Overseer Ro Im Ministerial Servant Ro Anij Ear Kãlet Ir
“Inem komin kejbãrok kom im lale aolepen bwij eo, bwe jitõb kwojarjar ear kãlet kom bwe komin overseer ro ioir.”—ACTS 20:28, New World Translation.
1, 2. Ewi wãwen an jejjet kitien Aiseia 60:22?
JEHOVAH ilo ien eo etto ear kanan bwe juõn men ekabwilõñlõñ enaj kar walok ilo ien eo jemlokin ien. Ikijen ri kanan Isaiah, kar ba: “Eo edik enaj juõn thousand, im eo e niñ enaj juõn ailiñ e kajur. Ña, Jehovah, Inaj kõmman bwe en mõkaj an laplok ilo ien eo an.”—Isaiah 60:22, NW.
2 Ewõr ke menin kamol bwe kanan in ej jejjet kitien rainin? Aet, emol! Ilo yiõ ko 1870 ko, juõn congregation an armij ro an Jehovah ear ejaak ilo Allegheny, Pennsylvania, U.S.A. Jen juõn ijjino eo edik einwõt in, elõñ thousand congregation ko rar jutak lõñtak im jededlok ibelakin lal. Elõñ million ri keañ ro an Ailiñ eo—juõn ailiñ ekajur—rej kiõ kobalok ibben elõñlok jen 91,000 congregation ko ilo 235 ene ko ibelakin lal. Ilo ejelok kajitõk, menin ej kamol bwe Jehovah ej kamõkajkajlok aintok eo an ri kabuñ ro remol mokta jen an walok “eñtan eo elap,” eo me kiõ ekanuij in ebaktok.—Matthew 24:21, NW; Revelation 7:9-14, NW.
3. Ta melelen baptais ‘ilo etan Jemen, Nejin, im jitõb kwojarjar’?
3 Elikin an juõn armij wujleplok mour eo an ñan Jehovah, im ilo an errã ibben nan in katak ko an Jesus, armij rein elõñ orair rar baptais “ilo etan Jema im Nejin im jitõb kwojarjar.” (Matu 28:19) Baptais “ilo etan Jema” melelen bwe kajjojo rein emwij air wujleplok rej kile bwe Jehovah einwõt Jemeir ilañ im Ri Letok-Mour im ajelok ir ñan kajur bõtata eo an. Baptais ‘ilo etan Nejin’ ej kalikar bwe rej kamol kin Jesus Christ einwõt Ri Binmour eo air, Ri Tel im King. Rej bareinwõt kamol jerbal eo an jitõb kwojarjar eo an Anij, ak kajur eo ej makitkit, ilo tel mour eo air. Menin ej kwalok bwe emwij air baptais ‘ilo etan jitõb kwojarjar eo.’
4. Ewi wãwen an Christian minister ro bõk maroñ?
4 Ilo baptais eo air, ri kalor rein rekãl rej likit ir einwõt minister ro an Jehovah Anij. Wõn eo ej kamaroñ ir? Ilo kaiñ, nan ko emwij jei ilo 2 Corinthians 3:5 (NW), rej jerbal ñan ir: “Maroñ eo ad [einwõt minister ro] ej itok jen Anij.” Ejelok air kõnan elaplok ñan bõk nebar jen air bõk maroñ jen Jehovah Anij make! Elikin air baptais, renaj etal wõt im eddeklok ilo jitõb einwõt ri kwalok ro an “news eo emõn” toan wõt air bõk tel eo an jitõb eo an Anij im etal wõt im jerbale Nan eo an.—Matthew 24:14, NW; Jerbal 9:31.
Ekãlel—Jab Jen Armij—Ak Jen Anij
5. Christian overseer ro im ministerial servant ro rej kãlet ke ir ikijen democracy? Kamelele.
5 Tel eo an overseer ro rej ritto ilo jitõb im jibañ eo ewõr maroñ ie an ministerial servant ro tellokiir rej aikwij ñan kejbãrok aikwij ko ilo jitõb kin eddeklok in oran minister ro rej niknik. (Dri Pilippai 1:1) Ewi wãwen air kãlet maan in jitõb rein? Ejjab einwõt kilen ko rej kajerbali ilo Christendom. Ñan wanjoñok, Christian overseer ro rejjab kãlet ir ilo wãwen democracy, einwõt ba, ilo air bõk vote ko an armij ro relõñ rej kobalok ibben juõn congregation. Jen an eindein, rein rej kãlet ir ikijen theocratic. Ta melelen menin?
