Rej Make Iair Ak Jañin Meloklok Ir

RI JILEK Paul ear rejañ Ri Christian ro mõttan: “Jen jerbale emõn ñõn armij otemjej, im elaplok ñõn ro rej ber ilo nukin tõmak.” (Gal. 6:​10) Rainin, jej lore wõt Nan in tel in ekakõrmol im jej bukõt wãwen ko ñan kõmman emõn ñan ri tõmak ro mõttad. Ibwiljin rein me rej aikwij im tellokin an Ri Christian ro ilo congregation eo kwalok yokwe ñan ir rej lellab im lõllab ro jeid im jatid me rej jokwe ilo moko imõn ritto.

Emol, ilo jet ene ko, ej juõn manit bwe family ko ren kauk ritto ro jineir im jemeir ilo mweo imwiir. Bõtab, ilo ene ko jet, elõñ lellab im lõllab ro ekkã air jokwe ilo mweo imõn ritto ijo me remaroñ kauk ir ie. Ta kin Ri Christian ro reritto me rej jokwe ilo moko imõn ritto? Ta abañ ko rej jelmaiki? Ewi wãwen rej maroñ kijenmij kin abañ kein elañe rejjab bõk jibañ jen ro uan family eo air? Ilo wãwen et Ri Christian ro ilo congregation eo remaroñ jibañ ir? Im ilo wãwen et ko jej bõk tokjen jeni ñe jej ikutkut ad lolok ir?

Abañ ko Rej Jelmae ilo Moko Imõn Ritto

Elañe Ri Christian ritto ro rej emmakit ñan mweo imõn ritto, remaroñ bed ilo territory eo an bar juõn congregation, im ro jeid im jatid ilo jikin eo remaroñ jab jelã kin ir. Tokjen men in, Ri Kennan ro ijo remaroñ jab lemnak in lolok ir aolep ien. Bareinwõt, ilo mweo imõn ritto, rej bed ibelakin armij ro me eoktak tõmak im kabuñ ko air. Men in emaroñ likit Ri Kennan ro mõttad reritto ilo juõn abañ ebin.

Ñan wanjoñok, ilo jet jikin ko, emwij karõk bwe kabuñ ko ren kõmman jar ilo moko imõn ritto. Juõn ri jerbal ear ba: “Kin an bin air melele men ko rej ba, emwij bõk jet ritto ro rej Ri Kennan ro an Jehovah ilo wheelchair ko ñan bed ilo ien jar an kabuñ ko ilo air jab kejelãik ir.” Bareinwõt, ekkã an ri jerbal ro kajerbal kemem ko, Christmas, ak Easter ñan ukõt makitkit ko an ro rej jokwe ijo. Jet ian Ri Kennan ro ilo moko imõn ritto emwij bareinwõt lelok ñan ir mõñã ko me bõklikit eo air eban kar kõtlok bwe ren mõñã. (Jerb. 15:​29) Elañe jej ekkeini ad lolok ritto rein jeid im jatid, jenaj maroñ in jibañ ir kijenmij kin abañ rot kein.

Jibañ Jen Congregation Eo

Ri Christian ro jinoin rar lale eddo eo air ñan jibañ ro reritto ñe ejelok air family ñan lale ir. (1 Tim. 5:9) Eindein, overseer ro rainin rej kanuij lale bwe ren jab kajekdron ritto ro me rej jokwe ilo moko imõn ritto ilo jikin eo rej bed ie.a Robert, juõn elder, ear ba: “Enaj kar lukkun kõketak im lap tokjen elañe Ri Christian overseer ro ren kar make lolok rein reritto ñan lale wãwen air bed im jar ibbeir. Elõñ wãwen ko congregation eo emaroñ kõmmani ñan lale aikwij ko air.” Elañe jej kõmman ien ñan lolok rein reritto, jej kwalok bwe jej melele joñan an aorõk iman mejen Jehovah ñan lale aikwij ko an ro rej bed ilo aikwij.​​—Jem. 1:27.

Elañe ej menin aikwij, elder ro rej mõnõnõ in karõk ñan jibañ rein jeiir im jatiir ilo moko imõn ritto ilo jikin eo air. Robert ear ba kin juõn men emaroñ menin aikwij, “Jej aikwij rejañ ritto ro jeid im jatid ñan bed ilo kwelok ko an Christian elañe rej kajur wõt ñan kõmman eindein.” Bõtab, ñan ro me relukkun mõjno kiõ ñan air etal ñan Kingdom Hall eo, elder ro remaroñ kõmman karõk ko jet. Jacqueline, eo me 80 jima an yiõ im ear bõk nañinmij in osteoarthritis ak juõn kain kũrro ej walok ilo mokwoj ko im ekaeñtanan, ej roñjake kwelok ko ilo telephone. Ej ba: “Elap aõ bõk tokjen ñe ij roñjake kwelok ko ilo ien eo rej kõmmani. Ikõnan wõt roñjaki kwelok ko jekdon ta eo enaj walok.”

