Kwomaroñ Kijenmij Ñan Jemlokin

“Jen kijenmij im etõr ilo iaikuij eo emwij likit e imar.”—DRI HIBRU 12:1.

1, 2. Ta melelen kijenmij?

“EMÕN komin kijenmij,” ri jilek Paul ear je ñan Christian Ri Hebrew ro ilo ebeben eo kein kajuõn. (Dri Hibru 10:36) Ñan kalikar aorõkin kadkad in, ri jilek Peter ear bareinwõt rejañ Christian ro: “Ilo ami tõmak komin kõke . . . kijenmij.” (2 Piter 1:5, 6) Ak ta in kijenmij?

² Juõn book in Greek-English lexicon ej kameleleik verb eo ilo kajin Greek kin “kijenmij” einwõt “bedwõt jen am ko . . . jutak bin, tõt.” Ikijen noun eo “kijenmij,” ilo kajin Greek juõn book in kamelele ej ba: “Ej jitõb ak lemnak eo emaroñ kijenmij ilo wãwen men ko, jab kin juõn eddo, ak kin juõn kejatdikdik ekakijeekek . . . Ej kadkad eo me ej kamaroñ juõn emaan bwe en jutak wõt ke ej jal ñan kõto eo. Ej kadkad eo me emaroñ ukõt melejoñ eo elaptata ñan juõn men in nebar kinke ellã jen eñtan eo ej lo mejenkajjik eo.” Inem, kijenmij ej kamaroñ juõn ñan jutak bin ñe ej jelmae melejoñ im abañ ko im ejjab ebwer. Wõn eo elaptata ej aikwiji kadkad in?

3, 4. (a) Wõn ro rej aikwij kijenmij? (b) Etke jej aikwij kijenmij ñan jemlokin?

³ Christian ro otemjej ilo kõkkar rej bed ilo juõn iaikwij eo me ej aikwiji air kijenmij. Ilo 65 C.E., ri jilek Paul ear jejelok ñan ri jerbal eo etiljek Timothy eo mõttan im rejetan ilo ito-itak kin nan in kõketak kein: “I ar tõrinae tõrinae emõn, I ar kamwijlok aõ elulu, I ar drebij tõmak eo.” (2 Timote 4:7) Ilo an kajerbal nan ko “I ar kamwijlok aõ elulu,” Paul ear keidi lok mour eo an einwõt juõn Christian ñan juõn iaikwij, ilo an wõr juõn ial emwij karõke im juõn line in jemlok. Ilo ien eo, Paul ear ebaklok ñan jemlokin iaikwij eo an, ilo liki ear reimanlok ñan an bõk jinekjej eo. “Jen ien in,” ear wõnmanlok im ba, “beliõ in kwojarjar ej kõtar iõ, eo Iroij, Dri ekajet e wãnik E naj letok ñõn iõ ilo ran eo.” (2 Timote 4:8) Paul ear liki bwe enaj bõk jinekjej eo kinke ear kijenmij ñan jemlokin. Ta kin kij?

⁴ Ñan rejañ ro rar deloñ ilo iaikwij eo, Paul ear je: “Jen kijenmij im etõr ilo iaikuij eo emwij likit e imar.” (Dri Hibru 12:1) Einwõt Christian ro, jaar deloñ ilo iaikwij in kijenmij in ke jaar wujleplok ad mour ñan Jehovah Anij ikijen Jesus Christ. Juõn ijjino eo emõn ilo ial an juõn ri kalor eaorõk, ak men eo eaorõktata ej bwe jen tõbar jemlokin ial eo. Jesus ear keañ: “A eo e naj kijinmij ñõn jemlokõn, e in e naj mour.” (Matu 24:13) Jinekjej eo me ej kõttar ro renaj lo tõbrak in air kajemlok iaikwij eo ej mour indio! Kin men in, ilo ad lemnak kin mejenkajjik eo, jej aikwij in kijenmij ñan jemlokin. Ta eo enaj jibañ kij ñan tõbar mejenkajjik eo?

