Ewi Wãwen Am Maroñ Kakajurlok Mour in Belele Eo Am

BAJ LEMNAK mõk kin juõn em emor. Uno in mweo ej ãkilkillok, bõrwoj in mweo ejorrãn, im ibelakin mweo ejjab erreo im karbõb. Alikar, lañ ko relap rar kajorrãn mweo iumin elõñ yiõ ko, im armij ro rar jerwane. Rej aikwij rupe ke? Bõlen jaab. Elañe bedbed eo ej bin wõt im kiin mweo ej emõn wõt, remaroñ baj kõkãle.

Wãwen mweo ej kakememej yuk ke kin mour in belele eo am? Iumin elõñ yiõ ko, elõñ lañ in kõkkar ko, remaroñ kar kajorrãn kõtan eo am im mõttam. Juõn joñan in jerwan emaroñ kar jelet juõn ak ruo iamiro. Eñjake eo am emaroñ kar einwõt eo an Sandy. Elikin 15 yiõ ko in belele, ear ba: “Kimro ar jab errã kin jabdewõt men ak kim ar belele wõt. Im men in ear jab bwe.”

Meñe belele eo am ej eindein, kwon jab jebel jen don ilo mõkaj. Bõlen, kwomaroñ kakõmanmanlok mour in belele eo am. Elap an maroñ tõbrak ñe ej atartar ion ewi joñan am im eo mõttam lukkun kõnan kõkãle im kejbãrok mour in belele eo amiro. Kajejjet kitien kallimur eo ej kakajur mour in belele eo ilo ien melejoñ ko. Ak ewi wãwen Bible eo emaroñ jibañ yuk ñan kakajurlok kõnan im bebe in ilo buruõm?

Kajejjet Kitien Kallimur Eo Ej Kitibuj juõn Eñjake in Bõk Eddo

Kajejjet kitien kallimur eo ej jitõñlok ñan juõn eddo eo juõn armij ej aikwij ineke. Jet ien, kajejjet kitien kallimur eo ej jerbal ñan juõn men ejelok kadkadin, einwõt juõn bujen in business.

Meñe belele ejjab juõn business, kõnan eo ñan kejbãrok e ej kitibuj juõn eñjake in kajejjet kitien kallimur eo. Kwe im eo rejetam komro jimor kar kallimur iman mejen Anij im armij ñan eddeb ñan don, jekdon ta eo enaj walok. Jesus ear ba: “Eo e ar kõmõn [maan im kõrã] ke ejino, E ar kõmõn ir man im kõra, im ba, Kin men in leo e naj likit jemen im jinen, im e naj ber iben lio belen: im irro re naj juõn wõt kõniek ke.” Jesus ear koba im ba: “Men eo Anij e ar kobaik, armij en jab kijbili.” (Matu 19:​4-6) Inem, ñe abañ ko rej walok, kwe im eo mõttam komro aikwij jek ilo buruemi bwe komin kajejjet kitien kallimur eo komro ar kõmmane ñan don.a Juõn kõrã ri belele ear ba: “Kar elikin wõt amro jolok lemnak in jebel jen don bwe mour eo amro ear jino emõnlok.”

Bõtab, elõñlok men ko ñan air kajejjet kitien kallimur in belele wõt. Bar ta eo ej kitibuji?

Jerbal Ibben Don Ej Kakajur Kallimur eo ñan Kajejjet Kitien Mour in Belele

Kajejjet kitien kallimur kin belele ejjab melelen bwe ri belele ro renaj errã ibben don ien otemjej. Ñe rejjab errã ibben don, ej aikwij wõr juõn kõnan elap ikõtairro bwe ren kamadmõde abañ eo jab kinke ej mõttan kallimur kin belele eo wõt ak ej juõn kein lukwõj eñjake ko ñan don bareinwõt. Ikijen maan im kõrã ri belele ro, Jesus ear ba: “Irro re jab ruo, a juõn wõt kõniek.”

