KAJJITÕK KO BAIBÕL̦ EJ UWAAKI

Ta eo ej kõm̦m̦an an elõñ armej tõmak bwe ewõr juon Rũkõm̦anm̦an?

Enañin 3,000 iiõ ko remootl̦o̦k, juon eo ear je bokin Sam ej ba: “Am̦ kõm̦anm̦an eõ men in lõl̦ño̦ñ im bwilõñ.” (Sam 139:14) Kwõnañin ke baj l̦õmn̦ak im bwilõñ kõn wãween an niñniñ ko ejaak ilowaan lo̦jien jineer? Aolep armej rej nõbar Rũkõm̦anm̦an eo kõn aolep menin kõm̦anm̦an ko an.​—Riit Sam 139:13-17, UBS; Hibru 3:4, UBS.

Rũkõm̦anm̦an eo ear kõm̦anm̦an ijoko otemjej ilõñ im ilal̦. Bareinwõt, ear kõm̦anm̦an men ko ilo lal̦ in im letok mour. (Sam 36:9, UBS) Em̦õj an kar kwal̦o̦k kajjien ñan armej ro.​—Riit Aiseia 45:18.

Jaar ke wal̦o̦k jãn menninmour ko?

Aolep wãween ko ilo ãnbwinnid ejjel̦o̦k oktak jãn menninmour ko. Unin an ãindein ej kõnke Rũkõm̦anm̦an eo ear kõm̦anm̦an armej im menninmour jim̦or bwe ren jokwe ilo lal̦ in. Ear kõm̦anm̦an armej eo m̦oktata jãn bwidej, im ejjab jãn menninmour.​—Riit Jenesis 1:24; 2:7, UBS.

Ewõr ruo wãween ko me armej im menninmour ko rej oktak jãn doon. Kein kajuon, armej ewõr aer maroñ ñan jel̦ã, kwal̦o̦k yokwe, im kautiej Rũkõm̦anm̦an eo. Kein karuo, menninmour ko rejjab maroñ mour ñan indeeo ak armej ro ewõr aer maroñ ñan mour indeeo. Bõtab, ejjab wal̦o̦k men in ilo raan kein. Armej rej rũttol̦o̦k im mej kõn wõt an kar em̦m̦aan eo m̦oktata jab pokake Rũkõm̦anm̦an eo.​—Riit Jenesis 1:27; 2:15-17.