Jokane ilo Jelãlokjen eo Ejimwe kin Anij
JET armij, rej leliñtak kajitõk ko rej kõmman abõnõnõ kin men eo Bible ej ba kake kin yokwe im tiriamokake eo an Anij. Rej kajitõk: Elañe Anij ej kõnan jolok nana, jelã wãwen kõmmane, im ewõr an kajur in kõmmane, etke nana ej etal wõt im laplok? Ñan jet abañ eo ej ñan lo mejelan jilu men ko me einwõt ejjab etaliir wõt juõn: (1) Anij ekajur ilo men otemjej; (2) Anij ej yokwe im emõn; im (3) men ko rej kõmman jorrãn rej etal wõt im walok. Un eo rej bõke ej bwe ke men eo kein kajilu eliktata rejjab maroñ kariap an mol, inem alikar juõn ian men ko ruo ejjab maroñ mol. Ñan ir, juõn wõt iair Anij ejjab maroñ kabõjrak nana ak ejjab lemnak kake.
Jejjo ran ko elikin jorrãn eo ilo World Trade Center eo ilo New York, juõn ri tel in kabuñ eo ebuñbuñ ilo United States ear ba: “Rar kajitõk ibba . . . buki alen ilo mour eo aõ kin etke Anij ej kõtlok an wõr jorrãn im eñtan. I ar aikwij kamol bwe I jab lukkun jelã tarlep in uak eo, meñe ñan kajju buruõ make.”
Ñan kwalok lemnak eo an ñan ennan in, juõn ri kabel in ekkatak kin kabuñ ear je bwe ear mõnõnõ kin “katak eo emõn kin kabuñ” ri tel in kabuñ in ear kwalok nan kake. E ar bareinwõt errã ibben lemnak eo an juõn ri kabel eo ear je: “Maroñ eo ejelok maroñ ie ñan melele kin eñtan ej mõttan maroñ in jab melele eo kin Anij.” Ak elukkun mol ke bwe ejelok maroñ ñan melele kin unin an Anij kõtlok nana?
Unjen Nana
Ilo keidi ibben men eo ri tel ro an kabuñ rej ba, Bible eo ejjab kwalok kin melim eo an Anij kin nana bwe einwõt ejelok maroñ in melele kake. Key point eo ilo melele kajitõk eo kin nana ej ñan kile bwe Jehovah ear jab kõmanman juõn lal enana. E ar kõmanman armij ro ruo moktata ilo wãppen, ilo ejelok jerawiwi. Jehovah ear reilok im lale jerbal in kõmanman ko an im ear lo bwe “re kanuij emõn.” (Jenesis 1:26, 31) Kar karõk eo an in ñan Adam im Eve ñan erakelok Paradise in Eden eo ilal bwe en debakbak im karmije kin armij ro remõnõnõ iumin kejbãrok in yokwe in kajur bõtata eo an.—Aiseia 45:18.
Nana ear ijjino ibben juõn enjel, meñe ilo jinoin ear tiljek ñan Anij, ear ejaake juõn kõnan ñan kabuñ ñane. (Jemes 1:14, 15) Jumae eo an ear alikar make ion lal ke ear kareel armij ro ruo moktata ñan kobalok ibben ilo jumae eo an nae Anij. Jen air kõttãik ir ñan nan in jiroñ eo ealikar an Anij bwe ren jab mõñã ak uñur leen wijki in jelã emõn im nana eo, Adam im Eve rar bõk mõttan im mõñã. (Jenesis 3:1-6) Air kõmman eindein, rar jab bokake wõt Anij ak rar bareinwõt kwalok bwe rar kõnan jenoloklok iair make jen e.
Juõn Menin Konono kin Mour Erreo Rar Leliñtak
Jumae in ilo Eden ear jarõk juõn menin konono kin mour erreo, juõn aitwerõk kin aorõkin ijoko ilañ im lal. Ri jumae ro rar bere ak kajitõk kin elañe Jehovah ear jimwe an jerbale an iroij ion menin kõmanman ko an. Ri Kõmanman eo ear wõr ke an jimwe ñan aikwiji likieo in bokake jen armij? Armij remaroñ ke kar emõnlok elañe rar makelok iair ilo kõmman?
Jehovah ear jerbale aitwerõk in kin an iroij ilo juõn wãwen eo ej kalikar wãppen eo an jokkin wõt juõn kin yokwe, ekajet jimwe, meletlet, im kajur. E maroñ kar kajerbal kajur eo an ñan mõkaj in kokkure jumae. Menin emaroñ kar einwõt ekajet jimwe, ke ear wõr an jimwe in kõmman eindein. Ak kõmman eindein ejamin kar uak kajitõk ko kin mour erreo ko rar leliñtak. Ilo wãwen eo juõn, Anij emaroñ kar jab baj lale wõt jerawiwi. Juõn ial eo einwõt in emaroñ kar ñan jet rainin einwõt juõn kãlet in yokwe. Ak, menin bareinwõt enaj kar likjap in uak nan eo an Satan bwe enaj kar emõnlok ñan an armij iroij ioir make. Bareinwõt, juõn ial eo einwõt in ejamin kar kõketak ro jet ke ñan air oktaklok jen ial eo an Jehovah? Tokjen enaj kar eñtan eo ejelok jemlokin.
