Wãween eo Enaaj L̦ap an Jipañ Eok ñan Etale Tõmak eo Am̦

KWÕJ ke juon Kũrjin? El̦aññe aet, eokwe kwõj juon iaan armej ro im 2 bilien jim̦a oraer ilo lal̦ in me rej ba bwe er Kũrjin. Rainin, elõñ to̦ujin kabuñ ko rej ba er Kũrjin, bõtab rejjab bõrokuk kõn an okkõtaktak katak im tõmak ko aer jãn doon. Kõn men in, men ko kwõj tõmaki remaroñ lukkuun oktak jãn tõmak ko an Kũrjin ro jet. Eaorõk ke bwe kwõn etale men ko kwõj tõmaki? Aet. El̦aññe kokõn̦aan bwe men ko kwõj tõmaki ren ekkar ñan ta ko Baibõl̦ ej ba, eokwe kwõj aikuj etale men ko kwõj tõmaki.

Ro rar l̦oore Jijej Kũraij m̦okta rar n̦aetaer ‘Kũrjin.’ (Jerbal 11:26, UBS) Rar jab aikuj bar n̦aetaer kõn juon ãt kõnke ear wõr juon wõt kabuñ ilo tõre eo me rej bõk ãt in Kũrjin. Kũrjin ro rar bõrokuk im juon wõt ilo aer l̦oore katak im naanin tõl ko an eo ear ejaake kabuñ eo aer, Jijej Kũraij. Ak ta kõn kabuñ n̦e am̦? Kwõj ke tõmak bwe kabuñ n̦e am̦ ej katakin eok kõn ejja katak ko wõt an Kũraij, im men ko kwõj tõmaki rej ejja men ko wõt rũkal̦oor ro an Kũraij rar tõmaki? Ewi wãween bwe kwõn lukkuun jel̦ã men in? Wãween eo wõt emaroñ jipañ eok ñan jel̦ã ej ñe kwõj kõjerbale Baibõl̦ eo ñan etale men in.

L̦õmn̦ak m̦õk kõn men in: Jijej Kũraij ear lukkuun kaorõk Naanin Anij. Ear jab m̦õn̦õn̦õ ippãn ro rar kõjekdo̦o̦n ta ko Baibõl̦ ej ba ilo aer l̦oor katak im l̦õmn̦ak ko an armej. (Mark 7:9-13) Eñin unin jemaroñ ba bwe ro rej m̦oolin l̦oore Jijej rej pedpede tõmak ko aer ilo Baibõl̦. Innem, kajjojo Kũrjin ej aikuj kajjitõk ippãn make im ba, ‘Katak ko an kabuñ e aõ rej ke juon wõt ippãn ta ko Baibõl̦ ej ba?’ Bwe kwõn maroñ loe uwaakin kajjitõk in, kwõmaroñ keidi katak ko ilo kabuñ n̦e am̦ ippãn ta ko Baibõl̦ ej ba.

Jijej ear ba bwe jej aikuj kabuñ ñan Anij ilo m̦ool, im jemaroñ lo m̦ool eo jãn naan ko an Anij ilo Baibõl̦. (Jon 4:24; 17:17) Rijjilõk Paul ear ba bwe ad bõk lo̦mo̦o̦r ej wawa ioon ad “jel̦ã m̦ool” eo. (1 Timote 2:4) Kõn men in, elukkuun aorõk bwe men ko jej tõmaki ren m̦ool im pedped wõt ioon ta ko Baibõl̦ ej ba kõnke men in emaroñ lo̦mo̦o̦ren kõj!

WÃWEEN AD KEIDI MEN KO JEJ TÕMAKI IPPÃN BAIBÕL̦

Jouj im riiti kajjitõk kein tok 6 im lale ta uwaak ko jãn Baibõl̦. Lale eoon ko kar kwal̦o̦ki im kõl̦mãnl̦o̦kjen̦ kõn uwaak ko. Innem kajjitõk ippam̦ make, ‘Ta ko kabuñ eo aõ ej katakin eõ kaki, im ta ko Baibõl̦ ej ba?’

Kajjitõk kein remaroñ lukkuun jipañ eok bwe en pidodo am̦ etale men ko kwõj tõmaki. Kokõn̦aan ke keidi katak ko jet kabuñ eo am̦ ej katakin eok kaki ippãn ta ko Baibõl̦ ej ba? Ri Kõnnaan ro an Jeova renaaj m̦õn̦õn̦õ in jipañ eok ñan etale katak ko rem̦ool jãn Baibõl̦. Kwõmaroñ kajjitõk bwe juon iaan Ri Kõnnaan ro an Jeova en iwõj im katak Baibõl̦ ippam̦ ilo ejjel̦o̦k on̦ãn. Ñe ejjab, kwõmaroñ etal ñan weep jait eo am etan jw.org/mh.

1 KAJJITÕK: Wõn Anij?

UWAAK: Jeova, eo ej Jemãn Jijej. Jeova ej Anij eo ej jãn indeeo im ñan indeeo, e eo ekajoor bõtata im ear kõm̦anm̦an men otemjej.

