Box In Kajitõk

◼ Ewi wãwen jen kõmmani jerbal ko ilo congregation eo?

Jibadbad ko reburukuk rej walok ilo an emõn an jerbal congregation eo an armij ro an Jehovah. (1 Kor. 14:33, 40) Lemnak kin ta ko ej kitibuji ñan kõmmane juõn wõt kwelok an congregation eo. Ijellokin air keboje program eo, elõñ jerbal ko brother im sister ro rej aikwij kõmmani mokta im elikin kwelok eo. Jerbal ko jet me rejjab alikar an ro jet loi raorõk bareinwõt. Ewi wãwen kij kajjojo jemaroñ bõk kunad ilo karõk in?

Lelok Kwe Make. Ro ewõr juõn jitõb in mõnõnõ ibbeir renaj lo elõñ men ko remaroñ kõmmani. (Sam 110:3) Kwalok am itoklimo kin ro renañinmij im ro reritto. Lelok jibañ ñan karreo Kingdom Hall eo. Elõñ men ko jemaroñ kõmmani ilo air jab aikwij kajitõk bwe jen kõmmani. Ej aikwij wõr juõn ad kõnan ñan jibañ.

Jerbal ilo ettã buru. Armij ro ettã burueir rej mõnõnõ in karejar ñan ro jet. (Luk 9:48) Ettã buru enaj debij kij jen ad bõk eddo ko elaplok jen ad maroñe. Bareinwõt, ettã buru enaj kejbãrok kij jen ad ele jen maroñ eo ad.​—Ken. 11:2.

Kwon tiljek. Kar rejañ Moses ñan kãlet “man ro remol” ñan bõk eddo ko ilo Israel eo etto. (Ex. 18:21) Jej aikwij kaddeklok ejja kadkad in wõt rainin. Kwon tiljek in lolorjake kajjojo jerbal kwoj bõke. (Luk 16:10) Elañe kwojjab maroñ kõmmane juõn jerbal, kwon kõmman karõk ko rekkar bwe bar juõn en kõmmane ñe kwoj jako.

Kõmman joñan wõt am maroñ. Rej rejañ Ri Christian ro ñan jerbal kin aolepen burueir meñe kin men ko an lal in. (Kol. 3:22-24) Ewõr juõn un elaplok ñan kõmmane elañe kwoj jerbal ñan kowõnmanlok kabuñ eo emol. Meñe ej juõn jerbal ettã ak edik tokjen, ej juõn jerammõn ñan congregation eo elañe ej emõn an kõmmane.

Kajjojo jerbal ej letok ñan kij juõn ien emõn ñan kwalok yokwe eo ad ñan Jehovah im ñan ro jeid im jatid. (Mat. 22:37-39) Jen lolorjake ilo tiljek jabdewõt jerbal ko rej litoki ñan kij.