“Ke Ear Lo Juõn Bõr Im Elap Wõnan”

“Rej kaiur ir ñõn ailiñ in lõñ, im ro dri kaiur rej kate ir im tõbar e.”​—MATU 11:12.

1, 2. (a) Kadkad et eo ejeja loe Jesus ear kwalok kake ilo juõn ian parable ko an kin Ailiñ eo? (b) Ta eo Jesus ear ba ilo parable eo kin bõr eo elap wõnãn?

EWÕR ke juõn men me elap am kaorõke im kwoj mõnõnõ in lelok men otemjej mweiõm ñan am bõke? Meñe armij rej konono kin air aikwij kate ilo jibadbad eo air kin juõn mejenkajjik​—money, buñbuñ, kajur, ak utiej​—ejeja an juõn armij lo juõn men me joñan an aorõk ej mõnõnõ in lelok aolep men ko ibben ñan an bõke. Jesus Christ ear konono kin kadkad in eaibujuij ilo juõn ian parable ko an kin Ailiñ in Anij.

² Ej juõn parable, ak wanjoñok, me Jesus ear jiroñ ro ri kaloran wõt, im ekkã air jitõñlok ñane einwõt parable eo kin bõr eo elap wõnãn. Eñin men eo Jesus ear ba: “Ailiñ in lõñ ej einwõt dru wia, ej kabukot bõr ko remõn; Ke e ar lo juõn bõr im elap wõnan, ej ilok im wiakaki men ko otemjej an im wiaik e.” (Matu 13:36, 45, 46) Ta eo Jesus ear kõnan bwe ro rej roñjake ren katak jen wanjoñok in? Im ewi wãwen jemaroñ bõk tokjen jen nan ko an Jesus?

Aorõkin Bõr ko

3. Etke bõr ko remõn rar aorõk ilo ien ko etto?

³ Jen ien ko etto, bõr ko kar kaorõki einwõt kein kainõknõk ko. Juõn unjen melele ear lo bwe ekkar ñan Ri Rome ri meletlet eo Pliny the Elder, bõr ko rej bed “ilõñtata ian men otemjej raorõk.” Einjuõn jen gold, silver, ak dekã ko raorõk, bõr ko rej walok jen men ko remour. Elap jelã kake bwe jet kain oyster (di) ko remaroñ ukõt men ko rej irir ibben don​—⁠mõttan ko redik in juõn dekã ñan wanjoñok​—bõr ko raibujuij ilo air kalibubuiki elõñ alen kin juõn den etan nacre (mother of pearl). Ilo ien ko etto, bõr ko remõntata rar aini jen Lomalo Ekilmir, Persian Gulf, im meto in India​—etolok jen enen Israel. Ejelok bere eñin kar un eo unin Jesus ear konono kin “dru wia ej kabukot bõr ko remõn.” Ñan an juõn lo bõr ko remõn, juõn armij ej aikwij lukkun kate wõt e.

4. Ta point eo elaptata jemaroñ katak jen parable eo an Jesus kin ri wia eo?

⁴ Meñe jen ien ko etto ear lap wõnãn bõr ko remõn, alikar joñan wõnãir ear jab point eo elaptata ilo parable eo an Jesus. Jesus ear keidi Ailiñ in Anij, jab ñan juõn bõr im elap wõnãn wõt, ak ñan juõn “dru wia ej kabukot bõr ko remõn” im wãwen eo ear emmakit ke ear lo juõn. Juõn ri wia bõr ear einjuõn jen juõn ri lale mõn wia bajjek, kinke ear tijemlok ilo jerbal in, ear emõn an lale oktak in wãwen ko ak ear wõr kabel eo ñan kile wãwen ko re loi me rej kakõllan juõn bõr im elap wõnãn. Ñe ej loe emaroñ kile juõn bõr emõn im rejjab maroñ mone e kin bõr ko renana ak reriap.

5, 6. (a) Ta men eo eaorõk jemaroñ katak kin ri wia eo ilo parable eo an Jesus? (b) Parable eo kin mweiuk eo enojak ej kwalok ta kin ri wia eo?

