Kalek Mour eo Am Ibelakin Jerbal eo an Jehovah
1 Jesus ear keidi ri roñjake ro an ñan ruo kain ri ekkal. Juõn ear kalek wãwen mour eo an ion bar in bokake Christ im ear maroñ jutak bin nae lañ in jumae im matõrtõr ko. Eo juõn ear ekkal ion bok in jab bokake ekibbon im ear jab maroñ jutak ke ijjibed ko rar itok. (Mat. 7:24-27) Kin ad mour ilo jemlokin jukjuk im bed in, jej iion elõñ kain lañ in jorrãn. Ilo kapin lañ kõdo ko rekilmej kin eñtan eo elap ej mõkaj air kuktok. Jenaj kijenmij ke ñan jemlokin ilo an bin wõt tõmak eo ad? (Mat. 24:3, 13, 21) Elõñ men ko rej wawa ion wãwen eo jej kalek mour ko ad kiõ. Kin men in, eaorõk bwe jen kajitõkin kij make, ‘Ej bin ke aõ ejaak mour in Christian eo aõ ibelakin jerbal eo an Anij?’
2 Ta melelen ñan ejaak mour ko ad ibelakin jerbal eo an Jehovah? Ej melelen bwe jej kõmman bwe Jehovah en iolaplapin mour ko ad. Ej kitibuj ad kalimjeklok Ailiñ eo einwõt men eo elaptata jej lemnak kake. Ekoba ad bokake Anij ilo aolep makitkit ko ilo mour ko ad ran otemjej. Ej aikwiji ad kate kij kin aolepen buruõd ilo ad katak Bible ibbed make, ibben family eo ad, im ilo congregation eo im ilo jerbal in kwalok nan eo ad, im kõmman bwe men kein ren moktata ilo mour ko ad. (Ekkl. 12:13; Mat. 6:33) Ial in bokake rot in ej walok ilo juõn tõmak ebin, eo ejamin buñ ñe ej jelmae lañ in jorrãn ko me remaroñ walok.
3 Jej mõnõnõ in lo elõñ million armij ro rej ejaake mour im kejatdikdik ko air kin ilju im jeklaj ibelakin jerbal eo ñan Anij, einwõt Jesus ear kõmmane. (Jon 4:34) Rej lor juõn schedule kin makitkit ko rej theocratic im tokjen men in rej lañliñ kin elõñ jerammõn ko. Juõn jinen ear kamelele kin ewi wãwen e im leo belen rar lo tõbrak in kibel ladik ro ruo nejin ñan karejar ñan Jehovah: “Kim ar kobrak mour ko am kin mol eo—etal ñan aolep convention ko, kebojak kin im bed ilo kwelok ko, im kõmman bwe jerbal in kwalok nan en mõttan mour eo am im kimij keini am kõmmane.” Leo belen ear kobaik: “Mol eo ejjab mõttan mour eo am, ej mour eo am. Aolep men ko jet rej kabole.” Kwar bareinwõt likit ke bwe jerbal eo an Jehovah en moktata ilo family eo am?
4 Kõmman juõn Schedule Ekeie ñan Week Otemjej: Dolul eo an Jehovah ej jibañ kij ñan lor juõn manit emõn kin men ko lor jitõb ilo an karõk lalem kwelok ko ilo juõn week. Christian ro me rej kalek mour ko air ibelakin kabuñ eo air ñan Jehovah rej karõk makitkit ko air ilo jikin jerbal im family eo ilo juõn wãwen bwe ren bed ilo aolep kwelok kein raorõk. Rejjab kõtlok bwe men ko edik tokjeir ren kautameik air keini air bed ilo kwelok ko.—Pil. 1:10; Hib. 10:25.
5 Christian ro re ritto ilo jitõb rej kile bwe einwõt ej aorõk ñan keini am mõñã kajjojo ran, eindein ej aorõk ñan kõmman karõk ko ñan katak ibbam make ak ibben family eo, ekoba kebojak ñan kwelok ko. (Mat. 4:4) Kwomaroñ ke kajenolok 15- ak 20-minute ko kajjojo ran ñan katak ibbam make? Key eo ej bwe kwon jab kõtlok bwe men ko jet ren kokkure ien eo kwar karõke ñan ien katak in. Kõmman bwe en juõn manit ewõr tokjen. Men in emaroñ aikwij bwe en mõkajlok am ruj ilo jibboñ jen kwoj iminene kake. 17,000 ro uan family in Bethel ibelakin lal rej ruj ilo jibboñtata bwe ren maroñ etale unin tel in ran eo. Emol, ñan mejinmour ilo jibboñ ej aikwij am kiki ilo mõkaj bwe en emõn am mour im ebwe am kar kakije ñe kwoj jino ran eo tok juõn.
