Nebar Jehovah “ilo Bwiljin Jar an Armij”

KWELOK ko an Christian rej juõn karõk jen Jehovah ñan kakajur armij ro an ilo jitõb. Ikijen ad keini ad bed ilo kwelok ko, jej kwalok ad kamolol kin karõk ko an Jehovah. Bareinwõt, jemaroñ “im kõkãtok [ro jeid im jatid] ñõn yokwe im jerbal ko remõn,” me ej juõn wãwen eaorõk ilo ad kwalok yokwe ñan dron. (Dri Hibru 10:24; Jon 13:​35) Bõtab, ewi wãwen jemaroñ kõketak ro jeid im jatid ilo kwelok ko?

Nan in Nebar ko Ilobwilij

King David ear jeje kin e make: “I naj kwalok etõm ñõn ro jeiõ im jatiõ; ilo bwiljin jar an armij I naj nebar Yuk. Jen Kwe aõ men in nebar iloan jar eo elap.” “I naj kamolol Yuk ilo jar eo elap, i bwiljin elõñ armij I naj nebar Yuk.” “I ar kwalok wãnik ilo jar eo elap: lo I jamin bor tiõ.”​​—Sam 22:​22, 25; 35:18; 40:⁠9.

Ilo ran ko an ri jilek Paul, ke Ri Christian ro rar kwelok ibben don ñan kabuñ, rar kwalok nan ko reinlok wõt kein kin tõmak eo air ilo Jehovah im kin aibujuij eo an. Ilo wãwen in rar rejañ don im kõketak don ñan yokwe im jerbal ko remõn. Ilo ran kein ad, elõñ ebeben ko elikin ran ko an David im Paul jimor, jej lukkun “lo an ran eo [an Jehovah] ebaktok.” (Dri Hibru 10:​24, 25) Jukjuk im bed in an Satan ej etal ñan an jeebeplok, im abañ ko rej laplok wõt. Ñan joñan eo ejañin kar walok mokta, jej aikwij in “kijenmij.” (Dri Hibru 10:​36) Wõn eo emõnlok an rejañ kij ñan kijenmij ijellokin ro jeid im jatid?

Einwõt kar ien ko mokta, rainin emwij letok ien ko remõn ñan kajjojo ri tõmak ñan kwalok tõmak eo air “ilo bwiljin jar an armij.” Juõn ien emõn ebellok ñan aolep ej ilo air uak kajitõk ko kar bõkmantak ñan ri kwelok ro ilo ien kwelok ko an congregation eo. Jab kajettokjen tokjen ko remõn me uak ko remaroñ kõtõbraki. Ñan wanjoñok, uak ko rej kwalok kilen anjo ak jer jen abañ ko rej kakajur kate eo an ro jeid im jatid ñan lor nan in kaiñi ko ilo Bible. Uak ko me rej kamelele kin eon ko im jab eliji nan kin nan jen eon ko ilo Bible ak rej kobaik melele ko rar loi ke rar bukõt kamelele ko jet emaroñ rejañ ro jet ñan kakõmõnmõnlok wãwen air katak ibbeir make.

Ad jelã bwe kij im ro jet renaj bõk tokjen ñe jej uak ilo kwelok ko en kar aikwij kamakit aolep Ri Kennan ro Jehovah ñan anjo ion ejookok im ikõñ. Elaptata an aorõk bwe elder ro im ministerial servant ro ren bõk kunair im uak kinke ri kwelok ro rej kõtmene bwe ren kõmman joñok ilo air uak im bareinwõt bed ilo kwelok ko. Bõtab, ewi wãwen juõn emaroñ kõmõnmõnlok an uak ñe ej loe bwe ebin an uak?

Nan in Rejañ ko ñan Kõmõnmõnlok Ad Uak

Kememej bwe uak ej mõttan kabuñ eo ad ñan Jehovah. Juõn Christian jeid im jatid kõrã ilo Germany ear kamelele kin wãwen ear watõk uak ko an. “Rej uak ko aõ make ñan jibadbad ko an Satan ñan bõprae armij ro an Anij jen air kwalok tõmak eo air.” Juõn jeid im jatid maan ej kab baptais me ej bed ilo ejja congregation in ej ba: “Ñe ij iten uak, elõñ alen ij jar.”

