Kwoj Bõk Ke Jibañ Jen Jehovah?
“[Jehovah] ej aõ Dri jibõñ; I jamin mijõk.”—DRI HIBRU 13:6.
1, 2. Etke ej aorõk bwe jen bõk jibañ im tel eo an Jehovah ilo mour eo ad?
BAJ LEMNAKE mõk, am etetal ion juõn tol. Bõtab, kwojjab make iam kinke juõn ri tel ej bed ibbem, im ej ri tel eo emõntata. Ej iminene im kajur jen kwe, ak meanwõd ñe ej etetal iturum. Ej lo am tipjek jet ien. Kin an jab kõnan bwe kwon jorrãn, ej kõtlok pein im jibañ yuk jen juõn jikin ekauwatata. Kwonaj makoko ke in bõk jibañ eo an? Emol jaab! Am mour manlok ej atartar ion jibañ eo an.
2 Einwõt Ri Christian ro, jej bed ilo ial eo ebwe an bin lore. Jej aikwij makelok iad ke im etetal ilo ial eo? (Matu 7:14) Jaab, Bible eo ej kwalok bwe Ri Tel eo emõntata ej, Jehovah Anij, eo ej kõtlok armij bwe ren etetal ibben. (Jenesis 5:24; 6:9) Jehovah ej jibañ ke ri karejar ro an ilo air etetal? Ej ba: “Ña Jeova, am Anij, I naj kapjere anbijmaroñõm, im ba ñõn yuk, Kwon jab mijõk; I naj jibõñ yuk.” (Aiseia 41:13) Einwõt ri tel eo ilo wanjoñok eo ad, Jehovah ej ilo joij kõtlok pein im jimjera eo an ñan ro rekõnan etetal ibben. Emol bwe ejelok juõn iad enaj makoko in bõk jibañ jen e!
3. Ta kajitõk ko jenaj uaki ilo katak in?
3 Ilo katak eo lok, jar bwebwenato kin emen wãwen ko Jehovah ear jibañ armij ro an ilo ien ko etto. Ej jibañ ke armij ro an ilo ejja wãwen ko wõt rainin? Im ewi wãwen ad maroñ in bõk jibañ jibañ rot in? Jen etale uak ko ñan kajitõk kein. Ilo ad kõmmane men in, jemaroñ kalaplok ad tõmak bwe Jehovah ej Ri Jibañ eo ad.—Dri Hibru 13:6.
Jibañ Jen Enjel Ro
4. Etke ri karejar ro an Anij ran kein rej aikwij liki bwe enjel ro renaj jibañ ir?
4 Enjel ro rej jibañ ke ri karejar ro an Jehovah rainin? Aet, rej jibañ. Emol, rejjab weaktok iman mejen ri kabuñ ro remol im kanemkwoj ir jen jorrãn. Bareinwõt ilo ien ko etto ilo Bible, enjel ro ejeja air kar walok ilo wãwen eo. Enañin aolep men ko rar kõmmani armij ro rar jab maroñ loi, ej eindein ilo ran kein. Mekarta, ro ri karejaran Anij me rar kile bwe enjel ro rar jurake ir rar lo bwe jelãlokjen in ear kakajur ir. (2 Kiñ Ro 6:14-17) Ewõr juõn un emõn ñan ad bõk lemnak in.
5. Ewi wãwen an Bible eo kwalok bwe enjel ro rej bõk kunair ilo jerbal in kwalok nan rainin?
5 Enjel ro an Jehovah rar lukkun itoklimo ilo juõn jerbal eaorõk im ej jelet kij. Jerbal rot eo? Jemaroñ lo uak eo ilo Reveles̃õn 14:6: “Im I ar lo bar juõn enjel ej kãki i mejatoto, im iben gospel ej in drio, bwe en kwalok e ñõn ro rej jokwe ion lõl, im ñõn ailiñ im bwij im konono im driloabjen otemjelok.” “Gospel” in “ej in drio,” ilo alikar ej ekkejel ibben “gospel kin ailiñ eo,” me Jesus ear kanan bwe renaj kwalok kake, “i aolepen lõl kin men in kennan ñõn ailiñ otemjelok” mokta jen jemlokin jukjuk im bed in enana. (Matu 24:14) Emol bwe, enjel ro rejjab kwalok nan ilo kajju. Jesus ear letok eddo in ñan armij ro. (Matu 28:19, 20) Ejjab juõn men emõn ke ñan jelã bwe ñe jej wõnmanlok ilo jerbal in, jej bõk jibañ jen enjel ro rekwojarjar, jitõb ro remeletlet im kajur?
