Karejar ñan Jeova ilo “Raan ko Renana”

ERNEST, juon iaan ro jeid im jatid me 70 jim̦a an iiõ ej ba: “Elukkuun nanal̦o̦k wõt ãjmour e aõ.”a (Lale kõmel̦el̦e eo itulal̦.) Em̦õj ke am̦ ba ejja naan kein wõt? El̦aññe kwõj jino rũttol̦o̦k im eñjake am̦ m̦õjn̦o̦l̦o̦k, men in emaroñ kõm̦m̦an am l̦õmn̦ake kõmel̦el̦e ko ilo Ekklisiastis 12 jebta. Ilo eoon 1 ej ba bwe ilo am̦ rũttol̦o̦k im bwijwol̦ã ej ãinwõt ñe kwõj tõpar “raan ko renana.” Bõtab, ejjab mel̦el̦ein men in bwe kwõban lo m̦õn̦õn̦õ. Kwõmaroñ lo m̦õn̦õn̦õ ilo am̦ karejar wõt ñan Jeova meñe kwõlukkuun rũttol̦o̦k im bwijwol̦ãl̦o̦k.

KAKAJOOR WÕT TÕMAK EO AM̦

Kom̦ rũtto ro, keememej bwe ebar wõr ro jet rej iioon apañ ilo aer rũttol̦o̦k im bwijwol̦ãl̦o̦k. Rũkarejar ro an Jeova ilo iien ko etto rar iioon ejja wãween kein wõt kom̦ij iiooni. Ñan waanjoñak, Aisak, Jekob, im Ehaija rar pilo. (Jenesis 27:1; 48:10; 1 Kiiñ 14:4) Sera ear eñjake an rũttol̦o̦k im m̦õjn̦o̦l̦o̦k. (Jenesis 18:11, 12, UBS) Kiiñ Devid ear jaje “mããn̦ãn̦.” (1 Kiiñ 1:1) Rũm̦weiie eo etan Barzillai ear jako an nemaki m̦õñã ko im roñ ainikien kõjañjañ ko. (2 Samuel 19:32-35, UBS) Ebream im Naomi rar bũrom̦õj ke ear mej ro rejetaer.​—Jenesis 23:1, 2; Rut 1:3, 12.

Ta eo ear jipañ rein bwe ren tiljek wõt ñan Jeova im lo m̦õn̦õn̦õ? Ilo an kar Ebream rũttol̦o̦k ear jab bõjrak jãn an l̦õmn̦ak kõn kallim̦ur ko an Anij. Baibõl̦ ej ba bwe “an tõmak ear kobrake kõn kajoor.” (Rom 4:19, 20, UBS) Kõj bareinwõt ej aikuj kajoor wõt tõmak eo ad. An kajoor tõmak eo ad ejjab itok jãn joñan dettad, kapeel ko ad, im wãween ko jej iiooni. Ñan waanjoñak, meñe Jekob ear m̦õjn̦o̦, pilo, im pen an m̦akũtkũt, ak ear kwal̦o̦k wõt an tõmak ilo kallim̦ur ko an Anij. (Jenesis 48:1-4, 10; Hibru 11:21, UBS) Ewõr juon jeid im jatid me 93 an iiõ etan Ines, im ewõr juon an kain nañinmej me ejelõt m̦ajel̦ ko ilo ãnbwinnin. Meñe ãindein, ak ej ba: “Aolep raan ij lo an Jeova jipañ eõ. Im ij l̦õmn̦ak wõt kõn Pedetaij. Men in ej letok ñan eõ kõjatdikdik.” Elukkuun em̦m̦an wãween an lel̦l̦ap in l̦õmn̦ak!

Bwe en kajoor tõmak eo ad jej aikuj jar, katak Naanin Anij, im pãd ilo kweilo̦k ko. Meñe rũkanaan Daniel ear rũtto ak ear keini an jar jilu alen kajjojo raan im katak Naanin Anij. (Daniel 6:10; 9:2, UBS) Anna, lel̦l̦ap eo me ear mej l̦eo ippãn ear ‘jab ilo̦k jãn tampel̦ eo.’ (Luk 2:36, 37) Ñe kwõj pãd ilo kweilo̦k ko im kate eok ñan bõk kun̦aam ilo kweilo̦k kein, men in eban jipañ wõt eok ak enaaj bar jipañ aolep rukweilo̦k ro. Im aolep iien Jeova ej m̦õn̦õn̦õ kõn jar ko am̦, meñe edikl̦o̦k men ko kwõmaroñ kõm̦m̦ani kiiõ jãn kar m̦okta.​—Jabõn Kõnnaan 15:8.

