“Kwon Kõmõn Jerbal An Dri Evanjel”
“A kwon jadõr ilo men ko otemjej, . . . kwon kõmõn jerbal an dri evanjel.”—2 Timote 4:5.
1. Ta jerbal eo Jesus ear lelok ñan ri kalor ro an?
IBELAKIN lal rej kwalok nan kin etan Jehovah im karõk ko an. Rej kõmman men in kinke armij ro an Anij emwij wujleplok air mour rar kaorõk jerbal eo Jesus Christ ear lelok ñan ri kalor ro an ke ear ba: “Komin ilok, im kõmõn dri ailiñ ko otemjej bwe ren dri kalora, im baptais ir ilo etan Jema im Nejin im Jitõb Kwojarjar; im katakin ir bwe ren bokake nan ko otemjej I ar jiroñ kom.”—Matu 28:19, 20.
2. Overseer eo Timote ear bõk ta nan in kakabilek eo, im ta juõn ian wãwen ko Christian overseer ro remaroñ kamwijlok jerbal eo air?
2 Ri kalor ro an Jesus ilo ebeben eo kein kajuõn rar kaorõk jerbal in. Ñan wanjoñok, ri jilek Paul ear rejañ Christian overseer eo Timote: “Kwon kõmõn jerbal an dri evanjel, kwon kajejit jerbal eo am.” (2 Timote 4:5) Ran kein, juõn wãwen an juõn overseer maroñ kõmman jerbal in, ej ilo an jerbal einwõt juõn ri kwalok eo ekijejeto kin Ailiñ eo, juõn eo ej keini in kwalok nan jen em ñan em. Ñan wanjoñok, Congregation Book Study overseer eo ej bõk jerammõn in tel ilo jerbal in kwalok nan im katakin armij ro jet. Paul ear bõk eddo eo ñan kwalok nan kin news eo emõn, im ear jibañ ro jet bwe ren bõk jerbal in.—Jerbal 20:20; 1 Dri Korint 9:16, 17.
Ri Evanjel Ro Rekijejeto ilo Ien ko Mokta
3, 4. Ta jerammõn ko Philip ear bõki einwõt juõn ri evanjel?
3 Ri Christian ro mokta rar buñbuñ einwõt ri evanjel ro rekijejeto. Lemnak kin ri evanjel eo Philip. Ear juõn ian “jiljilimjuõn armij . . . r’obrõk kin Jitõb Kwojarjar im meletlet” rar kãlet ir ñan bõkto-bõktak ilo ejelok kalijeklok mõñã ko ñan Ri Christian kõrã ro ejako beleir rej konono ilo kajin Greek im Hebrew ilo Jerusalem. (Jerbal 6:1-6) Ke jerbal in ejejuan ear jemlok im matõrtõr ear kejebliklok aolep Ri Christian ro ijellokin ri jilek ro, Philip ear etal ñan Samaria. Ijo ear kwalok news eo emõn ie im jitõb kwojarjar eo ear kamaroñ e bwe en ubakelok dimon ro im kejmoure ro rajkuk im ro ri akã. Elõñ Ri Samaria ro rar bõk ennan eo an Ailiñ eo im rar baptais. Ke rar roñ kin men in, ri jilek ro ilo Jerusalem rar jilkinlok ri jilek Peter im John ñan Samaria bwe ri tõmak ro rej kab baptais ren bõk jitõb kwojarjar eo.—Jerbal 8:4-17.
4 Kiõ jitõbõn Anij ear jilkinlok Philip ñan wõnmae Ri Itiopia unõk eo ilo ial eo ej wanlal ñan Gaza. Elikin an Philip kamelele ilo alikar kin kanan eo an Isaiah, emaan in eo ear “utiej iben Kandace, liroij in Itiopia, [im] ej lale mweien otemjej” ear tõmak ilo Jesus Christ im ear baptais. (Jerbal 8:26-38) Tokelik Philip ear etal ñan Ashdod inem tokelik ñan Caesarea, im “kwalok Gospel ilo jikin kwelok otemjej” ear etal ielok. (Jerbal 8:39, 40) Emol bwe ear likit juõn joñok emõn einwõt juõn ri evanjel!
