Etke Ejjabto Eñtan Otemjej Renaj Jemlok
“Ejman Eo, An jerbal e wãppen.”—DUTERONOMI 32:4.
1, 2. (a) Etke kwoj kaorõk kejatdikdik eo kin mour indio? (b) Ta eo ej bõpraik elõñ jen air tõmak ilo Anij eo ear kallimur kin elõñ men ko remõn kin ilju im jeklaj?
KWOKÕNAN ke lemnak kin mour ilo Paradise? Bõlen kwoj lo am itoitak im lale jikin ko ibelakin lal im katak kin oktak ko kwojjab maroñ in bwini kin men ko remour. Ak bõlen kwoj lemnak kin eñjake in juburu enaj walok ñe kwoj jerbal ibben ro jet ñan kejbãrok lal in im jibañ ukõte ñan juõn jikin kallip ibelakin lal. Ak kwomaroñ kalmenlokjen kin kabel ko kwomaroñ kaddeki ikijen jiña pija ko, jerbal in ekkal, kajañjañ, ak jibadbad ko jet me ejelok am ien rainin ñan jibadõki. Jekdon ta, kwoj kaorõk kejatdikdik eo ñan bõk mour eo Bible ej naetan “mour eo emol”—mour ilo wãwen eo Jehovah ear karõke bwe en eindein, ñan indio.—1 Timote 6:19.
2 Jemõnõnõ im watõke juõn jerammõn eaorõk ñan jaketo-jaketak kejatdikdik in me ej wawa ion Bible eo ibben ro jet. Bõtab, elõñ rej karmijeteik kain kejatdikdik rot in. Rej watõke einwõt juõn lemnak ejjab mol ak juõn ettõnak bajjek ñan armij ro ebidodo mone ir. Bareinwõt emaroñ bin air tõmak ilo juõn Anij me ej kallimur kin mour indio ilo juõn Paradise. Etke? Ñan jet, men eo ej kainebataik ir ej abañ eo kin nana. Rej tõmak bwe elañe ewõr juõn Anij im ekajur bõtata im yokwe, en kar ejelok nana im eñtan. Rej lemnak bwe juõn Anij eo ej kõtlok an walok nana ejjab maroñ mour—ak elañe emour, ejjab maroñ eo ekajur bõtata ak ejjab kea kake kij. Ñan jet, lemnak rot in ej men in kõmmanwa. Satan emol an kabel in kabiloik lemnak ko an armij.—2 Dri Korint 4:4.
3. Jenaj maroñ jibañ armij ro ñan lo uak eo ñan kajitõk et eo ebin, im etke jej bed ilo juõn wãwen ejej uan ñan kõmmane?
3 Einwõt Ri Kennan ro an Jehovah, jej bed ilo juõn wãwen ejej uan ñan jibañ armij ro me Satan im meletlet eo an lal in ear mone ir. (1 Dri Korint 1:20; 3:19) Jej lo taunin an elõñ jab tõmak ilo kallimur ko ilo Bible. Rejjab jelã kin Jehovah. Remaroñ jaje etan ak ewi aorõkin etan, im jidik wõt ak ejelok air jelã kin kadkad ko kadkadin ak maroñ eo an ñan kajejjet kitien kallimur ko an. Jej jerammõn bwe ewõr jelãlokjen rot in ibbed. Jen ien ñan ien, ewõr tokjen bwe jen lemnak kin ewi wãwen jemaroñ jibañ armij ro me “emarok ilo air lolãtãt” ñan lo uak eo ñan kajitõk eo ebintata uake, “Etke Anij ej kõtlok an wõr nana im eñtan?” (Dri Epesõs 4:18) Mokta jenaj etale ewi wãwen jemaroñ kõmman bedbedin lo juõn uak ekajuburu. Inem jenaj bwebwenato kin ewi wãwen kadkad ko kadkadin Jehovah rej alikar ilo wãwen eo ear jolok nana.
Bukõt Wãwen eo Ejimwe
4, 5. Ñe juõn armij ej bõkmantak kajitõk eo kin etke Anij ej kõtlok eñtan, ta eo jemaroñ aikwij kõmman mokta? Kamelele.
