Kejbãrok Ritto Ro​—Juõn Eddo Ñan Ri Christian Ro

“Im ñõn ien lõlap, Ña e, im ñõn ien ami uõn I naj ineklok kom.”​—AISEIA 46:4.

1, 2. Ewi wãwen kejbãrok eo an Jemed ilañ einjuõn jen eo an jemed im jined ion lal?

JEMEN im jinen ajiri ro retiljek rej kejbãrok im katakin ajiri ro nejiir jen ien ke rej niñniñ, ajiri, im jodikdik. Meñe jodikdik ro rej rittolok im wõr air family, jemeir im jineir rej wõnmanlok wõt im jibañ ir ilo yokwe.

² Meñe ewõr joñan ta eo jemen im jinen ajiri ro remaroñ kõmmane ñan ajiri ro nejiir, Jemeduij ilañ emaroñ jibañ im jurake ri karejar ro an retiljek ien otemjej. Ke ear konono ibben armij ro ear kãlet ir ilo ien ko etto, Jehovah ear ba: “Im ñõn ien lõlap, Ña e, im ñõn ien ami uõn I naj ineklok kom.” (Aiseia 46:​4) Nan kein elap air kainemõne Ri Christian lõllab im lellab ro! Jehovah ejjab ellok jen ro rej debij air tiljek ñan e. Ak, ej kallimur bwe enaj kejbãrok, jurake, im tel ir toan wõt air mour, elaptata ñe rej lõllab im lellab.​—Sam 48:14.

3. Ta eo jenaj katak kake ilo katak in?

³ Ewi wãwen ad maroñ kajeoñe Jehovah ilo an yokwe ro reritto? (Dri Epesõs 5:​1, 2) Jen etale wãwen ko ajiri ro, overseer ro ilo congregation eo, im Ri Christian ro kajjojo maroñ kabwe aikwij ko an ritto ro uan jimjãn jimjatin eo ad ibelakin lal.

Eddo eo an Ajiri Ro

4. Ta eddo eo ikijen jemeir im jineir ajiri ro rej Christian rej aikwij ineke?

⁴ “Koutiej jemõm im jinõm.” (Dri Epesõs 6:2; Exodus 20:12) Ilo an kwalok nan kein raorõk jen Jeje ko ilo Bible ilo kajin Hebrew, ri jilek Paul ear kakememej ajiri ro kin eddo eo air ñan jemeir im jineir. Ak ewi wãwen an nan kein jerbal ñan eddo eo ñan lale ritto ro? Juõn joñok ekamãnãn buruen armij ilo ien ko mokta jen ien Christian emaroñ uake kajitõk in.

5. (a) Ta eo ear kwalok bwe Joseph ear jab meloklok eddo eo an ñan kejbãrok jemen? (b) Ta melelen kautiej jemed im jined, im ta joñok eo emõn Joseph ear likit kin men in?

⁵ Iumin elõñlok jen 20 yiõ ko, Joseph ear jab lo jemen, ri patriarch eo Jacob. Bõtab, Joseph ear jab luji yokwe eo an ñan Jacob. Emol, ke Joseph ear kwalok emake iman mejen jein im jatin, ear kajitõk: “Jema ej mour wõt ke?” (Jenesis 43:​7, 27; 45:⁠3) Ilo ien eo, ñitta ear jelet aolepen enen Canaan. Inem, Joseph ear kejelãik jemen: “Kwon wõnlõltok ñõn iba, im jab rumij, im kwo naj jokwe i ene Goshen, im kwo naj ber ebak ñõn iõ . . . im I naj najirik yuk.” (Jenesis 45:​9-​11; 47:12) Aet, kautiej ro rej bwijwõlã ekoba kejbãrok mour ko air im kabwe aikwij ko air ilo kanniek ñe emaat air maroñ ñan kabwe aikwij ko air make. (1 Samuel 22:​1-4; Jon 19:​25-​27) Joseph ear mõnõnõ in bõk eddo in.

