“Ro Emwij Kãlet Ir” Rej Emmakit Ñan News eo Emõn

“Ro emwij kãlet ir ñõn mour indrio rar oktak im tõmak.”​​—JERBAL 13:48.

1, 2. Ewi wãwen Ri Christian ro rar emmakit kin nan in kanan eo an Jesus bwe news eo emõn enaj kar jededlok ibelakin lal?

ILO book in Jerbal ilo Bible eo ej kwalok bwebwenato ko rekaitoktoklimo kin wãwen an Ri Christian ro emmakit ñan kanan eo an Jesus kin ewi wãwen jerbal in kwalok news eo emõn kin Ailiñ eo enaj kar walok ilo aolepen lal. (Matu 24:​14) Ri kwalok ro rekijejeto rar likit juõn joñok emõn ñan ro renaj lor ir tokelik. Kinke ri kalor ro an Jesus rar kwalok kijejeto ilo jerbal eo ilo Jerusalem, elõñ thousand armij ro, ekoba “elap jaran pris ro,” rar kobalok ibben congregation eo ilo ebeben eo kein kajuõn.​​—Jerbal 2:​41; 4:4; 6:7.

² Missionary ro ilo ebeben eo kein kajuõn rar jibañ elõñ armij ñan erom Ri Christian ro. Ñan wanjoñok, Philip, ear etal ñan Samaria, im elõñ armij ro ie rar mõnõnõ ñan roñjake ennan ko an. (Jerbal 8:​5-8) Paul ear lap an ito-itak ibben ro mõttan, ilo ien ear kwalok ennan eo an Christian ilo Cyprus, ilo jikin ko jet ilo Asia Minor, Macedonia, Greece, im Italy. Ekanuij lõñ Ri Jew im Ri Greek ro rar erom Ri Christian ilo bukwon ko ear kwalok nan ie. (Jerbal 14:1; 16:5; 17:4) Titus ear wõnmanlok im kwalok nan ilo Crete. (Taitõs 1:5) Peter ear boub ilo Babylon, im ilo ien eo ear jeje letter eo an kein kajuõn, ilo tarrin 62-​64 C.E., jerbal eo an Ri Christian ro ekar buñbuñ ilo Pontus, Galetia, Cappadocia, Asia, im Bithynia. (1 Pit. 1:1; 5:​13) Rar ien ko rekalañliñ! Ilo ebeben eo kein kajuõn joñan an lap an Ri Christian ro kijejeto ilo kwalok nan ri kijirãte ro air rar ba bwe “r’ar ukõje lõl.”​​—Jerbal 17:6; 28:22.

3. Ilo ran kein ad ta tokjen ko rej walok jen jerbal eo an ro rej kwalok nan kin Ailiñ eo, im ta eñjake eo am kin men in?

³ Bareinwõt ilo ran kein ad, congregation in Christian ko rar lo jerammõn kin wãwen rar lukkun lõñlok. Kwoj ke mõnõnõ ñe kwoj read lokbook eo an Ri Kennan ro an Jehovah im lo tõbrak ko rej walok ibelakin lal? Men in ej ke kamõnõnõik buruõm ñan jelã bwe ri keañ ro an Ailiñ eo ibelakin lal rar kõmman elõñlok jen jiljino million Bible study ko ilo jerbal in kwalok nan eo iloan yiõ eo 2007? Bareinwõt, oran ro rar bed ilo ien Kememe Mij eo an Christ ilo yiõ eo lok ej kwalok bwe elõñlok jen joñoul million armij ro me rejjab Ri Kennan ro an Jehovah rar itoklimo kin news eo emõn im bed ilo kwojkwoj in eaorõk. Men in ej kwalok bwe elõñ wõt jerbal ko jej aikwij kõmmani.

4. Wõn ro rej tõmak kin ennan in Ailiñ eo?

⁴ Rainin, einwõt ilo ebeben eo kein kajuõn, “ro emwij kãlet ir ñõn mour indrio” rej tõmak kin ennan in mol eo. (Jerbal 13:​48) Jehovah ej karuaklok armij rein ñan deloñ ilo dolul eo an. (Read Haggai 2:7.) Ta lemnak eo ej aikwij wõr ibbed kin jerbal in kwalok nan elañe jekõnan jerbal joñan wõt ad maroñ ñan aintok armij?