4 Ñe juõn armij ej kajitõk kin etke Anij ej kõtlok eñtan, ewi wãwen ad uak? Jemaroñ kõnan mõkaj im kameleleik ir ilo tibdikdik, jino jen ta eo ear walok ilo jikin kallip in Eden. Jet ien, wãwen in emaroñ emõn. Ak, jej aikwij kejbãrok. Jemaroñ aikwij kõmman bedbedin uak eo ad mokta. (Jabõn Kennan Ko 25:11; Dri Kolosse 4:6) Jen lemnak kin jilu point ko me jemaroñ kõmmani ñan jibañ juõn armij, mokta jen ad uake kajitõk eo.
5 Mokta, elañe armij eo elap an inebata kin nana ko ilo lal in, bõlen juõn men enana ear jelet e ak juõn eo ejitenburu ibben. Inem, emaroñ juõn men in meletlet ñan ad ijjino ilo ad kwalok tiriamo eo emol. Ri jilek Paul ear kakabilek Ri Christian ro: “Jõñ iben ro rej jõñ.” (Dri Rom 12:15) Ñe jej kwalok tiriamokake, men in emaroñ jelet buruen armij eo. (1 Piter 3:8) Elañe ej kile bwe jej yokwe e, enaj mõnõnõ in roñjake ta eo jekõnan ba.
6, 7. Etke ej juõn men ekkar ñan ad nebar juõn armij emol buruen eo ej bõkmantak juõn kajitõk kin juõn katak emũlal ilo Bible me ej kainebataik e?
6 Kein karuo, jemaroñ nebar armij in emol buruen kin an kar bõkmantak kajitõk in. Jet armij rej lemnak bwe kinke rej inebata kin kajitõk kein, ej kwalok bwe ejelok air tõmak ak rejjab kwalok air kautiej Anij. Bõlen juõn ri tel in kabuñ ear jiroñ ir kin men in. Bõtab, men in emaroñ jab eindein. Ilo mol, elõñ armij ro retiljek ilo ien ko etto ilo Bible rar bõkmantak kajitõk ko einlok wõt. Ñan wanjoñok, ri jeje sam David ear kajitõk: “O Jeova, etke Kwoj jutõk etolok? Etke Kwoj tilekek ilo ien iñtan ko?” (Sam Ko 10:1) Eindein, ri kanan Habakkuk ear kajitõk: “O Iroij, ewi toan aõ naj kir ñõn yuk kin jibañ ak kwoj jañin uak im lomoren kim jen jorrãn kein? Etke kwoj kõmmõn bwe in iion jorrãn kein rellab? Etke kwoj bed wõt im jab lali men kein rebwid? Jorrãn im ire rej kabol iõ. Buktak im iakwelel rej walok ijoko otemjej.”—Habakkuk 1:2, 3.
7 Armij rein rar ro retiljek im elap air kar kautiej Anij. Kar kauweik ir ke kin air bõkmantak kajitõk kein? Jab, Jehovah ear kõnan jeje kajitõk kein ilo Nan eo an. Rainin, juõn armij eo ej inebata kin an jededlok nana ilo mol emaroñ kwuli ilo kõkkar kin men ko lor jitõb—ej bukõt uak ko me Bible eo wõt emaroñ letoke. Kememej, Jesus ear nebar ro rar kile ak jelã bwe “rej aikwiji men ko an Jitõb.” (Matthew 5:3) Ej juõn jerammõn elap ñan ad jibañ armij rein ñan lo mõnõnõ eo me Jesus ear kallimur!
8. Ta katak ko rekabwokbwok rar tel armij ñan air tõmak bwe Anij ej bõk eddo eo kin eñtan, im ewi wãwen ad maroñ jibañ ir?
8 Kein kajilu, jemaroñ aikwij jibañ armij eo ñan lo bwe ejjab Anij eo ej bõk eddon nana ko rej jededlok ilo lal. Elõñ armij rar katak bwe Anij eo ej iroij ion lal in jej jokwe ie, bwe jen etto Anij ear bebe kin aolep men ko rej walok ñan kij, im bwe ewõr un ko jejjab melele kaki unin an kaeñtan armij. Katak kein rejjab mol. Rej katton etan Anij im kwalok bwe e eo ej bõk eddon nana im eñtan ko ilo lal. Inem jej aikwij kajerbal Nan eo an Anij ñan kajimwe lemnak kein. (2 Timote 3:16) Jehovah ejjab iroij in jukjuk im bed in enana; Satan Devil eo ej iroij eo. (1 Jon 5:19) Jehovah ejjab karõklok iman kin ta eo enaj walok ñan men in kõmanman ko an remeletlet; ej lelok ñan kajjojo maroñ eo im ien ko remõn ñan kãlet ikõtan emõn im nana, jimwe im bwid. (Duteronomi 30:19) Im Jehovah ejjab unjen nana; ej dike nana im ej ierki ro rej eñtan ilo jab jimwe.—Job 34:10; Jabõn Kennan Ko 6:16-19; 1 Piter 5:7.
