Jibadõk “Bõr Im Elap Wõnan” Rainin
“Im naj kwalok gospel in an ailiñ in lõñ i aolepen lõl kin men in kennan.”—MATU 24:14.
1, 2. (a) Ewi kar lemnak eo an Ri Jew ro kin Ailiñ in Anij ilo ran ko an Jesus? (b) Ta eo Jesus ear kõmmane ñan lelok juõn melele ekkar kin Ailiñ eo, im kar ta tokjen ko?
AILIÑ in Anij ear men eo elap an kar Ri Jew ro itoklimo kake ke Jesus ear itok ñan lal. (Matu 3:1, 2; 4:23-25; Jon 1:49) Bõtab, ilo jinoin elõñ iair rar jab lukkun melele kin ewi lapin iroij eo an im ewi wãwen enaj jerbale maroñ eo an; im rar jab melele bareinwõt bwe enaj juõn kien ilañ. (Jon 3:1-5) Jet ian ro rar erom ri kaloran Jesus rar jab lukkun melele bareinwõt kin ta in Ailiñ in Anij ak ta eo rej aikwij kõmmane ñan bõk jerammõn eo ñan air erom iroij ro mõttan Christ.—Matu 20:20-22; Luk 19:11; Jerbal 1:6.
2 Ke emotlok ien, elõñ men ko Jesus ear katakin ro ri kaloran kaki ilo meanwõd, ekoba parable eo kin bõr eo elap wõnãn me jaar etale ilo katak eo iman, im ear kalikar ñan ir kin aorõkin air kate ir ilo air jibadõk Ailiñ in lañ. (Matu 6:33; 13:45, 46; Luk 13:23, 24) Emol men in emaroñ kar lukkun mũlal an jelet burueir kinke ejjabto rar erom ri keañ ro rekijejeto im beran kin news eo emõn kin Ailiñ eo ñan jabõn ko rettolok tata ilo lal, im elõñ kein kamol ko kin men in rej bed ilo book in Jerbal.—Jerbal 1:8; Dri Kolosse 1:23.
3. Ikijen ran kein, ta eo Jesus ear ba kin Ailiñ eo?
3 Inem, ta kin rainin? Jerammõn ko kin juõn paradise ion lal iumin ailiñ in rej kwalok kaki ñan elõñ million armij ro. Ilo kanan eo an elap kin “jemlokin jukjuk im bed in,” Jesus ear ba: “Im naj kwalok gospel in an ailiñ in lõñ i aolepen lõl kin men in kennan ñõn ailiñ otemjelok: ilo ien eo e naj itok jemlokõn.” (Matu 24:3, 14; Mark 13:10) Ear bareinwõt kamelele bwe rej aikwij kõmmane jerbal in elap meñe elõñ men in jumae ko im abañ ko, im matõrtõr bareinwõt. Mekarta, ear kamol ñan ir: “Eo e naj kijinmij ñõn jemlokõn, e in e naj mour.” (Matu 24:9-13) Aolep men kein rej aikwij ejja kain lemnak in karmijete kõnan ko im kijejeto eo me ri wia eo ilo parable eo an Jesus ear kwaloke. Ewõr ke armij ro rainin me rej kwalok ejja kain tõmak im kijejeto rot in ilo air jibadõk Ailiñ eo?
Lañliñ eo ilo Ad Lo Mol eo
4. Mol eo kin Ailiñ eo ej jelet armij ro ilo wãwen et eo rainin?
4 Ri wia eo ilo parable eo an Jesus ear lap an lañliñ ke ear lo juõn “bõr im elap wõnan.” Lañliñ in ear kamakit e ñan an kõmman jabdewõt men emaroñ ñan wiaik bõr eo. (Dri Hibru 12:1) Rainin, mol eo kin Anij im Ailiñ eo an ej bareinwõt kareel im kamakit armij ro. Men in ej kakememej kij kin nan ko an Brother A. H. Macmillan, eo ear je kin jibadbad eo an make ñan bukõt Anij im karõk eo An kin armij ilo book eo Faith on the March. Ear ba: “Men eo iar loe elõñ thousand armij rej loe kajjojo yiõ. Im rej armij ro einwõt kwe im ña, kinke rej jen ailiñ ko otemjej, jowi ko otemjej, wãwen mour ko im dettan ko otemjej. Mol eo ejelok an kalijeklok. Ej kareel jabdewõt kain armij.”