6. Ewi wãwen an kar Joseph kwalok yokwe eo emol kin jemen, im ewi wãwen ad maroñ kajeoñe joñok eo an?

⁶ Kin jibañ eo an Jehovah, Joseph ear erom juõn ian armij ro remweie im kajurtata ilo Egypt. (Jenesis 41:40) Ak ear jab lemnak bwe joñan an utiej im boub en ejelok ien ñan kautiej jemen eo ear 130-an-yiõ. Ke ear roñ bwe Jacob (ak Israel) ear ebak, “Joseph e ar kapojõk jariot eo an, im ej wõnliñlok bwe en wõnmae Israel, jemen, ñõn Goshen; im ej mõke kwalok e ñõn e, im buñ ion kenwan, im eto an jõñ ion kenwan.” (Jenesis 46:​28, 29) Karuwainene rot in ear laplok jen an baj kautiej e wõt. Joseph ear lap an yokwe jemen im ear jab jook in kwalok yokwe eo an. Elañe ewõr jemed im jined, elap ke ad kwalok kain yokwe rot in ñan ir?

7. Etke Jacob ear kõnan kalbwini enbwinin ilo Canaan?

⁷ Tiljek eo an Jacob ñan Jehovah ear kajur wõt mae ien eo ear mij. (Dri Hibru 11:21) Kinke ear tõmak wõt ilo kallimur ko an Anij, Jacob ear kajitõk bwe elikin an mij ren kalbwin enbwinin ilo Canaan. Joseph ear kautiej jemen ilo an lolorjake kõnan eo an, meñe ear lap wõnãn im jerbal ñan kajejjet kitien men eo jemen ear kajitõk kake.​—Jenesis 47:​29-​31; 50:​7-​14.

8. Ta unleplep eo unin ad aikwij kejbãrok jemed im jined?

⁸ Ta eo ear kamakit Joseph bwe en kejbãrok jemen? Meñe men in ear kalikar bwe ear yokwe jemen im kamolol e kinke ear keotak e im katakin e, ejelok bere bwe Joseph ear lukkun kõnan kabuñburuen Jehovah. Jej aikwij kõmman eindein. Paul ear je: “Elañe jabrewõt kõra ejoko belen, im eor nejin ak jibwin ak jiman, ren katak mokta kin kake ro nukiir, im ren emõn mwiliir kake, im nawõnan ro jemeir im jineir bwe men in men in kabuñburuen iman mejen Anij.” (1 Timote 5:⁠4) Emol, yokwe Jehovah im mijake kin ad kabuñ ñan e enaj kamakit kij ñan kejbãrok ro jemed im jined reritto, jekdon ta abañ ko jej jelmae.a

Wãwen an Elder ro Kwalok Air Itoklimo in Jibañ

9. Jehovah ear kãlet wõn ñan lale bwij eo, ekoba Ri Christian ro reritto?

⁹ Itujemlokin mour eo an, Jacob ear jitõñlok ñan Jehovah einwõt “Anij eo e ar najirik iõ ien otemjej in aõ mour ñõn rainin.” (Jenesis 48:15) Rainin, Jehovah ej tel im kejbãrok ri karejar ro an ion lal ilo an kajerbal Christian overseer ro, ak elder ro, iumin tel eo an Nejin, Jesus Christ, “S̃eperd [eo] elap.” (1 Piter 5:​2-4) Ewi wãwen an overseer ro maroñ kajeoñe Jehovah ñe rej kejbãrok ritto ro uan bwij eo?

10. Ta eo rar kõmmane ñan kabwe aikwij ko ilo kanniek ñan Christian lõllab im lellab ro?

¹⁰ Ejjabto elikin an Christian congregation eo jutak, ri jilek ro rar kãlet “jiljilimjuõn armij, . . . r’obrõk kin Jitõb kwojarjar im meletlet” ñan tel jerbal in “ajej ilo ran otemjej” mõñã ko ñan kõrã ro ejako beleir. (Jerbal 6:​1-6) Tokelik, Paul ear jiroñ overseer eo Timote bwe en likit etan kõrã ro reritto im ejako beleir ilo juõn lajrak bwe ren bõk jibañ ñan bõk men in aikwij ko ilo kanniek. (1 Timote 5:​3, 9, 10) Eindein, rainin overseer ro ilo congregation eo rej mõnõnõ in jibañ Ri Christian ro reritto jabdewõt ien rej aikwij jibañ. Bõtab, ñan kejbãrok ritto ro retiljek, ej kitibuj elõñlok men ko.