Bõk Mõñã ko Elap Õn Ie—Juõn Men in Aikwij

5, 6. (a) Ñan kijenmij ilo iaikwij eo kin mour, jej aikwij lale ta? (b) Jej aikwij kortokjen men in letok et ko ilo jitõb, im etke?

⁵ Iturinlok jikin kwelok eo an Corinth, Greece, kar wõr juõn jikin eo Isthmian Game ko rebuñbuñ rekin walok ie ilo ien ko etto. Ejelok bere Paul ear kile bwe brother ro ilo Corinth rar jelã kin jiai im ikkure ko rar walok ie. Ilo an kajerbal jelãlokjen eo air, ear kakememej ir kin air bed ilo juõn iaikwij in mour: “Kom jab jela ke bwe ro rej etõr ilo iaikwij, ir otemjej rej etõr a juõn wõt ej bõk mejenkajik? Komin etõr einwõt bwe komin tõbrõk.” Paul ear kalikar aorõkin air bedwõt ilo iaikwij eo im kate ir manlok ñan jemlokin. Ak ta eo enaj jibañ ir ñan kõmmane? Ear ba “Im jabrewõt armij eo ej iaikwij kin mejenkajik e jadõr ilo men otemjej.” Aet, ri ikkure ro ilo kain ikkure kein rekin kate kamineneik ir, kejbãrok ta eo rar mõñã im idak, im lale aolep makitkit ko air bwe ren wiin.​—1 Dri Korint 9:24, 25.

⁶ Ta kin iaikwij eo Christian ro rar deloñ ie? “Kwoj aikwij lale bwe kwon bõk mõñã ko ilo jitõb elañe kwo kõnan kijenmij ilo iaikwij in mour,” juõn elder ilo juõn congregation an Ri Kennan ro an Jehovah ear ba. Lemnak kin mõñã ko ilo jitõb Jehovah, “Anij eo ej letok kijenmij,” ear letok ñan kij. (Romans 15:5, New World Translation) Unjen eo elaptata in mõñã ko ilo jitõb ej Nan eo an, Bible eo. Ejjab juõn men in aikwij ke bwe jen kejbãrok juõn schedule emõn in read Bible? Ikijen “dri korijer e tiljek im meletlet,” Jehovah ear bareinwõt letok magazine in Imõniaroñroñ im Awake! ko rejejjet im book ko jet rej bedbed ion Bible. (Matu 24:45) Tiljek in katak book kein enaj kakajur kij ilo jitõb. Aet, jej aikwij bõk ien​—‘wiaik ien’​—ñan katak ibbed make.​—Dri Epesõs 5:16.

7. (a) Etke en kar jab juburu ñe jelã kin irinekatak in Christian ko? (b) Ewi wãwen jemaroñ “jibarbar ñõn men in wãppen”?

⁷ Ñan bedwõt ilo ial an juõn Christian ri kalor, jej aikwij le jen “katak kin men ko mokta an Kraist” im “jibarbar ñõn men in wãppen.” (Dri Hibru 6:1) Inem jej aikwij kaddek juõn itoklimo kin “ta eo drilpen, im aitokõn, im mũlõlin, im utiejen” mol eo im bõk õn jen “ekõn ko rebin rej ekar ñõn ro re ridto.” (Dri Epesõs 3:18; Dri Hibru 5:12-14) Ñan wanjoñok, bwebwenato ko emen kin mour eo an Jesus ke ear bed ion lal​—Gospel ko einwõt Matu, Mark, Luk, im Jon. Kin juõn etale eo emõn kin bwebwenato in Gospel kein, jemaroñ jelã jab kin jerbal ko wõt Jesus ear kõmmani im kar kain armij rot e ak jemaroñ bareinwõt melele kin wãwen lemnak eo an me ear kamakit e ñan jerbal. Inem jemaroñ bõk “lolãtãt an Kraist.”​—1 Dri Korint 2:16.