5. Ta tokjen ko remõn jemaroñ loe ilo report eo an yiõ in jerbal eo 2004?
5 Mol in nan kein ej alikar kinke, ilo kajjojo yiõ, news eo emõn kin Ailiñ in Anij ej kamakit elõñ buki thousand armij ro emol burueir ñan air wujleplok air mour ñan Jehovah im ñan kõmanman ankil an. Yiõ in jerbal eo 2004, eo ear jino jen September 2003 ñan August 2004, ear jab oktak. Iumin alliñ kein 12, 262,416 armij ro rar kalikar wujleplok eo air ñan Jehovah ilo air baptais ilo den. Men in ear walok ilo 235 ailiñ ko, ijo Ri Kennan ro an Jehovah rej kõmmane 6,085,387 katak kin Bible ko kajjojo week ñan jibañ armij ro jen jabdewõt wãwen mour im jen elõñ ailiñ ko, bwij ko, im konono ko ñan bõk mol eo ej letok mour jen Nan eo an Anij.—Reveles̃õn 7:9.
6. Ta unin laplok ko ilo yiõ ko remotlok?
6 Ta eo ear kõmman bwe en walok men kein? Ejelok bere bwe Jehovah ej ibertok ñan e rein rej tellokiir bõk mour. (Jon 6:65; Jerbal 13:48) Bõtab, jen jab kadiklok tokjen jibadbad ko ejelok kibbon im rekijejeto an ro rar mõnõnõ in lelok ir make ilo air jibadõk Ailiñ eo. Ke ear 79 yiõ dettan, Brother Macmillan ear je: “Jen ien eo ke iar jino katak kin kallimur ko kar litoki ñan armij ro renañinmij im rej mij, kejatdikdik eo aõ kin ta eo ennan in ilo Bible ear kwaloke ear jab mejkunlok. Ilo ien eo iar bebe ñan aõ kalaplok jelã eo aõ kin ta eo Bible eo ej katakin bwe in maroñ jibañ ro jet einwõt ña me rej bukõt jelãlokjen eo kin Anij eo Ekajur Bõtata, Jehovah, im karõk ko an remõn ñan armij.”
7. Ta experience eo ej kwalok kin lañliñ im kijejeto eo an ro rej lo mol eo ilo Bible?
7 Jitõb in kijejeto in jej bareinwõt loe ibwiljin ri karejar ro an Jehovah rainin. Juõn wanjoñok ej Daniela jen Vienna, Austria. Ear ba: “Jen ien eo ke iar ajiri, Anij ear jera eo emõntata. Etto aõ kar kõnan jelã ãt eo etan kinke ñan ña nan eo ‘Anij’ ear jab lukkun jejjet. Ak iar aikwij kõttar mae ien eo iar 17 yiõ detta, ke Ri Kennan ro an Jehovah rar itok ñan mweo imõ. Rar kameleleik ña kin men otemjej iar kõnan jelã kin Anij. Eliktata, iar lo mol eo, im ear lap an aibujuij! Joñan an kar lap aõ mõnõnõ iar kwalok nan ñan aolep armij.” Kijejeto eo an ear kõmman bwe ro mõttan ilo school ren kajirere kake e. “Ak, ñan ña iar lo an jejjet kitien kanan eo ilo Bible,” Daniela ear wõnmanlok, “kinke emwij aõ kar katak bwe Jesus ear ba bwe renaj kijirãte im matõrtõre ri kalor ro an kin etan. Elap aõ kar mõnõnõ im bwilõñ.” Ejjabto, Daniela ear wujleplok an mour ñan Jehovah, ear baptais, im jino jibadõk mejenkajjik eo ñan an deloñ ilo jerbal in missionary. Elikin an mare, Daniela, koba Helmut leo belen, rar kwalok nan ñan Ri Africa, Ri China, Ri Philippine, im Ri India ro ilo Vienna. Daniela im Helmut rej kiõ jerbal einwõt missionary ro ilo tu-rak tu-rilik in Africa.
Rejjab Ebwer
8. Ta juõn ian wãwen eo emõn elõñ rar kwalok air yokwe Anij im tiljek ñan Ailiñ eo?
8 Emol, jerbal in missionary ej juõn ian wãwen ko armij ro an Jehovah rainin rej kwalok air yokwe Anij im tiljek eo air ñan Ailiñ eo an. Einwõt ri wia eo ilo parable eo an Jesus, ro rej deloñ ilo jerbal in rej mõnõnõ in etal ñan jikin ko retolok kin tokjen Ailiñ eo. Emol, missionary rein rejjab ito-itak ñan bukõt news eo emõn kin Ailiñ eo; rej bõkloke ñan armij ro rej jokwe ilo jikin ko retolok tata ilo lal in, im katakin im jibañ ir ñan air erom ri kalor ro an Jesus Christ. (Matu 28:19, 20) Ilo elõñ ailiñ ko, rar aikwij in kijenmij iumin elõñ abañ ko. Ak rar bõk juõn ãjinkij elap kin kijenmij eo air.