5. Kõrã ro emen nejin Philip rar buñbuñ kin ta?
5 Philip ear niknik wõt ilo jerbal in kwalok nan ilo Caesarea 20 jima yiõ ko tokelik. Ke Paul im Luke rar bedwõt ilo mweo imõn, ear wõr “emen jiroñ ro nejin, ro virjin, im rej drikanij.” (Jerbal 21:8-10) Emol bwe rar lukkun katak ilo jimwe im bojak ilo jitõb, rar kijejeto ilo jerbal in kwalok nan, im rar bõk jerammõn in dikanij. Kijejeto eo an jemen im jinen ajiri ro emaroñ jelet ajiri ro nejiir ilo jimwe ilo ran kein, im kamakit ir ñan kõmman bwe jerbal in evanjel ilo kijejeto en jerbal eo air toan wõt air mour.
Ri Evanjel Ro Rekijejeto ilo Ran Kein
6. Ta tõbrak ko ri evanjel ro ilo ebeben eo kein kajuõn rar bõki?
6 Ilo kanan eo an elap eo ej jitõñtok ñan ran kein ad im jemlokin ien, Jesus Christ ear ba: “Im naj kwalok gospel ñõn dri ailiñ ko otemjej mokta.” (Mark 13:10) Jemlokin ien enaj itok elikin jerbal in kwalok nan kin news eo emõn “i aolepen lõl.” (Matu 24:14) Ke Paul im ri evanjel ro ilo ebeben eo kein kajuõn rar kwalok nan kin news eo emõn, elõñ rar tõmak, im elõñ congregation ko rar jutak ilo jikin ko otemjej iaolepen Ailiñ eo an Rome. Elder ro emwij air kãleti ñan jerbal ilo congregation kein rar bõk kunair ibben maan im kõrã ri tõmak ro mõttair ilo jerbal in evanjel im kajededlok jerbal in kwalok nan iaolepen lal. Nan eo an Jehovah ear laplok im jededlok ilo ran ko, ejja einwõt ilo ran kein kinke elõñ million Ri Kennan ro an Jehovah rej kõmman jerbal in evanjel. (Jerbal 19:20) Emwij ke am jutak einwõt juõn ian ro remõnõnõ in nebar Jehovah?
7. Ta eo ri keañ ro an Ailiñ eo rej kõmmane ilo ran kein?
7 Elõñ ri keañ ro an Ailiñ eo ilo ran kein rej bõk ien ñan kalaplok air jerbal in evanjel. Elõñ thousand ri kwalok ro rar bõk kunair ilo jerbal in missionary, im elõñ buki thousand iair rej kwalok nan full-time einwõt regular im auxiliary pioneer ro. Im ej juõn men in nebar elap kin jerbal eo maan, kõrã, im ajiri ro rej kõmmane einwõt ri kwalok ro rekijejeto kin Ailiñ eo! Emol, aolep armij ro an Jehovah rej lañliñ kin jerammõn eo emweie jen e ñe rej jerbal ibben aera kin aera einwõt Christian ri evanjel ro.—Zephaniah 3:9, New World Translation.
8. Ta jerbal in kakõlle eo rej kõmmane rainin, im wõn ro rej kõmmane?
8 Anij ear lelok ñan ri kabit ri kalor ro an Jesus jerbal eo ñan kwalok nan kin news eo emõn ibelakin lal. Ewõr juõn joñan armij ro rej “bar jet [an Christ] s̃ip” rej orlok wõt im jurake ir ilo jerbal in kwalok nan. (Jon 10:16) Ilo kanan, jerbal in lomor in ej einwõt ñe rej kakõlleik deman armij ro rej inebata im buromõj kin men ko renana rej walok kiõ. Mõttan jidik, ri nana ro renaj jako. Mae ien eo, ej juõn jerammõn elap ñan bõklok katak ko remol ñan lomoren armij ro an lal!—Ezekiel 9:4-6, 11, NW.
9. Ewi wãwen ad maroñ jibañ ro rekãl ilo jerbal in kwalok nan?
9 Elañe ebwe an to ad bed bõk kunair ilo jerbal in evanjel eo ñan kiõ, emol bwe jemaroñ kõmman juõn men ñan jibañ ro rekãl ilo congregation eo. Jet ien, remaroñ etal ibbed ilo jerbal in kwalok nan. Ro rej elder rekõnan kamaat air maroñ ñan kakajurlok ri tõmak ro mõttair ilo jitõb. Jibadbad ko remõn an elder ro ettã burueir emaroñ jibañ ro jet bwe ren einwõt ri evanjel ro rekijejeto im kouwa.—2 Piter 1:5-8.
