Jibañ Eo Emol ñan Family
“Jemaroñ ba bwe family ko ilo America rej bed ilo kauwatata. Jeban kwalok bar juõn jemlok ijellokin ñe jej lo joñan an lõñ jebel ko, ajiri ro rej lotak jen belele wan, im kokkure ñan jodikdik ro im ri belele ro.”
NAN kein jen Tom Brokaw ri bwebwenato eo ilo television ilo United States remaroñ jerbal ñan enañin aolep ailiñ ko. Ta melelen kauwatata in?
Ilo elõñ wãwen ko dolul in family ej bedbed in jukjuk im bed eo an armij. Elañe ewõr abañ ilo family, inem enaj wõr abañ ilo jukjuk im bed eo. Bareinwõt, family eo ej jikin eo ajiri ro rej bõk jibañ ilo eñjake im wõnãn mour. Ijo rej bõk katak ko moktata im eaorõktata kin mour. Elañe family eo ej bed ilo abañ, inem ta eo ajiri ro rej katak kake? Jokane eo air ej bed ia? Renaj kain armij rot ñe rej rittolok?
Ewõr ke jabdewõt wãwen ñan jibañ dolul in family ilo ien in e kauwatata? Aet. Anij ear kajutak dolul in family. (Jenesis 1:27, 28) Im ear letok jibañ eo eaorõktata ilo Nan eo an, Bible eo ñan tel family eo. (Kolosse 3:18-21) Emol, jejjab maroñ ukõt aolepen jukjuk im bed in, ak jemaroñ jerbale nan in kakabilek eo an Bible ñan family eo ad make. Kim kõnan jiroñ yuk kin jet ian armij ro rar kõmmane men in im ta tokjen ko rar bõki.
Bõprae Jebel
Ilo elõñ ailiñ ko joñan in 50 percent in belele ko rej jemlok ilo jebel. Ej juõn likjap elap ilo kõtan ko an armij! Emol, eñin unin elõñ ian jemen ak jinen ajiri ro rej jebel rej kate wõt ir ñan lale ajiri ro nejiir. Ak enañin aolepeir renaj errã im ba bwe emõnlok ñe leo im lio ri belele rej kamadmõde abañ ko ikõtairro im bedwõt ibben don.
Mour in belele eo an juõn leo im lio ri belele ilo Ailiñ in Solomon ear iten jorrãn. Leo, eo nejin juõn iroij, ear lej im kar wõr elõñ manit ko renana ibben. Joñan an bin mour ibben, lio belen ear kajeoñ bõk mour eo an make. Inem, leo ear errã in katak Bible ibben Ri Kennan ro an Jehovah. Ear katak bwe jabdewõt armij eo ekõnan kabuñburuen Anij en jab baj jelã wõt kin ta eo enana ak bareinwõt ej aikwij “kitõtõkake nana.” (Sam Ko 97:10) Men in ej koba dike men ko einwõt riap, kwot, lej, kowadoñ, im kadõk. Ear bõk ñan buruen aolep men kein im ejjabto tokelik ear anjo ion manit ko an renana im an lej. Lio belen ear bwilõñ kin oktak eo an, im mour in belele eo air ear emõnlok, kilan Nan in Anij.
Ilo South Africa juõn kõrã ri Kennan an Jehovah ear roñ bwe boss eo an im leo belen rar lemnak in jebel jen don. Liin ri Kennan eo ear kennan ibben boss eo an kin lemnak eo an Anij kin mour in belele im kwalok ñan e book eo naetan The Secret of Family Happiness (Key Eo ñan Family eo Elemõnõnõ). Book in, im Ri Kennan ro an Jehovah rar jeje, ej kalikare nan in kaiñi ko ilo Bible rej jerbal ñan mour in belele, im elaptata ej kamelele kin ewi wãwen Bible eo emaroñ jibañ ri belele ro kamadmõde abañ ko air. Boss eo an im leo belen rar jimor konono book eo im kate wõt ir ñan jerbale nan in kakabilek ko an Bible. Ilo jemlokin, rar beek in jab jebel—nan in kaiñi ko an Bible ear lomoren bar juõn mour in belele.
Ro Ri Mweo Rej Oktak ilo Kabuñ
Ta kin juõn leo im lio ri belele rejjab bed ilo juõn wõt kabuñ? Bible eo ej kaiñi ri Christian ro bwe ren mare “ilo Iroij wõt.” (1 Dri Korint 7:39) Jet ien, ri belele eo mõttan emaroñ ukõtlok ñan bar juõn kabuñ. Men in ej aikwij kajemlok ke mour in belele eo air? Jab ñan jidik.