Kebojak lok iman. Elañe kwoj likjap in kebojak lok iman, kwonaj lo bwe ebin ñan uak im uak ko am renaj dik air keie. Nan in rejañ ko ñan uak ilo kwelok ko an congregation emwij litok ilo book eo Benefit From Theocratic Ministry School Education (Bõk Tokjen Jen School in Kwalok Nan eo an Christian), page 70.a

Kõmman juõn mejenkajjik ñan uak juõn alen ilo kajjojo kwelok ko. Melelen menin bwe kwoj aikwij keboj jet uak ko, kinke ñe ekkã am kajutak peim, enaj laplok an eo ej tel katak eo kir yuk. Kwomaroñ ba ñane mokta jen ien kwelok kin kajitõk ko kwar keboji ñan am uak. Men in elap an jibañ elaptata elañe kwoj kab jino am uak. Kinke kwomaroñ jenliklik in kajutak peim “i bwiljin elõñ armij,” ilo am jelã kin paragraph eo kwar keboje uak eo am ie im bwe eo ej tel kwelok eo enaj bukõt peim enaj rejañ yuk ñan uak.

Uak ilo jinoin. Juõn jerbal ebin ejjab bidodolok kõmmane ikijen ad karumijlok. Uak ilo jinoin kwelok eo emaroñ lukkun lap an jibañ. Kwonaj bwilõñ kin joñan an naj bidodolok ñan am uak ruo ak jilu alen elikin am ellã jen abañ eo ñan uak ilo jinoin.

Kãlet juõn jikin jijet ekkar. Jet rej lo bwe ebidodolok ñan uak ñe rej jijet ilo jea ko imantata ilo Kingdom Hall eo. Ediklok kein kamad ko, im ebidodolok an eo ej tel katak eo loe peiir. Elañe kwoj kajeoñe menin, kememej in kalaplok ainikiõm bwe aolep ren roñ, elaptata elañe congregation eo ejjab kajerbal microphone (kein konono) ko rej bõkto-bõktak.

Lukkun roñjake. Menin enaj jibañ yuk ñan bõprae am eliji men eo juõn armij ej kab mwij an ba. Bareinwõt, uak ko an ro jet remaroñ kakememej yuk kin juõn eon ak juõn point me ej rejetak lemnak eo rej kab kwaloke. Jet ien, kwomaroñ kwalok juõn bwebwenato ekadu ñan kameleleik point eo rej konono kake. Uak rot kein emaroñ lukkun lap air jibañ.

Katak ñan uak ilo nan ko am make. Am readi uak eo jen book eo jej katak kake emaroñ kalikar bwe kwar lo uak eo ejimwe, im emaroñ juõn wãwen emõn ñan jino bõk kunam uak. Ak am wõnmanlok im uak ilo nan ko am make rej kwalok bwe kwoj melele kin point eo. Ejjab menin aikwij ñan eliji ejja nan ko ilo book ko ad. Ri Kennan ro an Jehovah rejjab baj eliji men ko book ko air rej ba.

Uak ko ren ekkejellok ñan katak eo. Uak ko rejjab ekkejellok ñan katak eo ak ko me rej kamad kij jen point ko relap ikijen men eo jej konono kake rejjab ekkar. Melelen menin bwe uak ko am rej aikwij ekkejellok ñan katak eo jej bwebwenato kake. Inem renaj kowõnmanlok juõn bwebwenato eo ekõketak ilo jitõb kin unin tel in katak eo.

Mejenkajjik eo ñan rejañ. Kinke un eo aorõk unin ad uak ej ñan rejañ ro jet, jej aikwij bõprae ad ba men ko remaroñ kabwer ir. Bareinwõt, jab uake aolepen paragraph eo kinke enaj jidik wõt ak maat point ko ñan an ro jet bar uak. Uak ko rekanuij in aetok im kabwokbwok ekkã air kõmman bwe en bin lo melele eo. Uak ko rekadu me rej kitibuj jejjo nan ko remaroñ lukkun keie im lap tokjeir, im renaj rejañ ro rekãl ñan kwalok uak ko air rekadu rar keboji.

Eddo eo an Ro Rej Tel Kwelok Ko

Ikijen kõmman bwe kwelok ko ren juõn men in rejañ, eo ej tel juõn kwelok ewõr juõn an eddo elap. Ej kwalok an itoklimo kin aolep uak ko ikijen an lukkun roñjake im reilok ñan eo ej uak jen an mad ibben juõn men. Enaj lukkun juõn men ejõkkar elañe ejjab lukkun roñjake im, tokjen menin, ej bar eliji men eo ej kab mwij ba ak kajitõk juõn kajitõk emwij uake!