9. Ta jet ian book ko “dri korijer e tiljek im meletlet” ear litoki ñan jibañ armij melele kin etke Jehovah Anij ej kõtlok an wõr eñtan?
9 Ñe emwij am kõmman bedbed rot in, kwomaroñ lo bwe eo ej roñjake enaj bojak in katak kin etke Anij ej kõtlok bwe eñtan en wõnmanlok wõt. Ñan jibañ yuk, “dri korijer e tiljek im meletlet” ear letok elõñ book in read ko rekeie. (Matu 24:45-47) Ñan wanjoñok, ilo “Bokake Anij” District Convention ilo 2005/6, juõn tract etan Ejjabto Eñtan Otemjej Renaj Jemlok! ear walok. Elañe ewõr tract in ilo kajin eo am, etke kwojjab readi bwe kwon jelã kobban? Eindein, ilo book eo What Does the Bible Really Teach? (Ta eo Bible Ej Lukkun Katakin?), kiõ emwij jeje ilo 157 kajin ko, ej kajerbal aolepen juõn chapter ñan jerbale kajitõk in eaorõk. Kwon kortokjen aolep kein read kein rekeie. Rej kamelele ilo alikar kin lajrak in men ko rar walok me Bible eo ej konono kaki, ko rar tellok ñan aitwerõk eo ilo Eden kin iroij bõtata eo im etke Jehovah ear jerbale aitwerõk eo ilo wãwen eo ear kõmmane. Kememej, bareinwõt, bwe ñe kwoj bwebwenato kin katak in, kwoj kwalok ñan eo ej roñjake kin jelãlokjen eo eaorõktata. Ej jelãlokjen eo kin Jehovah im kadkad ko remõn kadkadin.
Lale Kadkad ko Kadkadin Jehovah
10. Ta eo elõñ rej lo bwe ebin air melele kake kin an Anij kõtlok an wõr eñtan, im jelãlokjen et eo emaroñ jibañ ir?
10 Ñe kwoj jibañ armij ro ñan air melele kin etke Jehovah ear kõtlok bwe armij ren make iroij ioir iumin kilan Satan, kajeoñ in kareilok ir ñan kadkad ko remõn kadkadin Jehovah. Elõñ armij rej jelã bwe Anij ekajur; ekkã air roñ an armij ro jet naetan Anij Ekajur Bõtata. Bõtab, emaroñ bin air melele kin etke ejjab mõkaj an kajerbal kajur eo an elap ñan kabõjrak ekajet jab jimwe im eñtan ko. Bõlen rejjab melele kin kadkad ko jet kadkadin Jehovah, einwõt kwojarjar, ekajet jimwe, meletlet, im yokwe eo an. Jehovah ej kwalok kadkad kein ilo juõn wãwen ewãppen im jokkin wõt juõn. Bible eo ej ba: “An jerbal e wãppen.” (Duteronomi 32:4) Ewi wãwen kwomaroñ kalikar kadkad kein ñe kwoj uak kajitõk ko me ekkã air bõkmantak kaki kin men in? Jen lemnak kin jet wanjoñok ko.
11, 12. (a) Etke Jehovah ejamin kar jeorlok bwid eo an Adam im Eve ke rar jerawiwi? (b) Etke Jehovah ejamin kõtlok bwe jerawiwi en bed ñan indio?
11 Jehovah ear maroñ ke baj jeorlok wõt bwid ko an Adam im Eve? Ikijen ir, ear jab maroñ jeorlok air bwid. Einwõt armij ro rewãppen, Adam im Eve ilo jelã kake rar kãlet ñan air karmijete iroij bõtata eo an Jehovah im bõk tel eo an Satan. Ilo ejelok bwilõñ, ri jumae rein rar jab kwalok air buromõj im kõnan ukwelok. Bõtab, ñe armij rej kajitõk kin etke Jehovah ear jab jeorlok air bwid, ilo mol remaroñ lemnak kin etke Jehovah ear jab baj ukõt im kadiklok men in aikwij eo im kõtlok an bed jerawiwi im jumae. Uak eo ej kitibuj juõn kadkad me eaorõk ñan wãwen Jehovah—kwojarjar eo an.—Exodus 28:36; 39:30.