6. (a) Ta juõn theocracy eo emol? (b) Etke ijjitõñ ko an overseer ro im ministerial servant ro ej theocratic?
6 Ilo tubidodoin ba, juõn theocracy eo emol Anij eo ej iroij ion. Ri Kennan ro an Jehovah rej make lelok ir ñan iroij eo an im karejar ibben don ñan kõmanmõn ankilan eo ekwojarjar. (Sam 143:10; Matu 6:9, 10) Ijjitõñ ko an Christian overseer ro, ak elder ro, im ministerial servant ro rej theocratic kinke wãwen eo ñan jakemanlok im kãlet maan rot in rej bõk eddo rej jerbale ekkar ñan karõk eo an Anij einwõt an mwij karõke ilo Jeje ko Rekwojarjar. Im einwõt “bõran men otemjej,” Jehovah ewõr an jimwe in beek wãwen an jerbal dolul eo an jej loe.—1 Kronikel 29:11; Sam 97:9.
7. Ewi wãwen an Ri Kennan ro an Jehovah kajerbal maroñ?
7 Ilo keidi ibben elõñ kumi in kabuñ ko an Christendom, Ri Kennan ro an Jehovah rejjab beek ñan ir make ejaak in kabuñ eo rej jerbale. Christian rein ettã burueir rej kate ir ñan debij wõt kien ko an Jehovah. Overseer ro ibwiljiir rejjab likit ir ilo office ikijen lajrak in utiej ak title ilo congregation eo ilo wãwen ejaak in kabuñ. Elañe mõttan ko an lal in rej bukõt air idaptõk ibben kãlet kein, armij ro an Jehovah rej makoko in ebbururu. Ilo bin, rej debij wõt ijo emõn an kar ri jilek ro ilo ebeben eo kein kajuõn kalikar ke rar ba: “Emõn jen bokake Anij elap jen armij.” (Jerbal 5:29) Kin menin, Ri Kennan ro rej kõttãik ir make ñan Anij ilo men otemjej. (Dri Hibru 12:9; Jemes 4:7) Lor wãwen eo an theocracy ej bõktok kowãppen eo ekwojarjar.
8. Ewi wãwen an karõk ko rej democratic im theocratic einjuõn jen don?
8 Einwõt ri karejaran Theocrat eo Elap, Jehovah, emõn ñe jej kememej kin lemnak einjuõn ko ikõtan democratic im theocratic ilo karõk ko. Democratic karõk ko ie rej kir ñan joñan wõt juõn ilo jutak ilo etan armij ro im ekkã kalikare ikijen kareelel ñan bõk juõn jea eutiej ilo kien im kãlet ikijen vote ko relõñ. Karõk rot kein rejjab jelet theocratic kãlet ko. Men kein rejjab itok jen armij; im rejjab itok jen jet karõk in kien ak corporation ko. Alikar an kar jitõñlok ñan kãlet eo an jen Jesus im Jehovah einwõt juõn “dri jilik ñõn ailiñ ko,” Paul ear jiroñ Ri Galetia ro bwe emwij kãlet e “jab jen armij rõn, ak jab kin armij, a kin Jisõs Kraist im Anij Jemen, Eo e ar kejerkakbiji E jen ro remij.”—Dri Rom 11:13; Dri Galetia 1:1.
Jitõb Kwojarjar ar Kãlet Ir
9. Ta eo Jerbal 20:28 ej ba kake kin ijjitõñ ko an Christian overseer ro?
9 Paul ear kakememej overseer ro rar jokwe ilo Ephesus bwe emwij an Anij kãlet ir ikijen jitõb kwojarjar. Ear ba: “Inem komin kejbãrok kom im lale aolepen bwij eo, bwe jitõb kwojarjar ear kãlet kom bwe komin overseer ro ioir, ñan shepherde congregation eo an Anij, eo ear wiaik kin bõtõktõk in Nejin make.” (Acts 20:28, NW) Christian overseer rein rar aikwij etal wõt ilo an jitõb kwojarjar tel ir ilo air jerbale eddo ko air einwõt shepherd ro an bwij eo an Anij. Elañe juõn emaan eo ear bõk jerbal in overseer eo, ear etal im jako an tõbar kien eo ekwojarjar, jitõb kwojarjar eo enaj kamakit e bwe en to jen jerbal eo an.
