Kalikar kin Ta Melelen Kidu Awia eo im Kakõllan

KWO mõnõnõ ke in lo juõn melele ñan juõn men ittino? Ñan kõmman men in kwoj aikwij bukõt men in kamol ko ñan jibañ yuk ñan lo melele eo. Ilo Nan eo an ear kakõrmole, Anij ear letok nan ko ñan tel kij ñan bwinbwin in 666, etan, ak kakõllan kidu awia eo ilo Reveles̃õn chapter 13.

Ilo katak in, jenaj etale wãwen ko emen ñan uake kajitõk in ilo kõmmanwa​—nan in tel ko raorõk​—renaj kalikar kin ta melelen kidu awia eo. Jenaj etale (1) ewi wãwen air kãlet ãt ko ilo Bible eo jet ien, (2) ta in kidu awia eo, (3) ta melelen 666 kinke ej “oran” ak bwinbwin eo an armij, im (4) ta aorõkin bwinbwin in 6 im etke emwij je jilu alen, melelen 600 koba 60 koba 6, ak 666.​—Reveles̃õn 13:18.

Ãt ko ilo Bible eo​—Elaplok Jen Air Baj Title Wõt

Ekkã an ãt ko ilo Bible wõr aorõkiir, elaptata ñe Anij ej litoki. Ñan wanjoñok, kin an Abram erom jemen ailiñ ko, Anij ear ukõt ãt in Abram ñan Abraham, melelen “Jemen elõñ Bwij.” (Jenesis 17:5) Anij ear jiroñ Joseph im Mary ñan naetan ladik eo nejiiro Jesus, melelen “Jehovah Ej Ri Lomor.” (Matu 1:​21; Luk 1:​31) Ekkar ñan aorõkin ãt eo, ikijen jerbal in kwalok nan eo an Jesus im mij eo an, Jehovah ear maroñ lomoren kij.​—Jon 3:​16.

Kin men in, ãt eo emwij an Anij letoke 666 ej kõkkar kin kadkad ko kadkadin kidu eo ekkar ñan lemnak eo an Anij. Emol bwe, elañe jekõnan melele kin kadkad kein, jej aikwij kalikar ta in kidu eo im katak kin makitkit ko an.

Emwij An Kajerwawaik Kidu Eo

Book in Daniel ilo Bible eo ej kwalok kin ta melelen kidu in kõkkar ko. Kobban Chapter 7 ej kamelele ilo tibdikin kin “kidu ko emen”​—juõn lion, juõn bear, juõn leopard, im juõn kidu elap an lej im ñi ko relap ñiin einwõt iron. (Daniel 7:​2-7, New World Translation) Daniel ej jiroñ kij bwe kidu kein rej kõkkar kin “kiñ ro,” ak kien ko, rej iroij ion elõñ ailiñ ko.​—Daniel 7:​17, 23, NW.

Ikijen kidu eo ilo Reveles̃õn 13:​1, 2, book eo The Interpreter’s Dictionary of the Bible ej kamelele bwe kidu in “ej kobaik kadkad ko kadkadin kidu ko emen ilo vision eo an Daniel . . . Kin men in, kidu eo kein kajuõn [ilo book in Reveles̃õn] ej kõkkar kin aolepen kajur ko an kien ko an ailiñ ko rej jumae Anij ilo lal in.” Reveles̃õn 13:7 ej kabin melele in, eo ej ba kin kidu eo: “Im ar lelok ñõn e maroñ ion bwij, im driloabjen, im konono im ailiñ otemjelok.”

Bible eo ej bareinwõt ba bwe “drakon eo [Satan] ej lelok ñõn e an kajur, an tron, im maroñ elap.” (Reveles̃õn 12:9; 13:2) Kin men in, iroij in armij ear juõn maroñ jen Devil eo, inem ej kalikare kadkadin einwõt juõn kidu awia, im drakon. (Jon 8:​44) Kin kareelel eo an Devil eo, ejelok juõn armij ak dolul in armij ear maroñ bõktok ainemõn im jokane indio ñan armij ro.a​—Jon 12:31.