11. Ta eo Jesus ear ba kin kõrã eo ejako belen me ear ãti money ko reniñ?

¹¹ Ilo tujemlokin jerbal eo an ion lal, Jesus ear jijet iturin temple eo im “lale kijkan an armij ãti mõnni na iloan nien mõnni.” Inem ear lo juõn armij. Bwebwenato eo ej ba: “Juõn kõra, ejeramel im ejoko belen, ej itok im ãti ruo mõnni reniñ.” Jesus ear kirtok ri kalor ro an im jiroñ ir: “Emol Ij ba ñõn kom, Kõra in ejeramel im ejoko belen e ar ãti elap jen ir otemjej r’ar ãti na iloan nien mõnni. Bwe ir otemjej r’ar ãti wõt jet jen elõñ mweier a lio kin an jeramel e ar ãti men ko an otemjej, aet aolepen men in mour an.” (Mark 12:​41-​44) Ikijen joñan money ko, money ko kõra eo ejako belen ear ãti ear dik, ak Jesus ear jelã kin ewi joñan an Jemen ilañ kaorõk kamolol eo an ro rej kabuñ ñan e ñe rej lelok kin aolepen burueir. Jekdon ewi dettan kõrã eo, Jesus ear jab kajettokjen men eo ear kõmmane.

12. Ewi wãwen an elder ro maroñ kwalok air kamolol kin ijo kunan Christian lõllab im lellab ro?

¹² Einwõt Jesus, overseer ro ilo congregation eo rejjab kajettokjen men ko ritto ro rej kõmmane ñan kowõnmanlok kabuñ eo emol. Elder ro ewõr unin air nebar ritto ro kin air bõk kunair ilo jerbal in kwalok nan, bõk kunair ilo kwelok ko ilo congregation eo, kin wãwen an mwiliir jelet congregation eo ilo jimwe, im kin kijenmij eo air. Juõn wõt nan in rejañ emaroñ jibañ ritto ro ñan lo “unin kimjãje” ilo jerbal eo air ekwojarjar, im jab buromõj ñe rej keidi men ko Ri Christian ro jet rej kõmmane ak tõbrak ko rar kõmmani mokta.​—Dri Galetia 6:4.

13. Ilo wãwen et ko elder ro remaroñ kajerbal kabel ko im iminene ko an ritto ro?

¹³ Elder ro remaroñ nebar im kamolol Christian ritto ro kin air kajerbal kabel im maroñ ko air ñan jurake congregation eo. Jet ien remaroñ kajerbal ritto ro emõn joñok ko air ñan kwalok wanjoñok ko ak interview ir. “Ri kwelok ro relukkun liñõri im roñjake ñe Ij interview juõn lõllab ak lellab eo ear katakin ajiri ro nejin ñan bõk mol eo,” juõn elder ear ba. Elder ro ilo bar juõn congregation rar ba bwe juõn kõrã ej kwalok nan full-time im 71-an-yiõ ear lo tõbrak ilo an jibañ ri kwalok ro an Ailiñ eo ñan keini air kwalok nan. Bareinwõt ej rejañ ir bwe ren kõmmane “men in aikwij ko raorõk,” einwõt konono bible eo im lale unin tel in ran im kalmenlokjen kin ta ko rar konono kake.

14. Ewi wãwen an kar juõn kumi in elder kwalok air kamolol kin juõn overseer mõttair eritto?

¹⁴ Bareinwõt elder ro rej kaorõk jerbal ko an overseer ro mõttair reritto. José, eo ej 70 jima an yiõ ear jerbal einwõt juõn elder iumin elõñ yiõ ko, ej kab mwij an mwijmwij jejjo ran ko remotlok. Kinke ear kile bwe ejamin mõkaj an emõnlok ejmour eo an, inem ear lemnak in to jen jerbal eo an einwõt presiding overseer eo. “Bebe eo an elder ro jet ear kabwilõñ iõ,” José ej ba. “Jen air lore bebe eo aõ, rar kajitõk ibba elañe ewõr jabdewõt wãwen air maroñ jibañ iõ bwe in bedwõt ilo eddo in aõ.” Ikijen jibañ eo jen juõn elder emõn dettan, José ear wõnmanlok wõt ilo lañliñ einwõt presiding overseer eo, im men in ear wõr tokjen ñan congregation eo. Juõn mõttan elder ear ba: “Congregation eo elap an kamolol kin jerbal eo José ej kõmmane einwõt juõn elder. Rej yokwe im kautieje kin iminene eo an kin mour im joñok in tõmak eo an. Ej kalaplok aibujuij eo an congregation in am.”