⁵ Ewõr bar juõn men kin ri wia in me eaorõk. Juõn ri wia bajjek emaroñ lale mokta joñan wõnãn bõr eo bwe en jelã ewi joñan enaj aikwij kõllã ñan an maroñ kõmman juõn orlok in money eo an. Emaroñ bareinwõt lemnak elañe emaroñ mõkaj an wiakake. Melelen, elap an lemnak ñan korlok jããn ko an, jen an wiaiki bwe en an. Ak ejjab eindein ibben ri wia eo ilo parable eo an Jesus. Itoklimo eo an ear jab ñan korlok jããn. Ilo mol, ear mõnõnõ in wiakake “men ko otemjej an”​—bõlen aolep men ko mweien im weto ko an​—ñan bõk men eo ear bukõte.

⁶ Ñan elõñ ri wia ro, men eo leo ilo parable eo an Jesus ear kõmmane ear jab juõn men in meletlet. Juõn ri business emeletlet ejamin deloñ ilo juõn wãwen business ekauwatata einwõt in. Ak ri wia eo ilo parable eo an Jesus ear oktak wãwen an lemnak. Jinekjej eo an ear jab kin laplok in jããn ko an ak kar ilo an lañliñ im juburu kin an wõr ibben juõn men elap an aorõk. Point in kar kalikare ilo bar juõn parable me Jesus ear kwaloke. Ear ba: “Ailiñ in lõñ ej einwõt mweiuk noji ilo jikin kallip, eo armij e ar loe im noji, im kin an lõñliñ kake ej ilok im wiakaki men ko otemjej an, im wiaik jikin kallip eo.” (Matu 13:44) Aet, lañliñ eo ej itok kin an lo im wõr ibben mweiuk eo ear bwe ñan kamakit leo ñan wiakaki men ko otemjej an. Ewõr ke armij ro einwõt in rainin? Ewõr ke juõn mweiuk me ej tellokin kõmman juõn katok rot in?

Ro Rar Kamolol kin Aorõkin Ailiñ eo

7. Ewi wãwen an kar Jesus kwalok bwe ear kamolol kin aorõkin Ailiñ eo?

⁷ Ilo an kwalok kin parable eo an, Jesus ear konono kin “ailiñ in lõñ.” Ear juõn armij eo ear kamolol kin aorõkin Ailiñ eo. Bwebwenato ko ilo Gospel eo ej kamole men in. Elikin an kar baptais ilo 29 C.E., Jesus ear “jino An kwalok, im ba, Komin ukwelok ibemi; bwe ailiñ in lõñ ebak.” Iumin jilu im jimettan yiõ ko, ear katakin elõñ armij kin Ailiñ eo. Ear ito-itak ilujen eneo, “Ej ilok ilo jikin kwelok otemjej relap im redrik, Ej kwalok im konono gospel an ailiñ in Anij.”​—Matu 4:​17; Luk 8:1.

8. Ta eo Jesus ear kõmmane ñan kwalok kin ta eo Ailiñ eo enaj kõtõbrake?

⁸ Ilo an kõmman elõñ men in bwilõñ ko ilujen eneo​—ekoba kejmour ro renañinmij, najidik ro rekwuli, kalur lañ ko, im bareinwõt kajerkakbijeik ro remij​—Jesus ear kwalok kin ta ko Ailiñ in Anij enaj kõtõbraki. (Matu 14:14-​21; Mark 4:​37-​39; Luk 7:​11-​17) Eliktata, ear kamol tiljek eo an ñan Anij im ñan Ailiñ eo ilo an lelok mour eo an, mij ion juõn alal in eñtan. Einwõt ri wia eo ear mõnõnõ in lelok men ko otemjej an ñan bõk “bõr im elap wõnan,” Jesus ear mour im mij kin Ailiñ eo.​—Jon 18:37.