8. Ewi wãwen kwelok ko an Christian remaroñ jibañ kij kijenmij ilo iaikwij eo kin mour?

⁸ Paul ear rejañ ri tõmak ro mõttan: “Im jen lale dron, im kõkãtok dron ñõn yokwe im jerbal ko remõn; Im jen jab likit ar kwelok im jar, einwõt mõnit an jet, a jen kowe dron im kalaplok ar kõmõn men in, bwe jej lo an ran eo ebaktok.” (Dri Hibru 10:24, 25) Juõn unjen kõketak elap ej kwelok ko an Christian! Elap an kaemololo ñan bed ibben ro jeid im jatid maan im kõrã ro ewõr yokwe ibbeir, ro rej itoklimo kake kij im rekõnan jibañ kij kijenmij ñan jemlokin! Jejjab maroñ kajettokjen men in letok in kin yokwe an Jehovah. Ikijen ad katak ibbed make im keini ad bed ilo kwelok ko, jen “erom ritto ro ilo lolãtãt.”​—1 Corinthians 14:20, NW.

Ri Aluij ro ñan Erooje Yuk

9, 10. (a) Ilo wãwen et eo ri aluij ro remaroñ in juõn unjen rejañ ilo juõn iaikwij ej aikwij wõr kijenmij ie? (b) Ta eo ‘kõro elap, rej kabol kij’ ej konono kake ilo Dri Hibru 12:1?

⁹ Bõtab, jekdon ewi joñan an bojak juõn ri ettõr, emaroñ walok men ko ilo ial eo me remaroñ kõmman an tũbbok. “Emõn ami kin etõr; wõn e ar karumij kom bwe komin jab bokake mol?” Paul ear kajitõk. (Dri Galetia 5:7) Alikar, jet ri Christian im Galatia ro rar kamao ibben ri nana ro im, tokjen men in, kar kamad ir jen iaikwij eo air kin mour. Ijo tu-rãjet, jurak im nan in rejañ jen ro jet emaroñ kõmman bwe en bidodolok am kijenmij. Men in ej einlok wõt wãwen eo ibben ri aluij ro me remaroñ jelet ro rej bõk kunair ilo juõn ikkure. Jar ko reobrak kin kijejeto rej kalaplok itoklimo eo me ej kamakit ro rej bõk kunair ilo ikkure ko jen jinoin ñan jemlokin. Elamõjmõj an ro rej aluij, ekkã an koba ibben kajañjañ ko elap ainikeir im kabbokbok, remaroñ lelok rejañ eo ro rej ikkure rej aikwiji ñe rej kebaklok line in kajemlok eo. Emol, ri aluij ro remaroñ jelet ro rej bed ilo iaikwij eo ilo juõn wãwen emõn.

¹⁰ Ilo iaikwij in mour eo me Christian ro rar deloñ ie, wõn ro rej ri aluij ro? Elikin an kõlajrak ri kennan ro retiljek mokta jen ien ko an ri Christian ro, einwõt kar je ilo chapter 11 ilo book in Dri Hibru, Paul ear je: “Inem, bwe dri kennan, einwõt kõro elap, rej kabol kij, . . . jen kijenmij im etõr ilo iaikuij eo emwij likit e imar.” (Dri Hibru 12:1) Ilo an kajerbal nan in kõkkar eo kin juõn kõdo, Paul ear jab kajerbal nan in Greek eo me ej kalikar kilep in im jekjekin juõn kõdo. Jen an eindein ear kajerbal juõn nan eo me ekkar ñan lexicographer W. E. Vine ej “melelen juõn kõdo elap im ejelok jekjekin me ej kalibubu lañ ko.” Alikar, Paul ear lemnak kin juõn jar elap in ri kennan ro​—joñan air lõñ rar einwõt juõn kõdo elap.

11, 12. (a) Ewi wãwen an ri kennan ro retiljek mokta jen ien Christian maroñ, ilo kõkkar, pinniki kij ñan ettõr ilo kijenmij ilo iaikwij eo? (b) Ewi wãwen jemaroñ bõk elaplok tokjen jen ‘dri kennan ro einwõt kõro elap’?