6 Elañe kwoj bõran juõn family, kwon jino kõmman karõk kin makitkit ko rej theocratic ilo schedule eo an family eo. Jet family ko rej read Bible eo, Yearbook eo, ak bar juõn publication ibben don ñe rej kakije elikin air kejota. Elõñ ro jemen im jinen me rar lo ro nejiir rar rittolok im Christian ro rekajur ilo jitõb rar ba bwe juõn unin rar lo tõbrak ej kin kar manit eo an family eo ñan karõk juõn jota kajjojo week ñe rej lañliñ ilo air kõmman men ko rej kalek don ilo jitõb. Jemen juõn family ear ba: “Ij tõmak bwe eddeklok eo an ro nejim ilo jitõb kar walok kin am kar keini am katak einwõt juõn family ilo jotenin Wednesday, eo ear jino enañin 30 yiõ ko remotlok.” Aolep ro jilu nejin rar baptais ke rar dik wõt, im tokelik irjil aolep rar deloñ ilo jerbal in kwalok nan full-time. Ijellokin katak in family eo, remaroñ kamelmele ennan ko ñan kwalok nan ak katak ko air ilo kwelok ko im makitkit ko jet remõn rar maroñ lañliñ kaki ibben don.
7 Ilo schedule eo am kajjojo week, kwar ke “wiaik ien” ñan kwalok kin Ailiñ eo? (Kol. 4:5, NW) Enañin kij aolep eboub mour ko ad, ilo ad lale eddo ko an family eo im congregation eo. Elañe jejjab kõmman karõk ko rebin ñan bõk kunad ilo jerbal in kwalok nan im katakin ilo kajjojo week, enaj bidodo an men ko jet bõk ien jen jerbal in eaorõk. Juõn emaan ewõr juõn an jikin cow ekilep ear ba: “Turin lok 1944 iar kile bwe wãwen eo wõt inaj maroñ kwalok nan kar bwe in karõk juõn ran bwe in kõmmane. Ñan rainin ij bõk juõn ran ilo juõn week ñan kwalok nan.” Juõn Ri Christian elder eo ear lo bwe an wõr juõn schedule ñan kwalok nan ear kamaroñ e ñan kajerbal 15 awa ko ilo juõn alliñ ilo jerbal in kwalok nan. Elañe kar wõr jabdewõt jerbal ilo business eo an ilo Saturday ear karõki ñan elikin jerbal in kwalok nan eo an ilo jibboñ.“ Kwe im family eo am kom maroñ ke karõk juõn ran ilo kajjojo week ñan kwalok nan, im kõmman bwe en mõttan ial in mour eo am ilo jitõb?—Pil. 3:16.
8 Etale Mantin Mour eo Am: Ewõr men ko rej jumae ad kalek mour eo ad ibelakin jerbal eo an Jehovah. Men ko rej jidimkij air walok remaroñ kokkure karõk ko ad ñan katak, bed ilo kwelok, im kwalok nan. Im Ri Kijirãt eo ad, Satan, enaj kõmman joñan wõt an maroñ ñan “boprae [kij]” im kokkure karõk ko ad. (1 Tes. 2:18; Ep. 6:12, 13) Jab kõtlok bwe men in jumae kein ren kabwer yuk. Kõmman jabdewõt kajimwe ko kwoj aikwiji ñan kajejjet jerbal eo ej theocratic kwar karõke. Bebe eo ebin im kate rej men in aikwij ñan kõtõbrak men eo ewõr tokjen.