12 Elõñ buki alen Bible eo ej kalikar kin kwojarjar eo an Jehovah. Ak, ekaburomõjmõj bwe, eiet armij ro ilo lal in enana remelele kin kadkad in. Jehovah erreo, ekwojarjar, im jenolok jen jerawiwi ko otemjej. (Aiseia 6:3; 59:2) Ikijen jerawiwi, ear karõk ñan kabellok juõn ial ñan joloke, ak ejamin kõtlok an bed ñan indio. Elañe Jehovah ear mõnõnõ in kõtlok bwe jerawiwi en bed ñan indio, enaj kar ejelok juõn kejatdikdik ñan ilju im jeklaj. (Jabõn Kennan Ko 14:12) Ilo ien eo ear karõke, Jehovah enaj kõkãl aolep men in kõmanman eo an bwe ren kwojarjar. Jemaroñ liki bwe men in enaj walok, kinke ej ankil an Eo Ekwojarjar.
13, 14. Etke Jehovah ear kãlet bwe en jab kokkure ri jumae ro ilo Eden?
13 Jehovah ear maroñ ke baj mõn ri jumae ro ilo Eden im bar jinoe? Ear wõr an kajur ñan kõmmane men in; ejjabto enaj kajerbal kajur in ñan kokkure ri nana ro otemjej. ‘Etke,’ jet remaroñ lemnak, ‘ear jab kõmman eindein ke ear wõr jilu wõt ri jerawiwi ro iaolepen lañ im lal? Men in ejamin kar bõprae ke jerawiwi—im aolep buromõj ko jej loi ilo lal in—jen air jededlok?’ Etke Jehovah ear jab kãlet ñan an kõmmane men in? Duteronomi 32:4 ej ba: “Ial ko An otemjej re wãnik.” Jehovah elap an lemnak kin ekajet jimwe. Ilo mol, “Iroij ej yokwe jimwe.” (Psalm 37:28) Kin an yokwe ekajet jimwe, Jehovah ear jab kokkure ri jumae ro ilo Eden. Etke?
14 Jumae eo an Satan ear bõkmantak juõn kajitõk ikijen jimwe eo kin iroij bõtata eo an Anij. Ekajet jimwe eo an Jehovah ear aikwij bwe en uake aitwerõk in an Satan. Elañe ear mõkaj im kokkure ri jumae ro, meñe ear tellokin an kõmmane, ejamin kar letok juõn uak ejimwe. Men in enaj kar kamole kajur bõtata eo an Jehovah, ak ear jab men eo kar aitwerõk kake. Bareinwõt, Jehovah ear kwalok kin karõk eo an ñan Adam im Eve. Kar karõk bwe ren neje im kobrak lal, iroij ion, im en wõr air maroñ ion men in kõmanman ko ion lal. (Jenesis 1:28) Elañe Jehovah ear kokkure Adam im Eve, karõk eo ear kwalok kake ikijen armij renaj kar nan ko bajjek me ejelok tokjeir. Ekajet jimwe eo an Jehovah ejamin kar kõtlok bwe men in en walok, kinke ien otemjej ej jejjet kitien karõk eo an.—Aiseia 55:10, 11.
15, 16. Ñe armij rej kwalok “mejelan ko” jet kin aitwerõk eo kar walok ilo Eden, ewi wãwen ad maroñ jibañ ir?
15 Ewõr ke jabdewõt eo ilañ ak ilal me ear maroñ jerbale jumae eo ilo juõn wãwen elaplok an meletlet jen Jehovah? Jet armij remaroñ kwalok “mejelan” ko air make ñan jumae eo ilo Eden. Bõtab, ilo air kõmmane ej einwõt ñe rej ba bwe remaroñ lemnak kin wãwen ko remõnlok ñan kamadmõde aitwerõk eo. Remaroñ kõmman men in ejjab kin juõn un enana, ak ejelok ibbeir melele eo an Jehovah im meletlet eo an ekabwilõñlõñ. Ke ear jejelok ñan Ri Christian ro ilo Rome, ri jilek Paul ear mũlal an etale meletlet eo an Anij, ekoba “men eo etino” ikijen karõk eo an Jehovah ñan kajerbal Ailiñ in Messiah eo ñan lomoren armij ro retiljek im ñan kokwojarjar ãt eo Etan. Kar ewi lemnak eo an Paul kin meletlet eo an Anij eo ear kõmman karõk in? Ri jilek eo ear kajemlok letter eo an kin nan kein: “Ñõn Anij e wõt meletlet, kin Jisõs Kraist, ñõn E aibujuij in drio. Amen.”—Dri Rom 11:25; 16:25-27.
