jet, a jen mmij im jadõr.” (1 Tessalonika 5:2, 3, 6) Emol, ro rej reilok ñan dolul ko an armij ñan bõktok ainemõn im jokane rej kajekdon mol eo. Armij rot in emol air kiki!

²⁰ Jeebeplok eo an jukjuk im bed in enaj itok ilo idiñ. Kin menin, kõtmene wõt kin ran eo an Jehovah. Anij make ear jiroñ Habakkuk: “Ejamin rumij”! Emol, ejañin kar wõr joñan ekaiuriur ñan kij ñan ekkõl wõt.

[Kamelele ko itulal]

Kwoj Kememej Ke?

• Ta joñok ko ilo Jeje ko remaroñ jibañ kij bed im mimij wõt?

• Ewi wãwen an kar Jesus wanjoñok kin aikwij eo ñan ekkõl wõt?

• Ta line ko jiljino in menin kamol rej kamol bwe jej mour ilo ran ko eliktata?

[Pija ko ilo peij 21]

A. H. Macmillan ear karejar ñan Jehovah ilo tiljek iumin elõñlok jen jiljinoñoul yiõ ko

[Pija eo ilo peij 22]

Jesus ear keidi ri kalor ro an ñan ri karejar ro rar bed im mimij wõt