Ilo meletlet eo an, Jehovah ear kõtlok an armij atartar ioir make iumin juõn ien. Meñe kar melelen menin kõtlok an nana bed iumin jidik ien, armij ear wõr ien emõn ibbeir ñan kwalok elañe remaroñ lo tõbrak ilo air iroij ñan ir make im jenoloklok jen Anij, mour ekkar ñan kien ko air make kin ta eo ejimwe im bwid. Ta tokjen eo ej walok? Bwebwenato in armij ej kalikar kadkadin kin tarinae, ekajet bwid, ijjibed im eñtan. Likjap eo eliktata in jumae eo nae Jehovah enaj kajemlok menin konono ko kar jarõk liñtak ilo Eden juõn alen im ñan indio.
Ilo kõtan in, Anij ear kalikar yokwe eo an ilo an letok Nejin, Jesus Christ, eo ear ajelok mour in armij eo an einwõt juõn katok in binmour. Menin ej kamaroñ armij ro rej bokake bwe ren anemkwoj jen lia in jerawiwi im mij eo ear walok jen jab bokake eo an Adam. Binmour eo ear kabellok ial eo ñan mour indio ñan ro otemjej rej jerbale air tõmak ilo Jesus.—Jon 3:16.
Ewõr ibbed kamol in jokane eo an Anij bwe an armij eñtan ej ñan jidik wõt ien. “Bwe jirik wõt ien, im eo enana e naj joko,” ri jeje sam ear je. “Kwo naj kalimjeke jikin im e naj ejelok. A ro ettã burueir re naj jolit ene eo, im re naj kalõñliñ ir mõke kin ainemõn elõñlok.”—Sam 37:10, 11.
Juõn Ilju in Jokane im Mõnõnõ
An jejjet kitien kanan ko ilo Bible ej kalikar bwe ien eo ñan an Anij bõktok juõn jemlok ñan nañinmij, buromõj, im mij ebak. Lale juõn men eo ekanuij emõn ej kwalok lok iman kin men ko rej itok kar lelok ñan ri jilek John ilo juõn men eo ej loe. E ar je: “Im I ar lo lõñ ekãl im lõl ekãl; bwe lõñ eo mokta im lõl eo mokta re joko; im lometo ejelok. . . . Im Anij e naj ber ibeir [armij]. Im E naj kõmõrãik jen mejeir dren in kemjãlãl otemjej, im e naj ejelok bar mij, im re jamin bar liãjlol, ak jõñ, ak iñtan; bwe men ko mokta re joko.” Ilo juõn ennan eo ej kalikar aorõkin liki kallimur kein, kar jiroñlok John: “Kwon jeje, bwe nan kein retiljek im remol.”—Reveles̃õn 21:1-5.
Ak ta kin billion armij ro ejelok rueir ro rar mij jen ien jumae eo ilo Eden? Jehovah ear kallimur bwe enaj bar kajeblaktok bwe ren mour armij ro rej kiõ kiki ilo mij. Ri jilek Paul ear ba: “Im ij kejatrikrik iõ ilo Anij . . . bwe ro remõn im ro renana re naj jerkakbiji.” (Jerbal 24:15) Rein enaj wõr ibbeir jerammõn eo kin mour ilo juõn lal eo “kwojarjar ej jokwe iloan.”—2 Piter 3:13.
Ejja einwõt juõn jemen eo ej yokwe enaj kõtlok ajiri eo nejin bwe en bõk juõn mwijmwij eo ekõmmetak elañe ejelã bwe enaj bõktok tokjen ko etto air bed, eindein Jehovah ear kõtlok an armij ion nana eo ej bed ion lal im ejjab aetok kitien. Ak, juõn jerammõn in men ko rej indio ej kõttar ro otemjej rej jibadõk air kõmanman ankilan Anij. Paul ear kamelele: “Bwe emwij kõtaik men in kõmõnmõn ñõn jekron, jab ilo an bebe, a kin Eo ej kõtaik e, ilo kejatrikrik bwe bareinwõt men in kõmõnmõn e naj mejõl jen kamokoko an wabõnbõn, ñõn iloan anemkwojan in aibujuij an ro nejin Anij.”—Dri Rom 8:20, 21.
Menin emol ej news emõn—ejjab kain eo jej loe ilo television ak read ilo newspaper ej news emõn. Ej news eo emõntata in news otemjej ej news eo jen “Anij in ainemõn otemjej,” eo ej lukkun kea kin kij.—2 Dri Korint 1:3.
[Pija ko ilo peij 6]
Ien ear kalikar bwe armij rejjab maroñ lo tõbrak ilo air iroij ñan ir make im jenoloklok jen Anij
[Etan eo ej kõmman]
Somalian family: UN PHOTO 159849/M. GRANT; atom bomb: USAF photo; concentration camp: U.S. National Archives photo