6, 7. (a) Ta eo ej kwalok bwe enjel ro rej rejetak jerbal in kwalok nan eo ad? (b) Ewi wãwen ad maroñ liki bwe enjel ro an Jehovah rej bojak in jibañ kij?
6 Elõñ men in kamol ko rej kwalok bwe enjel ro rej jurake jerbal eo ad. Ñan wanjoñok, ekkã ad roñ bwe ilo jerbal eo ad, Ri Kennan ro an Jehovah rej wõnmaik juõn armij eo ej kab jino jar ñan Anij bwe en jibañ e ñan lo mol eo. Joñan an lõñ bwebwenato rot kein jejjab maroñ kajekdon i einwõt bwebwenato bajjek. Kin jibañ rot in jen enjel ro, elõñlok armij rej katak in kõmmane men eo “enjel eo ej kãki i mejatoto” ear keañ kake: “Mijõk Anij im lelok aibujuij ñõn E.”—Reveles̃õn 14:7.
7 Kwoj kijoror ke in bõk jibañ jen enjel ro rekajur an Jehovah? Inem kwon kamaat am maroñ ñan kate yuk ilo jerbal in kwalok nan eo am. (1 Dri Korint 15:58) Ñe jej lelok kij make ilo mõnõnõ ñan kõmmane jerbal in ejej uan jen Jehovah, jemaroñ liki bwe enjel ro renaj jibañ kij.
Jibañ Jen Enjel Eo Eutiejtata
8. Ta eddo eo Jesus ej bõke ilañ, im etke ej juõn wãwen rejañ ñan kij?
8 Jehovah ej bareinwõt letok jibañ jen bar juõn kain enjel. Reveles̃õn 10:1 ej kwalok kin juõn “enjel ekajur” eo me “turin mejen [ej] einwõt al.” Enjel in ilo vision eo ej pijaik Jesus Christ eo emwij an bõk aibujuij im kajur ilañ. (Reveles̃õn 1:13, 16) Mol ke bwe Jesus ej juõn enjel? Ilo juõn wãwen, aet, kinke ej arkenjel. (1 Dri Tessalonika 4:16) Ta melelen arkenjel? Melelen nan in “enjel eo moktata,” ak “enjel eo eutiejtata.” Jesus ej kajurtata ian aolepen jitõb ro nejin Jehovah. Jehovah ear kamaroñ e bwe en iroij ion enjel ro An otemjej. Emol bwe jemaroñ bõk jibañ jen arkenjel in ekajur. Ilo wãwen et ko?
9, 10. (a) Ewi wãwen an Jesus jerbal einwõt “Dri Jibõñ” eo ad ñe jej jerawiwi? (b) Ta eo jemaroñ loe ilo joñok eo an Jesus ñan jibañ kij?
9 Ri jilek eo eritto Jon ear je: “Elañe jabrewõt armij ej jerawiwi, juõn ar Dri Jojomar iben Jemer, Jisõs Kraist Dru Wãnik.” (1 Jon 2:1) Etke Jon ear ba bwe Jesus ear “dri jojomar’ eo ad elaptata ñe jej “jerawiwi”? Eokwe, jej jerawiwi ran otemjej, im jerawiwi ej tellok ñan mij. (Ekklisiastis 7:20; Dri Rom 6:23) Bõtab, Jesus ear letok mour eo an einwõt juõn men in katok kin jerawiwi ko ad. Im ej bed iturin Jemed eo ej tiriamokake bwe en jojomare kij. Kij aolep jej aikwij jibañ. Ewi wãwen ad maroñ bõke? Jej aikwij ukwelok jen jerawiwi ko ad im kajitõk kin jolok bwid eo ej wawa ion mour eo an Jesus emwij katok kake. Bareinwõt jej aikwij kejbãrok kij jen ad bar kõmman jerawiwi.
