Ri Christian Ro Remol Otemjej Rej Ri Evanjel Ro

“Komin al ñõn Jeova, komin nebar etan komin kwalok lomor eo An jen ran ñõn ran.”​​—⁠SAM 96:⁠2.

1. News et ko remõn armij ro aikwij roñjake, im ewi wãwen an Ri Kennan ro an Jehovah likit juõn joñok emõn ñan kajededlok news kein?

ILO JUÕN lal ijo jorrãn ko rej walok ran otemjej, ej juõn men in kainemõn elap ñan jelã bwe Bible eo ej kwalok bwe tarinae, kowadoñ, kwuli, im ijjibed ko renaj jemlok. (Sam 46:9; 72:​3, 7, 8, 12, 16) Emol, men in ejjab news eo emõn ke bwe armij otemjej rej aikwij roñjake? Ej eindein an Ri Kennan ro an Jehovah lemnak kake. Ilo jikin ko otemjej armij rej jelã kake ir einwõt ro rej kwalok nan kin “nan emõn.” (Aiseia 52:⁠7) Emol, elõñ Ri Kennan ro rej eñtan ilo matõrtõr kin air kate wõt ir ñan kwalok nan kin news eo emõn. Ak ilo burueir rej itoklimo kin armij. Im Ri Kennan ro rar ejaak juõn lokbook emõn kin kijejeto im kijenmij eo air!

2. Ta eo juõn unin an Ri Kennan ro an Jehovah kijejeto?

² Kijejeto eo an Ri Kennan ro an Jehovah rainin ej einwõt eo an ri Christian ro ilo ebeben eo kein kajuõn. Kin ir, Roman Catholic newspaper L’Osservatore Romano ear ba ilo jimwe: “Ri Christian ro jinoin, ke rar baptais, rar eñjake bwe kar eddo eo air ñan kajededlok Gospel eo. Ikijen air kennan, ri karejar ro rar kwalok Gospel eo.” Etke Ri Kennan ro an Jehovah, einwõt Ri Christian ro mokta, ej lap air kijejeto? Moktata, kinke news eo emõn rej kwalok kake ej jen Jehovah Anij. Emaroñ wõr ke bar juõn un emõnlok kin air kijejeto? Jerbal in kwalok nan eo air ej wãwen air uake nan ko an ri jeje psalm: “Komin al ñõn Jeova, komin nebar etan: komin kwalok lomor eo An jen ran ñõn ran.”​​—⁠Sam 96:⁠2.

3. (a) Ta un eo kein karuo unin an Ri Kennan ro an Jehovah kijejeto? (b) “Lomor eo an [Anij]” ta eo ej kitibuji?

³ Nan ko an ri jeje psalm ej kakememej kij kin un eo kein ka ruo unin kijejeto eo an Ri Kennan ro an Jehovah. Ennan eo air ej juõn ennan in lomor. Jet armij rej bõk jerbal in doctor, social, economy, ak jerbal ko jet ñan kakõmõnmõnlok wãwen an armij ro mõttair mour, im jibadbad rot kein rej juõn men in nebar. Ak jabdewõt men juõn armij emaroñ kõmmane ñan jibañ bar juõn ewõr joñan tõbrak ie ñe keidi ibben “lomor eo an [Anij].” Ikijen Jesus Christ, Jehovah enaj lomoren armij jen jerawiwi, nañinmij, im mij. Ro rej bõk tokjen renaj mour ñan indio! (Jon 3:​16, 36; Reveles̃õn 21:​3, 4) Rainin, lomor ej mõttan “men in bwilõñ” ko Ri Christian ro rej kememej kaki ñe rej uake nan ko: “Komin ba kin An aibujuij iben ro dri ailiñ ko, jerbal ko An, men in bwilõñ iben ro dri ailiñ ko otemjej. Bwe elap Jeova, im ren kanuij nebar E; ren mijõk E jen anij otemjej.”​​—⁠Sam 96:​3, 4.

Joñok Eo An Master Eo

4-6. (a) Kin un et eo kein kajilu unin an Ri Kennan ro an Jehovah kijejeto? (b) Ewi wãwen an kar Jesus kwalok kijejeto kin jerbal in kwalok nan kin news eo emõn?