¹¹ Ri kennan ro retiljek me mokta jen ien Christian remaroñ ke lukkun ri aluij ro ilo ran kein? Rejjab maroñ. Rej aolep kiki ilo mij, im rej kõttar jerkakbiji eo. Bõtab, ke rar mour rar ri ettõr ro rar lo tõbrak, im joñok ko air rej bed wõt ilo page ko ilo Bible. Ñe jej katak Jeje ko, rein retiljek rej alikar ilo lemnak ko ad, im remaroñ, einwõt ba, pinniki kij ñan ettõr ilo iaikwij eo ñan jemlokin.​—Dri Rom 15:4.a

¹² Ñan wanjoñok, ñe jerammõn ko an lal rej kabo kij, juõn etale kin ewi wãwen Moses ear karmijeteik mweiuk ko otemjej an Egypt ejamin kamakit kij ke ñan bedwõt ilo ial in aikwij eo? Elañe jej jelmae juõn melejoñ elap an bin, ilo ad naj kememej kin melejoñ eo elap me Abraham ear jelmaiki ke kar kajitõk ibben ñan an katok kin Isaac nejin men in enaj mol an rejañ kij bwe jen jab ebwer ilo aitwerõk eo kin tõmak. Kin joñan eo ‘jar eo elap’ ri kennan rein rej erooje kij ilo wãwen in ej wawa ion ewi joñan an alikar ad lo ir kin mejen buruõd.

13. Ilo wãwen et eo Ri Kennan ro an Jehovah ilo ran kein rej erooje kij ilo iaikwij eo kin mour?

¹³ Juõn jar elap an Ri Kennan ro an Jehovah ilo ran kein rej kabol kij bareinwõt. Christian ri kabit ro im bareinwõt maan im kõrã ro uan “jar eo elap” rar likit wanjoñok ko remõn kin tõmak! (Reveles̃õn 7:9) Jen ien ñan ien jemaroñ readi bwebwenato ko kin mour ko air ilo magazine in im ilo book ko jet an Watch Tower Society.b Ke jej kalmenlokjen kin tõmak eo air, jej bõk rejañ ñan kijenmij ñan jemlokin. Im elap ad mõnõnõ in bõk rejañ jen ro mõttad im ro nukid me rebak im rej karejar ñan Jehovah ilo tiljek! Aet, elõñ armij remaroñ erooje kij ilo iaikwij kin mour.

Karõk ilo Meletlet Joñan Mõkaj in Am Ettõr

14, 15. (a) Etke eaorõk bwe jen ilo meletlet karõk joñan mõkaj in ad ettõr? (b) Etke jej aikwij kwalok kõmmanwa ñe jej likit mejenkajjik ko?

¹⁴ Ñe kwoj ettõr ilo juõn iaikwij eaetok, einwõt ilo juõn marathon (juõn iaikwij 26 mile aetokin), juõn ri ettõr ej aikwij ilo meletlet karõk joñan mõkaj in an ettõr. “Am ettõr ilo emõkaj ilo jinoin iaikwij eo emaroñ walok ilo likjap,” magazine eo New York Runner ear ba. “Jemlok eo enaj walok ilo am aikwij to am kate yuk in ettõr ilo mile ko eliktata ak ilo am ebwer im bõjrak.” Juõn ri ettõr ilo juõn marathon ej kememej: “Ñan keboj kij ilo iaikwij eo juõn ri konono ear kakkõl kij ilo alikar: ‘Jab lukwarkware ri ettõr ro remõkaj. Ettõr ilo joñan eo kwomaroñ. Elañe jab kwonaj mõk im kwomaroñ ebwer im bõjrak.’ Ilo aõ bokake nan in kakabilek in ear jibañ iõ ñan kajemlok iaikwij eo.”