9. Kadkad et eo ejeja loe ear bed ibwiljin ri kalor ro an Jesus ilo jinoin?

⁹ Ear jab mour eo an wõt Jesus ear keolaplape ilo Ailiñ eo ak ear bareinwõt aini juõn kumi edik in ri kalor ro. Rein bareinwõt rar armij ro ear lap air kaorõk Ailiñ eo. Ibwiljiir kar Andrew, eo ilo jinoin ear juõn ri kaloran John Ri Baptais. Ke ear roñ nan in kamol eo an John bwe Jesus ear “Lam an Anij,” Andrew im bar juõn ri kaloran John, bõlen juõn ian lõmaro nejin Zebedee etan John, ear mõkaj air reel ibben Jesus im erom ri tõmak ro. Ak men in ear jab jemlokin men ko. Ilo mõkaj, Andrew ear kajju ñan Simon jein im jiroñ e: “Kim ar lo Messaia.” Ejjabto tokelik, Simon (eo jej jelã kajjen einwõt Cephas, ak Peter) im bareinwõt Philip im Nathanael jeran rar bareinwõt kile Jesus einwõt Messiah eo. Ilo mol, Nathanael ear ba ñan Jesus: “Kwe Nejin Anij; Kwe kiñ in Israel.”​—Jon 1:​35-​49.

Emmakit ñan Jerbal

10. Ri kalor ro rar emmakit ilo wãwen et ke Jesus ear itok im kir ir jet ien ko tokelik elikin ien eo moktata ear iion ir?

¹⁰ Jemaroñ keidi mõnõnõ eo elap an Andrew, Peter, John, im ro jet ke rar lo Messiah eo ñan mõnõnõ eo me ri wia eo ear eñjake ke ear lo bõr eo elap wõnãn. Ta eo renaj kõmmane kiõ? Ejjab lap an Gospel ko jiroñ kij kin ta eo rar kõmmane elikin wõt air iion Jesus. Alikar, elõñ iair rar jeblak ñan wãwen mour ko air. Bõtab, enañin jiljino alliñ ak juõn yiõ tokelik, Jesus ear bar iion Andrew, Peter, John, im jein John James ilo jerbal in eñwõd eo air iturin Lomalo in Galilee.a Ke ej lo ir, Jesus ear ba: “Komin lor Iõ, im I naj likit [kom] dri añwõr armij.” Kar ta uak eo air? Ikijen Peter im Andrew, bwebwenato eo an Matu ej ba: “Emõkaj air ilok jen ok ko air im lor E.” Ikijen James im John, jej konono: “rej likit men otemjej im lor E.”​—Matu 4:​18-​22; Luk 5:​1-​11.

11. Ta un eo unin an kar ri kalor ro emmakit ilo mõkaj ñan kir eo an Jesus?

¹¹ Uak eo emõkaj an ri kalor ro, rar kõmmane ke ilo air jab lemnak kake mokta? Jaab! Meñe rar jeblak ñan jerbal in eñwõd eo air elikin ien eo moktata rar iion Jesus, ear ejelok bere bwe men eo rar loe im roñjake ilo ien eo ear mũlal an jelet burueir im lemnak ko air. Kinke emotlok enañin juõn yiõ bwe ien ñan air kalmenlokjen kake men rot kein. Kiõ ej ien ñan air kõmman juõn bebe. Renaj kar einwõt ri wia eo ke me joñan an kar lap an buruen emmakit kin an lo bõr eo elap wõnãn, einwõt Jesus ear kwalok kake, “ej ilok” ilo mõkaj im kõmman men ko ej aikwij kõmmani ñan wiaik bõr eo? Aet. Men eo rar loe im roñjake ear kamakit burueir. Rar kile bwe ear ien ñan air emmakit. Kin men in, einwõt bwebwenato ko rej ba, ilo mõkaj rar likit men otemjej im erom ri kaloran Jesus.

12, 13. (a) Ilo wãwen et eo elõñ ian ro rar roñjake Jesus rar emmakit? (b) Ta eo Jesus ear ba kin ri kalor ro an retiljek, im ta eo nan ko an rar kwalok kake?

¹² Elap an kar oktak rein ri tiljek jen ro jet kar konono kake ir tokelik ilo bwebwenato ko ilo Gospel! Elõñ armij ro me Jesus ear kejmour ak najidik ir rar wõnmanlok ilo makitkit ko air jen ran ñan ran. (Luk 17:17, 18; Jon 6:​26) Jet rar bareinwõt kõmman jekben ke Jesus ear kir ir ñan air erom ri kalor ro an. (Luk 9:​59-​62) Ilo oktan, ikijen ro retiljek, Jesus ear ba tokelik: “Jen ran ko an Jon dri baptais ñõn ien in, rej kaiur ir ñõn ailiñ in lõñ, im ro dri kaiur rej kate ir im tõbar e.”​—Matu 11:12.