Kwalok Nan ilo Ejelok Kalijeklok

5. Kain armij rot Jehovah ej buñburuen kake?

⁵ Ri Christian ro ilo ebeben eo kein kajuõn rar melele bwe “Anij e jab lemnok kin okõtõn armij: A ilo ailiñ otemjej eo ej mijõk E, im jerbale kwojarjar, ej kabuñburuen.” (Jerbal 10:​34, 35) Meñe kõtan eo an juõn armij ibben Jehovah ej ebak ak jab ej wawa ion an jerbale tõmak eo an ilo katok in binmour eo an Jesus. (Jon 3:​16, 36) Bareinwõt, Jehovah e kõnan “lomoren armij otemjej, im bwe ren item jela mol.”​​—1 Timote 2:​3, 4.

6. Ri keañ ro kin Ailiñ eo rej aikwij kejbãrok ir jen ta, im etke?

⁶ Enaj juõn men ejjab jimwe elañe ri keañ ro kin news eo emõn rej ekajete armij ro ilo mõkaj kinke rej itok jen bar juõn ailiñ, eoktak baotokiir, kabuñ eo air, ak bar men ko me rej kajenolok ir jen armij ro jet. Lemnak mõk kin men in: Elap ke am kamolol armij eo me ear kwalok ñan kwe mol eo kin Bible eo ear jab kwalok kalijeklok? Inem, jen jab ãliklik ñan kwalok kin news eo emõn ñan jabdewõt ro rej mõnõnõ ñan roñjake kinke remaroñ bõk lomor.​​—Read Matu 7:​12.

7. Etke jej aikwij kejbãrok kij jen ad ekajete armij ro ilo jerbal in kwalok nan?

⁷ Jehovah ear kamelim Jesus bwe en jerbal einwõt Ri Ekajet Eo; inem, maroñ eo ñan ekajet ejjab bed ibbed. Men in ejimwe im ekkar, kinke jejjab einwõt Jesus. Ñe armij rej ekajete armij jej ekajete ekkar ñan ta eo jej ‘lo kin mejed’ ak ‘roñ kin lojilñid,’ bõtab ibben Jesus, ejelã ta men ko juõn armij ej lemnak kake im men ko rej bed ilo buruen.​​—Ais. 11:​1-5; 2 Tim. 4:1.

8, 9. (a) Mokta jen an kar Saul erom juõn Ri Christian kar kain armij rot e? (b) Ta eo jemaroñ katak jen bwebwenato eo an ri jilek Paul?

⁸ Armij ro jen enañin jabdewõt ailiñ reoktak jen don emwij air erom ri karejar ro an Jehovah. Juõn wanjoñok ekanuij emõn ej kin Saul jen Tarsus, eo ekar erom ri jilek Paul. Saul, juõn ri Pharisee, kar juõn ri jumae elej an Ri Christian ro. Ear make lemnak bwe rein rar jab mõttan ri kabuñ ro remol an Jehovah inem ear beek ñan matõrtõr congregation in Christian eo. (Dri Galetia 1:​13) Ekkar ñan lemnak eo an juõn armij, eban kõmman oktak ko ñan erom juõn Christian. Bõtab, Jesus ear lo emõn ilo buruen Saul im ear kãlet e bwe en kõmmane juõn jerbal ejej uan. Kin men in, Saul ear kobalok ibben congregation in Christian eo im elap an kwalok nan ilo kijejeto ilo jerbal in.

⁹ Ta eo bwebwenato eo an ri jilek Paul ej katakin kij kake? Ilo territory eo ad, bõlen ewõr ro me rej dike ennan eo jej kwalok kake. Meñe jemaroñ lemnak bwe reban oktak im erom juõn ian Ri Christian ro remol, jen jab ebwer ñan kwalok nan ibbeir. Jet ien ro me ilo jinoin jar lemnak reban mõnõnõ im roñjake ak tokelik rej kwalok itoklimo. Nan in jiroñ ej kwalok bwe jenaj aikwij wõnmanlok ilo ad katakin aolep im “jab mwij” ak bõjrak.​​—Read Jerbal 5:​42.