⁴ Ri Kennan ro an Jehovah rej kijejeto kin un eo kein kajilu. Rej lor joñok eo an Jesus Christ. (1 Piter 2:​21) Emaan in ewãppen ear bõk kin aolepen buruen jerbal in ñan “kwalok gospel ñõn ro dri jeramel.” (Aiseia 61:1; Luk 4:​17-​21) Kin men in, ear erom juõn ri evanjel, juõn ri kwalok kin news eo emõn. Ear ito-itak iaolepen Galilee im Judea, im “kwalok gospel an ailiñ in lõñ.” (Matu 4:​23) Im kin an jelã bwe elõñ renaj mõnõnõ in bõk news eo emõn, ear ba ñan ri kalor ro an: “Elap jonikõn, a eiet dri jerbal; inem komin jar ñõn Iroij in marmir, bwe En jilkinlok ro dri jerbal ilo jonikõn eo An.”​​—⁠Matu 9:​37, 38.

⁵ Ilo burukuk ibben jar eo an make, Jesus ear katakin ro jet bwe ren ri evanjel ro. Tokelik, ear jilkinlok ri jilek ro an bwe ren make kwalok nan im ear jiroñ ir: “Ñe komij ilok, komin kwalok, im ba, Ailiñ in lõñ ebak.” Enaj kar emõnlok ke ñan air kajutak program ko ñan kadiklok abañ ko an jukjuk im bed eo? Ak ren kar bõk kunair ke ilo politic ko ñan tarinaik nana ko rar jededlok ilo ien eo? Jaab. Jen an eindein, Jesus ear likit juõn kien ñan aolep Ri Christian ri evanjel ro ke ear jiroñ ri kalor ro an: “Ñe komij ilok, komin kwalok.”​​—⁠Matu 10:​5-7.

⁶ Tokelik, Jesus ear jilkinlok bar juõn kumi in ri kalor ro bwe ren keañ: “Ailiñ in Anij ej ebake kom.” Ke rar jeblak ñan kwalok tõbrakin jerbal in evanjel eo air, Jesus ear lap an lañliñ kake. Ear jar: “Kom mol, O Jema, Iroij im lõñ im lõl, bwe Kw’ar noj men kein jen dri meletlet im dri jelalokjen, im Kw’ar kwaloki ñõn niñniñ ro.” (Luk 10:​1, 8, 9, 21) Ri kalor ro an Jesus, ro mokta rar ri eñwõd ro, ri kallip ro, im ri jerbal ro eirlok wõt, rar einwõt niñniñ ro ñe keidi ibben ri tel in kabuñ ro remeletlet ilo ailiñ eo. Ak kar katakin ri kalor ro ñan kwalok nan kin news eo emõntata.

7. Elikin an Jesus wanliñlok ñan lañ, ri kalor ro an rar kwalok news eo emõn ñan wõn ro mokta?

⁷ Elikin an Jesus wanliñlok ñan lañ, ri kalor ro an rar kajededlok news eo emõn kin lomor eo. (Jerbal 2:​21, 38-​40) Rar kwalok nan ñan wõn ro mokta? Rar ilok ke ñan ailiñ ko rar jaje kin Anij? Jaab, jikin eo moktata kar Israel, juõn jar in armij rar jelã kadede kin Jehovah iumin elõñlok jen 1,500 yiõ ko. Ear wõr ke air maroñ ñan kwalok nan ilo juõn ene ijo rar kabuñ kadede ñan Jehovah? Aet. Jesus ear jiroñ ir: “Kom naj bõk maroñ ñe emwij an Jitõb Kwojarjar itok iomi: im kom naj Aõ dri kennan ilo Jerusalem, im i aolepen Judia, im i Sameria, im ñõn eneo etolok tata i lõl.” (Jerbal 1:⁠8) Israel ear aikwij roñjake kin news eo emõn ejja joñan eo wõt ailiñ ko jet.

