KATAK KO KÕN TAITÕL̦IN BOK IN | WÕN REIN RI KÕNNAAN RO AN JEOVA?
Ta Tõmak ko an Ri Kõnnaan ro an Jeova?
Ri Kõnnaan ro an Jeova rej tõmak bwe “Jeje ko otemjej em̦õj letok kõn kakũrm̦ool an Anij, ej bareinwõt wõr tokjãer.” (2 Timote 3:16) Kõmij kõtl̦o̦k bwe Baibõl̦ en katakin kõm kõn Rũkõm̦anm̦an eo ad im en tõle wãween am mour.
Baibõl̦ ej ba: “Bwe ren jel̦ã bwe Kwe wõt, im etam̦ Jeova, Kwe eo eutiejtata ioon aolepen lal̦ in.” (Sam 83:18) Kõn men in, kõmij kabuñ im karejar wõt ñan Jeova Anij. Kõmij kate kõm ñan kwal̦o̦k kõn etan ñan armej ro ãinwõt ke kõm Ri Kõnnaan ro an.—Aiseia 43:10-12.
Kõnke Ri Kõnnaan ro an Jeova rej Kũrjin, kõmij tõmak bwe Jijej ej “Nejin Anij.”a (Lale kõmel̦el̦e eo itulal̦.) Jijej ear itok ñan lal̦ in im ear erom Messaia eo. (Jon 1:34, 41; 4:25, 26) Ãlikin an kar Jijej mej, ear jerkakpeje ñan lañ. (1 Korint 15:3, 4) Tokãlik ear erom Kiiñ in Aelõñ eo an Anij. (Revelesõn 11:15) Aelõñ in an Anij ej juon kien. M̦õttan jidik kien in enaaj kõm̦m̦an bwe lal̦ in en oktak im bar juon Pedetaij ãinwõt kar m̦okta. (Daniel 2:44) Baibõl̦ ej bar ba: “Ak ro rej ineem̦m̦an renaaj amn̦ak ilo ãneo im renaaj mour ilo aenõm̦m̦an.”—Sam 37:11, 29, UBS; Jabõn Kõnnaan 2:21.
“Ri Kõnnaan ro an Jeova rej tõmak bwe ñe rej riit Baibõl̦, ej ãinwõt ñe Anij ej kõnnaanl̦o̦k ñan er. Ñe ewõr apañ ilo mour ko aer, rej kappok wõt jipañ jãn Naanin Anij. . . . Rej tõmak bwe Naanin Anij emaroñ jipañ er ñan kõm̦adm̦õdi apañ ko aer.”—Juon iaan rũtõlin kabuñ eo an Katlik etan Benjamin Cherayath, ear ba naan kein ilo juon nuujpeba (Münsterländische Volkszeitung) an Jãmne
Kõmij tõmak bwe kien ko im naanin kakapilõk ko ilo Baibõl̦ remaroñ jipañ armej rainin. (Aiseia 48:17, 18) Innem, kõmij kate kõm ñan mour ekkar ñan ta ko Baibõl̦ ej ba. Ñan waanjoñak, Baibõl̦ ej kakkõl bwe jen kõjparok kõj jãn jabdewõt men emaroñ kattoon l̦õmn̦ak ko ad im ãnbwinnid. Eñin unin kõmij jab kõbaatat ak bõk uno ko rekkajjoor. (2 Korint 7:1, UBS) Bareinwõt, kõmij kate kõm ñan jab kõm̦m̦ani jabdewõt men ko rej n̦ae Baibõl̦, ãinwõt kadek, mour in l̦õñ, im ko̦o̦t.—1 Korint 6:9-11.
a Baibõl̦ ej bar ba bwe Jijej ej “make wõt Nejin Anij” kõnke Jeova make ear kõm̦anm̦an e im ear kõm̦anm̦an e m̦okta jãn men otemjej.—Jon 3:18, UBS; Kolosse 1:13-15, UBS.