Jerammõn Ko Rej Bed Iman Ro “E Jab Mwij” Air Kwalok Nan

10. Etke jen jab ãliklik in katakin armij me rej einwõt kamijak? Kwalok bwebwenato ko jen bukwon eo am.

¹⁰ Men ko jej lo kin mejed remaroñ mone kij. Ñan wanjoñok, Ignacioa ear jino katak Bible eo ibben Ri Kennan ro an Jehovah ke ear bed wõt ilo juõn jikin kalbuj ilo Ailiñ in South America. Armij ro rar mijak e kinke elap an lej. Inem, ri kalbuj ro me rar kõmmane im wiakake men ko jet rar kajerbal Ignacio bwe en bõke muri an ri kalbuj ro mõttair rar rumij ñan kõllã. Bõtab, Ignacio ear kate wõt ñan katak Bible eo im jidik kin jidik ear wõnmanlok ilo jitõb im jerbale men ko ear katak kake. Kiõ, armij in me ear lukkun lej mokta ear oktak im erom juõn armij ejoij. Rej jab kajerbal e bwe en bõk muri ko an ri kalbuj ro jet, ak Ignacio ej juburu bwe mol jen Bible eo im jitõb an Anij ear jibañ e ñan ukõt an mour. Elap an kamolol kin ro rar katak Bible ibben im wãwen eo rar jab kwalok kalijeklok.

11. Etke jej kate kij ñan jeblak wõt ibben armij?

¹¹ Juõn unin jej kate kij ñan jeblak wõt ibben armij ro meñe emwij ad konono ibbeir ej kinke wãwen ko air im mwiliir remaroñ oktak im ilo mol renaj oktaklok. Jen ien lolok eo mokta, jet men ko emaroñ kar jelet ir einwõt juõn nañinmij elap, rar luji jerbal eo mokta, ak juõn jitenburu ibbeir ear mij. (Read Ekklisiastis 9:​11.) Abañ ko an lal remaroñ kamakit armij ro ñan lukkun lemnak kin ta ran ko rej bed imair. Kain men rot kein remaroñ kamakit juõn armij me kar ejelok an itoklimo mokta​​—ak bõlen ear jumae​​—ñan oktak im mõnõnõ in roñjake. Kin men in, jen jab ãliklik in kwalok nan kin news eo emõn ibben ro jet ilo jabdewõt ien emõn.

12. Ilo wãwen et jenaj aikwij watõk armij ro me jej kwalok nan ibbeir, im etke?

¹² Armij ro rej ekajet im kajenolok armij jen don ikijen biktokiir. Bõtab, Jehovah ej kalimjeki kajjojo armij. Ej kile jerbal ko an kajjojo im ej lo kadkad ko remõn kadkadiir. (Read 1 Samuel 16:7.) Ilo jerbal in kwalok nan eo ad, emõn bwe jen kõmman eindein. Elõñ bwebwenato ko rej kwalok bwe tokjen ko remõn renaj walok ñe jejjab ekajete armij ro me jej kwalok nan ibbeir.

13, 14. (a) Etke lemnak eo an juõn pioneer ear jab jimwe kin juõn kõrã ke ear wõnmaike ilo jerbal in kwalok nan? (b) Ta eo jemaroñ katak jen bwebwenato in?

¹³ Sandra, juõn sister im ej pioneer, ear kwalok nan jen em ñan em ilo enen Carribbean im ear wõnmae Ruth, eo me elap kunan ilo kwojkwoj ko rar naetan carnival. Ruo kõtan ear win jerammõn eo ñan leroij ilo ien kwojkwoj in carnival eo. Ear itoklimo kin men ko Sandra ear kwalok kake, inem rar karõk ñan katak Bible eo ibben don. Sandra ear ba: “Ke iar relõñ ilo mweo imõn Ruth iar lo juõn pija ekilep eo me ear kwalok e ilo ien ear kõnak nuknuk ko in carnival eo im ear jutak iturin trophy ko me ear wini. Iar bwid ilo aõ lemnak bwe juõn eo elukkun buñbuñ im elap kunan ilo carnival eo eban kwalok an itoklimo kake kin mol eo. Inem iar beek ñan bõjrak aõ lolok e.”