¹⁵ Ilo iaikwij eo kin mour, ri karejar ro an Anij rej aikwij kate ir. (Luk 13:24) Bõtab, ri kalor eo James ear je: “A meletlet jen lañ ej . . . kõmmanwa.” (James 3:17, NW) Ke wanjoñok ko remõn an ro jet remaroñ rejañ kij ñan kalaplok men ko jej kõmmani, kõmmanwa enaj jibañ kij ñan ad likit mejenkajjik ko rej ekkar ñan maroñ ko ad im wãwen ko ibbed. Jeje ko rej kakememej kij: “A jabrewõt armij en mõke melejoñ jerbal eo an, inem e naj or unin kijmãje ilo e mõke, im jab ilo dri turin. Bwe jabrewõt armij e naj mõke inek kwonan.”​—Dri Galetia 6:4, 5.

16. Ewi wãwen ettã buru ej jibañ kij ñe jej karõk joñan mõkaj in ad ettõr?

¹⁶ Ilo Micah 6:8, ej kajitõkin kij kajitõk in me ej kamakit ad lemnak: “Ta eo Jehovah ej kajitõk ibbam ak . . . kwon ettã buru ilo am etetal ibben Anij?” Ettã buru ej kitibuj ad jelã maroñ ko ad. Nañinmij ak am juõn eo eritto ear kõmman ke joñan am maroñ kõmmani ilo jerbal eo an Anij? Jen jab ebwer. Jehovah ej mõnõnõ kake jibadbad im men in katok ko ad ‘ekar ñõn men ko iben armij, jab ñõn men ko ejelok iben.’​—2 Dri Korint 8:12; keidi Luk 21:1-4.

Kalimjek Wõt Mejenkajjik eo

17, 18. Ta eo Jesus ear reimanlok ñan e im ar jibañ e ñan kijenmij ion alal in kaeñtan eo?

¹⁷ Ilo an kwalok ñan Christian ro ilo Corinth kin aikwij eo ñan kijenmij ilo iaikwij eo kin mour, Paul ear konono kin bar juõn wãwen ilo Isthmian Game ko me eaorõk bwe jen etale. Ikijen ro rar bõk kunair ilo ikkure ko, Paul ear je: “Ir rej kõmõn men in [ettõr] bwe ren jibarek rojenbõr e mor mõkõj; a kij eo e jamin mor. Inem ein drein ña ij etõr, jab einwõt I toñõñ.” (1 Dri Korint 9:25, 26) Mejenkajjik an juõn eo ej wiin ilo ikkure kein ilo ien ko etto kar juõn crown, ak ut, kõmman jen bwilik in pine ak men in eddek ko jet, ak emaroñ jen celery eo emõrã​—emol juõn “rojenbõr e mor mõkõj.” Ak, ta eo ej kõttar Christian ro rej kijenmij ñan jemlokin?

¹⁸ Ikijen eo ej ad Joñok, Jesus Christ, ri jilek Paul ear je: “Eo kin lañliñ ar likite iman, Ear eñtan ilo alal in kaeñtan eo, jekdon jook eo, im Ear jijet i anbijmaroñõn throne an Anij.” (Hebrews 12:2, NW) Jesus ear kijenmij ñan jemlokin mour eo an einwõt juõn armij ilo an kar reimanlok ellãlok jen alal in kaeñtan eo ñan mejenkajjik eo an, eo ej koba lañliñ eo ej bõke kin ijo kunan ñan kokwojarjar etan Jehovah, ilo an binmouri armij jen mij, im ilo an iroij einwõt King im Priest eo Eutiejtata ke ej karol armij ro rekiblie ñan mour indio ilo juõn paradise ion lal.​—Matu 6:9, 10; 20:28; Dri Hibru 7:23-26.