Kejbãrok Don

15. Etke aolep Ri Christian ro rej aikwij itoklimo kin wãwen mour eo an lõllab im lellab ro ibwiljiir?

¹⁵ Eddo eo ñan kejbãrok ritto ro ejjab an ajiri ro nejiir im elder ro wõt. Ilo an keidi Christian congregation eo ibben enbwinin armij, Paul ear je: “Anij e ar kobaik enbwin, im lelok elaplok aibujuij ñõn ra eo ej aikwij; bwe en ejelok kiojõljõl ilo enbwin, a bwe ra ko otemjej ren jimor kejbãrok don.” (1 Dri Korint 12:24, 25) Ñan kõmman bwe aolep ro uan Christian congregation eo ren jerbal ibben don, kajjojo iair rej aikwij itoklimo kin ri tõmak ro mõttair, ekoba lõllab im lellab ro.​—Dri Galetia 6:⁠2.

16. Ewi wãwen ad maroñ kwalok ad itoklimo kin ritto ro ñe jej bed ilo kwelok ko an Christian?

¹⁶ Kwelok ko an Christian rej letok ien ko remõn ñan kwalok ad itoklimo kin ritto ro. (Dri Pilippai 2:⁠4; Dri Hibru 10:​24, 25) Jej bõk ke ien ñan bwebwenato ibben ritto ro ilo ien kein? Meñe emaroñ emõn bwe jen kajitõk kin ewi wãwen air mour, jemaroñ ke lelok “jabrewõt men in yokwe an Jitõb,” bõlen ilo ar kwalok juõn bwebwenato in rejañ ak nan in kakabilek jen Bible eo? Kinke jet ritto ro rej mõjno ilo enbwin, ej juõn men in joij bwe jen kebake ir jen ad kõtmene bwe ren kebake kij. Elañe juõn lõllab ak lellab ejjab emõn an roñ, jej aikwij karumijlok ad konono im konono ilo juõn ainikien ealikar. In elañe jekõnan “rejañ don,” jej aikwij liñõri ta eo armij eo juõn ej konono kake.​—Romans 1:​11, 12, NW.

17. Ewi wãwen ad maroñ kwalok ad itoklimo kin Christian lõllab im lellab ro rejjab maroñ etal ñan kwelok ko an Christian?

¹⁷ Ta elañe ritto ro rejjab maroñ bed ilo kwelok ko an Christian? Jemes 1:​27 ej kwalok bwe eddo eo ad ej ñan lale “ro atajinemjen im kõra ejoko beleir ilo air jorrãn.” Juõn melele ñan nan in Greek eo ej ba, “lolok.” (Jerbal 15:36) Im elap an ritto ro kamolol ñe jej lolok ir! Ke ear bed ilo kalbuj ilo Rom ilo 65 C.E., “lõlap” eo Paul ear make ian. Ear kijoror in bar lo ri jerbal eo mõttan Timote im ear je: “Kwon kaiur im jarõptok.” (Pailimõn 9; 2 Timote 1:​3, 4; 4:⁠9) Meñe rejjab bed ilo kalbuj, jet lõllab im lellab rejjab maroñ diojlok jen moko imwiir kin air nañinmij. Einwõt air ba, ‘Joij, im kate yuk im lotok iõ. Kwoj ke uake nan in eowor kein?