8. Ewi wãwen an Ri Kennan ro an Jehovah rainin kajeoñe ri kalor ro an Jesus ilo ebeben eo kein kajuõn?

⁸ Ilo ejja wãwen in wõt, Ri Kennan ro an Jehovah rainin rej kwalok nan ilo aolepen lal. Rej jerbal ilo mõnõnõ ibben enjel eo John ear loe im ear wõr “iben gospel ej in drio, bwe en kwalok e ñõn ro rej jokwe ion lõl, im ñõn ailiñ im bwij im konono im driloabjen otemjelok.” (Reveles̃õn 14:⁠6) Ilo yiõ eo 2001, rar jerbal ilo 235 ailiñ im ene ko, ekoba ko me rar watõki enen Christian. E bwid ke bwe Ri Kennan ro an Jehovah ren kwalok nan ilo jikin ko emwij an kabuñ in Christendom kajutak mõn jar ko air? Jet rej ba bwe ebwid im remaroñ watõk jerbal in evanjel eo air einwõt juõn eo ej “kwote sheep ro air.” Bõtab, Ri Kennan ro an Jehovah rej kememej kin eñjake ko an Jesus kin ri Jew ro ettã burueir ilo ran ko an. Meñe kar wõr air dolul in priest kadede, Jesus ear jab ãliklik in jiroñ ir kin news eo emõn. Ear “tiriamokake ir, bwe rej barõk, im jibliklik einwõt s̃ip ko ejelok air s̃eperd.” (Matu 9:​36) Ñe Ri Kennan ro an Jehovah rej lo armij ro ettã burueir im rejjab jelã kin Jehovah im Ailiñ eo an, ren debij ke news eo emõn jen armij rot rein kinke juõn kabuñ ej ba bwe ewõr an maroñ ioir? Ilo ad lor joñok eo an ri jilek ro an Jesus, jen uak jaab. Jej aikwij kwalok nan kin news eo emõn “ilo ailiñ ko otemjelok,” ilo ejelok likjap ñan jabdewõt jikin.​​—⁠Mark 13:⁠10.

Aolep Ri Christian ro Jinoin Rar Ri Evanjel Ro

9. Ilo ebeben eo kein kajuõn, wõn ro ilo congregation in Christian rar bõk kunair ilo jerbal in kwalok nan?

⁹ Wõn ro ilo ebeben eo kein kajuõn rar bõk kunair ilo jerbal in kwalok nan? Men in kamol ko rej kamole bwe aolep Ri Christian ro rar ri evanjel ro? Ri jeje eo W.S. Williams ear je: “Nan in kamol eo ej bwe aolep Ri Christian ro ilo Kabuñ eo moktata . . . rar kwalok nan kin gospel eo.” Ikijen men ko rar walok ilo ran in Pentecost eo ilo 33 C.E., Bible eo ej ba: “Ir otemjej [maan im kõrã ro] rej obrõk kin Jitõb Kwojarjar, im jino air konono kin bar jet loir, einwõt Jitõb ej lelok ñõn ir bwe ren konono.” Ri Evanjel ro rar koba maan im kõrã ro, ro redik im ritto, ri karejar im ri anemkwoj. (Jerbal 1:​14; 2:​1, 4, 17, 18; Joel 2:​28, 29, New World Translation; Dri Galetia 3:28) Ke matõrtõr ear kamakit elõñ Ri Christian ro bwe ren ko jen Jerusalem, “ro r’ar jibliklok, rej etetal im kwalok nan.” (Jerbal 8:⁠4) Aolep “ro r’ar jibliklok,” im jab jejjo wõt rar kãleti, rar kwalok nan.