EKKAR ÑAN BAIBÕL̦:

“Kõmij kam̦m̦oolol Anij Jemãn ad Irooj Jijej Kũraij, im iien otemjej kõm jar kõn kom̦.”—Kolosse 1:3.

“Kwe Jeova, aet, Kwe wõt. Kwaar kõm̦anm̦an lañ, lañ in lañ ko, im aolepen jar eo an, lal̦ im men ko ioon, lo̦meto ko im aolep ej ilo er, im Kwõj kõjparok er otemjej; im jarin lañ ej kabuñ ñan Kwe.”—Nihimaia 9:6.

Bar lale Joel 2:32; 1 Timote 1:17, UBS.

2 KAJJITÕK: Wõn Jijej Kũraij?

UWAAK: Jijej ej m̦aanje eo Nejin Anij. Ewõr jinoin Jijej kõnke Anij ear kõm̦anm̦ane. Jijej ej pokake im kõttãik e ñan Anij im ej kõm̦anm̦an ankilaan.

EKKAR ÑAN BAIBÕL̦:

“Ij ilo̦k ñan ippãn Jema, kõnke eutiejl̦o̦k jãn ña.”—Jon 14:28, UBS.

“Kũraij, eo jej loe, ej nemãmeen wõt Anij, eo jejjab maroñ in loe. Ej M̦aanjien, im eutiej jãn menin kõm̦anm̦an ko otemjej.”—Kolosse 1:15, UBS.

Bar lale Matu 26:39; 1 Korint 15:28.

3 KAJJITÕK: Ta in jetõb kwõjarjar?

UWAAK: Jetõb kwõjarjar ej kajoor eo an Anij me ej kõjerbale ñan kajejjet karõk ko an. Jetõb kwõjarjar ejjab juon anij. Juon armej emaroñ obrak kõn jetõb kwõjarjar im armej eo emaroñ lukkuun kajoor kõn an jetõb kwõjarjar pãd ippãn.

EKKAR ÑAN BAIBÕL̦:

“Ke Elisabet ej roñ yokyokwe an Meri, niñniñ ej bwijbwij ilo lo̦jien; im Elisabet ej obrak kõn Jetõb Kwõjarjar.”—Luk 1:41.

“Kom̦ naaj obrak kõn kajoor, ñe Jetõb kwõjarjar ej itok ioomi.”—Jerbal 1:8, UBS.

Bar lale Jenesis 1:2, UBS; Jerbal 2:1-4, UBS; 10:38, UBS.

4 KAJJITÕK: Ta in Aelõñ eo an Anij?

UWAAK: Aelõñ eo an Anij ej juon kien ilañ. Jijej ej Kiiñ eo ñan Aelõñ eo an Anij. M̦õttan jidik Aelõñ eo an Anij enaaj kõm̦m̦an bwe en jejjet ankilaan Anij ilo aolepen lal̦ in.

EKKAR ÑAN BAIBÕL̦:

“Enjel̦ kein ka jiljilimjuon ear jilel, im ewõr ainikien rel̦l̦ap ilo lañ rej ba, ‘Aelõñ an lal̦ em̦õj an erom aelõñ an am Irooj, im an Kũraij eo An, im Enaaj Kiiñ indeeo im indeeo!’”—Revelesõn 11:15.

Bar lale Daniel 2:44; Matu 6:9, 10.

5 KAJJITÕK: Aolep armej ro rem̦m̦an rej ke etal ñan lañ?

UWAAK: Ejjab. Eiiet oran armej ro rej etal ñan lañ. Kar n̦aetan rein, “bwij edik.” Im Anij eo ej kããlõt er bwe ren etal ñan lañ. Renaaj tõl ippãn Jijej ilañ im tõl armej ro ioon lal̦ in.

EKKAR ÑAN BAIBÕL̦:

“Bwij edik, kom̦win jab mijak; bwe ebuñbũruon Jememwõj kõn An lewaj aelõñ eo ñan kom̦.”—Luk 12:32.

“Renaaj bũrij an Anij im an Kũraij, im renaaj kiiñ Ippãn.”—Revelesõn 20:6.

Bar lale Revelesõn 14:1, 3.

6 KAJJITÕK: Ta karõk eo an Anij ñan armej im lal̦ in?

UWAAK: Ñe jenaaj mour ium̦win Aelõñ ak kien eo an Anij, lal̦ in enaaj oktak im juon pedetaij im armej ro rar tiljek ñan Anij renaaj mour indeeo ilo aenõm̦m̦an im enaaj em̦m̦an ãjmour ko aer kõnke renaaj weeppãn.

EKKAR ÑAN BAIBÕL̦:

“Ro ettã bũrueer renaaj jolõt ãne eo, im renaaj m̦õn̦õn̦õ kõn aenõm̦m̦an el̦ap.”—Sam 37:10, 11.

“Enaaj kõm̦õrãik jãn mejãer dãnnin kõmjaal̦al̦ otemjej, im enaaj ejjel̦o̦k bar mej, im rejãmin bar liaajlo̦l̦, ak jañ, ak eñtaan; bwe men ko m̦okta rejako.”—Revelesõn 21:3, 4.

Bar lale Jabõn Kõnnaan 2:21; 2 Piter 3:13.