19. Ta eo jen kalimjeke ñe jej jibadõk ial an juõn Christian ri kalor?

¹⁹ Lemnak kin lañliñ eo ej bed imad ñe jej jibadõk ial an juõn Christian ri kalor. Jehovah ear letok ñan kij jerbal eo ej juburuõd kake ñan kwalok kin news eo emõn kin Ailiñ in Anij im ñan lelok ñan ro jet jelãlokjen eo ilo Bible me emaroñ lomoriir. (Matu 28:19, 20) Elap an kamõnõnõ ñan lo juõn armij eo ej itoklimo ilo Anij eo emol im jibañ e deloñ ilo iaikwij in mour! Jekdon ta uak eo an armij ñe jej kwalok nan ñan ir, ej juõn jerammõn ñan ad bõk kunad ilo jerbal eo ñan kokwojarjar etan Jehovah. Ñe jej kijenmij ilo jerbal in kwalok nan meñe armij ro ilo territory eo rejjab itoklimo ak rej jumae, jej lañliñ in jelã bwe jaar kamõnõnõik buruen Jehovah. (Jabõn Kennan Ko 27:11) Im ãjinkij eo elap me ear kallimur in letok ñan kij ej mour indio. Enaj juõn lañliñ elap! Jej aikwij kalimjek wõt jerammõn kein im kate kij ilo iaikwij eo.

Ñe Ej Ebaktok Jemlokin

20. Ewi wãwen iaikwij eo kin mour enaj laplok an bin ñe ebaktok jemlokin?

²⁰ Ilo iaikwij eo kin mour, jej aikwij tarinaik ri kijirãt eo ad elap, Satan Devil eo. Ke jej kebaklok ien jemlokin, ej kate e ñan an tibij ak kabwer kij. (Reveles̃õn 12:12, 17) Im ejjab bidodo ñan wõnmanlok einwõt ri keañ ro retiljek ñan Ailiñ eo ñe jej jelmae tarinae ko, ñitta ko, nañinmij ko, im abañ ko jet relap me rej kakõlleik “jemlokin ien eo.” (Daniel 12:4, NW; Matu 24:3-14; Luk 21:11; 2 Timote 3:1-5) Bareinwõt, emaroñ einwõt rumij lok jemlokin jen ke jaar kõtmene kake, elaptata elañe jaar deloñ ilo iaikwij eo elõñ yiõ ko remotlok. Ak Nan in Anij ej kamol ñan kij bwe jemlokin enaj itok. Jehovah ej ba bwe ejamin rumij. Jemaroñ loe.​—Habakkuk 2:​3, NW; 2 Piter 3:9, 10.

21. (a) Ta eo enaj kakajur kij ñe jej wõnmanlok ilo iaikwij eo kin mour? (b) Ta eo jen bebe kake ñe ebaktok jemlokin?

²¹ Inem, ñan lo tõbrak ilo iaikwij eo kin mour jej aikwij bõk kajur jen ta eo Jehovah ilo yokwe ear letok ñan kij ñan ad bõk mõñã ko ilo jitõb. Jej aikwij bareinwõt bõk rejañ jen ad keini ad kamao ibben ri tõmak ro mõttad, ro rej ettõr bareinwõt ilo iaikwij eo. Meñe matõrtõr im wãwen ko jejjab kõtmene kaki rej kõmman bwe en laplok an bin iaikwij eo, jemaroñ in kijenmij ñan jemlokin kinke Jehovah ej letok “maroñ eo e kanuij lap.” (2 Dri Korint 4:7) Elap an rejañ ñan ad jelã bwe Jehovah ekõnan bwe jen kajemlok iaikwij eo ilo anjo! Kin juõn bebe ebin, “jen kijenmij im etõr ilo iaikuij eo emwij likit e imar,” ilo ad liki bwe “ilo ien ekar je naj marmir elañe je jab bãrõk.”​—Dri Hibru 12:1; Dri Galetia 6:9.

[Kamelele ko itulal]

Kwoj Kememej ke?

◻ Etke jej aikwij kijenmij ñan jemlokin?

◻ Ta men in letok ko jen Jehovah jen jab jerwani?

◻ Etke eaorõk ñan karõk ilo meletlet joñan mõkaj in ad ettõr?

◻ Lañliñ ta eo ej bed imad ñe jej wõnmanlok ilo iaikwij eo?

[Pija eo ilo peij 28]

Bõk rejañ jen kwelok ko an Christian