10. Ta jerbal eo ewõr ruomiãñõn kar jejjet kitien mokta jen an jukjuk im bed eo an Ri Jew ro jako?

¹⁰ Men in ear alikar im mol iaolepen yiõ ko tujinoin. Jesus ear kanan: “Im naj kwalok gospel in an ailiñ in lõñ i aolepen lõl kin men in kennan ñõn ailiñ otemjelok: ilo ien eo e naj itok jemlokõn.” (Matu 24:14) Ilo ebeben eo kein kajuõn ke nan kein rar jejjet kitieir, news eo emõn kar kwalok kake ijoko otemjej mokta jen an jar in tarinae ro an Rome kokkure jukjuk im bed in kabuñ im politic ko an Ri Jew ro. (Dri Kolosse 1:​23) Bareinwõt, ri kalor ro aolep an Jesus rar bokake kien eo an: “Komin ilok, im kõmõn dri ailiñ ko otemjej bwe ren dri kalora, im baptais ir ilo etan Jema im Nejin im Jitõb Kwojarjar; im katakin ir bwe ren bokake nan ko otemjej I ar jiroñ kom.” (Matu 28:​19, 20) Ri Christian ro mokta rar jab rejañ ro ettã burueir bwe ren tõmak ilo Jesus inem ilok jen ir bwe ren make kabukõt ial eo air, einwõt jet ri kwalok ro ilo ran kein rej kõmmane. Jen men in, rar katakin ir bwe ren erom ri kalor ro an Jesus, karõk ir bwe ren erom congregation ko, im kibel ir bwe ren maroñ kwalok nan kin news eo emõn im kõmman ri kalor ro. (Jerbal 14:​21-​23) Rainin Ri Kennan ro an Jehovah rej lor ejja joñok in wõt.

11. Wõn ro rainin rej bõk kunair ñan keañ kin news eo emõntata ñan armij?

¹¹ Elõñ Ri Kennan ro an Jehovah, ilo air lor joñok ko ilo ebeben eo kein kajuõn an Paul, Barnabas, im ro jet, rar etal wõt im erom missionary ro ilo ene ko jet. Jerbal ko air kar wõr tokjen ko relap, kinke rar jab bõk kunair ilo politic ak ilo wãwen ko jet jebwãbwe jen jerbal eo air ñan kwalok nan kin news eo emõn. Rar bokake wõt kien eo an Jesus: “Ñe komij ilok, komin kwalok.” Bõtab, enañin aolep Ri Kennan ro an Jehovah rejjab missionary ilo ene ko reruwamaejet ie. Elõñ iair rej kabwe aikwij ko air ilo air jerbal ilo jikin jerbal ko, im ro jet rej bedwõt ilo school. Jet rej kakajiririk ajiri ro nejiir. Ak aolep Ri Kennan ro rej jake news eo emõn ibben ro jet me rar katak kaki. Ro redik im ritto, maan im kõrã, rej uak ilo mõnõnõ kin nan in jiroñ eo an Bible: “Kwon kwalok nan, kwon kate yuk ilo ien emõn im enana.” (2 Timote 4:⁠2) Einwõt ro moktata ilo ebeben eo kein kajuõn, rar wõnmanlok im “jab ebwer jen air katakin im kwalok nan kin news eo emõn kin Christ, Jesus.” (Acts 5:​42, NW) Rej keañ kin news eo emõntata ñan armij.

Jerbal in Proselytize ak Evanjel?

12. Ta in proselytism, im ewi wãwen air lemnak kake liktak ñan kiõ?

¹² Ewõr juõn nan in kajin Greek pro·se’ly·tos, im ej melelen “oktaklok.” Jen nan in ear walok nan eo ilo kajin English “proselytism,” melelen “ñan kamakit juõn ñan oktaklok ñan bar juõn kabuñ.” Ran kein, jet armij rej ba bwe proselytism ak kamakit juõn ñan ukõt tõmak eo an ej juõn men ekauwatata. Juõn document me dolul in World Council of Churches ear jeje kake ear kamelele kin “jerawiwi in proselytism.” Etke? Catholic World Report ear ba: “Kin abõnõnõ ko jen kabuñ in Orthodox, ‘proselytism’ ear oktak im bõk juõn melele einwõt iun juõn bwe en oktaklok.”

