Keañ kin Ennan in Ailiñ eo
1 “In kwalok nan emõn an ailiñ in Anij ñõn jikin kwelok ko jet; bwe ar jilkintok Iõ kin men in.” (Luk 4:43) Kin nan kein, Jesus ear kwalok kin unin tel in jerbal in kwalok nan eo an—Ailiñ in Anij. Ennan eo jej keañ kake rainin ej bareinwõt keolaplape Ailiñ eo, einwõt kar kanan kake ilo Matu 24:14: “Im naj kwalok gospel in an ailiñ in lõñ i aolepen lõl kin men in kennan ñõn ailiñ otemjelok: ilo ien eo e naj itok jemlokõn.” Ta mol ko kin Ailiñ in Anij armij rej aikwij roñjake?
2 Ailiñ in Anij ej iroij kiõ jen lañ ko im ejjabto enaj bõk jikin aolep iroij in armij. Emwij jolok Devil eo jen lañ, im jukjuk im bed in kiõ enana ear deloñ ilo ran ko eliktata. (Rev. 12:10, 12) Jukjuk im bed eo enana an Satan enaj jeebeplok, ak Ailiñ in Anij ejamin makitkit. Enaj bed ñan indio.—Dan. 2:44, New World Translation; Hib. 12:28.
3 Ailiñ eo enaj kamaat kõnan ko remõn an armij otemjej rekiblie. Enaj jolok eñtan eo ej itok jen tarinae, kowadoñ, ijjibed ko, im jeramel. (Sam 46:8, 9; 72:12-14) Juõn buñ pelok in mõñã ko renaj bellok ñan aolep. (Sam 72:16; Ais. 25:6) Nañinmij im jipikpik ko an enbwin renaj men ko an ien ko remotlok. (Ais. 33:24; 35:5, 6) Ke armij ro rej wãppenlok, lal in enaj oktak ñan juõn paradise, im armij ro renaj jokwe ibben don ilo burukuk.—Ais. 11:6-9.
4 Jej kwalok ad kõnan bwe jen armij ro an Ailiñ in Anij ikijen wãwen ad mour. Ennan in Ailiñ eo ej aikwij jelet aolepen wãwen mour eo ad, ekoba mejenkajjik ko ad im men ko jej kõlajraki einwõt raorõktata ilo ad mour. Ñan wanjoñok, meñe ewõr eddo eo ñan kabwe aikwij ko an family eo ad, jejjab kõtlok bwe inebata ko lor kanniek ren kautameik men ko an Ailiñ eo. (Mat. 13:22; 1 Tim. 5:8) Jen an eindein, jej aikwij bokake nan in kakabilek eo an Jesus: “A komin bukot mokta ailiñ in Anij, im kwojarjar eo An; im naj koorlok men kein [aikwij ko lor kanniek an mour] ñõn kom.”—Mat. 6:33.
5 Eaorõk bwe armij ren roñjake im jerbale ennan in Ailiñ eo ke ej wõr wõt ien. Jen jibañ ir bwe en eindein air kõmmane ilo ad “kameleleik im karel kin men ko an ailiñ in Anij.”—Jerbal 19:8.