¹⁴ Tokelik, ilo juõn ran Ruth ear kwelok ilo Kingdom Hall eo, im ilo jemlokin kwelok eo, ear kajitõk ibben Sandra, “Ta unin kwar bõjrak ñan lotok im katak ibba?” Sandra ear jolok an bwid im ear karõk bwe en wõnmanlok ilo an katak ibben. Ruth elap an mõkaj im wõnmanlok ilo jitõb, ear bõk pija ko an ke ear bed ilo carnival eo im kakoni, ear jino im bõk kunan ilo makitkit ko an congregation, im ear wujleplok an mour ñan Jehovah. Ilo mol, Sandra ear kile bwe lemnak eo an make kin kõrã eo ear bwid.

15, 16. (a) Ta eo ear walok ibben juõn ri kwalok ke ear bõk ien ñan kwalok nan ibben juõn nukin? (b)  Etke wãwen mour eo an juõn nukid en jab aikwij kabwer kij jen ad kwalok nan ibben?

¹⁵ Ro rar bõk ien ñan kwalok nan ibben ro uan family eo air rejjab bed ilo tõmak rar bõk tokjen ko remõn, meñe ilo jinoin rar jab lukkun itoklimo. Ñan wanjoñok, jen lale bwebwenato eo kin Joyce, juõn jeid im jatid kõrã ilo United States. Leo jein ak jatin leo belen ear bed ilo kalbuj elõñ alen jen ke ear jodikdik. “Armij ro rar ba bwe ejelok tokjen mour eo an,” Joyce ear ba, “kinke ear bõk im wiakake uno in kadõk ko rekamõnõnõ, ear juõn ri kwot, im kõmman elõñ men ko jet renana. Meñe eindein, iar wõnmanlok im kwalok mol ko an Bible ibben iumin 37 yiõ ko.” Kin an kate wõt in jibañ nukin ear lo tõbrak ke ear jino katak Bible ibben Ri kennan ro an Jehovah im kõmman oktak ko ilo mour eo an. Jejjo ran ko rej kab motlok, ke ear 50 an yiõ, lein jein ak jatin leo belen ear baptais ilo juõn kwelok elap ilo California, U.S.A. Joyce ear ba: “Iar jañ ilo lañliñ. Elap aõ mõnõnõ bwe iar jab ebwer jen aõ jibañ e!”

¹⁶ Bõlen kwoj ãliklik ñan kwalok nan ibben ro nukõm kin mol ko jen Bible kin wãwen mour eo air. Bõtab, Joyce ear jab ãliklik ñan konono ibben leo jein ak jatin leo belen. Ilo mol, wõn iad ejelã buruen armij? Bõlen armij in elap an kõnan bukõt mol eo kin kabuñ. Kin men in, jab jenliklik jen am lelok ñan jabdewõt armij jerammõn eo ñan bukõt mol eo.​​—Read Jabõn Kennan Ko 3:​27.

Juõn Kein Katak Bible Ekeie

17, 18. (a) Ewi joñan aorõkin book eo Ta eo Bible ej Lukkun Katakin report ko ibelakin lal rej kwalok kaki? (b) Bwebwenato rot ko elap air kõketak emwij am loe ilo am kajerbal book in?