“Ej [Bwinbwin eo an] Armij”

Wãwen eo kein kajilu ñan melele kin 666 ej eñin bwe ej “[bwinbwin eo an] armij.” Kamelele in ejjab jitõñlok ñan juõn wõt armij, kinke Satan​—jab jabdewõt emaan​—ej kajur ion kidu awia eo. (Luk 4:​5, 6; 1 Jon 5:​19; Reveles̃õn 13:​2, 18) Ak, kinke kidu in ej bõk “[bwinbwin eo an] armij,” ak kakõlle eo, inem ej kalikar bwe ej itok jen armij, jab jen jitõb ak dimon ro, im kin men in ej kwalok jet ian kadkad ko kadkadin armij. Aolep kadkad kein remaroñ einwõt ta? Bible eo ej uak im ba: “Bwe otemjej r’ar jerawiwi, im rej likjõp jen aibujuij an Anij.” (Dri Rom 3:​23) Inem, kinke kidu eo ewõr “[bwinbwin eo an] armij,” ej kalikar bwe wãwen kien ko an lal renana, kakõllan jerawiwi im jab wãppen.

Eokwe ededelok ad kamelele kin kidu eo im ewi wãwen lemnak eo an Anij kin e, kiõ jemaroñ etale wãwen eo kein k’emen ñan bwinbwin ittino eo ad​—[bwinbwin eo an] jiljino im etke rar je jilu alen​—bwe ej, 666, ak 600 koba 60 koba 6.

Jiljino Rar Eliji Jilu Alen​—Etke?

Ilo Jeje ko, jet bwinbwin ko ewõr meleleir. Ñan wanjoñok, ekkã air kajerbal jiljilimjuõn ñan kõkkar kin juõn men eyu, ak wãppen, iman mejen Anij. Ñan wanjoñok, week in kõmanman eo an Anij ear jiljilimjuõn ‘ran ko’ aetokin, ak ien ko raetok, im ilo ien eo Anij ear kamwijlok ilo eyu jerbal in kõmanman eo an ikijen lal in. (Jenesis 1:3–​2:3) “Nan ko” an Anij rej einwõt silver emwij “karreo e alen jiljilimjuõn,” melelen ear erreo im wãppen. (Sam 12:6; Jabõn Kennan Ko 30:​5, 6) Ri leper eo Naaman rar jiroñ e bwe en tutu jiljilimjuõn alen ilo River Jordan, im ear ejmour ilo eyu.​—2 Kiñ Ro 5:​10, 14.

Bwinbwin in jiljino ej juõn elikjap jen jiljilimjuõn. Bwinbwin in ejjab juõn men in kõkkar ejejjet ke kin juõn men ejjab wãppen, ak jorrãn, iman mejen Anij? Aet! (1 Kronikel 20:​6, 7) Bareinwõt, kinke bwinbwin in jiljino rar eliji jilu alen, einwõt 666, men in ej kalikar bwe elukkun jab wãppen. Ñan kamol bwe melele in ejimwe rar kalikar bwe bwinbwin in 666 ej “[bwinbwin eo an] armij,” einwõt emwij ad katak kake. Inem, bwebwenato eo kin kidu awia, “[bwinbwin eo an] armij” eo an, im bwinbwin in 666 rej jitõñlok ñan juõn jemlok ejejjet im jimwe bwe​—ej lukkun likjap iman mejen Jehovah.

Melelen Kakõlle Eo Ej Alikar

Elikin wõt an kalikare bwinbwin in 666, Reveles̃õn ej konono kin 144,000 ri kalor ro an Lamb eo, Jesus Christ, ro rar bõk etan im etan Jemen, Jehovah ion demair. Ãt kein rej kalikar bwe rej an Jehovah im Nejin, im rej mõnõnõ im bõk ãt kein. Eindein, ro rej kõnak kakõllan kidu eo rej kalikar air tiljek ñan kidu eo. Inem, kakõlle eo, ion anbijmaroñiir ak demair ilo kõkkar, ej juõn kakõlle ñan kwalok bwe eo ej kõnaki ej kabuñ ñan jukjuk im bed eo an kien ko an lal rej einwõt kidu eo. Ro rej kõnak kakõlle eo rej lelok ñan “Caesar” men ko an Anij. (Luk 20:25; Reveles̃õn 13:​4, 8; 14:1) Ewi wãwen air kõmmane men in? Ilo air kabuñ ñan kien eo an lal, men in e ko an, im dolul in tarinae eo an, im reilok ñan e ilo kejatdikdik im ñan bõk lomor jen e. Jabdewõt wãwen air kabuñ ñan Anij ej jen tieir wõt.