¹³ “Kaiur” im “dri kaiur rej kate”​—nan kein rej kwalok kin ta? Ikijen nan in Greek eo me nan kein rej itok jene, Vine’s Expository Dictionary of Old and New Testament Words ej ba: “Nan in ej kwalok air aikwij lukkun kate.” Im ikijen eon in, ri meletlet eo kin Bible Heinrich Meyer ej ba: “Ilo wãwen in ej kwalok kin kijerjer, im kate eo ñan jibadõk ailiñ in Messiah eo . . . Elap an wõr kijerjer im kijejeto (ejako ainemõn im jitõb in kõttar eo) ilo itoklimo eo kin ailiñ eo.” Einwõt ri wia eo, armij rein reiet rar kile ilo mõkaj ta eo ear mol an aorõk, im rar mõnõnõ in likit men ko otemjej air kin men ko an Ailiñ eo.​—Matu 19:27, 28; Dri Pilippai 3:8.

Ro Jet Rar Koba ilo Jerbal in Kabuk eo

14. Ewi wãwen Jesus ear keboj ri jilek ro kin jerbal in kwalok nan kin Ailiñ eo, im kin ta tokjen eo?

¹⁴ Ke Jesus ear wõnmanlok ilo jerbal in kwalok nan eo an, ear kamineneik im jibañ ro jet ñan bukõte Ailiñ eo. Mokta ear kãlet 12 ian ri kalor ro an im jitõñ ir einwõt ri jilek ro, ak ro ear jilkinlok ir. Ñan rein, Jesus ear lelok tibdik in nan in jiroñ ko kin ewi wãwen remaroñ kajejjet jerbal in kwalok nan eo air im ear bareinwõt kakkõl ir kin aitwerõk im abañ ko rar bed imair. (Matu 10:​1-​42; Luk 6:​12-​16) Iumin enañin ruo yiõ ko, rar etal ibben Jesus ilo trip in kwalok nan ko an ilujen eneo, im rar lañliñ kin juõn kõtan ebak ibben. Rar roñjake nan ko an, lo jerbal ko an rekabwilõñlõñ, im rar lo joñok eo an make. (Matu 13:16, 17) Ejelok bere bwe aolep men kein ear mũlal air jelet ir, ñan joñan eo bwe einwõt ri wia eo, rar jibadõke Ailiñ eo ilo kijejeto im kin aolepen burueir.

15. Ta eo Jesus ear ba kar lukkun unin lañliñ eo an ri kalor ro an?

¹⁵ Ijellokin ri jilek ro 12, Jesus ear “likit bar jijilimjuõnñoul, im jilkinlok ir karuolok iman mejen ilo jikin kwelok im ene otemjej, ijo E naj ilok ie lok.” Ear bareinwõt jiroñ ir kin melejoñ ko im abañ ko renaj iioni ilo ran ko renaj itok im ear jiroñ ir ñan ba ñan armij: “Ailiñ in Anij ej ebake kom.” (Luk 10:​1-​12) Ke ro 70 rar jeblak, rar lañliñ im jiroñ Jesus: “Iroij, im dimon ro rej bokake kim ilo Etõm.” Ak rar bwilõñ ke Jesus ear kwalok bwe juõn lañliñ elaplok ear bed imair kin air kijejeto kin Ailiñ eo. Ear jiroñ ir: “A komin jab lõñliñ kin men in, bwe jitõb rõn rej bokake kom; a komin lõñliñ bwe emwij jeje etõmi ilo lõñ.”​—Luk 10:17, 20.

16, 17. (a) Ta eo Jesus ear jiroñ ri jilek ro an retiljek ilo boñin eo eliktata ear bed ibbeir? (b) Lañliñ im kallimur et eo nan ko an Jesus kar bõktoke ñan ri jilek ro?

