Ta eo Kwonaj Ba ñan Juõn Ri Muslim?
1 Kwo nañin kwalok ke nan ñan juõn Ri Muslim? Elañe aet, kwomaroñ kar lo bwe Ri Muslim ro elap air tõmak ilo Anij. Bõtab, jidik wõt air jelã kin Paradise eo ion lal me ri kanan ro an Jehovah rar kanan kake, im je kõnan jaketo-jaketak kejatdikdik in ibbeir. (1 Tim. 2:3, 4) Kamelele in tok enaj jibañ yuk ñan kwalok nan ilo emõn.
2 Ri Muslim ro rej tõmak ilo Allah, ak Anij, im rej tõmak bwe Muḥammad ej ri kanan eo an Anij. Book eo air ekwojarjar ej Koran eo, im etan kabuñ eo air ej Islam, eo ej melelen “kõttã.” Koran eo ej ba bwe riap im kabuñ ñan ekjap rej men ko rebwid, bwe ewõr juõn wõt Anij, im bwe Anij ejjab mõttan juõn Trinity. Bareinwõt, ej katakin bwe aan eban mij, hell einwõt juõn jikin kijeek, im juõn paradise ilañ. Ri Muslim ro rej tõmak bwe Bible eo ej Nan in Anij ak rej tõmak bwe ear oktak, ke Koran, eo ej bedwõt ilo kajin eo jinoin, rar jab kattone.
3 Kwalok Joij, Jelã Kilen, im Lolokjen: Ñe kwoj bwebwenato ibben juõn Ri Muslim, kwalok joij im jelã kilen. (Ken. 25:15) Kememej bwe ebin okran katak ko an Ri Muslim im elõñ iair kar katak kaki ilo air elijinmen i. Kin men in, kõmmanwa kin katak ko an kabuñ im kamol ñan ir make kin ta eo ej ankil an Anij ear jab mõttan eddeklok eo air ilo jitõb. (Rom 12:2) Ñan jibañ Ri Muslim ro, eaorõk bwe jen kwalok inemõn im lolokjen.—1 Kor. 9:19-23.
4 Jab kajerbal nan ko me enaj kõmman bwe Ri Muslim ro ren kobaik yuk ibben Christendom. Kalikar bwe kwojjab mõttan kabuñ ko an Catholic ak Protestant, bwe kwoj oktak. Jitõñlok ñan Bible eo einwõt Book an Anij. Kinke Ri Muslim ro rej dike nan eo “Nejin Anij,” emõnlok am jab kajerbale ak bwebwenato kin katak in mae ien ej kõmman wõnmanlok ilo jitõb. Bõtab, kwomaroñ konono kin Jesus, im jitõñlok ñan e einwõt juõn ri kanan ak ri keañ. Jab akwel. Elañe kwoj lo bwe ej jino illu, ilo juõn wãwen ej kwalok kautiej kwon ilok.
5 Emõnlok kwon konono ibben juõn wõt armij im jab ibben juõn kumi. Enañin aolep ien, emõnlok elañe kõrã ro rej kwalok ñan kõrã, im emaan ñan emaan. Alikar, emaroñ wõr oktak, ak kwoj aikwij kajerbal lolokjen. Bareinwõt, elõñ Ri Muslim ebidodo air lõkatip kin ta eo rej watõk einwõt ejõkkar ikijen nuknuk im baotokin kõrã ro. Sister ro rej aikwij kejbãrok ikijen men in.—1 Kor. 10:31-33.
6 Men ko Kwomaroñ Konono Kaki: Konono kin aibujuij eo an Anij im yokwe eo an. Jab abwin ba bwe kwoj juõn ri tõmak emol, bwe Anij ej juõn wõt (jab mõttan juõn Trinity), im bwe ebwid kabuñ ñan ekjap ko. Konono kin nana ko ilo lal in rainin—tarinae ko, armij ro ilo juõn ailiñ rej jumaik don, kalijeklok, im jelã mon eo ej alikar ibwiljin armij ro rekijejeto ilo kabuñ.
7 Brochure eo The Guidance of God—Our Way to Paradise (Tel eo an Anij—Ial eo Ad ñan Paradise) enaj lewõj melele eo elaplok kin kain katak rot kwomaroñ kajerbali ñan bwebwenato ibben Ri Muslim ro. Kar eiki ñan an emõn ibben Ri Muslim ro me rej jokwe ilo juõn jikin ijo remaroñ anemkwoj in katak Bible.
8 Einwõt juõn ennan, kwomaroñ ba:
◼ “Ij kate iõ ñan konono ibben Ri Muslim ro. Iar readi jet men ko kin kabuñ eo am im tõmak bwe ij jimwe in ba bwe Ri Muslim ro rej tõmak ilo juõn wõt Anij emol im ilo aolep ri kanan ro. [Kõtlok an uak.] I kõnan bwebwenato ibbam kin juõn kanan me ear konono kin oktak eo an lal in ñan juõn paradise. I maroñ ke read wõj kin ta eo ri kanan eo ear je? [Konono Aiseia 11:6-9.] Kanan in ej kakememej iõ kin nan ko rar eliji jen Koran eo me jemaroñ loi ilo brochure in.” Eliklok ñan peij 9 ilo Guidance of God brochure eo, im konono nan in elij ko ilo jeje meej ko, im ej konono kin ro rewãnik me renaj jolet lal. Elañe rej kwalok air itoklimo, wõnmanlok ilo am etale paragraph 7 ñan 9 ilo peij eo juõn. Door brochure eo, im karõk ñan bar jeblak.—Kin bar juõn ennan, lale February 1998 Ad Jerbal Ñan Ailiñ Eo, peij 6, paragraph 27.
9 Ñe kwoj kir juõn armij ñan etale Guidance of God brochure eo, emõnlok kwon ba bwe ej juõn bwebwenato, jab juõn katak kin Bible. Ñe ededelok am etale brochure eo, ri katak eo emaroñ bojak ñan katak Jen Kõmmõne brochure eo ak book in Knowledge. Book ko jet me rej jejjet ñan Ri Muslim ro rej tract eo How to Find the Road to Paradise im booklet eo The Time for True Submission to God.
10 Kin jelãlokjen in kin tõmak ko im men ko remaroñ lõkatipi Ri Islam ro, jemaroñ kwalok lolokjen ilo book ko jej kãleti ñan lelok ñan Ri Muslim ro im ilo wãwen eo jej kwalok nan ñan ir. Jej kejatdikdik bwe Jehovah enaj wõnmanlok im kajerammõn jibadbad ko ad ñan jibañ armij otemjej bwe ren kir etan im bõk lomor.—Jerbal 2:21.