¹⁷ Report ko jen ibelakin lal rej kwalok bwe book in katak Bible eo Ta eo Bible ej Lukkun Katakin? ear kamakit elõñ armij ro emol burueir ilo juõn wãwen emõn. Penni, juõn sister eo ej pioneer ak kwalok nan full-time ilo United States, ear jino jet katak ko kin Bible ibben armij ro ilo an kajerbal book in. Ruo iair kar ibben ritto ro me mokta rar kijejeto ilo kabuñ eo air. Penni ear jaje kin ewi wãwen ren kar emmakit kin mol ko jen Bible eo ekkar ñan book eo Ta Eo Bible Ej Lukkun Katakin ej kamelele kake. Mekarta, ear je, “Kinke kamelele ko ilo book in elap air alikar, kwon im jejjet, elap air mõnõnõ ñan bõk katak ko rar katak kake, im rar jab makoko ak illu ñan bõke.”

¹⁸ Pat, juõn ri kwalok ilo Britain, ear jino katak Bible ibben juõn kõrã me ear aikwij im illok jen ailiñ eo an ilo Asia. Ke ri tarinae ro rar bõk leo belen im likao ro nejin, ear aikwij ko jen ailiñ eo im ear jab bar lor ir. Rar kalelñoñ e bwe en mij, rar kokkure mweo imõn ilo air tili, im juõn kumi in emaan ro rar kokkure e. Men kein aolep ear lukkun kaburomõjmõj e ñan lemnak bwe ejelok unin ñan mour manlok, ear lemnak ñan bõk mour eo an elõñ alen. Bõtab, an kar katak Bible eo, ear jibañ e ñan bõke juõn kejatdikdik. “Tubidodoin kamelele kin katak ko im wanjoñok ko ilo book eo Bible Eo Ej Katakin elap an jelet e,” Pat ear je. Ri katak eo ear mõkaj ilo an wõnmanlok ilo jitõb, ear tellokin ñan erom juõn ri kwalok ejañin baptais, im ear kwalok kõnan eo an ñan baptais ilo assembly eo ej itok. Elap an lañliñ ñan jibañ armij ro emol burueir ñan melele im kamolol kejatdikdik eo Jeje ko jen Bible eo ej letok!

“Jen Jab Mõk ilo Kõmõn Emõn”

19. Etke jerbal in kwalok nan ej juõn jerbal in kakaiuriur?

¹⁹ Ñe ej motlok kajjojo ran, elaplok an aorõk kien eo ad ñan kwalok nan im kõmõn ri kalor ro. Elõñ thousand armij ro rekõnan katak kin Jehovah im rej emmakit ñan jerbal in kwalok nan eo ad. Ak, “Ran eo elab an Iroij ebak,” melelen men in bwe ro rej bed wõt ilo marok kin men ko lor jitõb rej “ro re nañin joko.”​​—Zeph. 1:​14; Ken. 24:11.

20. Ta eo kij kajjojo jej aikwij beek ñan kõmmane?

²⁰ Ewõr ad maroñ ñan jibañ armij rein. Ak ñan kõmmane men kein, elap an aorõk ñan kajeoñe Ri Christian ro ilo ebeben eo kein kajuõn, me “e jab mwij air katakin im kwalok Jisõs bwe E dri Kraist.” (Jerbal 5:​42) Ilo ad lore wanjoñok eo air ikijen kijenmij eo meñe jej lo jumae, ikijen ad ekkõl ñan kabel in katakin, im ikijen ad kwalok nan ibben aolep armij im jab kalijeklok! “Jen jab mõk ilo kõmõn emõn,” kinke elañe jej kijenmij, jenaj maroñ bõke jerammõn ko rekanuij lap jen lañ.​​—2 Tim. 4:2; read Dri Galetia 6:9.

[Kamelele eo itulal]

Ewi Wãwen Kwonaj Uak?

• Wõn ro rej emmakit ñan news eo emõn?

• Etke jen jab ekajete ro jej kwalok nan ibbeir?

• Ta tokjen ko remõn rej walok jen book eo Ta eo Bible ej Lukkun Katakin?

[Pija ko ilo peij 13]

Elõñ thousand armij ro emol burueir rej emmakit

[Pija ko ilo peij 15]

Ta eo jemaroñ katak jen oktak ko me ri jilek Paul ear kõmmane?

[Pija eo ilo peij 16]

Ri keañ kin news eo emõn rejjab ekajete armij ilo ien lok iman