¹⁶ Eliktata, ilo boñin eo eliktata in an Jesus bed ibben ri jilek ro, ilo Nisan 14, 33 C.E., ear kajutak Kwojkwoj in Kejota eo an Iroij im kakien ir ñan air kejbãrok ran in. Ilo boñin eo, Jesus ear jiroñ ro 11 retiljek: “A komeo, ro r’ar ber iba ilo men ko r’ar kabo Iõ kaki. Im Ij likit ñõn kom juõn ailiñ einwõt Jema e ar likit ñõn Iõ: Bwe komin mõña im irak iturin Aõ tebel ilo Aõ ailiñ; im kom naj jijõt ion tron ko, im ekajet joñoul im ruo bwijin Israel.”​—Luk 22:19, 20, 28-​30.

¹⁷ Alikar ear obrak buruen ri jilek ro kin lañliñ im juburu ke rar roñ nan kein an Jesus! Kar lelok ñan ir nebar im jerammõn eo elaptata jabdewõt armij ear maroñ bõke. (Matu 7:​13, 14; 1 Piter 2:9) Einwõt ri wia eo, rar kajekdon elõñ men ko bwe ren maroñ lor Jesus ilo air bukõt Ailiñ eo. Kiõ kar kamol ñan ir bwe katok ko rar kõmmani ear jab ejelok tokjen.

18. Wõn ro ijellokin ri jilek ro 11 renaj bareinwõt bõk tokjen jen Ailiñ eo?

¹⁸ Ejjab ri jilek ro wõt me rar bed ibben Jesus ilo boñin eo renaj bõk tokjen jen Ailiñ eo. Ear ankil an Jehovah bwe oran in 144,000 ren deloñ ilo bujen Ailiñ eo im jerbal einwõt iroij ro mõttan Jesus Christ ilo Ailiñ eo eaibujuij ilañ. Ijellokin men in, ri jilek John ear lo ilo juõn vision juõn “jar elap, eo ejelok armij ej maroñ in bwinir, . . . rej jutõk iman tron eo im iman mejen Lam, . . . im ba, Lomor ñõn amuij Anij eo Ej jijõt ion tron, im ñõn Lam.” Rein rej ri karejar ro me renaj mour ion lal iumin Ailiñ eo.b​—Reveles̃õn 7:​9, 10; 14:​1, 4.

19, 20. (a) Ta eo ebellok ñan armij ro jen ailiñ ko otemjej? (b) Ta kajitõk eo jenaj etale ilo katak in tok juõn?

¹⁹ Mokta lok jidik jen an kar Jesus wanliñlok ñan lañ, ear kakien ri kalor ro an retiljek: “Inem komin ilok, im kõmõn dri ailiñ ko otemjej bwe ren dri kalora, im baptais ir ilo etan Jema im Nejin im Jitõb Kwojarjar; im katakin ir bwe ren bokake nan ko otemjej I ar jiroñ kom: im lo, Ij ber ibemi ien otemjej ñõn jemlokõn [jukjuk im bed in, NW].” (Matu 28:19, 20) Kin men in, armij ro jen ailiñ ko otemjej renaj erom ri kaloran Jesus Christ. Rein bareinwõt renaj jibadõk Ailiñ eo kin aolepen burueir​—meñe rej kejatdikdik ñan bõk mour ilañ ak ion lal​—einwõt ri wia eo ear kõmmane ikijen bõr eo emõn.

²⁰ Nan ko an Jesus rej kalikar bwe jerbal in kõmman ri kalor ro enaj wõnmanlok ñan “jemlokin jukjuk im bed in.” Inem ilo ran kein ad, ewõr wõt ke armij ro einwõt ri wia eo, me rej mõnõnõ in likit men ko otemjej air ñan jibadõk Ailiñ in Anij? Jenaj etale kajitõk in ilo katak in tok juõn.

[Kamelele ko itulal]

Kwomaroñ ke Kamelele?

• Ta point eo elaptata jemaroñ katak jen parable eo kin ri wia eo?

• Ewi wãwen an kar Jesus kwalok an kamolol kin aorõkin Ailiñ eo?

• Ta eo ear kamaroñ Andrew, Peter, John, im ro jet ñan uak ilo mõkaj ke Jesus ear kir ir?

• Ta ien eo emõn im aibujuij ej bed iman armij ro jen ailiñ ko otemjej?

[Pija eo ilo peij 19]

‘Rar likit men otemjej im lor Jesus’

[Pija eo ilo peij 21]

Mokta jen an kar wanliñlok ñan lañ, Jesus ear kakien ri karejar ro an ñan kõmman ri kalor ro