Ta melelen kwon “juõn wõt kõniek” ibben lio beleõm? Ri jilek Paul ear jeje bwe “lõmaro ren bareinwõt yokwe limaro beleir einwõt enbwiniir.” (Dri Epesõs 5:​28, 29) Inem, “juõn wõt kõniek” ej melelen bwe itoklimo eo am kin eo mõttam en joñan wõt am itoklimo kin kwe make.

Jet ri belele ro rej bed ibben don kinke rej yokwe ajiri ro nejiir ak rekõnan mweie im jokane. Meñe ej juõn men in nebar bwe belele kein rej kijenmij wõt, kememej bwe mejenkajjik eo am in bwe en wõr juõn kõtan ewõr yokwe ie ikõtamiro, im jab baj bedwõt ibben don.

Kõmman ko Rejjab Kibbon Rej Rejañ ñan Kajejjet Kitien Kallimur kin Belele

Bõtab, ilo juõn belele emõn, leo im lio rej kwalok juõn jitõb in lelok mour. Ewi wãwen am maroñ kõmman eindein? Jen am kalmenlokjen kin kajitõk eo, ‘Ta tokjen kõtan rot in ñan ña?’ kwon kajitõk ibbam make, ‘Ta eo in kõmmane ñan kakajurlok mour in belele eo aõ?’ Kwon etale makitkit ko am kwar kõmmani week eo lok. Ewi joñan am kar kwalok joij ñan eo mõttam im jab kõtmene in bõk jabdewõt jen e? Ke eo mõttam ear kõnan bwebwenato ibbam, kwar roñjake ke​—meñe kwar jab kõnan? Jete men ko elaplok an eo mõttam itoklimo kaki jen kwe im kwar kõmmani?

Lelok mour eo am ilo jerbal ko rej kakajurlok belele eo am kinke rej kwalok bwe kwoj kaorõke im kõnan kejbãrok e.

Lemnak bwe Belele En To An Bed Ej Juõn Men in Aikwij

Jehovah Anij ej kaorõk tiljek. Emol, Bible eo ej ba: “Kwo naj kwalok Yuk im wãppen iben ro re wãppen.” (2 Samuel 22:26) Bed ilo tiljek ñan Anij ej kitibuj ad tiljek ñan karõk in belele eo ear kajutake.​—Jenesis 2:​24.

Elañe kwe im mõttam komij tiljek ñan don, komro maroñ lo bwe mour in belele eo amiro enaj to an bed. Ñe komro komij lemnak kin ilju eo amiro, komro naj juõn pija eo me komro bed iloan.

Ilo ran in mare eo am, kwar kallimur, jab ñan juõn dolul im belele, ak ñan juõn armij emour​—eo mõttam. Mol in en jelet lemnak im jerbal eo am kiõ einwõt juõn eo emwij mare. Kwojjab errã ke bwe kwoj aikwij bedwõt ibben mõttam jab kinke kwoj tõmak wõt ilo kwojarjar in belele eo wõt ak kinke kwoj yokwe eo kwar mareik mokta?

[Kamelele eo itulal]

[Bo̦o̦k/Pija eo ilo peij 5]

Ilo Mour in Belele, Beek ilo Buruõd ñan Kejbãrok Mour in Belele Ej Kitibuj . . .

● Bõk Eddo “Ñe kwoj kanõjnij kin juõn kanõjnij ñõn Anij, kwon jab rumij ilo an kõllã.”​—Ekklisiastis 5:​4, 5.

● Jerbal Einwõt Juõn Kumi “Ruo emõnlok jen juõn . . . Bwe elañe re buñ, juõn e naj kejerkak eo juõn.”​—Ekklisiastis 4:​9, 10.

● Katok Mour eo an make “Mõnõnõ in lelok elap jen bõk.”​—Jerbal 20:35.

● Juõn Lemnak Ewõr Tokjen Eaetok “Yokwe . . . kijenmij ilo men otemjej.”​—1 Dri Korint 13:​4, 7.