Ilo Botswana kar kajitõkin juõn kõrã eo ej kab erom juõn ian Ri Kennan ro an Jehovah kin ewi wãwen kabuñ eo an ekãl ear ukõt wãwen an mour. Ear kajitõkin leo belen bwe en uake kajitõk eo, im ear ba: “Jen ien eo lio ibben ear erom juõn ian Ri Kennan ro an Jehovah, elõñ oktak ko iar lo ilo e. E bed ibben kio juõn kajur emeletlet im inemõn ijañin kar loe mokta. Ewõr kajur im maroñ eo ñan an jolok kõbatat, juõn likjap ijañin joloke ñan kiõ. Lio ibba kalaplok an yokwe io im ajiri ro nejimro, im ro jet. Ejelã debij an illu, elaptata nae ajiri ro. Ij lo an kajerbal ien eo an ñan kwalok nan, im jibañ ro jet ñan kakõmõnmõnlok wãwen air mour. Iar lo oktak ko remõn ilo mour eo aõ make. Ij tõmak bwe oktak kein kar walok kin joñok eo an.” Elap an emõn wãwen an kar nan in kaiñi ko an Bible jelet mour in belele in! Elõñ armij ro rejjab Ri Kennan ro rar ba eindein kin Ri Kennan ri belele ro mõttair.
Ñe Jemen Ajiri Ro Rej Jerwane Eddo Ko An
Kõtan eo ikõtan juõn jemen im ro nejin ej juõn key ñan kalek family ko rekajur. Ri jilek Paul ear kakabilek: “Im kom, ro jemeir, komin jab biuktõke ro nejimi ñõn illu: a komin kakajiririik ir ilo kaje im kowe an Iroij.” (Dri Epesõs 6:4) Inem, eñin unin juõn katak ilo The Wilson Quarterly ear naruõn jemen ajiri ro rejjab kajejjet kitien jerbal eo air kin elõñ abañ an armij. Katak eo ear ba: “Ikõtan yiõ kein 1960 im 1990, joñan ajiri ro rar jebel jen jemeir kar laplok ruo alen . . . Eietlok jemen ajiri ro rej bõk eddon tel family eo im ej juõn un elap ilikin elõñ abañ ko rej kaeñtan armij ro ilo America.”
Melelen men in ke bwe ajiri ro me jemeir rejjab tel ir renaj jorrãn? Jaab. Ri jeje psalm ilo ien etto ear ba: “Bwe jema im jinõ r’ar illok jen ña, a Jeova e naj bõk iõ.” (Sam Ko 27:10) Juõn ladik ej ratimjuõn an yiõ ilo Thailand ear lo mol in menin. Ear luji jinen ke ear juõn niñniñ, im jemen, eo ear jab kõnan kakajiririk e, ear likiti ibben jibwin. Kin an watõk emake einwõt ri jojolããr, ladik in ear jumae armij im kar naetan juon eo elej. Ear kamijak jibwin bareinwõt. Ruo Ri Kennan ro an Jehovah rej kwalok nan full-time, rar lo bwe ekkã an jutak inabõj in Kiiñdom Hall eo, rar kir e ñan mweo imwiir juõn ran.
Rar jiroñ e kin Anij—bwe E, einwõt juõn jemen, ej yokwe ajiri ro. Bareinwõt rar konono kin Paradise eo ijin ion lal im Anij ear kallimuri armij ro retiljek kake. (Reveles̃õn 21:3, 4) Aolep kamelele kein kar kaitoklimoen ladik in, im ear jeblak ran otemjej ñan katak kake. Ri Kennan ro rar jiroñ e bwe enaj kar aikwij bõjrak jen an ri lej elañe ear kõnan bwe Anij en Jemen. Men in kar errã ibben nan ko an Paul ñan ro ri Rom: “Elañe e maroñwe, einwõt ej ber ibemi, komin ainemõn iben armij otemjej.” (Dri Rom 12:18) Bareinwõt enaj kar aikwij joij wõt ñan jibwin. (1 Timote 5:1, 2) Ejjabto tokelik, ear jino jerbali nan in kaiñi ko an Bible—ejelok bere ear kakõmõnmõnlok mour in family eo an ibben jibwin. (Dri Galetia 5:22, 23) Joñan an ro ri turin bwilõñ kin oktak ko rar lo ilo ibben rar kõnan bwe ajiri ro nejiir ren katak Bible ibben Ri Kennan ro an Jehovah!
Juõn Jitõb Eainemõn
Ri jilek Paul ear jejelok ñan Dri Kolosse ro: “Komin kõnõk yokwe, eo ken lukwõj ej kowãppemi. Im ainemõn jen Kraist en iroij ilo buruemi.” (Dri Kolosse 3:14, 15) Juõn jitõb eainemõn im yokwe jen buru enaj kaburukuk juõn family. Im remaroñ kajimwe abañ in family ko etto air bed. Rukia, eo ej jokwe ilo Albania, ear jab konono ibben jatin iumin elõñlok jen 17 yiõ ko kin juõn akwelel in family eo. Ke ear katak Bible ibben Ri Kennan ro an Jehovah, ear katak bwe ri karejar ro otemjej karejaran Anij rar aikwij kwalok ainemõn ñan ro jet. “En kabukot ainemõn im lor e.”—1 Piter 3:11.