13. Ta jet ian wanjoñok ko kin proselytism me rekauwatata?

¹³ Proselytism ej juõn men ekauwatata ke? Emaroñ. Jesus ear ba bwe jerbal an scribe im Pharisee ro ear kauwatata ñan ro kar kamakit ir ñan oktaklok ñan bar juõn kabuñ. (Matu 23:15) Emol, “jibede juõn bwe en oktaklok ñan bar juõn kabuñ” ej juõn men ebwid. Ñan wanjoñok, ekkar ñan ri jeje bwebwenato eo Josephus, ke Ri Maccabean eo Jon Hyrcanus ear kajibokweik Ri Idumaean ro, ear “kõtlok air bedwõt ilo ene eo toan wõt air mwijmwij ekkar ñan mantin Ri Jew ro im bokake kien ko air.” Elañe Ri Idumaean ro rar kõnan bed iumin iroij eo an Ri Jew ro, rar aikwij lore kabuñ eo air. Ri jeje bwebwenato ro rej jiroñ kij bwe ilo ebeben eo kein karalitok C.E., Charlemagne ear anjo ion ri pagan Ri Saxon ro ilo tueañ in Europe im ilo juõn wãwen elej rar iun ir bwe ren oktaklok ñan bar juõn kabuñ.a Bõtab, kar ewi joñan mol an Ri Saxon ro ak Ri Idumean ro oktaklok ñan bar juõn kabuñ? Ñan wanjoñok, kar ewi joñan an ebak kõtan eo an Ri Idumea eo King Herod​​—⁠eo ear kõnan mõn niñniñ eo Jesus​​—⁠ñan Kien eo ekakõrmol an Moses?​​—⁠Matu 2:​1-​18.

14. Ewi wãwen an jet missionary ro an Christendom jibede armij ñan oktaklok ñan bar juõn kabuñ?

¹⁴ Rainin rej jibede armij ke ñan oktaklok ñan bar juõn kabuñ? Ilo juõn wãwen, jemaroñ ba aet. Emwij an kwalok report ko bwe jet missionary ro an Christendom rej wiaik buruen armij ro rej watõk enaj oktaklok kin scholarship in school ko. Ak rej kõmman bwe juõn ri ko jen juõn ailiñ en jijet ilo an kwuli im roñjake juõn katak in kabuñ mokta jen an maroñ bõk kijen. Ekkar ñan juõn kejelã ilo 1992 ilo juõn convention an ri utiej ro an kabuñ in Orthodox, “proselytism ej walok ikijen air kareel burueir kin mweiuk ko im jet ien ikijen elõñ kain kowadoñ ko.”

15. Ri Kennan ro an Jehovah rej kamakit ke armij ñan oktaklok ekkar ñan melele in nan eo proselytize ilo ran kein? Kamelele.

¹⁵ Jibede armij ñan oktak ñan bar juõn kabuñ ejjab jimwe. Emol, Ri Kennan ro an Jehovah rejjab kõmman eindein.b Inem, rejjab proselytize ekkar ñan melele in nan eo ilo ran kein. Ak, einwõt Ri Christian ro ilo ebeben eo kein kajuõn, rej kwalok nan kin news eo emõn ñan armij otemjej. Jabdewõt eo emõnõnõ in roñjake rej kir ir ñan kalaplok air melele ilo air katak Bible ibbeir. Armij rein rej itoklimo rej katak ñan likit air tõmak, eo ej bedbed ion jelãlokjen eo ejimwe an Bible, ilo Anij im karõk ko an. Tokjen men in, bwe rej kir etan Anij, Jehovah, ñan bõk lomor. (Dri Rom 10:​13, 14, 17) Elañe rej bõk news eo emõn ak jab ej air wõt bebe. Ejelok ijjibed ie. Elañe ekar wõr, inem oktaklok eo air enaj ejelok melelen. Ñan kabuñburuen Anij, kabuñ ej aikwij waloktok jen buru.​​—⁠Duteronomi 6:​4, 5; 10:⁠12.