10 Ijellokin an mij kin kij, Jesus ear likit juõn joñok emõn ñan kij. (1 Piter 2:21) Joñok eo an ej tel kij, ej jibañ kij ñan karõk juõn ial bwe jen kejbãrok kij jen ad kõmman juõn bwid elap im jemaroñ kabuñburuen Jehovah Anij. Jejjab ke mõnõnõ in bõk jibañ rot in? Jesus ear kallimuri ri kalor ro an bwe renaj kar bõk bar juõn ri jibañ.
Jibañ Jen Jitõb Kwojarjar Eo
11, 12. Ta in jitõb eo an Jehovah, ewi joñan kajur eo an, im etke jej aikwiji rainin?
11 Jesus ear kallimur: “I naj jar im kajitõk iben Jema, im E naj lewoj ñõn kom bar juõn Dri Kainemõn, bwe En ber ibemi in drio; jitõb õn mol. Eo lõl e ban bõk E.” (Jon 14:16, 17) “Jitõb õn mol” in, ak jitõb kwojarjar eo, ejjab juõn armij ak ej kajur eo—kajur eo emmakitkit an Jehovah. Ej kajur otem kajur. Jehovah ear kajerbal kajur in ñan kõmanman ijoko otemjej ilañ im ion lal, ñan kõmman men ko rekabwilõñlõñ, im ilo an letok vision ko rekabwilõñlõñ kin ankil an. Kinke Jehovah ejjab kajerbal jitõb eo an ilo wãwen kein rainin, melelen men in ke bwe jejjab aikwiji?
12 Jaab! Ilo “ran kein renana,” elaplok ad aikwiji jitõb eo an Jehovah jen mokta. (2 Timote 3:1) Ej kakajur kij ñan kijenmij iumin melejoñ ko. Ej jibañ kij ñan kaddek kadkad ko remõntata rej karuaklok kij ñan Jehovah im ri tõmak maan im kõrã ro mõttad. (Dri Galetia 5:22, 23) Inem, ewi wãwen ad maroñ bõk tokjen jen jibañ rot in emõntata jen Jehovah?
13, 14. (a) Etke jemaroñ liki bwe Jehovah ej mõnõnõ in letok jitõb kwojarjar eo an ñan armij ro an? (b) Ilo ad kõmman ta men eo ej kalikar bwe jejjab kõnan bõk jitõb kwojarjar eo?
13 Moktata, jej aikwij jar kin jitõb kwojarjar eo. Jesus ear ba: “Elañe komeo dri nana, kom jela kijkan lelok men ko remõn ñõn ro nejemi; ta, e jamin lap an Jememiuij i lõñ lelok Jitõb Kwojarjar ñõn ro otemjej rej kajitõk iben ke?” (Luk 11:13) Aet, Jehovah ej Jemen eo emõntata. Elañe ilo tõmak jej kajitõk ibben kin jitõb kwojarjar, ejelok bere bwe enaj letok men in letok in. Kajitõk eo in ej, Jej kajitõk ke kake? Jej aikwij kajitõk kake ilo jar ko ad ran otemjej.
14 Kein ka ruo, jej bõk men in letok in ilo ad jerbal ekkar ñan e. Ñan wanjoñok: Elañe juõn Ri Christian ej kate kin mõjno eo kin kõnan ñan aluij pija in kelwan. Ear jar ñan bõk jibañ jen jitõb kwojarjar ñan jolok manit in ejõkkar. Ear kebak Christian elder ro ñan bõk nan in kakabilek ko, im rar kakabilek e bwe en beek in illok jen manit eo ilo mõkaj, beek ilo buruen bwe en jab bar aluij pija rot kein. (Matu 5:29) Ta elañe ej kajekdon nan in kakabilek eo air im wõnmanlok im aluij pija rot kein? Ej jerbal ke ekkar ñan jar eo an kin jitõb kwojarjar ñan jibañ e? Ak ej bed ke ilo kauwatata ñan kaburomõj jitõb kwojarjar eo an Anij im luji men in letok in? (Dri Epesõs 4:30) Emol, kij aolep jej aikwij kõmman men otemjej ñan wõnmanlok im bõk jibañ rot in ekabwilõñlõñ jen Jehovah.