Elõñ iaami ro me rej tiljek wõt ñan Anij bõlen kom̦ kõn̦aan bwe en em̦m̦an wõt ami loe men ko kom̦ij riiti im bwe kom̦win kajoor wõt ñan ami pãd ilo kweilo̦k ko. Bõtab, kwõj kiiõ kile ippam̦ make ke ej penl̦o̦k wõt, ak bõlen kiiõ elukkuun tab am̦ loe im kwõlukkuun m̦õjn̦o̦. Ta eo kwõmaroñ kõm̦m̦ane? Kortokjãn men ko me repel̦l̦o̦k ñan kwe. Elõñ ro me rejjab maroñ pãd ilo kweilo̦k ko rej roñjake kweilo̦k kein ilo aer kõjerbale talboon ko. Juon jeid im jatid me 79 an iiõ etan Inge ej kõpooje katak ko ñan kweilo̦k ko kõnke juon iaan em̦m̦aan ro ilo eklejia eo an ej bũriin an kaape im kakilepl̦o̦k jeje ko bwe en maroñ loe naan ko ie.

Bõlen ewõr juon men ippam̦ me ro jet rekõn̦aan bwe en wõr ippãer. Ta in? Ej iien. Kwõmaroñ kõjerbal iien ko am̦ ñan roñjake rekoot ko kõn Baibõl̦, bok ko ad, katak ko, im tieta ko. Bareinwõt, kwõmaroñ kõjerbal iien ko am̦ ñan ko̦o̦l̦e rũttõmak ro m̦õttam̦ im lel̦o̦k naanin rõjañ ñan er. Ilo wãween in, kom̦ij rõjañ im “jipañ doon.”—Rom 1:11, 12, UBS.

KIJEJETO WÕT ILO AM̦ JERBAL ÑAN ANIJ

Christa, eo me 80 jim̦a an iiõ ej bũrom̦õj ilo an ba naan kein: “El̦ap an nana ñe kwõj lo bwe edikl̦o̦k men ko kwõmaroñ kõm̦m̦ani jãn kar m̦okta.” Ewi wãween bwe juon eo erũtto en maroñ lo wõt m̦õn̦õn̦õ? Piter, juon l̦al̦l̦ap me 75 an iiõ ej ba: “Ej aikuj em̦m̦an wõt l̦õmn̦ak ko ad. Jen jab l̦õmn̦ak wõt kõn men ko me ejjel̦o̦k ad maroñ ñan kõm̦m̦ani ak jen l̦õmn̦ak kõn men ko me jemaroñ kõm̦m̦ani kiiõ.”

Kwõmaroñ ke l̦õmn̦ak kõn wãween ko me kwõmaroñ kõm̦m̦ani ñan kwal̦o̦k naan? Juon lel̦l̦ap etan Heidi, ejjab maroñ kwal̦o̦k naan jãn em̦ ñan em̦ ãinwõt kar m̦okta. Bõtab ke ear 80 jim̦a an iiõ, ear ekkatak kilen kõjerbal kampiutõr bwe en jeje lõta ko. Jet rũtto rej kwal̦o̦k naan ippãn ro jet ñe rej jijet ilo jea ko ilo park ko ak jikin kõttar baj ko. Ak ñe kwõj kiiõ pãd ilo m̦õko m̦õn ro rerũtto, kwõmaroñ kõm̦m̦an bwe en juon am̦ “teretore” ilo am̦ kwal̦o̦k naan ñan ro rej lale eok ak rũtto ro jet.

Ke Kiiñ Devid ear l̦al̦l̦ap, ear m̦õn̦õn̦õ wõt in rejetak kabuñ eo em̦ool. Ear lel̦o̦k m̦weiuk im kõbwebweien aer kalõk tampel̦ eo im karõke jerbalin ekkal eo. (1 Kronikel 28:11–29:5) Kwõmaroñ bar rejetake jerbalin kwal̦o̦k naan eo ipel̦aakin lal̦ in. Kwõmaroñ kõm̦m̦ane men in ilo am̦ rejetak bainier ro im rukwal̦o̦k naan ro rekijejeto ilo eklejia eo am̦. Kwõmaroñ rejetak er ilo am̦ rõjañ er, lel̦o̦k menin lel̦o̦k ko reddik, ak kũrwaj er ñan m̦weo im̦õm̦. Bareinwõt, ilo jar ko am̦ kwõmaroñ kitibuj ro reddik im baam̦le ko, ro rej kõm̦m̦ani jerbal ko ilo doulul in, ro renañinmej, im ro me el̦ap eddo ko aer.

El̦ap am̦ aorõk im jerbal ko kwõj kõm̦m̦ani rebar aorõk. Jemãdwõj ilañ eban mel̦o̦kl̦o̦k kom̦ rũtto ro. (Sam 71:9) El̦ap an Jeova yokwe im kaorõk eok. Ejjabto jãn kiiõ, jenaaj rũttol̦o̦k ak jeban bwijwol̦ã im iioon eñtaan im elõñ kain apañ ko. Enaaj l̦ap ad kajoor im em̦m̦an ãjmour ko ad. Bareinwõt, jenaaj karejar ñan Jeova Anij, eo el̦ap an yokwe ñan indeeo!

[Kõmel̦el̦e eo itulal̦]