9 Jen jab kõtlok bwe kilan ko an lal in im kanniekid ejjab wãppen ren kadeloñ makitkit ko rejjab men ko lor jitõb me emaroñ kañ elõñ ien ko ad. Jej aikwij etale kij make, ilo ad kajerbal kajitõk ko einwõt: ‘Ial in mour eo aõ jidik kin jidik ear jako an jokkin wõt juõn ke ak iar kõtlok ke bwe men ko jet ren kamad iõ? Iar jino ke in kalek mour eo aõ ibelakin men ko an lal in me renaj jakolok? (1 Jon 2:15-17) Jete awa ko ij kajerbali kin kõnan ko aõ make, ito-itak, makitkit ko kin ikkure, ak men in kamõnõnõ ko jet—ekoba aluij television ak lale Internet eo—ñe keidi ibben ien eo ij kajerbali ilo makitkit ko ilo jitõb?’
10 Elañe kwoj kile bwe mour eo am ear mad kin elõñlok makitkit ko rejjab men in aikwij, ta eo kwon kõmmane? Einwõt Paul ear jar bwe ro jein im jatin ren “wãppenlok,” etke kwojjab jar ñan Jehovah kin jibañ ñan bar karol am mour ñan am kõmanmõn jerbal ko an? (2 Kor. 13:9, 11,) Inem kate yuk ñan kajejjet bebe eo am im kõmman kajimwe ko rej men in aikwij. (1 Kor. 9:26, 27) Jehovah enaj jibañ yuk ñan bõprae am jeor ñan tuanbwijmaroñ ak tuanmiñ ilo am jerbal ñan e ilo bokake.—Keidi Aiseia 30:20, 21.
11 Kwon Boub Wõt ilo Jerbal eo Ekalañliñ an Anij: Elõñ million armij ilo ikdeelel rej jibadõk mõnõnõ ak rej lo bwe ñe mour eo air ej ebak ñan an jemlok, mweiuk ko rar kijerjer in jibadõki rar jab bõktok ñan ir mõnõnõ eo ej indio. Ear einwõt “kañ kõto.” (Ekkl. 2:11) Ijo turãjet, elañe mour ko ad rej keolaplape Jehovah, ilo ad ‘likit Jeova [imad],’ jenaj lo juburu emol. (Sam 16:8, 11) Men in ej eindein kinke Jehovah ej unjen mour eo ad. (Rev. 4:11) Elañe ejako Ri Kõmman Karõk eo Elaptata, ejelok melelen mour. Karejar ñan Jehovah ej kobrak mour ko ad kin makitkit ko ewõr tokjeir im rekeie me ej bõktok jerammõn ko ñan kij im ro jet bareinwõt ilo juõn wãwen ej indio.
12 Eaorõk bwe en jab le jen joñan ad juburu kin tõbrak ko ad make im bwe en jako eñjake in ekaiuriur eo ad kin jemlokin lal eo an Satan eo ej ebaktok. Lemnak eo ad kin ilju im jeklaj ej jelet mour eo ad jen ran-ñan-ran. Armij ro ilo ran ko an Noah, ro rar jab tõmak bwe enaj kar itok juõn ibwijleplep me enaj jelet belakin lal, “rar jab jelã,” im rar keolaplap mour ko air ion jibadbad ko air make—mõñã, idak, im belele—mae ien ear itok ibwijleplep eo im “bõklok ir otemjej.” (Mat. 24:37-39) Rainin, ro rej keolaplap mour ko air ion lal in renaj lo kejatdikdik ko air kin ilju im jeklaj madeoñeoñ imair ilo jeebeplok eo elaptata me armij rej kab naj loe, “ran eo an Jehovah.”—2 Pet. 3:10-12, New World Translation.
13 Inem, etal wõt im kalek mour eo am ibelakin Anij eo emour, Jehovah, im kõmanmõn ankil an. Ejelok juõn jibadbad kwo maroñ kõmmane ilo mour in me ewõr juõn Eo ej jutak ilikin etiljek einwõt Jehovah. Ejjab maroñ riap—enaj mol ñan kallimur ko an. (Taitõs 1:2) Ejjab maroñ mij—ejelok juõn men jej likit ibben Jehovah enaj jako. (Hab. 1:12, NW; 2 Tim. 1:12) Mour in bokake im tõmak eo jej kaleke kiõ ej jinoin wõt juõn mour me enaj bed ñan indio ilo jerbal eo ekalañliñ an Anij eo ad emõnõnõ!—1 Tim. 1:11; 6:19.
[Naan ko ilo peij 3]
“Mol eo ejjab mõttan mour eo am, ej mour eo am. Jabdewõt men ko jet rej kabole.”