Jibañ Jen Nan in Anij
15. Ewi wãwen ad maroñ kwalok bwe jejjab kajettokjen Bible eo?
15 Bible eo ear juõn men in jibañ ñan ri karejar ro an Jehovah iumin elõñ ebeben ko. Bõtab, jen ad watõk Jeje ko Rekwojarjar einwõt juõn book bajjek, jej aikwij in kememej bwe Bible eo ej men in jibañ eo elap an kajur. Jej aikwij kate kij ñan watõk e einwõt juõn kein jibañ. Ñan bõke einwõt men in jibañ eo jej aikwij kate kij. Jej aikwij kõmman bwe ad konono Bible eo en mõttan makitkit ko ad kajjojo ran.
16, 17. (a) Ewi wãwen an Sam 1:2, 3 kamelele kin tokjen ko jen ad konono kin kien ko an Anij? (b) Ewi wãwen an Sam 1:3 kwalok bwe jej aikwij boub wõt ilo jerbal eo ad?
16 Sam 1:2, 3 ej ba kin armij eo ej kabuñburuen Anij: “Ej lõñliñ ilo kien Jeova; im ej lemnok kin kien eo ran im boñ. E naj einwõt wijki eo emwij kallipe iturin river in dren, eo ej jebar leen ilo ien eo an; im bwilikõn e jamin mõrar; im e naj jerammõn kin men otemjej ej kõmõni.” Kwoj lo ke point eo eaorõktata ilo ennan in? Ebidodo ñan konono nan kein im ba bwe rej kwalok juõn pija eaibujuij kin juõn jikin eainemõn—juõn wijki ekalur iturin river eo. Elap an emõn ñan kiki jidik ilo elikin raelep ilo juõn jikin einwõt in! Ak sam in ejjab rejañ kij ñan kakije. Ej kõmman bar juõn pija, eo ej rejañ kij ñan kijejeto wõt ilo jerbal. Ewi wãwen ad maroñ kõmman eindein?
17 Lale bwe wijki in ejjab juõn wijki ekalur eo ear baj walok wõt iturin river eo. Ej juõn wijki ej “jebar leen,” im armij eo ear “kallipe” ilo juõn jikin emõn—“iturin river in dren.” Ewi wãwen juõn wõt wijki emaroñ eddek iturin elõñlok jen juõn river? Eokwe, ilo juõn jikin kalbwin wijki ko rekouwa, ri kallip eo emaroñ kũbũj jukur ko ñan katoore den ko ñan okran wijki ko raorõk. Kiõ, ej alikar! Ilo juõn wãwen ilo jitõb elañe jej eddek einwõt wijki eo, ej kinke juõn ej boub in jerbal ñan jibañ kij. Jej kamao ibben juõn dolul ej bõktok den in mol ko rerreo ñan kij, ak jej aikwij bõk kunad. Jej aikwij bõk den in eaorõk ilo ad kalmenlokjen im etale kaki bwe jen likit katak ko remol kin Nan in Anij ilo lemnak eo ad im buruõd. Ilo wãwen in kij bareinwõt jenaj jebar leen ko remõn.
18. Ta eo jej aikwiji ñan lo uak kajitõk ko ad jen Bible eo?
18 Ejelok tokjen Bible eo elañe jej doore ion jikin book eo im jab kabelloke. Ejjab juõn kein madmõd—einwõt ñe jej kil mejed, im kõtlok bwe Bible eo en make bellok, im juõn uak ejejjet ñan kajitõk eo ad en walok imad. Ñe jej aikwij kõmman bebe ko, jej aikwij bukõt “jelalokjen eo an Anij” einwõt ñe jej bukõt men ko raorõk. (Jabõn Kennan Ko 2:1-5) Ekkã ad aikwij niknik in etale ilo jimwe im tibdikin ñan lo nan in kakabilek eo ilo Bible eo ej jerbale ñan aikwij ko rejejjet. Elõñ book ko rej wawa ion Bible eo ibbed ñan jibañ kij ñe jej kõmman etale ko. Ñe jej kajerbal men in jibañ kein ñan ture im bukõt meletlet eo ilo Nan in Anij, emol bwe jej kajerbal jibañ eo Jehovah ej letok ñan kij ilo jimwe.
