Juõn Tõmak Elõñ Armij Rej Tõmak Kake
“Elõñ alen iar ettõnak kin tõnak ko rekamijak kin aõ bwil ilo hell! Iar ettõnak bwe kar jolok iõ ilo juõn jikin eurur im iar ruj ilo aõ ellamijmij. Alikar, iar lukkun kate iõ bwe in jab jerawiwi.”—Arline.
KWOJ ke tõmak bwe hell ej jikin eo rej kaiñtan dri nana ro ie? Elõñ armij rej tõmak men in. Ñõn wanjoñok, ilo yiõ eo 2005 juõn dri meletlet ilo juõn University ilo Scotland ear lo bwe juõn mõtõn jilu in dri tel ro an kabuñ ilo Scotland rar tõmak bwe ro rejenolok jen Anij enaj iñtan “lemnok ko air ilo hell ñõn in drio.” Im juõn mõtõn lailim rar tõmak bwe ro rej ber ilo hell renaj iñtan ilo enbwin.
Ilo elõñ ailiñ ko, elõñ armij ro rej tõmak kin hell. Ñõn wanjoñok, ilo juõn ekkatak kar kõmõne ilo yiõ eo 2007 ilo Amerika, rar lo bwe enañin 70 bõjjããn in ro rar kajitõk ibeir rar tõmak kin hell. Ilo ailiñ ko me jarlepju in armij ro rejjab itoklimo kin kabuñ, rar bareinwõt tõmak kin hell. Juõn ekkatak kar kõmõne ilo Canada ilo yiõ 2004, rar lo bwe 42 bõjjããn in armij ro rar tõmak kin hell. Im ilo England, kar or 32 bõjjããn rar tõmak kin hell.
Ta eo Dri Tel in Kabuñ ko Rej Katakin Kake
Elõñ dri tel in kabuñ ko rar bwijrõk jen air katakin armij bwe hell ej juõn jikin eurur kin kijeek. Jen an eindrein, rar kwalok ejja melele eo wõt jen juõn buk an Kabuñ in Catholic (Catechism of the Catholic Church), me kar jeje ilo yiõ eo 1994. Buk in ej ba, “Kaje eo elaptata ilo hell ej jenolok eo in drio jen Anij.”
Meñe eindrein, elõñ rej tõmak wõt bwe hell ej juõn jikin kaiñtan lemnok im enbwinin armij. Ro rej kowõnmanlok katak in rej ba bwe katak in eor berberin ilo Baibel eo. Albert Mohler, eo ej tel jikuul in Kabuñ eo an Baptist, ej ba: “Eor kein kamol ilo Baibel kin katak in.”
Etke Men eo Kwoj Tõmak Kake Eaurõk?
Elañe emol bwe hell ej juõn jikin iñtan, inem kwon kar mijõk e. Bõtab, elañe katak in ejjab mol, inem dri tel ro an kabuñ ko me rej katakin armij kin katak in rej kabuk im kamijõk ir ilo ejelok tokjen. Rej bareinwõt kariõp Anij.
Ta eo Nan eo an Anij, Baibel eo, ej ba kin katak in? Katak kein tok renaj kajerbal ukok in Baibel ko jet ñõn uake kajitõk kein jilu: (1) Ta eo ej lukkun walok ñõn juõn armij ñe emij? (2) Ta eo Jisõs ear katakin kake kin hell? (3) Am katak mol eo kin hell, ewi wãwen an naj jelet yuk?