Kajerbal Makitkit ko ilo Ran Kein ñan Kaitoklimoen Armij
1 Kwo kõnan ke juõn lajrak in lemnak ko remõn eo ejamin maat me enaj kõmman bwe jerbal in kwalok nan eo am en kãl wõt im kaitoklimoen armij ilo ennan eo ilo Bible? Inem kajerbal ta eo ej walok ilo lal in im ilo bukwon eo am ñan ijjino bwebwenato ko. Kwomaroñ bõk ennan jen makitkit ko ilo bukwon eo im ailiñ eo ak news ko jen belakin lal. Men kein rej oktaktak. (1 Kor. 7:31) Lemnak kin wanjoñok ko tok.
2 Abañ ko ikijen economy im wõnãn mour rej lukkun inebata ko an armij. Kin men in, kwomaroñ ba:
◼ “Kwar roñ ke ilo news bwe wõnãn [kwalok men eo] ej bar laplok?” Ak kwomaroñ konono kin an jabwe job ko elañe juõn company elap ear jolok elõñ ri jerbal ro. Ekkar ñan ewi wãwen kwo kõnan wõnmanlok ilo bwebwenato eo, kwomaroñ kajitõk “Kwo nañin lemnak ke kin etke ebin kabwe aikwij ko an mour?” ak “Kwoj lemnak ke bwe enaj bin ien otemjej ñan kabwe aikwij ko an mour?”
3 Report ko kin kowadoñ, einlok wõt jorrãn ko rej walok ilo family ko ak ibwiljin ri school ro, rej letok bar juõn bedbed in bwebwenato. Kwomaroñ kajitõk:
◼ “Kwar read ke ilo newspaper bwe [kwalok jorrãn eo ear walok ilo bukwon eo]?” Inem kajitõk “Ta eo kwoj lemnak ej unjen kowadoñ ilo lal in?” ak “Kwoj lemnak ke bwe enaj wõr juõn ien ñe jemaroñ jokane?”
4 News ko kin ibwijleplep ko, makitkit lal ko, ak tarinae ko ibwiljin armij ro iloan wõt juõn ailiñ ilo kajjojo mõttan ko ilo lal in rej bareinwõt letok men ko jemaroñ bwebwenato kaki me rej kaitoktoklimo. Ñan wanjoñok, kwomaroñ kajitõk:
◼ “Anij ej bõk eddon ke [kwalok kin jorrãn eo]?” Ak kwomaroñ jitõñlok ñan tarinae eo ej kab walok ilo juõn ailiñ im ba: “Elañe aolep armij rekõnan lo ainemõn, etke ebin kõtõbrake?”
5 Kwon lemnak wõt kin makitkit ko rej walok me kwomaroñ kajerbali ilo nan in jino eo am. Kwomaroñ lo nan in rejañ ko iumin katak eo “Current Events (Makitkit ko ilo Ran Kein),” ilo peij 10-11, ilo Reasoning (Kõmmanwa) book eo. Bõtab, bõprae am jeb ilo aitwerõk ko in politic ak social (jukjuk im bed in armij). Jen men in, kareilok armij ñan Jeje Ko im Kien eo an Anij einwõt mejelan eo wõt ñan abañ ko an armij.