9, 10. Ta experience ko rekalañliñ missionary ro rar iioni ilo jikin ko retolok, einwõt ilo Central African Republic?
9 Juõn wanjoñok ej Central African Republic, ijo 16,184 armij ro rar bed ilo Kwojkwoj in Kememej mij eo an Christ ilo yiõ eo lok, enañin jiljilimjuõn alen an laplok jen oran ri kwalok ro kin Ailiñ eo ilo eneo. Kinke ejelok jarom ilo elõñ jikin ko ilo ailiñ in, ekkã an armij ro kõmmane jerbal ko air inabõj iumin ilur in juõn wijki. Inem ekkã an missionary ro kõmmane jerbal in kwalok nan eo air ilo ejja wãwen in wõt—kõmman katak kin Bible ko inabõj iumin juõn wijki. Ejjab kin an meram im molo wõt nabõj ak ewõr bar juõn tokjen. Elap an armij ro yokwe Bible eo, im ekkã air bwebwenato kin katak ko an kabuñ. Armij ro rej etetal emakijkij air lo ta eo ej walok im baj kobalok ilo katak eo.
10 Kin men in, ke juõn missionary ear kõmmane juõn katak Bible inabõj, juõn likao eo ear jokwe kajjen mweo ear itok im ba bwe kinke ejelok armij ear etal im lolok e, ear kõnan bwe missionary eo en itok im katak ibben bareinwõt. Aet, missionary eo ear mõnõnõ in katak ibben, im likao in emõkaj an kõmman wõnmanlok ko. Ilo ailiñ in, policeman ro ekkã air kabõjrak Ri Kennan ro iturin ial, jab ñan lelok bakkiñ, ak ñan kajitõk kin magazine in Watchtower im Awake! ko rekãl ak ñan kamolol ir kin juõn katak me rar mõnõnõ in readi.
11. Meñe rar iion elõñ melejoñ ko, ta lemnak eo an ro etto air missionary kin jerbal eo air?
11 Elõñ ro rar deloñ ilo jerbal in missionary 40 ak 50 yiõ ko remotlok rej jerbal wõt ñan kiõ ilo tiljek. Ej juõn joñok elap an emõn ñan kij aolep kin tiljek im kijenmij! Iumin 42 yiõ ko, ruo ri belele ro rar jerbal ibben don einwõt missionary ilo jilu ailiñ ko. Leo ej ba: “Ear wõr abañ ko. Ñan wanjoñok, kimar aikwij in kijenmij kin nañinmij in malaria iumin 35 yiõ ko. Ak, kimar jab ajlok kin bebe eo am ñan erom missionary ro.” Lio belen ej ba: “Ien otemjej ear lõñ men ko kimar maroñ kamolol kaki. Jerbal in kwalok nan elap an kalañliñ, im ebidodo ñan jino Bible study ko. Ñe kwoj lo an ri katak ro itok ñan kwelok ko im jelã kajjen don, kajjojo ien ej einwõt juõn ibben don an family eo.”
Rej “Watõki Men Otemjej Jerata Wõt”
12. Ewi wãwen juõn armij ej kwalok bwe emol an kamolol kin aorõkin Ailiñ eo?
12 Ke ri wia eo ear lo juõn bõr im elap wõnãn, “ej ilok im wiakaki men ko otemjej an im wiaik e.” (Matu 13:46) Mõnõnõ in ñan kajekdon men eo ej watõke eaorõk ej eindein ibben ro emol air kamolol kin aorõkin Ailiñ eo. Einwõt juõn ian ro rar bõk jerammõn eo ñan koba ibben Christ ilo aibujuij eo an Ailiñ eo, ri jilek Paul ear ba: “Ij watõki men otemjej jerata wõt, kin an kanuij emõn aõ jela Kraist Jisõs aõ Iroij: kin Eo men ko otemjej aõ re joko, im ij watõki kwobij, bwe in jibarek Kraist.”—Dri Pilippai 3:8.