Elañe Christian ritto ro rejjab maroñ in roñjake kwelok ko ilo telephone, elder ro remaroñ karõk ñan kane kwelok ko ilo juõn tape. Armij eo ej bõklok tape ko emwij kani ñan eo jeid im jatid ilo mweo imõn ritto emaroñ kajerbal ien eo ñan bwebwenato ibben kin men ko rekõketak. Juõn overseer ej ba: “Kwalok ennan ko remõn kin ro ilo congregation eo ibben ritto ro jeid im jatid ej kõmman bwe ren eñjake bwe rej mõttan wõt family eo ilo jitõb ilo congregation eo.”

Kejbãrok Ien Konono Ibben Don

Elõñ ro reritto rej lukkun inebata im buromõj ñe rej emmakitlok ñan mweo imõn ritto. Tokjen men in, jet iair rej kõnan make wõt iair. Bõtab, elañe jej lolok rein jeid im jatid reritto elikin wõt air kar emmakit im kwalok ñan ir bwe jekõnan wõnmanlok im rejetak ir, enaj lukkun lap ad jibañ ir ñan bar bõk ainemõn im lañliñ eo air.​​—Ken. 17:22.

Elañe ritto ro jeid im jatid ewõr air nañinmij in kamelij ak rej jaroñroñ ak bõk nañinmij ko jet me rej kõmman an bin konono ibbeir, men kein remaroñ kõmman bwe jet ren bõk jemlok eo im ba bwe ejelok unin lolok ir. Bõtab, jibadbad ko ad ñan lolok wõt ir, jekdon ewi joñan an bin ñan konono ibbeir, ej kwalok bwe jej wõnmanlok im ‘kwalok ad mõnõnõ in kautiej’ ri tõmak ro mõttad. (Rom 12:​10) Elañe juõn ej jino an emmãlele, jemaroñ rejañ e ñan kakememej tok men ko ear iioni jen mokta​​—emaroñ jen ke ear ajiri bareinwõt​​—ak bwebwenato ñan kij kin ewi wãwen ear jino jelã mol eo jen Bible. Ta eo jemaroñ kõmmane elañe ebin an ba nan ko rejimwe? Ilo meanwõd kwon roñjake, im ñe ekkar, kwalok ruo ak jilu nan ko me kwoj lo bwe ej kajeoñ in ba, ak bar eliji lemnak ko an im rejañ e ñan wõnmanlok wõt. Elañe ej bwok ak ej ablolo an kennan im ebin ad melele, jemaroñ kajeoñ in melele men eo ej ba ikijen ad lukkun roñjake ainikien.

Elañe rejjab maroñ konono, jemaroñ kajerbal wãwen ko jet. Juõn pioneer etan Laurence, ear ikutkut an lolok Madeleine, juõn sister 80 an yiõ im ejjab maroñ konono. Laurence ej kamelele kin wãwen an sister eo konono ibben: “Ij jibwe pein Madeleine ke kimro ej jar ibben don. Inem ej keene jidik peiõ im karomrome mejen ñan kwalok kamolol kin ien eo ekaemololo.” Jibwe pein ritto ro mõttad ak atbokwõj ir emaroñ ilo mol lukkun kakajur ir.

Am Bed Elukkun Aorõk

Am ikutkut im lolok ritto ro emaroñ lap kilan kin joñan kea eo rej bõke jen ri jerbal ro. Danièle, eo me elõñlok jen 20 yiõ ko in an lolok Ri Kennan ro mõttan ilo moko imõn ritto, ear ba, “Elañe ri jerbal ro ilo mweo imõn ritto rej kile bwe ekutkut an armij ro lolok eo eritto, enaj emõnlok wãwen air lale e.” Robert, eo me kar ba kake moktalok, ej ba: “Ri jerbal ro elaplok air roñjake armij eo me ekutkut an lolok juõn eo ej jokwe ijo. Remaroñ jab kwalok ejja kautiej in ñan ro rej lolok ilo jet wõt ien.” Kinke ri jerbal ro ekkã air jerbal ibben family ko an ritto ro im ejjab bidodo ñan kabuñburueir, elap air kaorõk nan in kamolol ko jen ri lotok ro. Bareinwõt, elañe jej kaddek juõn kõtan emõn ibben ri jerbal ro, remaroñ mõnõnõ in kautiej men ko raorõk im tõmak ko an ritto eo ej juõn Ri Kennan an Jehovah me ej bed iumin kejbãrok eo air.

Jemaroñ bareinwõt kaddek juõn kõtan emõn ibben ri jerbal ro ikijen ad jibañ ir kin jerbal ko ebidodo kõmmani. Kin an jabwe ri jerbal ro ilo jet jikin ko, men in ej kõmman bwe en diklok joñan kejbãrok eo ritto ro rej bõke. Juõn ri jerbal etan Rébecca, ej ba: “Elaptata an boub ilo ien mõñã ko an ritto ro. Inem ien kein remaroñ ien ko remõntata ñan an juõn lotok eo mõttan im jibañ e mõñã.” Jen jab ãliklik in kajitõk ibben ri jerbal ro kin ta wãwen ko jemaroñ jibañ ie.