Bareinwõt ekabwerer elañe eo ej tel ej keini an elij ilo nan ko reoktak jidik kin juõn uak me ej kab mwij ba, einwõt ñe ej ba bwe uak eo ejjab lukkun emõn im ejabwe. Ijo turãjet, ekõketak ñe uak ko rej kabellok juõn ial ñan kalaplok air bwebwenato kin juõn point eaorõk. ‘Ewi wãwen jemaroñ jerbale menin ilo congregation eo ad?’ ak, ‘Eon ta eo ilo paragraph eo ej rejetak men eo ej kab mwij ba?’ Kajitõk rot kein rej rejañ armij ñan kwalok uak ko rekõketak, me rej kakobaba ko raorõk.

Aet, jej aikwij elaptata nebar ro rekãl ak ro rejookok ñe rej uak. Jemaroñ kõmman men in ilo ad make kebak kajjojo iair elikin kwelok eo kinke ilo wãwen in reban jook im ej lelok juõn ien emõn ñan eo ej tel katak eo ñan lelok nan in rejañ ko ñe ekkar.

Ilo ien bwebwenato, juõn armij me e wõt ej kennan ejjab rejañ ro jet ñan air bõk kunair ilo bwebwenato eo. Ro rej roñjake e rej eñjake bwe rejjab aikwij kwalok lemnak ko air make. Rej meanwõd wõt im roñjake ak jab jen aolepen burueir. Emaroñ walok ejja wãwen in ñe eo ej tel katak eo ej bõk aolepen bwebwenato eo ilo an ikutkut an kamelele. Bõtab, eo ej tel juõn kwelok emaroñ kõmman bwe ri kwelok ro ren kwalok ta eo ilo burueir im lujur lemnak ko air kin katak eo ikijen kajitõk ko jet ej kobaiki. Kajitõk rot kein rej aikwij jidik wõt air kajerbali.

Ejjab juõn menin aikwij bwe eo ej tel katak eo en kir armij eo moktata ej kajutak pein. Men in emaroñ kabwer ro rej aikwij jidik ien ñan karõk uak ko ilo lemnak ko air. Ilo an kõttar jidik, enaj lelok ien ñan eo ejañin bõk kunan bwe en uak. Enaj bareinwõt kwalok lolokjen ilo an jab kir ajiri jidik ro ñan uak kajitõk ko kin men ko remũlal me ajiri ro rejjab melele kaki.

Ta elañe rej kwalok juõn uak ebwid? Eo ej tel ej aikwij bõprae bwe en jab kajook armij eo ear uak. Meñe uak ko rejjab jimwe ak ekkã an wõr mõttan ko kin mol eo ie. Eo ej tel emaroñ kwalok uak eo ejimwe im jab kajook armij eo ikijen an kãlet juõn ennan me ejimwe ilo uak eo, ikijen an ukõt kajitõk eo, ak ikijen an bar kajitõk juõn kajitõk.

Ñan rejañ ro jet bwe ren uak, eo ej tel juõn kwelok ej aikwij bõprae an kwalok kajitõk ko einwõt, ‘Ebar wõr ke uak?’ Ak kajitõk in, ‘Wõn ejañin uak? Eñin ien eo eliktata ebellok ñan am uak!’ emaroñ juõn kajitõk ej lemnak enaj lujure armij, ak ejamin rejañ juõn armij bwe en mõnõnõ in kwalok buruen. Ejjab aikwij kõmman bwe ro jeid im jatid en nana air mour kin air kar jab uak jen jinoin katak eo. Jen an eindein, rej aikwij rejañ ir ñan bõk kunair ñan kwalok men eo rejelã kinke menin ej juõn wãwen kwalok yokwe. Bareinwõt, elikin an eo ej tel kir juõn bwe en kwalok uak eo an, emõn ñe ejjab ba, “Elikin an armij in uak, jenaj roñjake uak eo an jeid im jatid lamen im jeid im jatid limen.” Eo ej tel en kar mokta roñjake uak eo inem tokelik lale elañe emenin aikwij ñan kakobaba.

Uak Ej juõn Jerammõn

Bed ilo kwelok ko an Christian ej juõn men in aikwij ilo jitõb; ak uak ilo kwelok kein ej juõn jerammõn. Ñan joñan eo jej bõk kunad ilo wãwen in ejej uan ñan nebar Jehovah “ilo bwiljin jar an armij,” ej joñan eo wõt jej lor joñok eo an David im bokake nan in kakabileklek eo an Paul. Ad bõk kunad ilo kwelok ko ej kamol bwe jej yokwe ro jeid im jatid im bwe jej mõttan congregation eo elap an Jehovah. Bar ia eo kwonaj kar kõnan bed ie ke “jej lo an ran eo ebaktok”?​​—Dri Hibru 10:⁠25.

[Kamelele eo itulal]

[Pija ko ilo peij 14]

Roñjake im uak rej jimor aorõk ilo kwelok ko an Christian