Ak, Bible eo ej rejañ kij: “Komin jab liki bwirõk rõn, ak nejin armij eo ejelok jibõñ iben. Menono an ej ilok, ej jeblak ñõn lõl eo an ilo ran eo lemnok ko an rejokolok.” (Sam 146:​3, 4) Ro rej bokake nan in kakabilek eo emeletlet rejjab buromõj ñe kien ko an lal rej likjap in kajejjet kitien kallimur ko air ak ñe ri tel ro an kabuñ wan rej buñ jen jikin eo eutiej ilo kabuñ eo air.​—Jabõn Kennan Ko 1:​33.

Men in ejjab melelen bwe Ri Christian ro remol rejjab kea kin abañ ko an armij. Jen men in, rej niknik in kwalok nan kin juõn kien eo enaj kamadmõde abañ ko an armij​—Ailiñ eo an Anij, eo rej binej jenkwon.​—Matu 24:14.

Ailiñ eo an Anij​—Kejatdikdik eo Wõt an Armij

Ke ej bed ion lal, Ailiñ eo an Anij kar unleplep in katak eo an Jesus ilo jerbal in kwalok nan eo an. (Luk 4:​43) Ilo jar eo an, jet ien kar naetan Jar eo an Iroij, Jesus ear katakin ri kalor ro an bwe ren jar bwe Ailiñ in en itok im bwe ankil an Anij en kõmanmane ijin ion lal. (Matu 6:​9, 10) Ailiñ eo ej juõn kien eo enaj kajur ion aolepen lal, jen juõn jikin kwelok eo ion lal, ak jen lañ. Kin men in, Jesus ear naetan “ailiñ ilõñ.”​—Matu 11:12.

Ailiñ eo an Anij enaj bõktok ainemõn ñan ri karejar ro an otemjej rekiblie. (Sam 37:11, 29; 46:​8, 9) Jesus, einwõt King eo an Ailiñ eo, enaj jolok Satan, juõn men ejelok juõn armij emaroñ kõmmane. Bareinwõt buromõj, eñtan, im mij renaj jako. Ej juõn jerammõn elap an aibujuij ñan ro ejelok kakõllan kidu eo ioir!​—Reveles̃õn 21:​3, 4.

[Kamelele eo itulal]

[Bo̦o̦k eo ilo peij 5]

Wãwen ko ñan Melelen 666

1. Ãt ko ilo Bible eo ekkã air kwalok kin kadkad ko kadkadin ak wãwen mour eo an armij, einwõt ikijen Abraham, Jesus, im elõñ armij ro jet. Eindein, etan kidu eo ej kõkkar kin kadkad ko kadkadin.

2. Ilo book in Daniel, elõñ kain kidu ko rawia rej kajerbali ñan pijaik ailiñ ak kajur ko an armij. Kidu eo ilo Reveles̃õn 13:​1, 2 ej kõkkar kin jukjuk im bed eo an kien ko ibelakin lal iumin kajur eo an Satan.

3. Kinke kidu eo ewõr “[bwinbwin eo an] armij” ibben, men in ej kalikar bwe ej itok jen armij, jab jen juõn dimon. Kin men in, ej kwalok likjap ko an armij rej waloktok jen jerawiwi im jab wãppen.

4. Iman mejen Anij, bwinbwin jiljino, kin an likjap juõn jen jiljilimjuõn bwinbwin eo eyu, im wãppen ekkar ñan Bible eo, jiljino ej melelen jab wãppen. Kakõlle eo 666 ej kalikare likjap in ilo an elij bwinbwin in jilu alen.

[Pija ko ilo peij 6]

Iroij eo an armij ear likjap, bwinbwin in 666 ear kõkkar kake ilo alikar

[Credit Line]

Ajiri ekwuli: UNITED NATIONS/F. GRIFFING ear kõmmane pija in