Ñe jej ikutkut ad lolok ejja mweo imõn ritto, jenaj maroñ lo ta ko ritto eo jeid im jatid ijo ej aikwiji, im kin melim eo jen office eo an personnel, jemaroñ bõk eddo eo ñan jibañ e. Ñan wanjoñok, bõlen jemaroñ kainõknõk room eo an juõn ritto kin pija in ro rejitenburu ibben ak kin jiña ko an ajiri ro. Kin ad lemnak kin aikwij ko an, jenaj maroñ bõktok juõn an nuknuk mãnãn ak jet an aikwij jidik. Elañe ewõr jikin kallip iturin mweo ej jokwe ie, jemaroñ ke bõk nabõj lok e ñan an kamejatoto? Laurence, eo kar ba kake moktalok, ej ba: “Madeleine ej reimanlok ñan week ko kajjojo ij lolok e ie. Ñe ij bõklok ajiri ro ibba lok, ilo mõkaj ej ettõñdikdik im mejen eromak kin an mõnõnõ!” Emmakit ilo wãwen kein emaroñ lukkun lap an jelet ro rej jokwe ilo mweo imõn ritto.​​—Ken. 3:​27.

Tokjen Lolok Ko

Ikutkut in lolok juõn armij eritto emaroñ melejoñ “mol in [ad] yokwe.” (2 Kor. 8:8) Ilo wãwen et? Emaroñ kaburomõj kij ñan lo an juõn mõttad mõjnolok. Laurence ej kile: “Ilo jinoin, joñan an kar wãwen bed eo an Madeleine jelet iõ, iar jañ elikin kajjojo ien ij lolok ie. Ak iar katak bwe jar jen buru emaroñ jibañ kij anjo ion mijak ko ad im erom menin kõketak ñan ro jej lolok ir.” Iumin elõñ yiõ, Robert ear lolok juõn brother etan Larry eo ear jorrãn kin nañinmij in Parkinson (juõn nañinmij eo ej jelet kamelij eo, dilep, im nerve ko). Robert ej ba: “Joñan an kar nañinmij eo an Larry jelet e iar jab maroñ melele juõn nan ej ba. Ak ke kimro ej jar ibben don, imaroñ eñjake joñan tõmak eo an.”

Ñe jej lolok ri tõmak ro mõttad reritto, jeban jibañ wõt ir ak jenaj bareinwõt bõk tokjen. Kate eo air ñan bed ebake wõt Jehovah ke rej bed ibwiljin armij ro eoktak tõmak ko air ej katakin kij ñan tõmak wõt im kwalok beran. Kijoror eo air ñan bõk ekan ko lor jitõb meñe rejaroñroñ im bilo ej kalikar bwe “armij e jamin mour kin bred wõt, a kin nan otemjej rej waloktok jen loñin Anij.” (Mat. 4:4) Ikijen air lo lañliñ ilo men ko relamwan, einwõt an juõn ajiri ettõñdikdik ak mõñã ibben don, ritto ro rej kakememej kij ñan jokane kin men eo ewõr ibbed. Yokwe eo air kin aorõkin men ko lor jitõb emaroñ jibañ kij ñan karõk men ko raorõk moktata ilo mour eo ad.

Emol, aolepen congregation eo ej bõk tokjen jen air jibañ ritto ro. Etke jemaroñ ba men in? Kinke ro me remõjno ilo kanniek elaplok air atartar ion yokwe eo an ro jimjãn jimjatin. Wãwen in ej letok ien ko rebellok ñan an congregation eo kalaplok air kwalok yokwe. Kin men in, kij aolep jej aikwij lemnak kin kejbãrok ritto ro, meñe ñan juõn ien eaetok, einwõt mõttan ad karejar ñan don. (1 Pit. 4:​10, 11) Elañe elder ro rej tel ilo makitkit in, renaj jibañ ro jet uan congregation eo ñan lo bwe jejjab aikwij kajekdon mõttan in ilo makitkit ko an Christian. (Ezek. 34:​15, 16) Ikijen ad yokwe im mõnõnõ in jibañ, jej kakajur Ri Christian ro mõttad reritto bwe jejañin meloklok ir!

[Kamelele eo itulal]

[Naan ko ilo peij 28]

“Elañe ri jerbal ro ilo mweo imõn ritto rej kile bwe ekutkut an armij ro lolok juõn eo eritto, enaj emõn air lale e”

[Pija eo ilo peij 26]

Jar ko jen buruõd remaroñ jibañ ri tõmak eo mõttad eritto ñan bar bõk ainemõn eo an

[Pija eo ilo peij 26]

Ad kwalok yokwe enaj kakajur ri tõmak ro mõttad reritto