Kwalok Nan Jen Em ñan Em
10. Christ im ri kalor ro an mokta rar likit kain joñok rot eo ilo jerbal in kwalok nan?
10 Jesus Christ ear likit juõn joñok emõn ñan ri kalor ro an einwõt juõn ri evanjel. Ikijen jerbal eo an Christ im ri jilek ro an, Nan in Anij ej ba: “Ej ilok ilo jikin kwelok otemjej relap im redrik, im Ej kwalok im konono gospel an ailiñ in Anij: im joñoul im ruo iben.” (Luk 8:1) Ta kin ri jilek ro? Elikin an kar lutõklok jitõb kwojarjar eo ilo Pentecost ilo 33 C.E., “ran otemjej iloan tempel, im ilo jikir e jab mwij air katakin im kwalok Jisõs bwe E dri Kraist.”—Jerbal 5:42.
11. Ekkar ñan Jerbal 20:20, 21, ta eo ri jilek Paul ear kõmmane ilo jerbal in kwalok nan eo an?
11 Kin an kijejeto ilo jerbal in kwalok nan, ri jilek Paul ear maroñ jiroñ Ri Christian elder ro jen Ephesus: “I ar kwalok ñõn kom, im katakin kom ilo bwilij, im jen mweo ñõn mweo.” Ke Paul ear ‘katakin jen em ñan em,’ ear lolok ke ri kabuñ ro an Jehovah, im kakajurlok ri tõmak ro mõttan? Jaab, kinke ej wõnmanlok im kamelele: “[I ar] kennan ñõn dri Ju ro, im bareinwõt ñõn ro dri Grik, [kin] ukwelok ñõn Anij, im tõmak ar Iroij Jisõs Kraist.” (Jerbal 20:20, 21) Jemaroñ ba bwe, ro emwij wujleplok air mour ñan Jehovah rejjab aikwij katak kin “ukwelok ñõn Anij im tõmak [ilo] Iroij Jisõs Kraist.” Paul ear katakin Christian elder ro ilo jerbal in kwalok nan ke ear katakin ro rejjab tõmak kin ukwelok im tõmak. Ilo an kõmman men in, Paul ear anõk joñok eo an Jesus.
12, 13. Ekkar ñan Pilippai 1:7, ta eo armij ro an Jehovah rar kõmmane kin maroñ eo air ñan kwalok nan?
12 Emaroñ bwe an bin kõmman jerbal in kwalok nan jen em ñan em. Ñan wanjoñok, jet armij remaroñ illu ñe jej konono ibbeir kin ennan eo an Bible. Jejjab kõnan kaillu armij. Ak, jerbal in kwalok nan jen em ñan em ej bedbed ion Bible eo, im yokwe eo ad ñan Anij im ro ri turud rej kamakit kij ñan kwalok nan ilo wãwen in. (Mark 12:28-31) Ñan ‘jojomar im kabin’ maroñ eo ad ñan kwalok nan jen em ñan em, jaar aikwij jojomare ilo imõn ekajet ko, ekoba Imõn Ekajet eo Elaptata ilo United States. (Pilippai 1:7) Emol bwe bebe eo an ri utiej ro ilo Imõn Ekajet eo rar errã ibbed. Bebe eo air ear einwõt nan ko tok ilal:
13 “Jerbal in leto-letak tract ko kin pã juõn mantin evanjel an missionary jen ien etto—joñan wõt an kein kõmman book im magazine ko bed. Ear juõn jerbal ekajur ilo elõñ kain kabuñ ko jen yiõ ko mokta liktak. Wãwen jerbal in evanjel in rej kõmmane ilo ran kein, ñan juõn joñan elap ilo elõñ kabuñ ko rekajju jen don im ri kwalok ro air rej bõkto-bõktak Gospel eo ñan elõñ thousand moko im ikijen air lolok armij ro ñan kareel ir ñan bed ilo tõmak eo air. . . . Wãwen kabuñ in ej joñan wõt aorõkin kabuñ ilo imõn jar ko im kwalok katak ko kin Bible na loair iumin Kien eo Kein Kajuõn ilo Bujen United States.”—Murdock v. Pennsylvania, 1943.
Etke Wõnmanlok Wõt ilo Kwalok Nan?
14. Ta tokjen ko rej laplok wõt remaroñ itok jen jerbal in kwalok nan eo ad?
14 Elõñ un ko unin kwalok nan jen em ñan em. Ilo kajjojo ien ñe jej lolok ri mweo, jej kate wõt in jeor inen mol eo jen Bible. Ñe jej bar jeblaklok ñan ir, jej utdikdiki. Im emaroñ jelet ri mweo ilo juõn wãwen emõn, kinke Paul ear je: “I ar kallip, Apollõs e ar kamorur, a Anij e ar kadreklok.” (1 Dri Korint 3:6) Inem jen wõnmanlok im jeor im utdikdik, im liki bwe Jehovah enaj ‘kadreklok.’