10. Ewi wãwen an jitõb kwojarjar eo jerbale juõn jerbal in ijjitõñ ko ikijen theocracy ej atartar ion?
10 Ewi wãwen an jitõb kwojarjar eo kõmmane juõn jerbal eo ej wawa ion? Moktata, lokbook eo ej karõk menin aikwij ko ñan lale eo ilo jitõb kwojarjar eo ear kakõrmole. Ilo letter ko an ñan Timothy im Titus, Paul ear kilajrak kien ko overseer ro im ministerial servant ro rar aikwij tõbari. Aolepeir, ear kwalok kin jet menin aikwij ko 16 reinjuõn jen don. Ñan wanjoñok, overseer ro en ejelok rueir, ren ettã ilo manit, en jimwe air lemnak, karõk, karuwainene, maroñ ñan katakin, im ren joñok einwõt bõran family. Ren kar jokkin wõt juõn ilo kajerbal alcohol, ren jab arõk money, im ren jerbale jatõr. Ilo wãwen in lok wõt, kien ko reutiej emwij kar karõki ñan maan ro rej jibadõk ijjitõñ ko einwõt ministerial servant ro.—1 Timote 3:1-10, 12, 13; Taitõs 1:5-9.
11. Ta jet ian kadkad ko maan ro rej jibadõk eddo eo ilo congregation eo rej aikwij tõbari?
11 Juõn etale eo kin kadkad kein ej kwalok bwe ro rej tel ilo kabuñ eo an Jehovah rej aikwij joñok ilo mwilin Christian. Maan ro rej jibadõk eddo eo an congregation eo rej aikwij kamol bwe jitõb kwojarjar eo ej jerbal ioir. (2 Timote 1:14) Ej aikwij menin kamol eo bwe jitõb eo an Anij ej kwalok ibben emaan rein leen jitõb in “yokwe, lõñliñ, ainemõn, meanwõr, joij, lejokmen, tiljek, inemõn, jadõr.” (Dri Galetia 5:22, 23) Leen rot kein renaj alikar ilo jerbal ko air ibben ri tõmak ro mõttair im ro jet. Bwebõta, jet emaroñ laplok air kalikar jet ian leen jitõb ko, ke ro jet remaroñ tõbar kadkad ko jet ñan overseer ro ñan juõn joñan eo elap. Bõtab, ilo aolepen joñok in mour eo air, ro otemjej rej kejatdikdik ñan bõk ijjitõñ einwõt overseer ro ak ministerial servant ro rej aikwij kalikar bwe rej armij in jitõb, bed ilo joñok in menin aikwij ko ilo Nan in Anij.
12. Wõn ro jemaroñ ba bwe jitõb kwojarjar eo ear kãlet ir?
12 Ke Paul ear kõketak ro jet ñan air oktak im ri kajeoñe e, ear maroñ kõmman eindein kin anemkwoj in konono kinke e make ear kajeoñe Jesus Christ, eo ‘ear likit juõn joñok ñan kij bwe jen anõke jenkwon nee ko neen.’ (1 Piter 2:21; 1 Dri Korint 11:1) Ro rej tõbar menin aikwij ko ilo Jeje ko ilo ien ijjitõñ eo air einwõt overseer ro ak ministerial servant ro jemaroñ ba bwe jitõb kwojarjar eo ear kãlet ir.
13. Ewi wãwen an jitõb kwojarjar eo jibañ ro rej kõmman jokãlet ko ñan kãlet maan ro ñan air jerbal ilo congregation eo?
13 Ebar wõr juõn mol eo ej kwalok kin wãwen an jitõb kwojarjar eo jerbal ilo kãlet im ijjitõñ eo an overseer ro. Jesus ear ba bwe ‘Jemen ilañ ej letok jitõb kwojarjar ñan ro rej kajitõk ibben.’ (Luk 11:13) Inem ñe elder ro ilo congregation eo rej kwelok ñan kãlet maan ro ñan erreo eo an congregation, rej jar kin jitõb eo an Anij bwe en tel ir. Rej bedbede kãlet ko air ion ta eo Nan in kakõrmol eo an Anij ej ba, im jitõb kwojarjar eo ej jibañ ir ñan air melele elañe juõn armij eo rej watõke ñan air kãlete ej tõbar menin aikwij ko ilo Jeje ko. Rej kõmmane kãlet ko rejjab reel kin baotok eo itulik, tõbrak ko ak kabel ko rar tõbari ilo school, ak maroñ ko ibbeir. Men eo rej lukkun lale eo elañe armij eo ej juõn emaan in jitõb, juõn eo ro uan congregation eo rejamin bõjrak jen air kebake ñan bõk kakabilek ilo jitõb.