Rukia ear kile aikwij eo ñan kwalok ainemõn ñan jatin. Ear jar aolepen juõn boñ, im ilo jibboñin ran eo tokelik, im ilo ikũmkũm, ear etal ñan mweo imõn jatin. Ledik eo nejin jatin ear kabellok kejam im ilo ilbõk ear kajitõk: “Kwoj et ijin?” Ilo juõn ainikien eainemõn Rukia ear kajitõk elañe emaroñ konono ibben jatin, im kamelele bwe ear kamadmõde abañ eo ikõtairro. Etke? Kinke ear kile kiõ bwe men in kar ankil an Anij. Jatin ear uak ilo mõnõnõ, rar kamole burukuk eo airro ilo air atbõkwoj don im jañ ilo mõnõnõ—juõn family ear bar koba ibben don kin air lore nan in kaiñi ko an Bible.
Ri Kamao Ro Renana
“Rainin, juõn ajiri ej aluij TV jiljilimjuõn awa ko kajjojo ran. Ñe ej kadiojlok jen school enaj kar aluij elõñlok jen ralitõk thousand picture in uror im jibuki thousand picture in kowadoñ ko.” Eindein an kar book eo The 7 Habits of Highly Effective Families ba kake. Ewi joñan an picture kein jelet juõn ajiri? “Ri kabel ro” rejjab errã kake, ak Bible eo elap an kakkõl kij nae ri kamao ro renana. Ñan wanjoñok, ej ba: “A eo ej komao iben ro dri bwebwe, e naj jorran kake.” (Jabõn Kennan ko 13:20) Ej bareinwõt ba: “Kõmao ko renana rej kakõt mõnit ko remõn.” (1 Dri Korint 15:33) Mour in family eo emaroñ emõnlok elañe jej kaorõk nan in kaiñi in einwõt mol eo jekdon elañe ri kamao ro renana rej armij ak picture ko ilo TV.
Juõn jinen ilo Luxembourg ear katak Bible ibben juõn ian Ri Kennan ro an Jehovah. Juõn ran ear jiroñ Ri Kennan eo bwe aolep jota ledik ro ruo nejin rej jiljilimjuõn im ralitõk air yiõ elap air akwel im lej. Ri Kennan eo ear kajitõkin e kin ta eo ledik ro rej kõmmane ilo jota. Jineir ear ba bwe rar aluij TV ke ear karreoik jikin kõmat eo. Kain picture rot? “Oh, jet picture in moñka,” jineir ear ba. Ke Ri Kennan eo ear ba bwe jet ian picture kein rej kwalok kowadoñ, jineir ear kallimur bwe enaj lale.
Juõn ran tokelik, jineir ear ba bwe ear bwilõñ kin kain picture in moñka rot ko ledik ro nejin rar aluiji. Rar kwalok men in mour ko rekamijak jen iju ko rar kokkure men otemjej rar bed ilo ial ko air. Ear kamelele ñan ledik ro nejin bwe Jehovah ej dike kowadoñ im ejjab mõnõnõ ñe jej aluij kain kowadoñ rot in. (Sam ko 11:5) Ledik ro, rar kõnan kabuñburuen Jehovah, im rar errã ñan jiña im unoik picture ko jen air aluij TV. Ilo mõkaj, rar oktak jen air lej, im mejatoto in family eo air ear emõnlok.
Bwebwenato kein rej jet ian wanjoñok ko ñan kwalok bwe jerbali nan in kaiñi ko an Bible emaroñ kakõmõnmõnlok mour in family eo. Nan in kakabilek ko an Bible remaroñ jerbal ñan elõñ wãwen mour. Ej mol im elap an jelet armij ilo jimwe im emõn. (Dri Hibru 4:12) Ñe armij ro rej katak Bible im jerbale, family ko renaj kajurlok, kadkad ko kadkadin armij renaj emõnlok, im jenaj kejbãrok kij jen bwid ko. Meñe juõn wõt uan family eo ej lore nan in kakabilek ko an Anij, mour enaj emõnlok. Emol, ilo aolep wãwen mour, jej aikwij watõk Nan in Anij einwõt ri jeje psalm ear watõke ke ear je: “Am in nan e lamp ñõn neiõ, im maram ñõn aõ ial.”—Sam ko 119:105.
[Pija ilo peij 5]
Abañ ko an family kar kamadmõdi ilo ad jerbale nan in kaiñi ko an Bible