15, 16. Etke jej bar jeblak ñan moko imõn armij ro elõñ alen?
15 Jej kõmman jerbal in evanjel kinke mour eo an armij ro ej bed ilo kauwatata. Ilo ad kwalok nan jemaroñ lomoren kij im ro rej roñjake kij. (1 Timote 4:16) Elañe jej jelã bwe mour eo an juõn armij ej bed ilo kauwatata, enaj jidik wõt ke ad jibañ e? Emol jaab! Kinke lomor eo an ri mweo emaroñ wawa ion ad lolok ir, jenaj bar jeblak elõñ alen ñan armij ro. Wãwen armij ro rej oktaklok wõt. Juõn armij eboub im emaroñ jab roñjake ilo ien eo ak emaroñ mõnõnõ in roñjake ennan eo an Bible bar juõn ien emõn. Bar juõn armij ilo ejja mweo jaad lolok mokta emaroñ uak ñe jej jeblak, im emaroñ tellok ñan ad ejaak juõn bwebwenato emõn kin Bible ibben.
16 Ejjab wãwen ko an wõt ak lemnak ko an ri mweo bareinwõt remaroñ oktak. Ñan wanjoñok, kin an jitenburu eo an juõn armij mij men in emaroñ kamakit e ñan roñjake ennan eo an Ailiñ eo. Jej kejatdikdik in kainemõn armij eo, kõmman bwe en kile aikwij eo ñan bõk men ko lor jitõb, im kwalok wãwen an maroñ kabwe aikwij in.—Matu 5:3, 4.
17. Ta unleplep eo unin ad kwalok nan?
17 Unleplep in ad kwalok jen em ñan em ak bõk kunad ilo wãwen ko jet ñan kwalok nan ej kinke jekõnan kwalok kin etan Jehovah. (Exodus 9:16; Sam 83:18) Ej juõn men in kamõnõnõ elap ibbed ñe jerbal in kwalok nan eo ad ej jibañ ro rej yokwe mol im wãnik ñan erom ro rej nebar Jehovah! “Man rõn im kõra rõn emõn drer, ridto rõn im ajiri rõn,” ri jej sam ej ba. “Ren nebar etan Jeova; bwe etan wõt eliñlok, An aibujuij ilõñin lõl im lõñ.”—Sam 148:12, 13.
Kij Make Jej Bõk Tokjen Jen Jerbal in Evanjel
18. Ewi tokjen jerbal in kwalok nan?
18 Kij make jej bõk tokjen jen jerbal in evanjel ilo elõñ wãwen ko. Bõkto-bõktak news eo emõn jen em ñan em ej jibañ kij ñan kaddek kadkadin ettã buru, elaptata ñe armij ro rejjab joij. Einwõt ri evanjel ro rebolemed, jej aikwij einwõt Paul, eo ear erom ‘men otemjej ñõn armij otemjej bwe kin otemjej in lomoren jet.’ (1 Dri Korint 9:19-23) Ad keini in kwalok nan ej jibañ kij ñan kwalok joij. Ilo ad atartar ion Jehovah im kãlet nan ko remõn, jemaroñ jerbale nan in kakabilek eo an Paul: “Ami konono, en ien otemjej ilo joij, im en mwij kejãtõk e kin salt, bwe komin jela kijkan emõn ami uak armij otemjej.”—Dri Kolosse 4:6.
19. Ewi wãwen ri evanjel ro rej bõk jibañ jen jitõb kwojarjar eo?
19 Bareinwõt jerbal in evanjel eo ej kamakit kij ñan atartar ion jitõb kwojarjar eo an Anij. (Zechariah 4:6, NW) Inem, leen ko leen—“yokwe, lõñliñ, ainemõn, meanwõr, joij, lejokmen, tiljek, inemõn, jadõr”—renaj alikar ilo jerbal in kwalok nan eo ad. (Dri Galetia 5:22, 23) Ej jelet wãwen ad jerbal ibben armij ro, kinke ad kõttãik kij ñan tel eo an jitõb eo ej jibañ kij ñan jerbale yokwe, kwalok lañliñ im ainemõn, meanwõd im joij, kwalok lejokmen im tõmak, im kwalok inemõn im jatõr ñe jej kwalok nan kin news eo emõn.
