Kuktok Ibben Don ñan Nebar Jehovah
1. Ta unin tel in convention eo, im etke Jehovah ej tellokin bõk nebar eo ad?
1 Jehovah e kajur bõtata, meletlet eo an ellã jen maroñ bukõte, ekajet jimwe eo an ewãnik, im ej jutak kin yokwe. Einwõt Ri Kõmanman eo, Ri Letok Mour, im Iroij Bõtata Ijoko otemjej ilañ im ilal, e wõt ej tellokin bõk kabuñ eo ad. (Sam 36:9; Rev. 4:11; 15:3, 4) “Kaibujuij Anij” District Convention eo ad ilo September enaj kakajurlok bebe eo ad ñan nebar e einwõt Anij eo wõt emol.—Sam 86:8-10.
2. Ewi wãwen karõk ko remõn renaj kamaroñ kij ñan bõk tokjen eo elaptata?
2 Karõk ko Remõn Rej Men in Aikwij: Kõmman bwe en mejenkajjik eo am ñan mõkajtok ñan jikin convention eo kajjojo ran. Men in enaj kamaroñ yuk ñan bed ilo jea eo am mokta jen al in kabellok eo im enaj jibañ yuk bwe en emõn lemnak eo am ñan bõk nan in katak ko renaj kwaloki. Kejam ko renaj bellok ilo 8:00 a.m. kajjojo ran. Joij im jab kejbãrok jea ko ijellokin ko ñan family eo am ak ro rar uwe ibbam.
3. Etke rej rejañ kij aolep ñan bõktok kijed mõñã in raelep ñan convention eo?
3 Kimij rejañ bwe aolep ren bõktok kijeir mõñã in raelep jen air etal jen jikin convention eo ñan wia kijeir. Ilo am jerbal ekkar ñan karõk in enaj jibañ ñan kowõnmanlok juõn mejatoto in ainemõn im kabellok ien ñan am kamao ibben ri tõmak ro mõttam.—Sam 133:1-3.
4. (a) Ewi wãwen jemaroñ jino keboje buruõd ñan convention eo? (b) Ta eo emaroñ jibañ kij ñan kejbãrok ad lemnakelok program eo? (Lale box eo.)
4 Roñjake im Katak: Ezra ear mol an keboje buruen ñan bõk nan eo an Anij. (Ezra 7:10) Ear lelok buruen ñan katak ko an Jehovah. (Ken. 2:2) Mokta jen ad etal jen mweo jemaroñ jino keboje buruõd ñan convention eo ilo ad kalmenlokjen kin unin tel in convention eo im bwebwenato kake ibben family eo ad. Ilo ien convention eo, nan in rejañ ko ilo box eo emaroñ jibañ kij ñan kakõmanmanlok ad kalmenlokjen.
5. Etke eaorõk bwe baotokid en erreo im karbõb?
5 Erreo im Kwon: Baotokid en kwalok kien ko an Anij eo ad, eo ej erreo im kwon. (1 Kor. 14:33; 2 Kor. 7:1) Enbwinid, kol in bõrad, akki in peid ren erreo, im baotokid en karbõb. Ekkã an armij jabde ilo baotokiir ilo ran kein. Bõtab, meñe juõn armij eo ebuñbuñ ilo kõmman pija ko ak juõn ri ikkure ej jabde ilo baotokin ejjab melelen bwe juõn Ri Christian ej aikwij kõmman eindein. Elañe jej lor men ko rebuñbuñ, enaj bin an armij lo oktak eo ikõtan ro rej karejar ñan Anij im ro rejjab.—Mal. 3:18.
6. Ewi wãwen jemaroñ kõmman bwe baotokid en errã ibben kakabilek eo jemaroñ loe ilo 1 Timote 2:9, 10?
6 Nuknuk ko Me Rekkar ñan Christian Ri Karejar ro: Ke ri jilek Paul ear jeje ñan Christian overseer eo Timothy, ear rejañ bwe “kõra ren kõnõk nuknuk ko re karbõp, im ren kõkõmõnmwin im jejairunoij, . . . A (eo ekar ñõn kõra ro rej kwalok air tõmak) kin air jerbal remõn.” (1 Tim. 2:9, 10) Ñan kõmman bwe nuknuk ko ad ren karbõb jej aikwij lukkun lemnak kake. Nuknuk ko ren karbõb, erreo, im kwalok ad ettã buru—jab kwalok juõn buru ejua im jab kareel armij ñan kõmman mour etton.—1 Pit. 3:3.
7, 8. Nuknuk im baotokid rekarbõb remaroñ jelet ro jet ilo wãwen et?
7 Einwõt juõn ettõñdikdik ejoij ej kakõmanmanlok turin mejed, eindein nuknuk im baotokid rekarbõb renaj kautiej ennan eo jej bõkto-bõktak im dolul eo jej jutak kake. Jet ro rej kalimjek kij ilo “Kaibujuij Anij” District Convention ko ilo yiõ in remaroñ emmakit ñan kajitõk kin etke jej einjuõn jen ro jet im eliktata remaroñ ba “Kim naj ilok ibbemi lok, bwe kim ar roñ bwe Anij ej bed ibbemi.” (Zech. 8:23) Kij kajjojo jen kwalok ad kautiej Jehovah ikijen nuknuk ko ad im baotokid.
8 Emol jej reimanlok ñan kuktok ibben don ñan nebar Jehovah! Jen bebe ñan kaibujuij e ilo ad bed ilo aolepen program eo, ilo ad lukkun roñjake, im ilo ad jerbale ta eo jej katak.—Dut. 31:12.
[Box eo ilo peij 5]
Roñjake ilo Convention ko
▪ Lemnak kin unin tel in katak ko
▪ Lale eon ko
▪ Jeje kamelele ko rekadu
▪ Kakõlleik point ko kwonaj jerbali
▪ Elij ta ko kwar katak kaki