14. Ta eo jej katak kake jen Jerbal 6:1-3?
14 Meñe enbwin ko an elder ro rej bõk kunair ibben traveling overseer ro ilo kãlet brother ro ñan air jerbal einwõt elder ro im ministerial servant ro, ijjitõñ ko rej lukkun kõmman ekkar ñan joñok eo kar karõke ilo ebeben eo kein kajuõn. Ilo juõn ien, juõn aikwij ear walok kin maan ro tellokiir ilo jitõb ñan kejbãrok juõn jerbal eo elap tokjen. Governing body eo ear lelok nan in tel kein tok ilokan: “Komin bukõt ñan kom make jiljilimjuõn maan ro emwij kamol kin ir jen ibwiljimi, robrak kin jitõb im meletlet, bwe kim maroñ kãlet ir ñan jerbal in ej menin aikwij.” (Acts 6:1-3, NW) Meñe maan ro rar bed ijo rej kõmmane kãlet ko, ijjitõñ ko kar kõmmani jen maan ro kar kamaroñ ir kin eddo ko ijo ilo Jerusalem. Juõn joñok eo einlok wõt rej anõke rainin.
15. Ewi wãwen Governing Body eo ej bõk kunan ilo wãwen eo ñan kãlet maan ro?
15 Governing Body eo an Ri Kennan ro an Jehovah ej kajju im kãlet aolep ro uan Branch Committee ko. Ñe rej beek ñan wõn eo emaroñ bõk juõn kain eddo rot in, Governing Body eo ej likit ilo an lemnak ennan eo an Jesus: “Jabrewõt eo emwij lelok elõñ ñõn e, naj bukot elõñ jen e: im ñõn eo r’ar likit elõñ iben, re naj koorlok air kajitõk iben.” (Luk 12:48) Kobatok ibben ijjitõñ eo an ro uan Branch Committee eo, Governing Body eo ej jitõñ Bethel elder ro im traveling overseer ro. Bõtab, rej kajerbal brother rej liki air bõk eddo ñan jerbal ilo etair ilo kõmman jet ijjitõñ ko jet. Ebareinwõt wõr joñok ilo Jeje ko kin menin.
‘Kõmman Kãlet ko, Einwõt Nan in Kibel ko Iar Liwoj ñan Kom’
16. Etke Paul ear likit Titus ilo Crete, im ta eo menin ej kalikare kin kãlet ko rainin ikijen theocracy?
16 Paul ear jiroñ ri jerbal eo mõttan Titus: “Kin men in I ar likit yuk i Krit bwe kwon kajime men ko re jañin jimewõt, im likit jet armij bwe ren elder ro ilo jikin kwelok otemjej, einwõt I kar jiroñ yuk.” (Taitõs 1:5) Inem Paul ear kilajrak kadkad ko Titus en kar lali ibben maan ro rej tellokin bõk kãlet ko einwõt kein. Kin menin, rainin, Governing Body eo ej kãlet brother ro tellokiir ilo branch office ko ñan bõk eddo ilo etan ñan kãlet elder ro im ministerial servant ro. Rej aikwij kejbãrok bwe ro rej bõk eddo ilo etan Governing Body eo ealikar air melele im lor ial in tel ko ilo Jeje ko ñan kõmman kãlet rot kein. Eindein, ej iumin tel eo an Governing Body eo bwe maan ro tellokiir rej kãlet ir ñan air jerbal ilo congregation ko an Ri Kennan ro an Jehovah ibelakin lal.
17. Ewi wãwen air jerbale jokãlet ko ñan kãlet overseer ro im ministerial servant ro ilo juõn branch office?
17 Ñe rej kãlet ñan ijjitõñ ko an overseer ro im ministerial servant ro rej lelok ñan juõn branch office an Watch Tower Society, maan ro ewõr air iminene im rej atartar ion jitõb eo an Anij ñan ial in tel ilo kõmman ekãlel ko. Maan rein ewõr juõn air eñjake in eddo, ilo kile bwe rej aikwij jab mõkaj in likit peiir ion jabdewõt emaan, im bõlen bõk kunair ilo jerawiwi ko an.—1 Timote 5:22.
18, 19. (a) Ewi wãwen air jilkinlok jet kãlet ko? (b) Ewi wãwen air jerbale aolepen karõk eo kin jokãlet im kãlet?
18 Jet kãlet remaroñ jilkinlok ilo juõn letter eo ewõr juõn stamp in kien ie jen juõn jikin jerbal in kien. Juõn letter rot in remaroñ kajerbale ñan kãlet elõñlok jen juõn brother ilo congregation eo.