18. Ta tokjen ko rej walok ñe jej lolok ritto ro?

¹⁸ Jab kajettokjen wãwen an lolok kein maroñ jelet ritto ro jeid im jatid ilo tõmak. Ke juõn Ri Christian etan Onesiphorus ear bed ilo Rom, ear kate wõt in bukõt Paul, im ear loe, im tokelik ear kainemõne elõñ alen.’ (2 Timote 1:​16, 17) “I mõnõnõ in bed ibben jodikdik ro,” juõn lellab ilo tõmak ear ba. “Men eo emõntata ej bwe rej watõk iõ einwõt juõn uan family eo air. Men in elap an rejañ iõ.” Bar juõn Christian eritto ej ba: “Elap aõ kamolol ñe juõn armij ej bõktok juõn nan in yokyokwe ilo jeje, kirtok iõ ilo telephone meñe iumin jejjo wõt minute, ak lotok iõ iumin jidik wõt ien. Ej einwõt juõn men in kaemololo elap ibba.”

Jehovah Ej Kajerammõn Ro Rej Kwalok Air Kea

19. Ta jerammõn ko rej itok jen ad kejbãrok lõllab im lellab ro?

¹⁹ Kejbãrok lõllab im lellab ro ej bõktok elõñ jerammõn ko. Kamao ibben ritto ro im bõk jelãlokjen jen ir im jelã kin men ko reiminene kake ej make wõt juõn jerammõn ejejuan. Ro rej kejbãrok ritto ro rej bõk mõnõnõ eo elap kin air lelok, im rej lo tõbrak im bõk ainemõn iloa kin air kajejjet kitien eddo in ekkar ñan Jeje ko ilo Bible. (Jerbal 20:35) Bareinwõt, ro rej kejbãrok ritto ro rejjab aikwij mijak bwe renaj jojolããr ilo ran ko tokelik. Nan in Anij ej kallimure kij: “Eo e joij in lelok, naj kamãtõk e im eo ej kaimlolo, naj kaimlolo e mõke.”​—Jabõn Kennan Ko 11:25.

20, 21. Ewi lemnak eo an Jehovah kin ro rej lale ritto ro, im ta eo jej aikwij beek ilo buruõd bwe jen kõmmane?

²⁰ Jehovah ej kajerammõn ajiri ro, overseer ro, im Ri Christian ro jet rej mijake Anij im kabwe aikwij ko an ri tõmak ro mõttair reritto ilo ejelok kibbon. Jitõb rot in ej ekkar ñan jabõn kennan in: “Eo ej tiriamokake ro dri jeramel, ej lelok ñõn Jeova, im E naj nawõnan kin an kõmõn emõn.” (Jabõn Kennan Ko 19:​17) Elañe yokwe ej kamakit kij ñan kwalok joij ñan ro rettã im jeramel, Anij ej watõk lelok rot in einwõt juõn muri im enaj nawõnãn ilo an lelok elõñ jerammõn ko. Ej bareinwõt kõllã ñan kij ñe jej kejbãrok ri kabuñ ro mõttad reritto, elõñ iair rej ‘jeramel ilo lal in ak remweie ilo tõmak.’​—Jemes 2:5.

²¹ Anij elap an joij! Mour indio ej mõttan men ko ej kõllã ñan kij kake. Enañin aolep Ri Kennan ro an Jehovah, renaj mour indio ilo paradise ion lal, ijo men ko jar joleti jen jerawiwi renaj jako im lõllab im lellab ro retiljek renaj jeblak einwõt armij ro emõn ded im kajur. (Reveles̃õn 21:​3-5) Mae ien eo, jen wõnmanlok im kajejjet kitien eddo eo ad einwõt juõn Ri Christian emol im kejbãrok lõllab im lellab ro.

[Kamelele eo itulal]

Ta Uak ko Am?

• Ewi wãwen an ajiri ro maroñ kautiej jemeir im jineir?

• Ewi wãwen an elder ro kwalok air kamolol kin ritto ro ibwiljin bwij eo?

• Ta eo Ri Christian ro kajjojo remaroñ kõmmane ñan kwalok air itoklimo kin lõllab im lellab ro?

• Ta jerammõn ko rej walok jen ad kejbãrok Christian lõllab im lellab ro?

[Pija eo ilo peij 13]

Jej lukkun joij ke in kwalok yokwe ñan ritto ro jemed im jined?

[Pija ko ilo peij 14]

Aolep ilo congregation eo remaroñ kwalok air yokwe ñan ri tõmak ro mõttair reritto