16 Paul ear melele bwe Jehovah “e wõt meletlet”—meletlet otem meletlet ilo lañ im lal. Wõn ian armij ro rejjab wãppen ear maroñ lemnak kin juõn wãwen emõnlok ñan kamadmõde jabdewõt abañ—elaptata ñan aitwerõk eo ebintata kar kõmmane ñan meletlet eo an Anij? Inem, jej aikwij jibañ armij ñan air bõk ejja kautiej eo wõt ewõr ibbed kin Anij eo “Ej meletlet ilo buruen.” (Job 9:4) Ñe emõnlok ad melele kin meletlet eo an Jehovah, enaj laplok ad liki bwe wãwen eo ej kamadmõde abañ ko ej wãwen eo emõntata.—Jabõn Kennan Ko 3:5, 6.
Kamolol kin Kadkad eo Elaptata an Jehovah
17. Ewi wãwen juõn melele elaplok kin yokwe eo an Jehovah emaroñ jibañ ro me rej inebata kin an Anij kõtlok eñtan?
17 “Bwe Anij yokwe.” (1 Jon 4:8) Kin nan kein, Bible eo ej kwalok kin kadkad eo elaptata kadkadin Jehovah. Ej kadkad eo elaptata an emejaja ian kadkad ko jet kadkadin im eo elaptata an kainemõn ro rej inebata kin an nana jededlok. Jehovah ear kwalok yokwe ilo aolep wãwen ko ear kajerbali ñan kamadmõde tokjen ko renana kin jerawiwi ion men in kõmanman ko an. Yokwe ear kamakit Jehovah ñan lelok juõn kejatdikdik ñan ro nejin Adam im Eve rejerawiwi. (Jenesis 3:15) Anij ear kõtlok bwe ren maroñ kebake ilo jar im ñan kajutak juõn kõtan ibben. Yokwe ear kamakit Anij ñan letok juõn binmour me enaj kabellok ial eo ñan air bõk jeorlok bwid kin jerawiwi ko air im bar bõk mour wãppen ñan indio. (Jon 3:16) Im yokwe ear kamakit e ñan an jerbal ilo meanwõd ibben armij, im lelok ñan ir elõñ ien ko remõn ñan air karmijeteik Satan im kãlet Jehovah einwõt Iroij Bõtata eo air.—2 Piter 3:9.
18. Ta melele eo jej jerammõn in bõke, im ta eo jenaj katak kake ilo katak in tok juõn?
18 Ke juõn ri tel in kabuñ ear konono ibben juõn jar in armij ro me rar kuktok ibben don ñan kememe ran eo terrorist ro (ro rej kõmman jorrãn ko ñan kamijak armij) rar kõmman juõn jorrãn elap, ear ba: “Kim jaje unin an Anij kõtlok nana im eñtan ñan air wõnmanlok.” Elap an kaburomõjmõj! Elap ad jerammõn bwe jemelele kin men in. (Duteronomi 29:29) Kinke Jehovah e meletlet, jimwe, im yokwe, jejelã bwe mõttan jidik enaj bõktok jemlokin eñtan otemjej. Ilo mol, ear kallimur bwe enaj kõmman men in. (Reveles̃õn 21:3, 4) Ak, ta kin aolep ro rar mij iumin elõñ buki yiõ ko? Wãwen eo Jehovah ear jerbale aitwerõk eo ilo Eden ear ke kõmman bwe en ejelok air kejatdikdik? Jaab. Yokwe ear kamakit e ñan lelok ñan ir juõn kejatdikdik bareinwõt, ikijen jerkakbiji eo. Eñin men eo jenaj katak kake ilo katak in tok juõn.
Ewi Wãwen Kwonaj Uak?
• Ta eo jemaroñ ba ñan juõn armij eo ej kajitõk kin etke Anij ej kõtlok eñtan?
• Ewi wãwen kwojarjar im ekajet jimwe eo an Jehovah rej alikar ilo wãwen eo ear jerbal ibben ri jumae ro ilo Eden?
• Etke jej aikwij jibañ armij ro ñan air bõk juõn melele elaplok kin yokwe eo an Jehovah?
[Pija eo ilo peij 12]
Bukõt ñan jibañ ro rej inebata kin eñtan ko ilo lal in
[Pija ko ilo peij 15]
Armij ro retiljek David im Habakkuk rar kajitõk ibben Anij kin kajitõk ko remol