13. Ewi wãwen an kar juõn armij ilo Czech Republic kwalok yokwe eo an kin Ailiñ eo?
13 Ilo ejja wãwen in wõt, elõñ rainin rej mõnõnõ in kõmman oktak ko relap ilo air mour ñan bõk jerammõn ko an Ailiñ eo. Ñan wanjoñok, ilo October 2003, juõn emaan 60-yiõ dettan eo ear jeban juõn school ilo Czech Republic ear lo book in jibañ eo ñan katak Bible etan Jelãlokjen Eo Ej Tellok ñan Mour Indio. Elikin an kar readi, ilo mõkaj ear kebak Ri Kennan ro an Jehovah ilo bukwon eo an ñan jino an katak Bible. Ear emõn an wõnmanlok im ejjabto tokelik ear jino bed ilo aolep kwelok ko. Ak, ta kin karõk ko an ñan bukõt jea in mayor im tokelik ñan jibadõk bwe en juõn senator? Ear kãlet ñan an deloñe juõn iaikwij eoktak—einwõt juõn ri keañ kin Ailiñ eo. Ear ba, “Iar maroñ lelok elõñ book in Bible ko ñan ri school ro aõ.” Ear kwalok wujleplok eo an ñan Jehovah ilo an baptais ilo juõn convention ilo July 2004.
14. (a) Ta eo news eo emõn kin Ailiñ eo ear kamakit elõñ million armij ro ñan air kõmmane? (b) Ta kajitõk ko kij kajjojo jemaroñ kajitõkin kij make?
14 Elõñ million ro jet ibelakin lal rar emmakit ilo ejja wãwen in wõt ñan news eo emõn kin Ailiñ eo. Rar diojtok jen lal in enana, wutik armij eo emor, ilok jen ro mõttair mokta, im jolok jibadbad ko air kin men ko an lal in. (Jon 15:19; Dri Epesõs 4:22-24; Jemes 4:4; 1 Jon 2:15-17) Etke rej kõmmane aolep men kein? Kinke rej kaorõk jerammõn ko an Ailiñ in Anij ilõñin jabdewõt men me jukjuk im bed in kiõ emaroñ lelok ñan ir. Eindein ke eñjake eo am kin news eo emõn kin Ailiñ eo? Kwoj emmakit ke ñan kõmman oktak ko rej men in aikwij ñan kõmman bwe wãwen mour eo am, men ko kwoj kaorõki, im mejenkajjik ko am ren burukuk ibben ta eo Jehovah ej aikwiji jen kij? Ilo am kõmmane men in enaj bõktok jerammõn ko indio ñan yuk, kiõ im ilo ran ko renaj itok.
Jonikõn eo Ej Tõbar Jemlokin
15. Ta eo kar kanan kake bwe armij ro an Anij renaj kõmmane ilo ran ko eliktata?
15 Ri jeje sam ear je: “Ro drom rej mõnõnõ im lewoj ir mõke ilo ran in Am kajur.” Ro rej mõnõnõ in lelok ir make ekoba “molawi an ien emõn drer” im “juõn jar elap” in “kora ro rej kwalok e.” (Sam 68:11; 110:3) Ta tokjen eo ear walok kin tiljek im jitõb in karmijete ir make eo an armij ro an Jehovah—maan im kõrã ro, dik im ritto—ilo ran kein eliktata?
16. Kwalok juõn wanjoñok kin ewi wãwen ro ri karejaran Anij rej kate ir ñan jibañ ro jet katak kin Ailiñ eo.
16 Juõn pioneer, ak juõn ri keañ kin Ailiñ eo me ej kwalok nan full-time, ilo India ear lemnak kin ewi wãwen remaroñ jibañ elõñlok jen ruo million armij ro rejaroñroñ ilo eneo ñan katak kin Ailiñ eo. (Aiseia 35:5) Lio ear bebe ñan an kadeloñ etan ilo juõn school ñan an katak sign language (konono ilo kamakit pein). Ijo ear maroñ kwalok kin kejatdikdik eo kin Ailiñ eo ibben elõñ ro rejaroñroñ, im ear ejaak elõñ kumi ko ñan katak Bible. Iloan jet wõt week ko, elõñlok jen juõn dozen (joñoul ruo) armij ro rar jino bed ilo kwelok ko ilo Kingdom Hall eo. Tokelik, ilo juõn kwojkwoj in belele, pioneer eo ear lo juõn likao ejaroñroñ jen Calcutta ear lõñ an kajitõk im ear kwalok an itoklimo ñan kalaplok an jelã kin Jehovah. Bõtab ear wõr juõn abañ. Likao eo ear aikwij rol ñan Calcutta, enañin 1,000 mile ko retolok, ñan an jino college, im ear ejelok Ri Kennan ro rejelã sign language ijo. Kin an lap an kate, ear maroñ kareel jemen ñan an kõtlok bwe en school ilo Bangalore bwe en maroñ wõnmanlok ilo katak Bible eo an. Ear kõmman wõnmanlok ko remõn ilo men ko lor jitõb, im elikin juõn yiõ, ear wujleplok an mour ñan Jehovah. E, kiõ ear oktak, im katak Bible ibben elõñ ro re jaroñroñ, ekoba juõn mõttan jen ke ear dik. Ra eo ilo India ej kõmman karõk ko kiõ bwe pioneer ro ren katak sign language ñan jibañ ilo wãwen in.