20, 21. Ta jet jerammõn ko ilo ad boub wõt einwõt ri evanjel ro?
20 Bar juõn jerammõn jej bõke einwõt ri evanjel ro ej bwe jen watõk eñjake ko an armij einwõt ad make. Ñe armij ro rej kwalok kin abañ ko air—einwõt nañinmij, ejelok air jerbal, abañ ko ilo family eo an—jejjab jerbal einwõt ri kakabilek ro bajjek, ak jej kwalok eon ko rej kalek im kakajur ir. Jej itoklimo kin armij ro rebilo ilo jitõb ak rej yokwe wãnik. (2 Dri Korint 4:4) Im ej juõn men in kalañliñ elap ñan jibañ ro emwij “likit ir bwe ren mour in drio” ilo juõn wãwen ilo jitõb!—Jerbal 13:48.
21 Ad keini in kwalok nan ej jibañ kij ñan kememej wõt kin men ko ilo jitõb. (Luk 11:34) Emol bwe elap tokjen men in, kinke elañe ejjab eindein inem jenaj lorak ilo men in kabo ko an lal in. Ri jilek Jon ear rejañ Ri Christian ro: “Komin jab yokwe lõl ak men ko ilo lõl. Elañe jabrewõt armij ej yokwe lõl, yokwe Jemer e jab ilo e. Bwe men ko otemjej ilo lõl, mõn an kõniek, mõm an mej ko, im wuj wan an mour in, re jab an Jemer a rej an lõl. Im lõl e jokolok im mõm ko an: a eo ej kõmõnmõn ankil an Anij ej berwõt in drio.” (1 Jon 2:15-17) Ñe jej boub wõt einwõt ri evanjel ro ilo jerbal eo an Iroij ej jibañ kij bwe jen jab yokwe lal.—1 Dri Korint 15:58.
Korlok Mweiuk ko Ilañ
22, 23. (a) Ta mweiuk ko Christian ri evanjel ro rej korlok? (b) Ewi wãwen an katak eo tok ilal naj jibañ kij?
22 Kwalok nan ilo kijejeto kin Ailiñ eo ej bõktok tokjen ko ñan indio. Jesus ear kwalok kin men in ke ear ba: “Komin jab koorlok mweiuk ñõn kom ion lõl, ijo drile im jo rej kõñi, im ijo ro dri kwot rej rupe im kwõte. A komin koorlok mweiuk ñõn kom i lõñ, ijo drile im jo re jab kõñi im ijo ro dri kwot re jab rupe im kwote. Bwe ijo mweiõm ej ber, bareinwõt buruõm e naj ber ie.”—Matu 6:19-21.
23 Jen wõnmanlok im korlok mweiuk ko ilañ, im kememej bwe ejelok bar juõn jerammõn elaplok jen ad jutak ilo etan Iroij Bõtata eo ad Jehovah einwõt Ri Kennan ro an. (Aiseia 43:10-12) Ñe jej jerbal einwõt ri jerbal ro an Anij, jemaroñ bõk juõn eñjake einwõt juõn Christian kõrã eo ej 90 jima an yiõ eo ear konono kin toan an jerbal ñan Anij im ba: “Iumin aolep melejoñ ko Ij kamolol Jehovah kin an kijenmij wõt kin iõ iumin aolep yiõ kein, im Ij jar kin aolepen buruõ bwe enaj Jema ñan indio.” Elañe jej kaorõk kõtan eo ad ibben Anij, emol bwe jekõnan jerbal ilo eyu einwõt juõn ri evanjel. Katak eo tok ilal enaj jibañ kij ñan lale wãwen ad maroñ kamwijlok jerbal eo ad.
Ewi Wãwen Am Naj Kar Uak?
• Etke jej aikwij kõmman jerbal in evanjel eo?
• Ta eo jemaroñ ba kin jerbal eo an ri evanjel ro ilo ien eo mokta im ran kein?
• Etke jej kwalok nan jen em ñan em?
• Ewi wãwen am make bõk tokjen ñe kwoj kõmman jerbal in evanjel eo?
[Pija ko ilo peij 18]
Ri evanjel eo Philip im kõrã ro nejin ewõr ro rej lañliñ im annañelok ir ilo ran kein
[Pija eo ilo peij 22]
Ewi wãwen am bõk tokjen ñe kwoj kwalok news eo emõn ibben ro jet?