19 Theocratic ijjitõñ ko rej itok jen Jehovah ikijen Nejin im ilo ial eo an Anij ilo lal in jej loe, “dri korijer e tiljek im meletlet” im Governing Body eo an. (Matu 24:45-47) Aolepen wãwen jerbal in kin ekãlel im ijjitõñ jitõb kwojarjar eo ej tele. Eñin wãwen eo kinke kadkad ko emwij karõki ilo Nan in Anij, eo ej kakõrmol in jitõb kwojarjar, im kajjojo ro emwij jitõñ ir ej kwalok menin kamol in kwalok leen jitõb eo. Kin menin, ro emwij kãlet ir ren watõke einwõt emwij an jitõb kwojarjar jitõñ ir. Ejja einwõt overseer ro im ministerial servant ro kar kãlet ir ikijen theocracy ilo ebeben eo kein kajuõn, ejja wãwen in wõt ej mol rainin.
Kamolol kin Ial in Tel eo An Jehovah
20. Etke jej errã ibben ennan ko an David emwij jei ilo Sam 133:1?
20 Ilo tõre in tõreãn jerammõn ilo jitõb im an laplok theocracy ilo jerbal in kwalok nan kin Ailiñ eo, jej kamolol bwe Jehovah ej bõk eddo eo moktata ñan ijjitõñ eo an overseer ro im ministerial servant ro. Karõk in ilo jitõb ej jibañ kij debij kien kwojarjar ko reutiej an Anij ibwiljid einwõt Ri Kennan ro an Jehovah. Bareinwõt, jitõbõn Christian eo im jibadbad ko raorõk an overseer im ministerial servant rein elap ijo kunair ñan ainemõn im burukuk eo ad emõn einwõt ro ri karejaran Jehovah. Einwõt ri jeje Sam eo David, jej emmakit ñan ad lamõj: “Lo! enañin emõn im men in mõnõnõ, ñe ro jim jein im jim jãtin rej ber iben dron ilo buru juõn!”—Sam 133:1.
21. Ewi wãwen an jejjet kitien Aiseia 60:17 rainin?
21 Jej kamolol kin ial in tel eo an Jehovah ikijen Nan eo an im jitõb kwojarjar eo! Im emol, elap melele ko, emwij jei ilo Aiseia 60:17: “Kin jinibõrõrõ I naj bõktok gold, im kin mãl I naj bõktok silver, im kin alal ko, jinibõrõrõ, im kin dreka ko, mãl; im I naj kãlet ainemõn einwõt overseer ro am im wãnik einwõt ri ijjitõñ ro am.” Ke kilen jerbal in theocracy ko rej wõnmanlok im laplok wõt kõmanmanlok ibwiljin Ri Kennan ro an Jehovah, emwij ad loi wãwen jerammõn kein ikijen dolul eo an Anij ilo lal in.
22. Kin ta eo ejimwe ad kamolol kake, im ta eo jej aikwij beek ñan ad kõmmane?
22 Ej lukkun mũlal ad kamolol kin theocratic karõk ko rej bed ibwiljid. Im elap ad kamolol kin jerbal eo ebin im emwij an overseer ro im ministerial servant ro kõmmane ro kar kãlet ir ikijen theocracy. Kij kin aolepen buruõd jej wijtake ilo elap ainikien Jemed ilañ eo ej yokwe, eo ear kõtloktok ñan kij jerammõn eo ilo jitõb im kajerammõn kij kin namweied eo elap. (Jabõn Kennan Ko 10:22) Kin menin, jen beek ñan debij wõt buñten nee eo ibben dolul eo an Jehovah. Ilañin men otemjej, jen etal wõt im jerbal ibben don ilo burukuk ñan nebar, wijtak, im kaibujuij ãt eo elap im kwojarjar etan Jehovah.
Ewi Wãwen Am Naj Kar Uak?
• Etke jemaroñ ba bwe kãlet eo an overseer ro im ministerial servant ro ej theocratic, im jab democratic?
• Ewi wãwen an jitõb kwojarjar eo kãlet Christian maan ro rej bõk eddo?
• Ewi wãwen Governing Body eo ej bõk kunan ilo kãlet overseer ro im ministerial servant ro?
• Ikijen theocratic ekãlel ko, etke jej aikwij kamolol ñan Jehovah?
[Pija]
Elder ro im ministerial servant ro rej bõk kajerammõn ñan jerbal ikijen kãlet eo kin theocracy