17. Kwalok ta eo ear kõketak yuk ilo report eo an yiõ in jerbal eo 2004 ilo page 25 ñan 28.
17 Ilo page 25 ñan 28 ilo magazine in, kwonaj lo report eo jen belakin lal kin jerbal in kwalok nan eo an Ri Kennan ro an Jehovah ilo yiõ in jerbal eo 2004. Bõk jidik ien ñan am etale, im lo kin mejõm kein kamol eo bwe armij ro an Jehovah ibelakin lal rej kate ir ñan jibadõk “bõr im elap wõnan” rainin.
Wõnmanlok im “Bukot Mokta Ailiñ in Anij”
18. Ta melele eo Jesus ear jab kobaiki ilo parable eo kin ri wia eo, im etke ear jab?
18 Elañe jej bar lemnak kin parable eo an Jesus kin ri wia eo, jej lo bwe Jesus ear jab ba jabdewõt kin ewi wãwen ri wia eo enaj kar maroñ kabwe aikwij ko an elikin an wiakake aolep men ko mweien. Jet remaroñ kajitõk: ‘Ewi wãwen an ri wia eo maroñ bukõt mõñã, nuknuk, im jikin jokwe elañe ear ejelok jabdewõt men ibben? Enaj ta tokjen bõr eo eaorõk ñan e?’ Kajitõk kein rej men in kõmmanwa ñan ro rej lemnak ekkar ñan kanniek. Ak Jesus ear jab rejañ ke ri kalor ro an: “A komin bukot mokta ailiñ in Anij, im kwojarjar eo An; im naj koorlok men kein otemjej ñõn kom”? (Matu 6:31-33) Point eo elap ilo parable eo ej bwe jej aikwij kwalok ad tiljek ñan Anij im kijejeto kin Ailiñ eo. Ewõr ke juõn men jemaroñ katak jen men in?
19. Ta point eo eaorõk jemaroñ katak jen parable eo an Jesus kin bõr eo elap wõnãn?
19 Meñe jej kab katak kin news eo emõn ak etto ad kar bukõt Ailiñ eo im jiroñ ro jet kin jerammõn ko an, jej aikwij wõnmanlok wõt im kõmman bwe en lap ad itoklimo im lemnak wõt kin Ailiñ eo. Ran kein ej ran ko rebin, ak ewõr un ko rebin ibbed ñan ad tõmak bwe men eo jej jibadõke emol im ejelok jabdewõt men jemaroñ keidi ñan e—einlok wõt bõr eo ri wia eo ear loe. Makitkit ko ilo lal im kanan ko ilo Bible me emwij air jejjet kitieir rej letok kein kamol ko ralikar bwe jej bed ilo “jemlokin jukjuk im bed in.” (Matthew 24:3, NW) Einwõt ri wia eo, jen kwalok ad kijejeto kin aolepen buruõd kin Ailiñ in Anij im lañliñ kin jerammõn eo ñan keañ kin news eo emõn.—Sam 9:1, 2.
Kwoj Kememej ke?
• Iumin elõñ yiõ ko, ta eo ear kõmman bwe en wõr laplok ko ibwiljin ri kabuñ ro remol?
• Ta jitõb eo jej loe ibwiljin ro rej jerbal einwõt missionary?
• Ta oktak ko jet armij rar kõmmani kin tokjen news eo emõn kin Ailiñ eo?
• Ta point eo eaorõk jemaroñ katak jen parable eo an Jesus kin bõr eo elap wõnãn?
[Jaat ilo peij 25-28]
2004 REPORT IN YIÕ IN JERBAL EO AN RI KENNAN RO AN JEHOVAH IBELAKIN LAL
(Lale bok in)
[Pija eo ilo peij 23]
“Mol eo . . . ej kareel jabdewõt kain armij ro.”—A. H. Macmillan
[Pija eo ilo peij 24]
Daniela im Helmut rar kwalok nan ilo jikin eo im rar konono bar juõn kajin ilo Vienna
[Pija ko ilo peij 29]
Einwõt ri wia eo, missionary ro rainin elap air jerammõn
[Pija eo ilo peij 30]
“Ro drom rej mõnõnõ in lewoj ir mõke”