Jibañ Ikijen Ri Tõmak ro Mõttad
19. (a) Etke jemaroñ ba bwe katak ko ilo Imõniaroñroñ eo im Awake! rej kein jibañ ko jen ri tõmak ro mõttad? (b) Ewi wãwen kwar bõk jibañ jen juõn katak ilo juõn ian magazine ko ad?
19 Ri karejar ro an Jehovah rej mõnõnõ in jibañ don ien otemjej. Jehovah ear ukõt ke lemnak eo an ilo men in? Jab ñan jidik. Ejelok bere bwe kij aolep jemaroñ lemnak kin ien ko jar bõk jibañ ilo ien eo ejejjet jen ri tõmak ro mõttad. Ñan wanjoñok, kwomaroñ ke kememej kin jet katak ko ilo magazine kein Imõniaroñroñ ak Awake! rar kainemõn yuk ke kwar aikwij jibañ ak rar jibañ yuk ñan jelmae im anjo ion juõn men ear melejoñe tõmak eo am? Jehovah ear jibañ yuk ikijen “ri korijer eo e tiljek im meletlet” eo ej bõk eddo eo ñan “najirik [kij] ilo ien emõn.”—Matu 24:45-47.
20. Ilo wãwen et ko Christian elder ro rej einwõt “men in letok in armij”?
20 Bõtab, ekkã an walok bwe jibañ eo jej bõk jen ri tõmak ro mõttad ej itok ilo kajju. Juõn Christian elder ej kwalok juõn katak eo ej kalel buruõd, ak ej lotok im jibañ kij ilo juõn ien ewõr juõn abañ elap ibbed, ak ej letok nan in kakabilek ko ilo joij im jibañ kij ñan kile im anjo ion juõn men ej kamõjnoik kij. Juõn Ri Christian ekamolol ear je kin jibañ eo ear bõk jen juõn elder: “Ilo jerbal in kwalok nan, ear bõk ien ñan tur buruõ. Ilo boñin eo mokta, Iar jar ñan Jehovah, im kajitõk kin juõn eo im imaroñ konono ibben. Juõn ran tokelik, ri tõmak in ear konono ibba ilo juõn wãwen ejoij im yokwe. Ear jibañ iõ bwe in lo wãwen an Jehovah kar jibañ iõ iumin aolepen yiõ kein. IJ kamolol Jehovah kin an jilkintok elder in ñan iõ.” Ilo wãwen kein, Christian elder ro rej kwalok bwe rej einwõt “men in lelok in armij,” Jehovah ear letoke ikijen Jesus Christ bwe jen kijenmij ilo ial eo ej tellok ñan mour indio.—Dri Epesõs 4:8.
21, 22. (a) Ta eo ej walok ñe armij ro ilo congregation eo rej jerbale nan in kakabilek eo ilo Dri Pilippai 2:4? (b) Etke kõmman ko redik jej kõmmani ilo joij rej aorõk?
21 Ijellokin elder ro, kajjojo ri Christian ekõnan jerbale kien in ekakõrmol bwe en “jab lale men ko an wõt, a bareinwõt men ko an ro jet.” (Dri Pilippai 2:4) Ñe ro rej bed ilo congregation eo an Christian rej jerbale nan in kakabilek in, elõñ kõmman ko rejoij rej walok. Ñan wanjoñok, juõn family ear eñtan kin jorrãn ko kar walok ñan e ilo idiñ. Jemen ear ãñini ledik eo nejin ñan imõn wia eo. Ke rar ettõrlok ilo wa eo wair ñan mweo imwiir, rar bed ilo juõn lanwõtwõt. Ledik eo nejin ear mij; im jemen ear lukkun jorrãn. Ke ear dioj jen hospital eo, joñan an jorrãn ear jab maroñ kõmman jabdewõt men ilo jinoin. Lio belen ear lukkun buromõj im ear jab maroñ jibañ e. Inem juõn leo im lio ri belele ilo congregation eo rar bõk leo im lio rejorrãn bwe ren jokwe ilo mweo imwiir im kejbãrok ir iumin jejjo week.