Jerbal in Evanjel ilo Ran Kein

16. Ewi wãwen an jerbal in evanjel eo an Ri Kennan ro an Jehovah ilo ran kein laplok?

¹⁶ Iaolepen ran kein, Ri Kennan ro an Jehovah rar kajejjet kitien Matu 24:14 ñan juõn joñan elaplok ikijen air kwalok kin news eo emõn. Juõn kein jerbal elap ilo jerbal in evanjel eo air kar magazine eo The Watchtower.c Ilo 1879, ke rar kõmmani copy ko moktata in The Watchtower, rar kõmmani im lelok 6,000 magazine ko wõt ilo juõn wõt kajin. Ilo yiõ eo 2001, elõñlok jen 122 yiõ ko tokelik, oran magazine ko rej kõmmani im liloki kar tõbar 23,042,000 copy ko ilo 141 kajin ko. Ekoba ibben laplok in kar laplok in jerbal in evanjel eo an Ri Kennan ro an Jehovah. Keidi jejjo thousand awa ko ilo ebeben eo kein ka 19 ibben 1,169,082,225 awa ko rar kwalok nan in yiõ eo 2001. Lemnak kin 4,921,702 katak kin Bible ko ilo ejelok wõnãn rar kõmmani ilo kajjojo alliñ. Ej juõn joñan jerbal elap im emõn air kõtõbrake! Im 6,117,666 ri kwalok ro reniknik an Ailiñ eo rar kõmman men in.

17. (a) Kain anij rot ko rewan rej kabuñ ñan i rainin? (b) Jekdon ta kajin eo air, ailiñ eo air, ak jojikin rej bed ie, ta eo armij ro otemjej rej aikwij jelã kake?

¹⁷ Ri jeje psalm ej ba: “Anij ro otemjej an ro dri ailiñ ko re ekjõp wõt; a Jeova e ar kõmõnmõn lõñ ko.” (Sam 96:⁠5) Ilo lal eo rainin, tiljek ñan ailiñ ko, kakõlle ko kakõllan ailiñ ko, ro reutiej, men ko ilo kanniek, im bareinwõt mweie kar men ko rar kabuñ ñan i. (Matu 6:​24; Dri Epesõs 5:5; Dri Kolosse 3:⁠5) Mohandas K. Gandhi ear ba juõn ien: “Ej lemnak eo aõ ebin bwe . . . Europe ej juõn ailiñ in Christian ilo ãt wõt. Ilo mol ej kabuñ ñan Mammon [mweiuk ko].” Mol eo in, armij ro ijoko otemjej rej aikwij eoroñ news eo emõn. Armij otemjej, jekdon kajin eo air, ailiñ eo air, jojikin rej bed ie, rej aikwij jelã kin Jehovah im karõk ko an. Jej kejatdikdik bwe aolep renaj tõmak kin nan ko an ri jeje psalm: “Komin lelok ñõn Jeova, kom ro nukin ian ro dri ailiñ ko, komin lelok ñõn Jeova aibujuij im kajur. Komin lelok ñõn Jeova aibujuij ekar ñõn etan; bõktok jurtak, im dreloñtok ñõn iloan worwor ko An”! (Sam 96:​7, 8) Ri Kennan ro an Jehovah rej jibañ ro jet ñan katak kin Jehovah bwe ren kaibujuij e. Im ro rej uak rej bõk elap tokjen. Ta jerammõn ko rej bõki? Katak in tok ilal enaj kamelele kin jerammõn kein.

[Kamelele ko itulal]

Kwomaroñ Ke Kamelele?

• Etke Ri Kennan ro an Jehovah rej ri evanjel ro rekijejeto?

• Etke Ri Kennan ro an Jehovah rej kwalok nan ilo jikin ko otemjej meñe ewõr kabuñ ko an Christendom ie?

• Etke Ri Kennan ro an Jehovah rejjab kamakit armij ñan oktaklok ñan bar juõn kabuñ ekkar melele in proselytize ilo ran kein?

• Kar ewi joñan jerbal in evanjel eo an Ri Kennan ro an Jehovah laplok ilo ran kein?

[Pija ilo page 7]

Jesus ear juõn ri evanjel ekijejeto im ear katakin ro jet bwe ren kõmman ejja jerbal in wõt

[Pija ilo page 8]

Aolep ro uan congregation eo ilo ebeben eo kein kajuõn rar bõk kunair ilo jerbal in evanjel

[Pija ilo page 9]

Jibede armij ñan oktaklok ñan bar juõn kabuñ ej juõn men ebwid