22 Emol, bwe jab aolep men ko rej kõmmani ilo joij rej waloktok jen jorrãn ko im ej tellokin ad aikwij in lelok kij make. Jet jibañ ko jej bõki rejjab kanuij lap. Ak jekdon elañe joij eo jej bõke edik joñan, jej kamolol kake, jejjab ke? Kwomaroñ ke lemnak kin ien ko juõn ri tõmak eo mõttad ear ba tok juõn nan ak kõmman juõn men ilo joij ñan kij ilo ien eo ejejjet jaar aikwiji? Ekkã an Jehovah kwalok an kea kin kij ilo wãwen kein.—Jabõn Kennan Ko 17:17; 18:24.
23. Ewi wãwen an Jehovah lemnak ñe jej kate kij ñan jibañ don?
23 Kwokõnan ke bwe Jehovah en kajerbal kwe ñan jibañ armij ro jet? Jerammõn in ej bellok ñan kwe. Emol, Jehovah ej kamolol yuk kin am bõk kunam ilo men in. Nan eo An ej ba: Eo ej tiriamokake ro dri jeramel, ej lelok ñõn Jeova, im E naj nawõnan kin an kõmõn emõn.” (Jabõn Kennan Ko 19:17) Lañliñ eo elap ej itok jen ad lelok kij make ñan ri tõmak maan im kõrã ro mõttad. (Jerbal 20:35) Lañliñ eo ej itok jen ad lelok ak bõk jibañ ejjab waloklok ñan ro rej kamakelok iair jen armij ro jet. (Jabõn Kennan Ko 18:1) Kin men in, jen tiljek wõt im bed ilo kwelok ko an Christian bwe jen kõketak don.—Dri Hibru 10:24, 25.
24. Etke jejjab aikwij eñjake bwe Jehovah ear debij juõn jerammõn jen kij elañe jaar jab lo men in kabwilõñlõñ ko an einwõt ilo ien ko etto?
24 Jejjab mõnõnõ ke ñan kalmenlokjen kin wãwen ko Jehovah ej jibañ kij kaki? Meñe jejjab mour ilo ien eo Jehovah ear kõmman elõñ men in bwilõñ ko ñan kajejjet kitien karõk ko an, jejjab aikwij lemnak bwe ej debij jerammõn ko jen kij. Men eo eaorõk ej bwe Jehovah ej jibañ kij aolep bwe jen tiljek wõt. Im elañe jej kijenmij ibben don ilo tiljek, jenaj mour ilo ien eo Jehovah enaj kõmman men ko rekabwilõñlõñ im aibujuij tata jen men ko ear kõmmani jen jinoin ien kõmanman ñan kiõ! Jen beek ilo buruõd ñan bõk im kajerbal ñan mãt joñan jibañ eo Jehovah ear letok ñan kij ilo yokwe bwe jen mour ekkar ñan nan ko ilo unin tel in yiõ eo 2005: “Aõ jibõñ ej itok jen Jeova.”—Sam 121:2.
Ta Lemnak Eo Am?
Ewi wãwen an Jehovah letok jibañ eo jej aikwiji rainin—
• ikijen enjel ro?
• ikijen jitõb kwojarjar eo an?
• ilo Nan in kakõrmol eo an?
• ikijen ri tõmak ro mõttad?
[Pija eo ilo peij 12]
Ej juõn men emõn ñan jelã bwe enjel ro rej rejetak jerbal in kwalok
[Pija eo ilo peij 15]
Jehovah emaroñ kajerbal juõn ian ri tõmak ro mõttad ñan bõktok nan in kainemõn eo jej aikwiji